summer133hk's Profile

今日難得有一日me time，於是一瞓醒起身就過澳門搵食。一過關第一站即刻搭巴士去goat bakers，之前三次過黎想試佢個花杯子都食唔到，知道佢喺官也街附近開咗分店，於是就過嚟試下~今次過到嚟終於俾我買到佢嘅花杯子，第一時間買咗兩個 (一個原味奶酪花杯子，一個抹茶味花杯子)，一到手即刻坐低食抹茶味花杯子，個層皮又鬆化又香。一啖咬落去仲食到抹茶的甘味，作為一個抹茶控係十分驚喜，之後慢慢食落去仲食到淡淡嘅奶酪味，十分有層次。之後個奶酪花杯子打算今晚返到屋企先食，問過店員建議可以放入雪櫃，於是今晚甜品又有著落。…Read More

入黎大埔真係好多嘢想買，好多時尾站都一定係黎榕基買鹵水斬料返屋企加餸，我哋全屋人都好鍾意食佢嘅鹵水，一來佢啲鹵水好入味但係味道又唔會太濃，二來就係次次食完佢啲鹵水，都唔會發喝。於是今次臨走嘅時候又去榕基買滷水，每次去買嘅目標都好清晰，都唔使點樣喺門口睇餐牌就可以直接入去點外賣，今次買咗鹵水鵝片例牌，幾隻鵝頸，四兩墨魚同四兩鵝腸。我好欣賞佢啲墨魚同鵝腸係可以段兩咁樣買(二兩起)，咁令到我可以每樣買少少買多幾款唔同的滷水。返到屋企一打開已經係問到好香嘅鹵水味，每次拎外賣嘅時候店員都好細心會同我講解，返到屋企未食住可以將啲鵝片放入雪櫃，臨食前一小時拎返出嚟室溫等佢自動解凍就可以，再將鹵水汁加熱直接淋面就可以食用，咁樣鵝片嘅肉質依然可以保持得好好。…Read More

忙咗一整日，夜晚得自己一個人食飯，諗住簡簡單單買盒燒味飯就算，心諗雖然係食飯盒不如對自己好少少，於是就去旺角熟食市場，買好耐都冇食過嘅海南雞飯~可能由於係夜晚食飯時間，一上到去熟食市場已經係人山人海，喺度心大心細食啲咩嘅時候，由於太多人嘅關係，驚再諗要等好耐，於是即刻去買海南雞飯，行到去已經有幾個人係前面買緊外賣，等咗一陣就到我，本來諗住買盒海南雞飯就算，但係隔住塊玻璃望見啲串燒真係好吸引，於是二話不說即刻加多條司華力腸，買返屋企慢慢食。返到屋企一打開，條司華力腸仲係熱，加上佢嘅孜然粉真係好好食，好快食咗條司華力腸打開個海南雞飯，賣相經已唔錯，一食落去海南雞嘅肉質又滑又淋，加上佢個醬汁又好惹味，真係好好餸飯~…Read More

今日入嚟大埔除咗飲茶之外，其中最主要嘅一個目的就係黎滑嘟嘟，喺我心目中佢嘅客家糍粑絕對稱得上大埔名物必買手信之一。如果唔係因為住得遠嘅關係，我真係每個禮拜買一次都可以嘅。飲咗茶行過嚟大概十一點四十五分，坐喺度等一陣大概十二點正準時開門，一到十二點就見到姐姐喺度開始整客家糍粑，見佢搓糍粑嘅時候已經感覺到嗰種軟熟，毫不猶豫買咗兩盒(六粒)。我喜愛佢個花生芝麻餡唔會太甜，食落去好純天然，而且一粒粒好有口感。由於個人喜好嘅關係，特別叫咗兩粒係冇餡嘅，因為佢個皮實在非常之軟熟，縱然冇餡料喺入面都好好食，絕對係值得一試~…Read More

瞓唔著一早醒咗，難得今日放假又冇特別嘢做，諗起好耐冇食過點心，第一時間諗起西環新興同大埔林記，由於太懶唔想過海嘅關係，於是就坐巴士入大埔飲返個早茶。差唔多十一點嚟到大埔熟食中心，行去林記已經見到人山人海，好彩我得自己一個人好快就搵到個位先，一坐低即刻叫姐姐開返壼香片，嘆茶真係最緊要啲水夠熱，水滾就真係茶靚。即刻叫咗三籠點心醫返個肚先，蝦餃，燒賣同雞扎，真係去飲茶必叫嘅點心。燒賣啖啖肉足料，蝦餃皮薄，雞扎勁大舊，真係同細個飲茶食嘅點心一模一樣，食飽唔夠喉加多個山竹牛肉，真係飽到捧住個肚走~…Read More

近排天氣轉黎轉去，攪到有兩聲咳同喉嚨乾，於是諗起今晚不如去一意飲返個燉湯潤一潤先~由於佢座位有限，我諗最多應該坐唔到20個人，所以諗住今晚去到應該要等位，好好彩去到剛剛有枱客走，所以唔使等就可以直接入去~由於佢啲點心同部分小菜都係即叫即蒸，需要時間等候，所以一坐低就先點咗個咖哩魷魚同鳳爪先，咖哩魷魚真係送飯一流，所以每次都會必點。本來打算食金華火腿蛋餃蒸雞，但係可惜又係冇曬蛋餃所以食唔到，於是就叫咗金針雲耳蒸雞沙鍋飯。之前試過佢豉汁蒸鱔好大碟，今次就試下麵豉普寧醬汁配大眼雞，大眼雞配普寧醬真係絕配，肉質夠實唔散，配上鹹鹹哋嘅普寧醬，真係兩煲飯都食得曬。…Read More

好想食日本嘢，醒起好耐冇嚟過焱丸食，於是特登訂位再嚟食之前食鮑魚好新鮮，於是今日再次食燒鮑魚，鮑魚好新鮮又大隻。喺等嘢食嘅過程中叫咗杯檸檬可樂威士忌highball，杯嘢好明顯飲到威士忌味，絕對唔係飲緊檸檬可樂咁hea，非常足料。叫咗兩款刺身，非常新鮮，三文魚刺身切成一條條狀令到口感更加豐富。不過最驚喜都係紫菜魷魚鬚天婦羅，香脆得嚟又唔會覺得好油膩，最重要係仲要食得出紫菜味， 絕對唔係純粹裝飾，口感非常突出。最後食埋凍嘅蕎麥麵作為今晚晚餐嘅結尾。除咗飽到上心口之外食物質素仲要不錯。絕對值得再返嚟食…Read More

見到好多人都話民豐個開心果糯米糍好食，縱然今日落住雨都行去買嚟食。一去到已經見到一條長長嘅人龍，一直看不見盡頭，排喺我前面嘅女士講，佢今日中午經過嘅時候見到條人龍仲長，我聽完之後不禁心諗開心果糯米糍嘅威力真係咁大。之後足足排咗45分鐘先排到，喺排緊隊嘅途中， 一個類似少店主嘅人出嚟叫大家放心，話而家排緊隊嘅人一定會買到糯米糍，因為師傅喺入面不停包緊，叫大家放心等候。等咗45分鐘終於等到，二話不說即刻買咗芝麻， 榛子，開心果三款唔同嘅味道各兩粒，買嘅時候姐姐仲千叮萬囑記得要係今日食用，因為隔咗一日就會好硬變得唔好食。於是一番到屋企即刻打開嚟食，個皮軟熟得嚟又有糯米香，加上淡淡嘅開心果碎香味，真係相得益彰，難怪喺排緊隊嘅時候聽少店主講，自從佢研發咗開心果味之後就日日都畀佢阿媽鬧，因為生意大好令到店舖嘅工作量大增😂…Read More

朋友就嚟移民去外國，於是約出嚟喺佢飛之前食返餐好嘅，太耐冇食過燒肉喇，所以第一時間就約咗去海之戀間牛繁食晏~ 由於一早訂咗位，所以就好快地安排入座。環境寬敞舒適又有日本feel，趁朋友未到嘅時候睇下menu先，發覺佢lunch一人燒肉 set都有好多選擇，多款唔同種類嘅肉類和重量選擇，絕對可以根據個人口味和食量去揀由於太多選擇嘅關係，同朋友一人點咗一個set之餘，仲散點咗一些肉類，由於價錢唔高所以可以試多幾款不同種類嘅肉，牛胸花同牛肩胛片都好有牛味，就算唔使點任何汁醬都好好食。另外元氣牛小排肉質又淋又juicy，真係食唔停口試過一次之後發覺絕對可以再嚟食，因為性價比真係高。…Read More

放假唔想出咁遠，於是近近地喺附近食晚飯，突然醒起好耐冇去過醉潮館食，好掛住佢個蒸魚片，於是即刻過去 walk in睇下有冇位。由於太過即興冇訂位嘅關係，喺門口坐在一陣就好快安排可以入座。一坐低第一時間就即刻落咗個薑蔥蒜蓉蒸鯇魚片先，幾乎每次嚟親都會叫呢碟餸，除咗本身自己鍾意食鯇魚片之外，佢嘅煮法亦都非常之好，用少少蒜蓉去蒸提出鯇魚個鮮味之餘，又唔會喧賓奪主。另外點咗個鐵板鮮魷盤龍茄，一落台真係大碟到非常之誇張，熱辣辣又淋嘅茄子配上茄子出奇地襯，真係餸到兩碗白飯~實在有太多嘢想食所以叫到一枱都係餸，最後食到飽到上心口咁走~…Read More

放假可以瞓到自然醒真係一件好幸福嘅事。起身當然想飲返杯靚嘅咖啡去醒醒神，於是就第一時間去return Coffee 嘆返杯靚咖啡。之前見佢門口個牌寫住有Ice Coconut Latte， 今日終於有機會試到~ 椰汁味好fresh，同杯咖啡的味道好平衡，唔會搶咗咖啡豆嘅味道之餘仲帶出陣陣嘅椰子香。由於未食嘢嘅關係，所以點咗個carbonara食， creamy得嚟又唔會好滯，個意粉煮得剛剛好， 唔會太淋或者太硬。最後點多個New York cheesecake作為今日lunch嘅結尾，真係非常滿足…Read More