Fabio Raul's Profile

呢間鋪頭啱啱新開左一個禮拜，叫點天下，就喺南豐紗廠中間位對住樓梯上一層。果日帶狗狗玩左大半日好攰，見到門口個餐牌，毫不猶豫就入去試下，重點係狗狗可以同你一齊坐低打邊爐。每人先$168仲要冇加一，而且食材非常新鮮，有鮮牛肉、滑雞、海蝦、生蠔、貴紀蚌⋯⋯全部材料都好新鮮，飲品都係自家製作出品，唔係一般溝水溝浠嘅飲料，如果正價，我覺得平極都要3、400蚊，所以真心抵食，唔係亂吹，嘿嘿⋯⋯下次再帶狗狗過去一定要再食！…Read More

之前食過好幾次嘅小店，性價比超高，座位不多，但環境舒適，光猛寧靜。今次叫左個雜錦壽司Set，另外叫一份天婦羅炸蝦，份量啱啱好！埋單都只係200蚊有找。下次如果興致好又唔趕時間的話，可以試吓午餐Omakase，午餐廚師發辦都只係500幾蚊一位，下次一定要試試！…Read More

話說好日都唔去鰂魚涌，早幾日去到等人，冇地方好去，行過M6冰室，即管入去試吓。𥚃面呀姐好nice咁問我食乜。我點左呢個雞髀公仔麵茶餐。雖然一份普通茶餐好難衡量有幾好味，但係雞髀係入味，面係彈下彈下，我覺得已經足夠，最重要係坐得舒服，唔催你食完好走。結果我有一個幾唔錯嘅小時光。…Read More

話說喺新世紀睇完早場同老婆、外母飲茶，然後去咗北京樓排隊等位。等左大約半個鐘頭就有位，坐低之後見到有個片皮鴨二人餐幾抵食就試下。第一道先上個沙律，好似有啲格格不入，但係食鴨咁肥膩嘅食物之前黎啲素食都唔錯。第二道係個時菜鮮魚𡙡，略有啲鹹，但係個人偏好稍為重味啲都可以接受。第三道係宮爆蝦球，蝦球炸漿好脆，肉質爽口，配上咕嚕汁，好開胃。第四道係主菜片皮鴨，皮脆肉嫩，雖然片得偏薄，略為凍左啲啲，但係作為二人餐份量絕對足夠，若然要挑的話，反而覺得塊粉皮唔夠熱同太薄。第五道係蟹粉小籠包，中規中矩，係好味，必須趁熱食。第六道再黎碗拌麵，呢個面唔係難食，但基本上唔洗食，因為已經好飽。最後一道甜品係椰汁糕。作為二人餐黎講，係非常抵食，其實四位都夠食，而且上菜速度好快。你未食完一道，下一道已經送到上枱。特別一讚係，旺角店嘅侍應都好有禮貌，令食客有賓至如歸嘅感覺。想食片皮鴨的話，可以放假早啲去試吓。…Read More

幾年前已經食過波記叉燒、油雞燒鵝，一試永世難忘。一直都知道係好食靠得住嘅燒臘飯店，琴日突然想食，所以今日食晏專登喺中環搭車入去西環食。一落車見到人龍排到隔離兩個鋪位，非常墟冚！原來主要都係Kong U學生黎食晏。等左大約20分鐘，終於有位坐。我哋叫左個叉鵝瀨同肥叉油雞飯。肥叉睇落去脂肪同肉分佈相當均勻，而個叉燒汁應該係有落到蜜糖，甜得嚟唔會涸口，果然咬落去口感非常豐富，至於個油雞，係凍左少少，有啲海南雞feel，但係好好彩地個部位係雞髀，所以口感滑到不得了，重點係呀波叔（同佢唔熟，暫時尊稱）將件雞肉下面啲骨起晒，令食客可以安心食用，呢啲咪就係級數囉，呢啲咪就係心思囉。至於個燒鵝，皮脆肉香，唔洗酸甜醬都可以食哂佢。以呢個價錢俾到咁嘅質素，形同派錢。我哋見到後面個肥仔學生一個人食完一碟又再嗌一碟自己食，好食嘅程度已經唔洗再講落去。企門口等20分鐘絕對更加顯示到佢有幾值得去食。其實相信大家都知道波記根本唔需要人幫手寫好食評，因為佢已經做起左個口啤。而且佢哋唔需要做大佢，因為已經非常忙碌。不過好就要寫好，唔好就要寫唔好，今日終於落手寫一個歌頌式食評，都係為咗表揚波叔、波哥、波姐、波妹（同佢唔熟，暫時尊稱），佢哋默默耕耘付出，以非常平民價錢貢獻左附近街坊、Kong U學生，單係呢樣野，已經值得廣大支持，香港飲食界絕對需要呢類食店，小弟僅此致謝！一個亂世小書僮上。…Read More

上星期專程去美荷樓行手作市集。發現美荷樓後方有一間cafe，見到玻璃櫃擺放左芒果椰汁糯米糍窩夫同Baileys糯米糍窩夫模型。毫不猶豫，即刻入去食，相信好多人被佢個糯米飯窩夫吸引左入去。如果每一間餐廳都有鎮店之寶，呢個糯米飯窩夫一定係當仁不讓。品嚐甜品之前，仲叫左個煙肉法包，味道不俗。製作食物速度都算快，見到實物就更加期待佢有幾好味道。首先外表好立體，有種抵食夾大件嘅感覺，二來，第二度好似未見過呢款食物。味道方面，係好食嘅。但係嚴格黎講，要挑剔都仲可以有少少建議：個窩夫如果可以再熱啲再鬆脆啲，口感一定更好。芒果雪得太硬，冇左芒果肉嘅口感。椰汁可以再重手少少咁多。咁成件事就會更加豐富！基本上，食呢個作品係有開心嘅感覺，單憑呢個驚喜就已經值回票價，而且價錢都係大眾消費。下次經過，一定會食埋個Baileys糯米飯！…Read More

太太講咗好耐，想食個貝果，星期日終於有時間去試呢間 Cafe。聞說略有名氣，即管試試。佢係一間寵物友善餐廳，可以帶狗狗入去。下午一點半左右，我地等左兩個鐘終於到我地入去。我地排隊叫野食，然後今日嘅貝果賣晒，當刻第一反應著左。喺失望之下，之後叫左個波蘿包、熱狗、Dear Fizz、Hojicha Latte。評心而論，野食不過不失，但果刻感覺係無癮，個人認為餐廳賣晒啲嘢，唔緊要，起碼應該同店外排隊食客告知一下，等人地唔好呆等。未必個個人為飲杯野排兩個鐘頭。再望下隔離左右枱，個個都係清一色食波蘿包⋯⋯最後強烈建議，一係你好早黎，一係你唔介意排兩個鐘隊。…Read More