foodlover_2019's Profile

第一次黎奧海城food court食飯，行左一轉見啲餐廳都好普通，所以揀左呢間特別少少主打蕃茄湯底的鋪頭。望落賣相唔錯，首先試左啖湯，蕃茄味好濃郁，完全唔係味精湯，淨係湯底已經誠意十足。另外個蛋都幾滑，螺絲粉索哂啲湯，但又唔會浸到淋哂。雞肉同螺絲粉的份量都算多，好滿足的一餐。…Read More

係ig見過唔少人推介呢間鋪頭，今日終於有機會黎試下。今晚六點幾黎到唔駛等位就入得，店鋪唔大，當晚所見的食客大部分都係一家大細黎食，主要做街坊生意。一場黎到一定要試下佢地最出名的蜜汁叉燒，一上枱就比佢吸引住，色澤好靚，仲有少少燶邊，而且叉燒的肥瘦比例岩岩好，食落好淋身，配飯食一流唯一要挑剔既係蜜汁少左啲，甜味唔夠。跟餐仲有碗無味精的住家老火湯，當晚的湯係老黃瓜赤小豆扁豆豬骨湯，碗湯落足料，仲可以解下燒味的油膩。另外我地仲叫左份例牌燒鴨，望落個皮燒得幾靚，不過食落就唔夠香同唔夠脆，而且偏咸，相比起叉燒就失色不少。最後仲叫左碟冷盤，話梅涼瓜真係第一次食，涼瓜片好脆，但我覺得話梅味太重，無哂苦味，搶走左涼瓜本身的味道。…Read More

話說同事們食完之後贊不絕口，於是就帶左鐘意食辣野既我黎試下。午餐的選擇都幾多，而且價錢適中，所以吸引到唔少返工人士黎食lunch。今次叫左個酸菜魚飯，小辣。呢碗酸菜魚以一人份量黎講算係誠意十足，比足料，而且呢度係用生魚黎煮，食落完全無骨，肉質都幾滑溜。雖然湯底飲落有啲辣，但魚同酸菜食落只係微辣帶少少麻，配飯食一流不過小辣就真係未必滿足到鐘意食辣的朋友，下次可以直接叫中辣。另外試左同事叫的水煮牛肉都好有水準，下次要再黎食…Read More

平時都幾鐘意食牛角，但消費太高，所以今次就食住呢間牛角次男坊解下癮先。今晚差唔多七點黎到已經full哂，不過好快就有位，睇好食咩就去買野食。叫左個最簡單的牛角次男坊丼，雖然無圖片顯示埋得咁高，但都見到啲牛係鋪滿哂成個飯，望落非常吸引呢個牛肉丼係用左美國肩脊肉，簿簿一片，帶少少肥肉，燒得好香但略嫌硬左少少，唔嫩滑。肉同飯中間仲夾左芽菜中和返，令成個飯食落無咁油膩，但個燒肉汁就甜左啲。每個飯仲會跟一碗麵豉湯，食完好滿足…Read More

好耐無食過十勝牛，今晚黎到同以前一樣都係咁多人。蟹子沙律係必點的，大大份，蟹子同沙律醬都比足料，好抵食。個反卷賣相就麻麻地，但食落都唔差，炸蝦都夠脆。燒魷魚賣相幾靚，燒得好香，食落夠彈牙。個炒飯就不過不失，都炒得幾香口。相反個烏冬就差啲，食落無咩味，而且有啲油。最後仲叫多左個墨魚咀過下口癮，岩岩炸好熱辣辣，脆卜卜，唔錯。雖然呢間餐廳的食物質素麻麻地，但始終係做街坊生意，價格唔貴，所以仍然吸引到好多人黎食。…Read More

突然好想食德國豬手，於是就係openrice搵到呢間德國餐廳。今晚黎到見到客人比較少，我地本身都有啲擔心。睇完menu都係覺得叫餐最抵食，所以就叫左個dinner set for 2。跟餐叫左杯hoegaarden rosee，飲啤酒就梗係要食栗米片，但個蕃茄醬汁的調味就怪怪地。腸仔就正正常常，點埋醬都幾好味。最後就輪到今晚的主角-德國鹹豬手。隻豬手好大份，已經起哂骨，方便食用。豬手的皮非常脆，雖然肉就硬左少少，但整體都算唔錯。不過呢度的酸菜就真係麻麻地。…Read More

每次黎到荃灣廣場都見到呢間餐廳出面排哂長龍，今晚終於有機會試下。枱面擺左個牌話你知點樣調教塊扒的生熟程度，另外仲擺左啲圍裙比客人用，頗貼心。另外佢地仲做緊$29兩隻帆立貝的promotion，幾抵食，但要叫300g牛扒先可以order，所以我地就無試到。今次叫左澳洲肉眼扒，上枱時切開岩岩好係三成熟，食落肉質正常，但肉味唔算重，以呢個價錢黎講都唔可以有太大的期望。配菜份量好多，食完都幾飽。…Read More

今日係大角咀做完運動，朋友帶左我黎呢間小店食東北菜。天氣太熱叫返個涼拌小菜就最適合不過，白菜絲非常爽脆，加埋啲酸酸地的汁，好開胃，仲好大碟。紅油抄手有10隻咁多，一啖一隻，不過食落味道偏淡，如果再辣啲會更好。炸醬面同我地平時食開個啲好唔同，醬汁甜啲，加埋啲蔬菜絲撈埋一齊食，食落無咁濃味，麵都幾有咬口。…Read More

陳漢記係大埔好出名的街坊食店，今晚六點幾黎到已經見到鋪內坐左一大半人。當晚見到唔少人叫煲仔飯，但我地想食得清淡啲，所以只係叫左粥同腸粉。粥底係偏稀，食落都幾綿，內臟的份量都多。另外仲落左好多薑絲同蒜頭，可以辟味之餘仲令碗粥更加香。黎到陳漢記一定要試下佢地最出名的玻璃腸粉，今次叫左豬潤腸，好足料，豬潤的份量多到撐爆左條腸。腸粉皮好薄好滑，點埋豉油確實係幾好味。不過腸粉就偏細條，要叫多幾碟先夠😅下次有機會要試埋佢地的煲仔飯。…Read More

第一次黎食Jollibee，荃灣呢間分店鋪位好大，好寬落，坐得幾舒服。餐牌選擇唔多，最後我地叫左個$99二人餐， 望落好豐富。之前見好多人都話jollibee的炸雞比KFC好食，第一次食發現佢的炸雞確實係比較juicy，層皮比較脆，個雞醬都幾惹味，整體都算唔錯。意粉就麻麻地，個醬好咸，啲腸仔好淋，唔係我地平時食開的腸仔。最後仲有個蜜桃批做甜品。個批淋左，唔脆，入面的醬亦唔好食，同麥當勞的蘋果批差太遠。…Read More

見好多人介紹呢間餐廳，於是就bk左食生日飯。呢度的環境氣氛一流，當晚都見到好多情侶一齊黎食飯，不過張枱就細左少少。睇完餐牌我地決定叫set dinner。前菜有蘑菇湯同沙律。個湯好香，不過旁邊塊包就硬左少少，唔夠脆。今晚的主角就係呢塊必叫的安格斯肉眼扒。切開色澤唔錯，確實係medium rare，肉質幾好，但表面煎得唔夠香，有啲失望。相反個薯蓉就好好味魚柳望落無咩特別，但原來外層煎得好香口之餘，裡面的魚肉仲keep到好嫩滑，有驚喜最後食埋甜品份量剛剛好。…Read More

今日黎到荃灣同朋友慶祝生日。平時經過beans都見到好多人，今日我地下午茶時間黎到都排左一陣先有位。呢個意粉係必食之一，蟹肉份量好多，個鹹蛋黃醬好出色，同蟹肉好夾，撈埋個意粉一齊食，好味相對地個意大利飯就比較一般。叫餐除左會跟多杯熱飲之外仲可以加$25叫佢地的homemade cakes，款式唔多但每款都好吸引。我地最終揀左個清新啲的lychee lover，雖然荔枝味唔重，但個mousse都算滑，整體唔錯。…Read More

我好鐘意食海南雞飯，成日都周圍搵食，呢間就係同事介紹的。雖然呢間鋪頭主要係食清湯腩，但我睇過評語都麻麻地，所以就只係叫左兩碟海南雞飯。清雞湯充滿住蘿蔔的甜味，清清地幾好飲。雞的份量都幾多，已經去哂骨，雞皮都算爽，食落唔肥膩。飯底就無特別，普通油飯。個綠綠地色的醬汁係整個飯的精髓，好快比我點哂，下次要多醬先得。當晚見到的客人大部分都係點海南雞飯，睇黎真係幾受歡迎。雖然呢間的海南雞飯未算係食過最好味，但整體上都算唔錯，可以再食。…Read More

今日一場黎到大坑就梗係要去試下出名的滑蛋叉燒飯。餐廳位於一條小街裡面，遠處已經見到長長的人龍。可惜我地個日太遲去到，排隊時先發現佢地只係開到晏晝4點，入到去叉燒已經賣哂，所以叫左另一款都好多人叫的滑蛋蝦仁飯。我地算係好好彩，因為我地坐左陣其他野食都開始陸續賣哂。滑蛋飯的賣相非常好，份量都算多，試左一啖滑蛋果然無失望，再撈埋啲豉油，好味蝦仁大隻又夠爽，加埋杯凍朱古力，好飽好滿足不過成個飯都只係微溫，如果可以熱啲就更加好。下次真係要早啲黎試埋佢個叉燒。…Read More

太耐無黎銅鑼灣，原來榮式雞扒搬左鋪位，裝修都唔同哂，鋪位大左，亦都坐得舒服左。今晚食飯時間黎到即刻有位，入到去見到大部分都係遊客慕名前來。餐牌加多左插圖介紹食物，但入面的款式都係一樣，所以二話不說就揀左榮式雞扒飯。除左裝修靚左，連上菜的碟都換埋，望落兩大塊雞扒確實係幾吸引。不過我一向覺得榮式的雞扒無咩特別，比較薄身，偏咸，配菜份量亦偏少。雖然味道上吸引唔到我，但可以係市區用呢個價錢食到咁大碟飯已經算好抵。…Read More