Sakura Sakura's Profile

食好野前當然開個OPENRICE睇睇有咩推薦菜式先？可能當時食店好新所以一個食評都未有。朋友試過話唔錯，我又大膽一行八人去，多人就試更多唔同菜式。當晚氣溫得9度左右係樓下有位男職員派緊傳單，佩服咁凍仲可以保持住笑容工作！我就凍到手都僵…先嚟一張食物大合照之後續一介紹！朋友係銅鑼灣區工作，試過後就推薦我到渣甸中心九樓試下新野，由於我唔係附近工作只能有機會試晚餐。之後我都有幫襯幾次，睇住間鋪人流越來越多開業一個月左右某個星期五晚接近爆場。環境+服務如果無朋友帶我去未必知餐廳位置！上到樓估計係女店主，佢好貼心為我地2人先送上溫熱水，估計當晚星期一加上新開食店人流唔多有包場Feel！門口望落有d似日式佈置，又有台灣文青風格。佢道玻璃門有少少重要幾用力先推得郁，入到去仲聞到少少裝修味。第一感覺似去咗樓上Café，裝修清簡到好似咩佈置都未有，燈光充足照落張雲石色枱感覺高雅唔浮誇，啲座位距離有空間感，我好怕坐到好迫好彩佢無呢種感覺。因為OPENRICE未有佢食評，唯有問下店主有咩好推薦？同店主講聲每人Budget $180內，八人試咗十幾款菜式，佢有幾款菜式係做得特別出眾 ( 之後我都有再去幫襯幾次 ) 我同朋友較鍾情頭幾樣 ：推薦菜式  1. 糯米雞米紙卷 – 糯米煙韌 醬汁必點 2. 酸子雞飯 – 雞脆無骨 酸得好正 多汁更好 3. 薄底薄餅 – 全麥薄批 個人喜好 激似酥皮 芝士香脆 4. 冬蔭功肉醬焗薯角 – 冬蔭功正 薯角香脆 多醬更好5. 水牛城雞翼 – 外脆香口 內裡嫩滑 食落唔膩 6. 燒豬肋骨 – 抵食惹味 多人用餐必選 7. 豬雞串燒 – 沙爹惹味 串燒脆口   8. 巴東牛飯 – 獨特香料 牛肉軟硬適中 每項食物味道及服務‧評分由3星至6星 (個人喜好)因為Openrice入面比4分就會成推薦菜式，部份評分為三點幾分唔代表菜式差，只係有D菜式值6星評分更值推薦比大家。(戴定頭盔先)爽脆沙律菜加手撕烤雞，醬料帶微酸甜再加微辣，有啲複雜同時又帶d刺激感混埋蔬菜雞肉一齊食開胃清新又惹味。好適合做前菜因為醬汁好開胃，可惜係青木瓜可能熟咗少少口感唔夠爽脆，不過佢D醬汁同蝦可補償青木瓜不足。醬汁帶辣惹味係佢上面有D脆花生同蝦米，搗碎後味道更突出，木瓜清新又酸辣令到胃口大開。諗唔到芝士加冬蔭功醬可以咁夾同特別，香茅南薑炒得好香，天然香料氣味直迫上鼻，仲有粒粒肉醬增加整體口感，食落唔油膩，芝士焗得又香又脆，唔會搶走冬蔭功醬味道，其實真係好想食多幾件。店主好細心因為有朋友唔太食辣又唔食蝦，店主將沙律分開上碟，變成一份迷你沙律，好貼心嘅小店。雞肉串燒$78+豬肉串燒$78 各半打 賣相唔係好精緻，但咬落肉汁豐富，外層燒至焦香，食落仲幾香口。沙嗲醬汁提升串燒層次。另外醬內加入花生碎，增加咗咬口。 串燒靈魂果然係濃郁惹味[沙嗲醬]建議食用時，將醬汁直接狠狠倒上面！雞翼未點紅色醬料已經唔錯，外皮香脆！大大隻都非常入味而且肉質都幾嫩滑，撕開時雞翼中間熱到滲煙，食落唔覺油膩，正！加返個紅色醬汁上面，酸酸辣辣但又唔係真好辣，頗為惹味！朋友仔話出面好多雞翼都倒上醬汁，搞到隻脆雞變淋雞，呢道好處可以自己揀落唔落醬，大家食到舔舔脷想再追加！試完真係返唔到轉頭，出面食過都差唔多，唯獨呢間係特別！未點汁時糯米味道清香口感煙韌，入面有爽脆蘿蔔同雞絲，講到佢醬汁好難用文字去形容，香酸甜甘等等複雜味道同時出現，慢慢再滲出香料味，極有刺激感！有機會一定自己試試印象深刻！可能係暫時食過最好食嘅米紙卷！問返店主點解可以比外面買到嘅唔同？店主話用咗三個國家食材同烹調精粹去完成一道米紙卷，印尼傳統食物混合埋越南菜色，再用上泰國醬汁改良而成。落足心機去研究，真係精製手工菜！黑松露平均沾係薄餅上，野菌被烤制過後散發特殊香氣，加上Rocket菜清香不膩人。餅邊幾脆店主介紹話餅底係用全麥造仲要自己搓粉，食落唔覺油膩！我個人較注重係芝士，味濃郁不過好似蓋過咗黑松露陣味？定係之前食嘅味道蓋過黑松露本身？我認對黑松露有D貪心，因為好鐘意陣電油味！可能大家點菜前留意，食野味道要由淡至濃味，下次要先食黑松露Pizza！店主比多一個迷你Pizza我地試分別，都係全麥餅底只係較薄身，上面加新鮮香草Basil，涵料位置就非常煙韌，薄底口感原來都好OK，以為自己食緊酥皮Pizza❤！睇落賣相平凡食落非一般，材料落得足，芝士控朋友就唔可以錯過，我有懷疑過店主係咪用火槍燒D過芝士？點解芝士可以烤得咁脆口！唔覺就食曬成個Pizza，8人分享跟本唔多。2個批嚟講個人較喜歡薄底Pizza。之前從未食過巴東牛肉，問返店主先知其實係咩嚟？運用多種非常複雜印尼專有香料磨碎炒香，再調出濃郁嘅味道，做起嚟相當花時間同功夫。先聞到濃郁香料同微微辣味，入口就慢慢滲出椰香，食落仲有D刺激感，牛肉吸收香料的味道，肉汁有陣陣椰香。少少辣但又唔係好辣，牛肉有咬口質感軟硬適中！呢味菜式出面唔容易食得到，因為太花時間同功夫去整！絕對係一道非常香濃、味道豐富菜式。另外提提白飯口感係米粒分明有彈性，送飯係唔錯選擇！炸雞外層酥脆，食落去無骨！咬落唔覺油膩而且有肉汁，配埋佢個醒胃醬汁，真係不得了！味道幾特別酸子醬汁，食落味道偏甜同時又帶有熱帶水果酸味感，酸中帶甜非常醒胃口提神，幾位朋友食完都有讚無彈！如果多d汁就更好啦朋友食過所以讚呢間Carbonara整得唔錯，本身唔太喜好卡邦尼嘅質感，擔心食完膠住個口，不過食落D忌廉汁唔太濃剛剛好，長通粉煙韌唔痴牙！裡面仲有細塊煙肉同野菌，其實碟長通粉係唔錯，如果份量多少少就更好~燒豬以肋骨部最好味，幾個朋友食飯時share就最開心！肋骨燒得啱啱好而且骨肉比例均稱，肉質唔會太硬同粗澁，煙韌彈牙又易切，朋友仔好搞笑話食完唔痴牙！豬肋骨其實本身都醃得入味但我唔記得個醬咩味？見D朋友起勢咁點碟上D醬，早知請店主拎多少少醬汁。差D唔記得咗講埋旁邊幾份重要配菜！我自己就先食蘆荀(去皮)，平時好少機會食得到，跟住再慢慢嘆埋粒蕃茄，兩樣都唔錯！但薯仔唔知咩時候比朋友拮走咗，所以無試到！整體新鮮蔬菜將肥膩感直線下降。貪心嘅我諗如果佢啲係炸角就會更好…哈哈！當我地以為所有野食晒嘅時候，主店突然拎出一份細細嘅芝士蔬菜捲(晚餐Meun唔覺有)因為同行8人裡面，其中有朋友係唔食雞同牛，店主擔心朋友唔夠野食特別整！呢份精美蔬菜捲，覺得店主超細心真係好加分！我問朋友拎咗半件嚟試，係幾好食！店主再介紹個餅捲係用全麥自己搓出嚟，唔洗怕濟！唔講味道講心意小店優勝。朋友聚餐後點都要食個甜品先算幸福圓滿！間舖未有甜品供應，唯有飲住野先出面得9度天氣唔想周圍行，唔記得咗影Meun (飲品類別未算多) 我同幾個朋友就點咗：菊花杞子蜜、熱凍各一海鹽焦糖意大利鮮奶咖啡、凍朱古力試試！杯野係朋友點一上枱係有個茶袋入住，朋友多手打開咗，因為本身知道呢杯野影相可以呃Like，開咗茶袋杯飲品即時變到靚好，個杯底仲有D蜜糖要搞勻先好飲！以為普通凍朱一望賣相唔錯喎，一杯凍朱有四個唔同顏色，聽到對面位朋友話唔錯，咁我就偷試幾啖，入口好真係Creamy朱古力味唔會嗆喉飲落舒服，杯飲品無叫佢少甜，但好彩真係唔太甜，值得一讚！上面加咗忌廉泡泡，賣相討好，飲多幾啖都唔會有卡住喉嚨嘅感覺，相信佢都係用靚料再加特有技巧沖製！值得搵女店主調製，因為真係比想像中好飲，跟住同朋友傾住計慢慢嘆一個夜晚！齋聽名好難唔揀上手！加上我朋友之前嚟飲過所以我揀佢！先講凍飲賣相真係好精緻，一杯漸變鮮奶咖啡，已經深深吸引住我！唔係好捨得搞勻杯咖啡，微微海鹽焦糖令咖啡味更濃郁入口渾厚，真心覺得值得一試！另外朋友話熱咖啡比凍咖啡更濃味。 總結係…1.  醬汁係店中靈魂2. 食物選擇多元化 (選擇困難者會頭痛)3. 健康路線全麥PIZZA4. 店主服務貼心，製作有心思                                                          5. 銅鑼灣區價錢多人分享特別抵食6. 坐位舒服空間感足夠睇返張收據，店主可能認得我朋友第二次幫親，有部分食物係贈送試食！六男兩女食咗十幾款每人都係$165非常夠飽肚！銅鑼灣食飯要坐得舒服又可以享受食物，其實唔係咁容易搵到個好地方！…Read More

未裝修前都都經常去幫櫬，因為好平味道又唔係太差！但衛生環境就…唔知我黑仔定係點，食食下碗麵有隻昆蟲係入面，因為間舖好細基本D職員都望住我食麵，女職員見到都即時幫我換過一碗，我算熟客差唔多隔日都出現。再有一次係天花板定唔知邊到，比風扇吹咗隻昆蟲落嚟，雖然係又平又抵食but 2次都係我？昆蟲跌入碗都一件事可以稱之為意外，另外隔離枱有個男士叫咗杯豆漿，飲第一啖就通知職員豆漿變酸，其實杯豆漿當時$6，帶眼鏡個男職員指住個客大大聲問「係咪你味覺有問題？」跟住仲口up up閙返個客，個客話要退跟住埋單走，個客都費事同佢嘈，直接埋單走。我有啲同情佢，其實佢鬧客我都唔係第一次見，有時見佢仲有其他語言嚟鬧客，以為人地唔識聽，果次之後我就無再去！ 食評我又唔想比劣，基本每日都好多人幫櫬都超多支持者(因為同區嚟講真係超平)，不過估唔到食野都要講運氣，仲有機會睇職員面色。 …Read More

☝🏻其實我係想比四粒半星星先比大家睇張大合照先，之後我會續一去講。晚餐時間經常路過都見坐滿客人，一直都好想入去試試，有時星期六或日門口仲要排晒長龍，係香港做飲食唔容易，仲要係素食店真係難上難啊基本上有朋友試過話掂，我先大膽於約埋朋友一行8人去試下先！多啲人去就可以試更多唔同菜式我都係睇定Openrice 有咩推薦及食評先點菜，希望無伏。☝🏻菜式平均$60-70 需要白飯就另+$10同行7人都點中湯，清清地應該無落味精唔飲中湯朋友可以選擇檸茶、檸水、奶茶、咖啡類飲品，凍飲+$2☝🏻問下侍應姐姐有咩好推薦？佢推薦咗呢碟「椒鹽素鮮魷」大家見到個樣真係麻麻？加返啲椰菜伴下碟都好，不過味道真係唔錯，超級香口碟野好快被清！ ☝🏻「古法南乳齋煲」同行朋友一人點一餸，鐘意南乳嘅人會好鐘意，送白飯真係無得頂☝🏻「沙爺芥蘭炒素牛肉」我同行嘅朋友話素牛肉質感好正:)我就鐘意啲香脆芥蘭！（記得落單時必叫少油，可能炒嘅關係用油會較多）☝🏻呢個不得了！又靚又好食「沙拉奇妙豆腐」呢碟餸一上枱就哇哇聲「靚」外面香脆，裡面有軟豆腐！口感十足，配埋佢啲醬汁好想偷偷食多粒。☝🏻呢個係睇Openrice網友推薦「黑松露炒雜菌」真係無推薦錯！真係好香松露味，蔬菜又夠新鮮，都係記得下次點菜時，少油！呢碟餸我之後返轉頭食過幾次☝🏻「荷香雲耳蒸素雞」成碟野都有荷葉香，清蒸又少油感覺好一流特別佢啲黑木耳（好似係)好爽脆☝🏻「老干媽鮮竹粒猴頭菇西蘭花煲」名好長...想食新鮮蔬菜所以叫咗呢碟，味道唔多記得係點，但記得西蘭花好新鮮整得好爽脆:)☝🏻「蘿白支竹素羊腩冬菇煲」:)大家都搶啲白蘿蔔嚟食，支竹都唔錯！好入味好適合送白飯。☝🏻最後大家睇睇張單，食得夠飽又開心，同行7位朋友都邊食邊讚朋友介紹係得嘅大家要留意食店只收現金，習慣用咭嘅我都要禁定錢先。我覺得廚師同老闆都花咗唔少心思去整理菜式及醬汁上，價錢亦非常大眾化，見有唔少老人家及一家大小去光顧，唯一坐位比較迫，仲有就係大家點菜時記得叫「少油」！我之後再同朋友去食3456次，發現少油嘅菜式真係仲正（個人意見）多謝收睇❤️…Read More