Reneew87's Profile

說話Café Kool 嘅自助餐，無論港香同九香都食過幾次，但係5星酒店都要出外賣飯盒，應該啲生意都真係差到唔救市唔得。本身老公上網見到啲宣傳係$88，可惜一個唔小心中咗COVID，留喺屋企休息咗一個星期，再出去買已經變咗$128。本著點都要試嘅心態，我老公每款叫咗一個。佢哋個外賣飯盒分咗三款，肉類、海鮮、素食。佢哋網站上面稱之為盲盒，講到明盲盒，即係無指明有咩餸喺入面啦。問過佢哋嘅員工，都話係廚師們喺廚房隨心準備嘅，所以都唔知入面有啲咩喎。（個人覺得係吹㗎啫，說話我問佢肉盒入面嗰個係紅酒燴牛腩？佢係即刻答到我嗰個係牛𦟌嚟嘅😂）總之我哋買完三個飯盒就滿心歡喜歸家去啦。可惜，一打開個盲盒，真係差啲粗口都飛埋出嚟！😂佢個素食盲盒，一打開，一大格放嘅係印度茴香飯，用嚟食咖哩嗰啲。上面細格又真係搭咗一個馬薩拉咖哩，不過唔辣，係有個突出少少嘅蕃茄釀芝士再加啲青椒咁。另外嗰一格係無乜汁嘅紅燒豆腐四條。其實$128買個素嘅咖哩飯我真係無問題。問題在於佢個咖哩得兩啖，佢個飯有一大盒。而茴香飯係乾身啲用黎送咖哩嘅，無咖哩真係唔知點放入口。仲要加一個無汁嘅豆腐，如果我係單點呢個飯，我諗我真係食唔到。去間專門食咖哩嘅舖頭，先唔好講使唔使$128 一盒飯，至少我肯定我兜咖哩汁夠送飯囉😑再講海鮮盲盒，又係一個唔買好過嘅組合。有2件炒蟹（應該係成盒入面最貴嘅餸）、一隻蝦同兩舊魷魚炒嘅荷蘭豆、同一個豉油皇海鮮炒麵。戒口中嘅我，兩件蟹由老公包辦，無聽佢彈，但係都無讚，應該都係正常發揮。荷蘭豆就⋯只能夠講，我估計唔到佢係做中式餸嘅海鮮飯盒，至少都煎舊100克嘅鱸魚吖😮‍💨好啦，係我要求太高🥲個豉油皇炒麵先九唔搭八，仲要啲蝦係一開二，蝦身同蝦尾切開嚟炒嘅（？滿頭問號？？）其實好老實講，呢啲急凍海鮮值幾多錢？計成本都唔使慳到咁，仲要有半盒係個麵，真係多謝晒。雖然佢個豉油皇炒麵係幾香，但真係未搵到$128 嘅價值囉。到最後一個肉盒。唯一覺得值得比$128 食佢嘅一個。首先個牛𦟌份量好充足，調味都唔錯。加埋個炸雞，雖然得幾件，但係都皮薄，凍咗都叫做Juicy。最後係個法式焗薯批，因為本人好鍾意食呢樣嘢，同西餐都夾嘅，係個調味甜咗少少，但都唔太差。據聞佢哋個肉盒係無澱粉質嘅（呢個都係個職員講嘅），但係我哋最終三個盒都有澱粉質。只係肉盒嘅澱粉質份量係最恰當。但真心，無可能叫咩盒佢都比澱粉質我㗎嘛，啲餸嘅份量又少，叫個兩餸飯都無咁嬲。今餐$384 個人就覺得完全唔值，如果有下次，應該會淨係叫肉盒。留多句言比個餐廳，如果你哋希望救市，希望有生客黎捧場，咁你哋呢個外賣盒就應該大方啲，比人試到你哋好食嘅嘢，而唔係比人睇到你咁計較。你哋話有客人反映唔夠飽，唔夠飽唔係用澱粉質塞滿客人個胃，而係啲餸嘅份量應該多少少。你做$88 一個就話無乜利潤啫，你做緊$128 一個喎，你確定應該出半盒白飯比客人？你哋真係當自己$35 兩餸飯咩。評分（5😋滿分，😬為0.5分）：食物：😋😋（啲分全部比個肉盒嘅）環境：😋😋😋😋抵食程度：😋😬 （啲分都係比個肉盒嘅）…Read More

話說早幾日去石門搵食，本身諗住睇吓呢間舖頭，最後入咗第二間餐廳坐低食，所以呢間餐廳就入咗我個Bucket list。到今日，諗住買啲外賣返屋企食，同老公嗱嗱臨揸車過去買咗一盒韓式甜辣炸雞、一盒燒汁洋蔥蘑菇炒意粉同埋一盒流心芋泥丸+地瓜丸+芝士年糕。因為本身冇諗住寫食評，只係自己做飲食日誌，所以求其影咗張相😅相入邊有薯條同雞翼係另一間舖頭嘅，唔關佢事。先講一講佢個甜辣炸雞，個醬教得非常好食，有少少蒜頭香，可惜外賣返到屋企食嘅時候已經唔夠熱，所以就放返入微波爐再叮，變咗外皮比較腍。我估新鮮買黎即刻食會好食好多。但係，個燒汁洋蔥蘑菇炒意粉極之難食。呢一個都係我無端端決定寫食評嘅原因🫠一個完全冇味嘅意粉，唔知點樣炒出嚟。佢應該係贏在非常之大份，跟意粉有少少沙律。但個意粉真係好難食。我哋倒咗半盒🥲張相見到嘅就係我哋倒咗嘅份量🥲（下面張相見到，我哋食甜品，啲意粉都仲喺度😂）呢三樣嘢入邊，有兩樣好食，一樣唔好食。芝士年糕係正常外面食到嘅，味道都算正常地瓜球都叫做Q彈，有地瓜嘅甜味。個流心芋泥丸就唔合格，個芋泥完全冇味，得個奶黃餡有甜味，但係個芋泥好乾、又硬，兩樣嘢溝埋一齊唔好食。總結來講，如果我會再幫襯呢間舖，應該只會食炸雞，其他嘢都唔會再考慮。我都建議老闆專心做好炸雞就算數。評分（5😋滿分，😬為0.5分）：食物：😋😋😋環境：😋😋😋（餐廳應該主力做外賣，有兩個吧枱位可以坐低堂食）抵食程度：😋😋😋😬…Read More

Pici 幫襯過幾次，真係無令人失望。自家製意粉好好食、自家製餐前飽都好好食。幫我哋落單嘅Michael 都好細心，留意到我大肚，提返我哋落嘅甜品Tiramisu 有酒精💯我哋叫咗Set For 2 加飲品。小食叫咗蕃茄醬青口、炸魷魚圈。因為青口嘅蕃茄汁太好食，於是要多咗一袋飽嚟點青口。💗魷魚圈唔係常見嘅大魷魚圈，係細粒嘅，夠脆唔油膩，係有少少太咸，扣咗少少分。意粉叫咗一個辣肉腸貓耳朵同一個8月限定嘅車厘茄大蝦意大利雲吞。呢到嘅意大利雲吞係我so far 食過最好食嘅，入面嘅餡好Juicy、又有口感。最後到甜品，又叫咗8月限定嘅焦糖香蕉Tiramisu🥲呢個有少少失望，原來唔係平時嘅Tiramisu 加焦糖香蕉，而家一杯全新嘅甜品，香蕉Tiramisu。（我太鍾意食原本嘅Tiramisu）甜品總體黎講香蕉味好出，有少少似食緊香蕉雪糕咁，好滑。同埋佢唔係用咖啡酒，係用冧酒，味道都真係幾強勁😬但講到尾，都係原味最好食🤣…Read More

所有嘢都差咁啲😢見到佢推個牛骨髓韓國拉麵鍋，老公話想食上次卜咗最後去唔到，今日再卜過去到放題式咁由我老公點😂火炙左口魚邊卷 $168中規中矩，正常左口魚壽司咁啦上面嘅魚子味道唔重，可能左口魚味搶咗火炙咗都香嘅青紅蘋果絲蟹籽沙律 $98又唔記得影相🙈沙律偏酸醬好足夠，但可能加埋蘋果就酸咗啲155mm 珍寶燒蠔（赤麵豉醬）$88 買一送一夠大隻，可惜蠔同醬係分開，一夾起，得隻蠔，一啲醬都掛唔到入口微腥，咁重醬都遮唔到陣腥味🥲串燒，左起：冬菇 $22大蔥 $22牛肋串 $48牛舌芯 $68白鱔（武士辣醬） $78冬菇燒得太乾，上枱已經無溫度，醬汁味道太重大蔥最尾嗰舊燒唔熟，好辣，外面唔夠香脆，上枱得微溫牛肋串燒得太乾，好似柴皮😂溫暖，但唔熱，椒鹽但太鹹🥲牛舌芯係騷嘅🥲都係溫暖同太鹹，唔香白鱔最失敗，好似焗熟咁嘅，正常白鱔咁好油，好心機燒會好脆但佢做唔到🫣可能呢個有醬，或者係最後燒起，所以得呢個熱嘅🙈如果佢哋想所有串燒一齊上，應該掌握好燒烤嘅時間，啲咁基本嘅嘢都做唔到，點做居酒屋😮‍💨豚肉蒜芯卷 $48（我老公影，係咪好睇好多呢？😂😂😂）喺串燒上枱前一刻叫咗唯有等埋佢明顯因為得一串嘅關係呢一串入口係熱嘅可惜，佢為咗燒脆個面，件豬肉燒得太乾，無哂水份同油脂，勁鞋🥲同埋佢本身應該唔係用五花腩，所以油份唔夠蒜芯係香嘅，但有少少渣服務方面，壺茶就喺枱面，自己照顧自己都好方便，落單用QR Code，所以得兩個樓面睇一千呎場🥶有嘢想問就要等🥶🥶🥶睇返成個Menu，食物設計係打卡able，但花巧足夠，份量太少，定價太高一路食我就一路講，可能下一碟會好啲呢，講到比我老公笑😂亦都好在佢係自助落單，所以真係邊食邊落唔好食就及早收手🥲同埋我哋6:30 入場，都算舒服，但到7點一多人，開始好似嘈交咁😂總結呢一間一定無下次😢…Read More

早幾日經過一次無買到今日再經決定試吓佢買咗玉子燒+$8芝士拉絲 $43同鹹蛋黃炸燒賣 $32/10粒先講玉子燒，有蛋味，拉絲芝士唔夠多，芝士味無乜🥲唔推薦加錢試🥲同埋玉子燒好細份，都收得$35 一份，雞蛋啫⋯🫠鹹蛋黃炸燒賣係見燒賣關注組有人推就試下整體黎講炸燒賣夠脆，個鹹蛋黃醬包哂成個皮如果一粒燒賣成粒食，係食唔到鹹蛋黃味得魚肉燒賣味如果分開幾啖食，就可以食到開頭同尾大陣少少鹹蛋黃味中間重少少魚肉味環境方面有啲逼，去到嘅時候得一位客人坐緊，我哋兩個人，我坐咗老公已經要罰企🤣跟住有幾位客人入嚟，見到後面第二組已經要企喺外面食因為要自己執返垃圾去掉嘅關係，佢哋都無人會出嚟抹枱，所以枱比較污糟舖頭好似無風閘，勁多小動物飛入嚟🥶總體嚟講算係咁，但定價高咗少少味道唔算好突出，試一次ok，但應該無下次🫢…Read More

周圍搵食，老公見到擔擔麵就衝咗入去帶位嗰個人，語速超快，完全同我哋零溝通，講完自己要講嘅嘢就走咗去，估唔到而家生意咁難做，仲興呢啲咁嘅服務態度🤣叫咗兩個一人餐，包小食同飲品按上枱順序講：千層豬扒擔擔麵麵係日式拉麵，對於期待食上海麵嘅老公就覺得好失望，我當北京拉麵咁食覺得可以接受嘅麵都算彈牙千層豬扒就失色咗啲我估佢將啲五花腩一片片疊起就拎去炸但同我想像中嘅日式千層豬扒有出入🥲少少油，同無乜豬味普通急凍貨色，但百幾蚊好難無要求喎😅我個餐嘅紅油抄手全晚最收貨嘅一樣嘢皮少少厚，餡都叫做足料，醬有花生香，真係合格佢四隻抄手得一隻上面有一大羹蒜蓉，對於唔食蒜蓉嘅我黎講好好彩，可以留比我老公😂但如果普通人食蒜蓉嘅話，就要自己撈返勻，真係有少少搞笑😂炸雞親子丼唔好食完全無調味，淡茂茂得蛋香，雞肉都無味🫣啲雞肉全部都係粉紅色，唔知點解呢🙃個炸皮有啲位好厚，但又無味佢哋咁多日餐品牌，呢碟炸雞真係要去學下嘢🤷🏻‍♀️如果做油淋雞，調個醬，可能仲食到但佢全碗飯都無味就⋯我知我瘦，要食清啲🤷🏻‍♀️我老公個小食，小籠包最期待亦都係最失望四隻有兩隻一夾就穿皮就大塊，餡料少，調味做得唔好小籠包都係要食返鼎泰豐😂（我對上一次食係13年喺台北，唔知而家咩味道😂唔好食唔好打頭😂）四隻穿兩隻，右邊嘅係遺骸🤣數全晚最難食非佢莫屬飲品我叫咗熱檸檬柚子蜜黎到淨係飲到柚子蜜，完全冇檸檬味仲要超級甜😐好彩叫咗一杯熱水，可以自己加水溝淡總括嚟講，呢度唔會再去三百幾蚊食垃圾🙃…Read More

老公約咗朋友喺九龍城食飯，於是喺Openrice 睇咗成晚，睇哂食評、左揀右揀，先決定揀呢一間，即刻訂埋枱，訂枱有清酒買一送一優惠（其實去到都有，餐廳貼哂宣傳海報）。去到朋友已經坐咗喺度食緊嘢，以為朋友肚餓食住先，點知原來係人頭數嘅前菜，要收錢嘅。（按日式居酒屋，確實係有呢個做法嘅）食到一半先醒起要影相，個前菜就係沙律菜加個醬。無乜特別，但如果係我唔會叫呢類型沙律，唔咸唔淡咁。之後叫嘢食同酒，都係叫日式Cocktail（即Highball, Sour）$78 一杯，黎到嗰杯嘢得250ml，仲要有冰，老實講，一杯溝嘅酒咁低成本，收得$78 無可能得250ml。之後點串燒，個店員懶到，我比張紙你寫比我（下？你連落單都懶呀？）唔講以為佢唔收加一🤷🏻‍♀️點好嘢食上菜，先係惡夢嘅開始。難唔難食就見人見智，但值唔值得就一眼睇到。薄燒牛舌，真係紙咁薄、又細片，一開二咁，同張相差好遠，收$98帆立貝，$68好似廚餘咁⋯真係是是但但食咗就算數。明太子，真係好佩服佢哋刀功，全部可以切到咁薄🙂百幾蚊，抵唔抵就見人見智🤣串燒又係食到一半先記得影相介紹返，左手邊嗰一條豚肉蘆筍（？？？）$32 得一條蘆筍好貴咩？😂豬肉薄到透嘅卷我都係第一次見🤷🏻‍♀️另外仲有一個經典，我哋叫咗燒秋葵食開日本嘅都係一排四、五條嘅秋葵串埋一齊燒點知佢呢間係一支秋葵一串（？？？）秋葵咁平嘅蔬菜燒一燒收你$18一條見到咁，本身想encore 都即刻起身。我未試過去居酒長食一round 就起身，但佢杯酒又細杯、嘢食份量又孤寒我哋決定即刻埋單起身咁樣都食咗$800🤷🏻‍♀️真係覺得莫名其妙唔怪之得佢間餐廳冇人幫襯（下面有圖為證，全間餐廳得我哋一枱人）我哋真係俾佢啲好評呃咗，全部都係假嘅仲要一人食咗$200 都未飽（食得一round）如果要食飽，我諗一個人要$600-800 先走到囉🤷🏻‍♀️…Read More

話說幾年前開始突然好興開心果甜品，呢間舖係2年前突然好多人讚佢個開心果糊好好食咁啱好近當年嗰間公司，於是即刻去咗試買完外賣喺車即食，發現佢難食到一個點，絕對有理由相信讚佢好食嘅人係唔識食嘅太鍾意食甜品嘅我仲叫咗個紅豆糕，應該係我食過最唔好食嘅紅豆糕（食過最好食嘅係朋友整嘅）鬼口水咁嘅開心果糊除咗佢個名之外，我食唔出佢點解會係開心果糊又杰又無味，綠色係色素？深色到完全唔自然無果仁味、唔香紅豆糕睇樣好正常😓係得個樣，偏實少少紅豆煮唔透，硬到好似生豆咁完整一粒畢到上黎比大家睇🤣就⋯無乜必要都唔需要去試🥲…Read More

兩個人食咗$178食到一半先醒起無影相叫咗兩個小辣過橋米線，各自加咗餸另外加咗一份蒜蓉雲吞、一份過橋雙拼餃子先講米線個湯頭完全無味，唔咸唔辣，只有撈到有辣油嗰啲位有啲機械式嘅辣味，唔香無辣油嗰啲位係完全無味但我係成個肉醬撈哂落去個湯到，都少少咸香味都無係份量好大，食到個人好飽，但唔好食之後講蒜蓉雲吞其實唔係好分到佢個雲吞同餃子，個樣同味道都差唔多餡料都係無乜味食落去一陣生蒜蓉味同有啲辣油但個辣油同米線係同一個，得辣唔香雙拼水餃係得個椰菜餃有啲甜味，韭菜餃就同雲吞一樣無味點唔點醋都係咁同埋佢無論雲吞定餃子都係勁厚皮嘅款式總結黎講，呢一餐係嘥quota食完都唔知自己食咗咩😶講少少服務，因為佢都幾爆，係咁搭枱，所以上菜上到好亂同埋我哋係見佢咁爆以為佢好好食先入去，點知同枱另外兩位都係咁，米線上到黎食咗一啖就話「無味嘅？」我諗好多人都係咁中伏😓…Read More

喺附近做嘢行到好攰，於是喺Open Rice 搵下附近有咩Coffee Shop 可以叫杯嘢飲坐下以咁細間嘅店仔黎講，佢嘅朱古力選擇叫做好多，對於要戒咖啡嘅我黎講係一大福音（笑）入到去先去Counter 叫飲品，有三位店員，嗰陣時已經係兩點，我估啱啱過咗繁忙時間，餐廳無乜人。叫咗杯70% 嘅剛果朱古力，之後搵位坐，入面有一位客人，叫咗意粉邊工作邊食。等咗一陣杯朱古力先到，夠熱，飲到朱古力味同酸味、苦味嘅平衡，唔係求其沖一杯比你飲。中間出去借充電嘅時候見佢哋磅緊朱古力，唔知係咪用佢黎沖🤭以下午搵地方坐下黎講，呢到算係幾好坐，嘢飲都合格，下次再喺附近勁過搵Coffee Shop，我都會再去。另外見佢黑板有畫到佢一啲自家製甜品同Bakery，有機會都可以試下☺️…Read More

平時食開嵩記，今日身痕過去裕泰試下佢（本來係兩叔姪）$45碗崩沙腩麵（我叫咗米粉），外賣加$1價錢好合理，地方淺窄少少，所以叫外賣返office 食入正題，$45 7件崩沙腩，夠化，但唔夠入味，唔夠香🥲啲米粉碎濕濕，夾都夾唔起湯嘅味道唔夠香、唔夠濃，食到尾飲少少湯頭就知辣椒油唔夠香，無味，成包倒落去都唔辣🙃（我食過最好食辣椒油嘅暫時仲係澳門梓記，當然，佢個腩都好好食）如果真係再去食，可能就食返淨腩淨牛什🥲不過應該會食返嵩記或者試埋明興🙊…Read More

去親嗰頭都一定幫襯，不過通常都係自己帶杯去因為尋日飲完個杯洗咗無拎，咁啱今日又過去，所以終於叫咗杯有佢哋嘜頭嘅飲品🙊入面沖茶嘅妹妹全部都好好人，我要少甜少冰少珍珠，佢哋做到都會幫我做而且味道都好飲，大約三十蚊一杯真係值得幫襯仲有印花咭儲印仔，10個印仔一杯免費我飲過佢哋嘅咖啡、食過咖啡凍、飲過珍珠、水果茶、芝士奶蓋可能慣性叫少甜或者微甜，我覺得甜度都好合適水果茶叫微甜比較可以飲到多啲果香味咖啡系列都唔錯，不過附近有間飛龍，如果你對咖啡好有要求就去飛龍啦（但飛龍啲蛋糕一般，我喺舊店有出過食評）咖啡凍可以一試，當係甜品，佢哋仲出咗茶凍，不過我未試過珍珠系列啲珍珠真係勁多，好似唔使錢咁（我叫親都叫大杯），所以成日叫佢哋少珍珠，否則應該會濟到晚飯都食唔到😂珍珠彈牙嘅，唔算好甜，唔會好影響杯飲品嘅甜度balance今日呢杯士多啤梨奶蓋叫咗少甜，應該微甜會好飲啲另外芝士奶蓋唔算好出，下次可能都係飲返茶類（尋日飲完果茶所以今日想轉口味囉🙈）…Read More

上外賣網搵食，見到佢，外賣網評分唔太高，於是上黎Open Rice 睇吓，見到大部分都係正面評價，於是就信咗，結果當然係中伏啦🥲本身訂外賣自取，較咗半個鐘後，唔知咩原因，落咗order 先見到佢跳返去即時拎，即刻打去餐廳，截住個order，諗住叫佢遲啲先做一打去，好快聽電話，我話我落咗個自取，個網出問題比錯時間咁咁咁，叫佢唔好整住唔知係咪佢當我想取消order佢一句話，我整好咗啦，放陣啦我心諗，有冇咁快呀？我落order 到你聽電話最多咪2分鐘部外賣機通常都勁hang 機，接到單都一分鐘後啦😩最後當然焗住放咗半個鐘先拎到返到去一食，已經係叫紅薯粉，但都腍哂其實正常紅薯粉唔吸湯係放得，唔知佢點解會腍唔知係咪佢用嗰隻紅薯粉唔靚，所以先腍到咁叫咗酸辣粉，得酸無辣，同埋勁多油，唔知點解🥲有少少豆卜雲耳花生，但一啲都唔吸引😢另外有三個串串揀咗燒賣（因為食評推）、鵪鶉蛋、魷魚燒賣個醬真係幾好食，但除咗個醬，其他嘢都無特別拎外賣嘅時候感覺間舖比較污糟唔衞生，好在唔係堂食😩反正無下次😢…Read More

今日去試伏⋯都真係幾伏大約12:15 入到去，剛剛開店我去到首先借咗洗手間先，結果原來要淋雨先去到，仲要入面無洗手液⋯🙃喺而家疫情過後嘅年代，好難相信佢啲員工去完廁所用清水洗手再上餐比你食仲有一樣野，到上餐湯再講話說我哋叫好嘢食，兩個都揀咗羅宋湯，之後佢哋叮啲餐包出嚟，我就諗起扒王之王，學生年代成日幫襯佢食午餐😂上羅宋湯嘅時候，佢哋三個樓面有兩個都叉隻手入去個碗到🤯佢哋去完廁所無用洗手液洗手，然後叉隻手入去我準備飲嗰碗湯到🤮餐包就係扒王之王咁嘅水準至於個餐湯⋯我有飲嘅⋯我老公話見到佢隻手指無掂到我啲湯嘅⋯佢話⋯唉⋯個羅宋湯除咗酸味我都飲唔到咩味⋯偏向中式嘅羅宋湯到上兩個鐵板我老公揀咗肉眼扒薯菜加$18 要熱溶芝士我就揀咗蔥油豬扒帆立貝白飯黑椒汁佢哋比張餐巾我哋檔住，但佢塊鐵板一啲都唔「炸」⋯So sorry好明顯佢塊鐵板唔夠熱都上咗，無得彈到我老公個芝士，上網睇片會著火，但我哋呢個冇，佢有拎火機，但黎到搞兩搞就車落去⋯所以唔知佢個火機用黎做咩，都無見到佢著火🤷🏻‍♀️😂之後我首先試咗一啖芝士醬，好「蘇」⋯唔知佢用咩芝士，得一陣蘇味再試一啖薯條，有啲生水炸唔熟咁⋯跟住我都無試牛扒食完我老公嗰個勁失望，到我自己嗰個就一啲期待都無我第一樣嘢食帆立貝，一咬就知係普通急凍熟帆立貝，可能因為平，但呢啲通常入口都係無味，所以我唔鍾意食跟住試佢個豬扒其實好大份，有一塊半，但係好重醃料嘅酒味，除咗酒味之外，我食唔到其他味🥲忍住陣酒味食咗大半塊豬扒，連黑椒汁都遮唔到嗰陣味到後尾有一舊豬扒連住下面墊低嗰片生洋蔥，就好咗少少嗰片洋蔥唔甜唔辣，可能咁啱嗰個位啲酒味又無咁重，總之全餐飯食到呢到我先覺得自己食緊正常嘢之後嗰啲我都無食到餐飲叫咗一杯唂咕，杯唂咕無加糖、夠濃，都算做得到水準最後上多杯本地合成雪糕，個餐算叫做幾齊啦，$100內嘅嘢，唔通想食Mövenpick 咩🤪不過你問我就真係無下次我同老公食完邊行出去邊講，去隔離間冰室食應該會滿足啲🥲…Read More

今日去尖沙咀搵食，去到厚褔街唔知食咩好，最後見到本陣，記得上次去佢好早就last order 咗，見今日7點幾咁早，就行上去試吓入到餐廳已經坐咗3、4枱客，但我哋都叫做唔使等位，無卜都可以直接坐低坐低發現張枱有少少污糟，以佢人頭定價要$500一個人黎計，張枱抹唔乾淨、無提供餐紙，得濕紙巾，坐低水都無一杯，我知你想客人叫嘢飲，但一般日本菜都會有杯熱茶/凍水，佢真係要開口先有$50 服務費買唔到服務叫親侍應都要叫好耐先有人應😮‍💨講返食嘢方面。咁好快決定好叫咩我揀咗$489 嘅set，另外加咗日本豬腩肉、野菜盛り合わせ再加咗紫菜沙律、Kimchi同超幸福生蛋拌飯由牛肋肉同上牛扒食起，牛肋肉偏肥，燒耐少少等啲牛油逼哂出嚟先上牛扒就幾腍，都夠肥，入口都算幾新鮮（左邊上起　牛肋肉、上牛扒　右邊上起　牛舌、雞髀肉）之後到橫隔膜，最難燒得熟、又容易燒過龍嘅部位但肉味夠，厚度夠，選擇澳洲和牛又比日本和牛再濃味啲到牛扒，都算腍，同上牛扒最大嘅分別係腍度，其他分別唔算太大以口感黎講，牛扒切得厚啲、口感實在啲左起：橫膈膜、牛扒中間我哋穿插燒啲蔬菜，全程都唔錯雞髀肉都好彈牙，係日本雞髀肉黎嘅，厚度算夠，燒得熟少少都唔會老到我另外叫嗰碟日本豬腩肉，我放上燒爐，我老公話咁似熟咗嘅我話佢個樣有啲似日本叉燒😂但應該未熟掛，唔係點會比你燒？最後我哋問咗侍應黎問，佢話係預先蒸過，但未全熟，燒到金黃色就食得咁我哋好乖咁燒到好靚，其實都幾期待㗎，因為日本豬腩肉一向好食但一入口，「？」好嚡🥲完全唔似我食開嗰啲日本豬腩肉🥲又無味🥲簡直嘥心機如果我叫嘅時候佢有講舊肉有蒸過，我肯定我唔會叫始終蒸過，放完再煮，就好似你隔夜餸返熱咁，邊度好食啫？呢碟我係合埋眼食完就算數無端端唔知點解要蒸過先比你食嘅豬腩肉紫菜沙律一開始就上咗，好快但個Kimchi 我哋等到頸都長埋都未見到，追兩次先拎出嚟我老公忍唔住講咗句，係咪撈緊？😂但佢碟Kimchi 唔算好食，偏甜同辣，唔夠酸超幸福飯因為我唔食得生蛋嘅關係，叫咗佢蛋黃另外上，拎上黎我哋問佢有冇，個侍應話唔記得咗，話拎隻碗幫我哋分返開我話唔使啦我老公話佢講得出就等佢搞掂點知佢原來唔識處理，一下就諗住用隻鐵匙羹𢳂起個蛋黃結果當然係佢𢳂唔起，個蛋黃穿咗，愈整愈衰，我唔使食我即刻叫佢放低其實佢有智慧少少，用隻大啲嘅匙羹，連旁邊少少飯一齊𢳂起，就唔會整穿個蛋黃，真係估佢唔到最後成碗飯益咗我老公，佢食得勁開心碗飯就無影相，比佢整到咁樣衰講咁耐，係咪發現少咗啲嘢呢？係呀，個牛舌呀！我老公因為好鍾意食牛舌，決定留到最後先燒黎食，點知一食就出事蘇到喊，直頭想嘔返出嚟🤢我同我老公講，不如同佢講，叫佢換其他野，我老公話得嗰幾片，人哋點換喎於是夾硬食埋佢但真心，就算服務有啲出錯、啲嘢食有啲奇怪，都唔夠嗰碟蘇到嘔嘅牛舌咁難頂、咁敗筆！直頭係成餐飯嘅污點食咗咁耐，本來對佢印象都ok，最多下次知伏，唔叫豬腩肉但佢嗰個咁唔新鮮嘅牛舌，完全破壞咗成餐飯真心建議，想去食就唔好叫豬腩肉同牛舌，否則你會後悔😢一共食咗九百幾蚊，但係咪物超所值呢？又未到。我諗暫時都無下次，咁嘅性價比，一啲都唔值得再去第二次🥲另外值得一提，我哋坐近電梯大堂嗰邊嘅位，啲黨委嘅人就坐喺我哋隔離，個間隔仲要有窿，然後等位有個男人係咁喺度咳，真係聽見都覺得恐怖😮‍💨…Read More