onlyfoodie's Profile

最近去過日本旅遊，回港後一直想再品嚐高質素的日本料理，幾經研究後找到這家日本食材直送的居酒屋。餐廳佈置優雅，充滿日本風，我們被安排了舒適的卡位座享用晚餐。為了慶祝十五周年紀念，餐廳提供啤酒以半價售出，很有誠意。特選刺身盛-時令鮮魚附刺身盛包括三文魚，吞拿魚，赤海蝦，油甘魚，池魚，每一款刺身都非常新鮮。赤海蝦尤其令人驚嘆，蝦肉又爽又彈，而蝦頭膏非常鮮甜，搭配醬油和山葵，味蕾得到了極大的滿足。月見極丼定食一放上餐桌已經令人嘩一聲，擺盤精緻，色彩豐富。丼飯配上新鮮的生蛋黃及各種配料，米飯的口感軟糯，與蛋黃的滑順相得益彰，讓整道菜的層次感更加豐富。鹽燒半切雞皮餃子串餃子串的外層是雞皮，燒至香脆，內餡豐富，口感一流，調味恰到好處。西京燒熟成黑豚腩肉黑豚腩肉的油脂分布均勻，外層焦香但入邊仍然保持肉質嫩滑，充滿肉汁，完全不會有油膩感覺，搭配微甜的醬汁，越吃越香。整體來說，這次用餐經歷非常愉快，餐廳職員親切有禮，環境座位舒適，菜式選擇多，而每一道菜品都十分美味，展現了日本食材的新鮮和廚師的用心與技巧。…Read More

在西貢的粵式海鮮料理多不勝數，但當中有些質素參差，幸好獲朋友推介到這家星級餐廳。餐廳以精湛粵式海鮮料理聞名，並連續多年獲得米芝蓮一星。椒鹽奇脆豆腐外層金黃酥脆，內裡豆腐卻保持豆香與嫩滑薑蔥炒蟶子皇蟶子肉厚如手指，爆炒後仍十足彈牙，而且被薑蔥的鑊氣滲透，盤底醬汁鮮甜不膩，忍不住配飯全吃光椒鹽焗鮑魚鮑魚先焗至軟嫩，再裹薄漿炸出脆邊，椒鹽與鮑魚鮮味碰撞出鹹鮮火花，伴酒一流天婦羅桶蠔生菜包十分邪惡！超級肥美的新鮮蠔被薄薄的天婦羅衣裹住，配上生菜葉的清爽，中和炸物的油膩上湯開邊龍蝦伊麵新鮮大隻龍蝦開邊，龍蝦肉十足，而且鮮甜緊實，蝦膏融入濃郁上湯，伊麵吸盡精華但保持彈口鮮菠蘿生炒骨酸甜醬汁裹著酥脆排骨，排骨肥瘦適中，配合新鮮菠蘿解膩米湯浸時蔬脆嫩的菜心在乳白米湯，湯底清甜並帶淡淡油香自家製甜品椰汁大菜糕椰香撲鼻，甜度恰到好處，為用餐帶來圓滿的句號…Read More

今次同朋友去咗西貢呢間隱世Cafe，成間店走簡約木系風格，玻璃窗透曬自然光入嚟，坐低即刻覺得好chill，令我想攞本書喺度坐成日。磯煮鮑魚蕎麥麵鮑魚煮到超淋身又入味，咬落去甜甜哋帶少少酒香，仲要係原隻上超大方！蕎麥麵掛湯一流，凍食爽口得嚟唔會覺得寡，旁邊嘅wasabi係新鮮磨嘅，辣得嚟有回甘，成個配搭100粉火炙鰈魚裙邊茶漬飯平時食開三文魚茶漬飯，呢個鰈魚裙邊真係贏幾條街！魚油炙燒過後逼曬出嚟，撈埋玄米茶湯一啖食，魚油香混合茶香，仲有脆脆嘅米通增加口感久丸小山園抹茶配黑糖糰子抹茶控必嗌！苦澀同回甘平衡得剛好，飲完個喉嚨有種好乾淨嘅感覺～黑糖糰子蘸埋抹茶一齊食，甜度即刻中和返，好有京都feel！椰子抹茶朋友嗌咗呢杯fusion特調，估唔到又幾夾！椰子水嘅清甜中和抹茶嘅濃郁，夏天飲真係透心涼…Read More

尋日收工收得夜，普通餐廳都已經收得七七八八 ，好彩附近仲有呢間餃子店開住，即刻入去食返餐填飽個肚。呢度嘅餃子都係每日手工新鮮爆炸，仲可以透過櫥窗望住店員逐粒逐粒咁樣包。呢間餃子皮薄餡靚，食得出店主嘅用心。至尊松茸豬肉餃嘅松茸將咁矜貴嘅食材包入餃子入邊唔使講都知一定好食，仲有辣同唔辣嘅松露醬配搭。雙拼煎餃嘅雲耳椰菜豬肉餃配搭上雲耳爽口彈牙，仲有椰菜嘅鮮甜，口感豐富。韭菜豬肉餃嘅韭菜好細嫩，韭菜味超級濃肉，好食。仲嗌咗香菇雞肉餃，香菇超級厚肉，雞肉餡相對豬肉餡會比較硬身，但肉汁依舊飽滿。而且好鍾意呢度嘅狀元九鼎湯，材料包括咗粉葛，鯪魚，鯽魚等等各種材料，講真放工返屋企都唔會有時間煲湯，而且無添加味精，好感動喺出面都可以飲得出家嘅味道。出面熱辣辣最啱飲返杯自製山楂雪梨水，好適合咁炎熱嘅夏天降暑潤肺。…Read More

返工難得有得放平日，決定好好獎勵自己，揀咗間高質鐵板燒嚟食。呢間鐵板燒位於天后，位置好方便，喺地鐵站隔離，咁啱嗰日落大雨都唔使行好遠就去到。餐廳喺24樓，望出去可以見到好靚嘅海景。前菜前菜一嚟就好驚艷，京都湯葉配上本茹水雲菜，酸酸甜甜，超級開胃。日本溫室蕃茄清爽多汁，北海道白粟米十分爽甜，仲有海膽配腐皮，道道都超級好味！刺身白松露櫻花鯛魚薄切花鯛魚本身好清甜，配埋淡雪鹽同埋白松露油，連豉油都唔使點，一放入口白松露嘅味即刻爆發出嚟壽司大池魚壽司比較爽口同埋清甜，鰈魚壽司比較滑身，但師傅用火燒一燒，令到本身嘅油香完全帶咗出嚟，食完啲油香留喺嘴入邊，兩款都好高質。鐵板燒澳洲龍蝦師傅會即場喺水缸撈隻龍蝦出嚟，隻隻都好生猛，再望住師傅即場切，然後放喺鐵板上面煎。隻龍蝦又新鮮又大隻，啖啖肉好正，而且蝦膏超級濃郁，真係好食到唔捨得食晒呀三文魚籽配北海道帆立貝日本帆立貝固自然鮮甜，但再由師傅熟練嘅手勢，煎到外層香脆，再配搭師傅自家製嘅三文魚子，下面仲有海苔湯汁，無論口感同埋味道都係超級正美國牛柳牛肉可以揀厚切或者薄切，薄切嘅牛中間會夾住香脆嘅蒜片同埋香蔥，咬落去嘅味道會比較豐富。好似嘅牛牛味比較濃郁，可以自己選擇生熟程度，再配搭淡香鹽同埋蒜片一齊食，質感澎湃。鐵板炒飯望住師傅將櫻花蝦爆香，然後再放上去炒到粒粒分明嘅炒飯，望住啲炒飯喺鐵板上跳吓跳吓咁，已經知呢個炒飯必定好好味鐵板炒什菜炒雜菜配上咗自家製嘅醬汁，入邊用咗啲櫻花蝦，蟹膏油等等製成，食落似XO醬咁香濃，但係一啲都唔辣，好香好香。季節濃魚湯魚湯熱辣辣，魚味濃郁，主打一個清湯帶出魚味，唔另外添加任何調味料是日精選甜品今晚有抹茶奶凍，抹茶味好甘香，又唔會比奶味蓋過咗，再配上上面嘅黑豆，好味到想叫師傅比多杯食…Read More

嗰日喺尖沙咀同朋友行街，眨吓眼就行咗成日，又要搵晚餐食咩好。因為朋友係食量比較大，所以佢都好想食放題。啱得咁蹺朋友想食刺身，但係我想食燒肉，唯有要搵間兩樣都有得食嘅餐廳。好彩俾我哋search到呢間餐廳兩樣都有得食，嗰日我哋去嘅時候好彩夠早，啱啱好有得Walk in食。呢度嘅設計好好，因為大部份位都係卡位，私隱度比較高，傾偈自由自在又坐得舒服。呢度有好多唔同嘢揀，除咗刺身壽司呢啲放題必有嘅嘢食之外，燒烤方便有牛肉，豬肉，雞肉，淨係牛肉都有成10款選擇，我自己個人好鍾意食牛舌，呢度仲要有兩款牛舌選擇，夠晒有心意。熟食方便，好有驚喜嘅包括蒜爆通菜，煮得非常香濃惹味。呢度除咗嘢食都質素之外，價錢亦都唔算貴，店員亦都親切有禮，如果之後再要食放題都會考慮再返嚟呢度。…Read More

自從食過一次水門雞飯之後就一直念念不忘，價錢又抵食，今次就趁住冇人煮飯嘅一晚，叫個外賣嚟食。泰式乾炒辣牛河：辣嘅程度係有得選擇，所以怕辣人士亦都可以嗌，牛河炒得好有鑊氣，輕鬆清晒鳳尾蝦泰式金邊粉：呢度嘅招牌菜除咗水門雞之外，覺得佢嘅金邊粉炒得好入味，而且配料係好充足，絕對值得一試泰式腩仔：同中式嘅燒腩仔好唔同，泰式腩仔更加香脆，而且配上醬汁，一啲肥膩嘅感覺都冇胡椒單骨雞翼：雞翼好香好好食，而且單骨非常方便食用…Read More

自從上次食完Omakase之後，一路都好想再食多次，今日雖然冇咩特別嘢要慶祝，但係都搵間好嘅餐廳獎勵吓自己做嘢辛苦。餐廳設計優雅，環境潔淨，而且客人座位只有十個，所以坐得好舒服。師傅詳細為我地介紹每一項料理。前菜包括白蘆筍，螢光魷魚，水雲。白蘆筍清新爽甜，螢光魷魚配上柚子汁同埋醬油，好惹味，水雲酸甜又開胃。跟住就係刺身。真鯛刺身：配海膽蛋黃醬，真鯛本身油分偏低，所以配上海膽蛋黃醬增添味道醬油燒平貝：平貝夠曬厚切，醬油令風味，紫菜好香脆，增添口感池魚二食：一片係就咁配搭wasabi，食佢鮮味，另一片係燒左之後配上燒木魚花，將油分逼出，非常香口間白，魚長崎生蠔：配酸汁，調得十分惹味安康魚肝：質感非常細滑，完全冇渣，非常濃味金鯛立鱗燒：魚鱗炸得好脆，魚肉好鮮甜，加埋紫菜湯，配搭一流壽司:鳥貝赤貝醬油漬吞拿魚北寄貝黑龍海膽手卷厚切玉子魚骨煲嘅麵豉湯靜岡蜜瓜，宮城芒果…Read More

咁耐以來一路都未試過食Omalase，今次難得慶祝周月紀念，選擇咗依家歷史悠久嘅Suzuno。門面設計非常優雅，有日式庭園嘅設計風格，店舖面積唔算大，但係只係提供大約10位客人嘅座位，所以座位非常寬敞，亦都十分舒適。師傅就住每一道菜都詳細解釋，又同我哋傾閒計，成餐飯都食得好開心。首先帶嚟開胃嘅前菜， 擺設非常精緻，包括鯛魚漬，黑豆，烏魚子，魷魚。最好食嘅係鯛魚漬，鹹鹹地又好香。跟住落嚟嘅係季節性嘅食材，今日嘅係蜆湯，好香好甜，好驚訝嘅係師傅同我哋講話一粒鹽都無落，突顯天然甜味同埋鹹味。刺身方面有五款，羽太，來自熊本嘅縞鰺，赤貝，水八爪魚，白見貝。羽太配上含有辣蘿蔔蓉嘅酸汁，好惹味。師傅特別準備咗八爪魚吸盤，有大中細，好爽好彈口，配上自家店嘅醬油積wasabi，比一般Wasabi辣，但係都忍唔住全部用晒。師傅亦都準備咗小食俾我哋，係炸沙甸魚苗，炸成薄片，好香脆。至於熱食方便，師傅安排咗櫻鯛嘅白子，用昆布燒，係春天先會有嘅季節性料理。第二份熟食係增象，即係炸蝦丸，炸到外皮香脆，同魚蛋嘅口感相似。最後係壽司嘅環節，有金木雕，帆立貝，鯖魚，池魚，槍魷魚，蝦，中吞拿魚腩，大拖羅魚腩，而壓軸出場嘅係海膽手卷，海膽超級鮮甜，份量亦都非常慷慨。甜品係士多啤梨同埋十勝水羊羹，為晚餐帶黎完美嘅句號。…Read More

食完飯之後覺得好口渴，行過呢間蔗汁店覺得佢好特別，而且竹蔗汁相比其他肥仔水又健康，位置就正正係肥姐小食店隔離，所以就喺度買咗嘢飲試吓。每一杯飲品都會有抽獎，我哋咁啱抽中咗有得下次減$5 ！蔗杯葡萄🍇 +原味晶球葡萄配上蔗汁都係第一次飲，估唔到味道咁夾！而且葡萄係大皮，成個感覺好清新。原味晶球口感好得意，好似食緊粒好煙韌嘅提子咁。蔗杯薄荷☘️+馬蹄雪晶露見到佢哋即刻攞條蔗去柞汁，係真材實料，再加埋薄荷，感覺好清新。啱啱先食完啲好肥膩嘅燒烤嘢飲，特別覺得消滯。…Read More

之前聽朋友講過話呢間餐廳用料新鮮同食材好高質素，今日咁啱要去旺角做嘢，所以放咗工之後就過嚟食晚餐。餐廳裝修環境優雅而又有日本風，座位亦都好舒適。菜式嘅選擇好多，亦都有套餐可以揀，而嗰日我哋選擇咗叫自己有興趣嘅嘢食。燒蠔好大隻好新鮮，又夠曬厚肉，加埋好香嘅蒜蓉燒得好好食。另外，我地叫左豚肉赫心卷，鮮磨山葵牛肉串同埋青椒蝦滑串，全部都配搭得好好食，又燒到有好香嘅炭香味。特別值得一提嘅係明太子醬燒翠玉瓜，將翠玉瓜配上明太子最原來咁好食，食過今次之後以後試吓喺屋企整先🤣。食日本野點都要叫d生野食，所以我地叫左廚師發辦壽司七貫，食得出用料好靚，每一件刺身都好鮮甜，壽司飯酸度同質感恰到好處。雲丹炙燒和牛小砵煮得好入味，又保持鮮嫩。之前一路都食開用紫菜包嘅手卷，今次係到試用菜包嘅手卷，比起紫菜更有鮮味，好有創意。…Read More

最近啱啱去完韓國旅行，返嚟香港冇幾耐又想想去食韓國菜，所以決定再次拜訪之前試過嘅Dodam Chicken。嗰日晏咗收工，八點幾先去到餐廳，不過仍然係差唔多坐滿全場，好熱鬧。店員好好人，幫我哋兩個安排坐卡位，坐得又闊落又舒服。雙重芝士麵包辣烤雞辣炒雞調味好到位，好香好惹味，又唔會過分辣，烹調時間啱啱好，令雞保持嫩滑。麵包上面淋左好多芝士，好邪惡但係好好食，作為芝士嘅粉絲真係食到唔停口黑松露卡邦尼炒年糕真係好有創意嘅菜式，係西式同埋韓式菜嘅fusion。年糕煮得啱啱好，超級煙靭，卡邦尼醬汁好香濃Creamy，估唔到咁樣配埋可以咁夾。牛排骨湯牛排骨湯用石鍋作為擺盆，一嚟到嘅時候仲滾緊，幫助個湯係成個食嘅過程都一直保到暖。湯嘅份量十足，而且啖啖鮮甜，仲有好香濃嘅牛味。湯入邊嘅牛肉仍然保持肉汁，唔會煲到冇曬味。…Read More

喺旺角行完街之後想搵間Cafe chill 下，之前一路都有聽過茶聊評價好好，所以就黎試試。餐廳設計好有特色，有吧枱可以望到街景，亦都有個紅色嘅電話亭可以打卡。茶聊招牌漢堡漢堡使用嘅安格斯牛肉，煎到外層焦香，入面保持medium rare，keep住D肉汁，再配埋香煎煙肉，配搭得非常好。薯條炸到好香脆，不過唔會驚太滯，因為配埋新鮮嘅凱撒沙律。海王櫻花珍寶巨蝦配龍蝦忌廉扁意粉意粉一登場好有驚喜嘅效果，有手掌咁長嘅好大蝦鋪喺沾滿龍蝦汁嘅意粉上邊。大蝦嘅外層俾櫻花蝦包裹住，食起嚟口感好有層次，除咗有櫻花蝦嘅脆之外，仲有大蝦嘅彈口。意粉所配嘅醬汁充滿龍蝦鮮味，喺烹調嘅過程再加上少許忌廉，令入口更加香滑。髒髒黑糖珍珠鮮奶嘢飲本身已經超級吸晴，鮮奶散發着淡淡奶香味，而珍珠粒就偏甜，好經典嘅配搭，做到好好嘅balance。開心果椰椰估唔到開心果除咗雪糕之外，仲可以整成咁好味嘅嘢飲，味道我認為可以將開心過關注組㖭啊！從來冇諗過椰青水同開心果會咁夾，開心果蓋超級濃郁，淡淡果香去清甜嘅椰青水，而且仲配有粒粒嘅開心果粒，飲落去好有口感。最後仲嗌咗兩個甜品嚟試。首先第一款嘅係自家製巴克斯芝士蛋糕蛋糕芝士味突出，但係又唔會過度濃郁令人難以入口，而且甜度啱啱好。另一款係自家製75%特濃朱古力蛋糕，朱古力味濃而帶有輕微嘅苦澀，但係入口幾秒之後就會感覺到甘香。…Read More

好難得放假可以入嚟大美督chill下，之前揸車經過見到呢間餐廳出面泊滿車，所以決定入嚟呢間餐廳食晚餐。值得一讚嘅係餐廳可以提供泊車位，車位都唔少，不過就算餐廳車位爆咗，都可以去隔離咪錶位拍，好方便。餐廳職員好好咁俾我哋選擇坐出邊或者入邊，個晚天氣好涼爽，所以決定坐出邊享受吓涼風。有好多唔同嘢食可以揀，基本上越南菜嘅所有嘢都有。因為我哋都幾肚餓，所以就叫咗四款嘢食。雞扒牛肉撈檬撈檬可以選擇好多唔同配搭，而我哋就揀咗雞扒同牛肉。雞扒同牛肉醃得好入味，其他配料食材都好新鮮，加埋醬汁一齊撈埋好惹味。河內番茄牛筋腩湯粉職員一攞上嚟即刻哇一聲，因為好大碗，好粥了。牛筋腩煮得又淋又入味，湯底好濃郁。原來呢度粉麵嘅湯底全部都係自家淆製，係唔用味精嘅。火車頭紅飯上次去越南冇機會試下紅飯，所以今日見到有就即刻嗌。紅番炒得又濃又充滿茄香味，仲配埋好多唔同配料，有雞扒，雞翼，扎肉，雞肉串，墨魚餅，同埋太陽蛋，真係好似嗌咗個小食拼盤咁。馬拉盞通菜食飯點都要叫碟菜食下。通菜炒得好清脆，調味又啱啱好，好好食。…Read More

近排天氣又凍返，除咗想食啲暖啲嘅嘢之外，胃口亦都比平時更加好，上網搵到呢間火鍋放題價錢好吸引，仲有有分段時間收費，所以就去試吓。火鍋店嘅場地範圍好大，如果多人嘅話會有卡位坐，雖然我哋嗰日得兩個人，冇得坐卡位，但係坐普通枱都好舒服同埋好闊落。喺食火鍋之前有得先食麻辣雞煲，係任食嘅。雞煲一開火煮已經聞到超級香，雞肉非常嫩滑，亦都唔算太辣，調得好惹味。食完雞煲係時候揀湯底，呢間火鍋店好多唔同湯底可以揀，而我哋就揀咗麻頭魚湯底。打邊爐最緊要當然係有咩食啦，除咗肥牛同丸之外，仲有好多其他嘢揀，基本上想食嘅都會有。最令人驚喜嘅地方係，呢度啲海鮮好新鮮，絕對食得出唔係雪藏或者冰凍，淨係呢樣已經贏咗唔少地方。甜品嘅選擇唔算太多，不過冇乜所謂，因為食火鍋嘅已經食到超級飽。火鍋店俾咗一部軟雪糕機比自己自由配搭，有朱古力同埋雲呢拿味，仲可以自己配埋麻糬或者小丸子。…Read More