DavidHui8544's Profile

前幾天路過黃埔仁孚後面，咁啱有個車位，醒起之前有當區朋友提過有間好正嘅天婦羅，於是一路揾，原來要去到街盡頭咁滯，去到一望人頭擁擁我同老婆又鬼咁肚餓，於是只有放棄，一望對面見另外有間日本野，雖然都好多人但吧頭仲有位，於是姑且一試，餐牌是一般居酒屋咁，樣樣有啲但又唔算好多嘢，諗嚟諗去見價錢唔太貴不如就試吓「亞媽家姐」即廚師發辦。坦白講日本嘢我食咗幾十年貴貴都食過，一入口就知好與壞，估唔到八百幾蚊竟然有中環兩三千嘅效果，個餐除咗有拖羅、左口邊、日本象拔之外，竟然連紅衫都有，呢種魚你唔好以為紅衫係cheap嘢，實則十幾年前我在跑馬地某名店食過，當年幾片都都要我五舊 水，呢度咁闊佬用嚟做餐，加上啲魚好新鮮，我覺得性價比相當高。另外我哋仲加咗雜錦天婦羅，粉唔厚入口鬆化食完紙上亦冇乜油，可見廚房有番咁上下功力。除食物外當晚只有一位服務員，佢一個後生女跑晒全場招呼二三十人，但又保持禮貌笑容，今時今日香港真係需要咁嘅服務態度，要特別比個讚佢👍🏼…Read More

我幾十年來都係Louis Steak House嘅擁躉，由馬來西亞大廈食到嚟中信大廈，雖然招牌換咗但主理人都係楊先生父子，坦白講我從來冇失望過，Tomarhawk斧頭扒一流不在講，如果想食得輕巧少少佢嘅龍蝦飯同石斑飯都係一流，除此之外呢度獨有秘製嘅懷舊薄餅同紅炆花膠更加係其他地方絕對食唔翻，但主理人同佢嘅兒子即係現任嘅大廚Wilson絕對係用足心機去做，誠意可加，做每樣嘢都比足心機親力親為，特別海鲜一類用料更係楊先生每朝親自喺西營盤街市揀選，新鮮到極，其他地方真係食唔到，今時今日呢類餐廳絕無僅有，我自問乜嘢高級食肆都去過，感覺食物冇一間比得上呢度，我係真心覺得，絕對唔係做打手喺度宣傳做假，我見有啲負面批評，但試問邊間食肆冇缺點？招呼出了小問题是個別員工質素所致。不過講多都冇用大家嚟試吓就知，再一次重申本人真心誠意推介絕對唔係放鱔！…Read More

早前路經蘭桂芳見有一壽司店新開張，一個人都冇，但門口職員好熱情諗住當幫下人即管試吓。叫了六百幾蚊的廚師發辦，食起上嚟竟然有驚喜，剌生用比較靚的種類，有金目鯛、拖羅、大池和赤祿等等，加上壽司的赤貝、左口邊可算樣樣俱全，我平時是食慣日本嘢，感覺上與附近收費一兩千的冇大差別，反而仲好似感覺新鮮啲，唯一係地方唔係太好坐逼夾啲，同埋單尾個湯認真麻麻哋，但總的嚟講還是食得過，好過附近有一間冇得坐企到腳都軟，如果經過中環不妨一試。…Read More

個人十分喜歡日本菜，二十多年來試過不少，到今天仍然四出尋找美食。今晚照舊搵新地方，早前到銅鑼灣一著名日本菜時，見到同大廈有另一間叫Sushi Love的料理店，裝修價錢都可以，故今天特往一試。可能是回歸假期放煙花關係，生意比較冷清，但既來之則安之，見到冰櫃內魚貝的選擇均不少，故坐在吧頭由師傅發辦，招呼我的是一位年輕人叫驃師傅，先問一問在邊度學師，原來系出名門，曽在見城和澄等名店做過，咁又放心多些，前菜一來已見甚有taste, 有四款小點包括魚啫喱，頗見心思，主食第一味先來個大池魚薄切，坦白講刀功普通似乎片得唔夠薄，但食落則魚味十足和非常新鮮，之後是帶子、北寄貝、拖羅、赤陸、油甘、劍魚等剌身，之後再有四款不同魚和自創壽司，其中包括有左口邊及主廚自創的三層珍味魚子和白身魚混合的不知名壽司，十分正斗，最後仲有海膽手卷，是正宗見城式的平底包法，紫菜仍脆足見功夫，海膽是原隻開而非一板板來的，但當然亦不是正宗日本海水膽。總的來說以我三十年經驗可給80分，特別三位師傅雖非年長但誠意十足，埋單每位九百我覺是物有所值，因為同樣食品在樓下最少要$1200以上，相信如果生意再好些或許可再放膽入些更高級貨例如當造的日本沙甸、喜之次和象拔蚌等，效果將會更佳，希望下次再去食會有更大驚喜。…Read More

早前見到廣告宣傳有正宗壽司在黃埔開檔，咁啱前晚經過新塲九號水產，入內看看，見到一間叫翔太裝修似乎幾正，走入去試試點知冇位，結果今日再去，一試果然唔錯，款式多嘢新鮮，最好就係竟然有游水花竹蝦同毛蟹食，雖然價收番咁上下不過比起銅鑼灣灣都算平，唯一招呼似乎亂啲同埋比較嘈，不過吧頭師傅落力，唔夠比到夠食為止，呢樣就真係低讚。事先聲明我真係有嗰句講嗰句唔係放鱔稿。…Read More

數週之前與家人路過勝利道見到海幸壽司似乎相當企理故入內一試；聽到鄰枱似乎是熟客要求更換甚麼的，不以為已於是點了雜錦剌身，來到一看赤身和油甘魚顏色古怪似乎不甚新鮮，入口果然如是，牡丹蝦還算可以，但赤貝未入口已經聞到異味，醒起先前鄰座投訴正是要更換赤貝，師傅事後仍未檢查就給其他客人食，似乎有點離普，之後改叫熟食燒雞串用雪雞仲要冇晒味，最後叫麵多時員工招呼愛理不理，今時今日可算經典！…Read More