or#Tm65902463's Profile

今次已是第二次食了。最近公司 OT，都必會叫定 OpenRice 燒夜外賣。8 點準時去取，店家都好準時預備好！取完就去碼頭坐，等 8 點半開出嘅巴士回家。每次坐響碼頭等梗巴士，都忍唔住打開，食住少少先 😂因為掛住食，所以好少影相 🫢第一次食時，點咗好多串燒同一條燒茄子。全部都好好味，啲調味粉一啲都唔孤寒，極有風味！仲送咗幾粒炸燒賣比我試食，食到我叮一聲！第二次食時，就點返上次食過翻尋味嘅炸燒賣，另加花甲粉。嘩！個花甲粉不得了，勁大兜。仲有配菜 金菇和娃娃菜，超正！個湯底又好味。點解可以只賣 $3X 咁抵食！今次店家送了炸魚蛋比我試食，味道都唔錯，真係好有心思！各位觀塘嘅朋友，多多幫襯，包你唔會失望 😋…Read More

上年 11 月公司大 OT 完，特登過嚟食，覺得味道唔錯。今日公司再大 OT，諗住再嚟食，點知食唔成仲一肚氣！因為想快快食完趕回家照顧小朋友，已經專登 18:30 Send Whtsapp 去落單，店主亦即時已讀，講明 20:10 會去到堂食。點知 19:50 收工打電話過去，想確認一下係咪準備緊啲食物喇，電話無人聽。行 15 分鐘終於行到過去，店主有寫低我張單的，但完全無開始燒嘅跡象，仲同我講，要等 30 分鐘喎。雖然店主係好有禮貌㗎，但問我等唔等到 30 分鐘，如果等唔到不如下次先食。吓！咁請問我早成粒幾鐘，Whtsapp 落定單嘅意義係咩？店主炒定我張單又有咩意義？可能店主覺得今晚已夠生意，唔稀罕做我呢張單，亦可能知我少嚟食，覺得得失我呢個客都無所謂。但你唔想接唔緊要呀，你早講呀，我 OT 收工勁攰都行成 15 分鐘過嚟，嚟到同即時落單嘅客人速度一樣，咁你不如唔好 Whtsapp 接我張單，唔好話歡迎客人預先下單啦！真心唔會再嚟！…Read More

早上返工會經過呢間士多，幫襯佢買早餐已經兩星期了。之前試過買腸粉餐 (2 條腸粉+燒賣)，姐姐用同一個兜裝，食腸粉就冇嘢，但食燒賣食到我想反胃，始終接受唔到燒賣會撈埋啲甜醬麻醬一齊食。今早再幫襯，叫咗腸粉餐 (2 條腸粉+燒賣) 同兩粒粉果，叫姐姐幫我分開腸粉同燒賣，腸粉一個兜，燒賣同粉果一個兜。姐姐拒絕，話腸粉餐係一個餐，一定要放埋一齊，唔可以分開擺。我頭都大埋咁話「我有另外買粉果嘅，粉果都有一個兜㗎喇，你只係幫我將啲燒賣，擺去粉果嗰邊姐，我又冇另外要多你一個兜，點解唔可以呢？」姐姐就繼續話，總之就唔得啦，我真係唔明呢份堅持。之後就話老闆唔俾，咁做人人都要求分兜，佢哋會好麻煩，我真係諗唔明有咩咁麻煩。我已經另外再買粉果，無增加你嘅成本。如果有增加你嘅成本，好似啲餐廳咁，加一蚊要個兜咪得囉。算啦，我都費事堅持，最後冇買到腸粉餐，因為啲燒賣撈埋啲甜醬麻醬一齊食，真心食到反胃。最後我買咗 2 粒粉果 + 2 粒牛肉，因為 Menu 上係獨立嘅食物，唔係一個餐，所以姐姐就終於肯同我分兜喇。我話牛肉要喼汁，姐姐已經一嘢落咗豉油，我心諗喼汁咁深色㗎咩？十秒後，「喼汁」呢句說話終於由姐姐隻耳，傳到上個腦度，姐姐再補落喼汁，然後仲話我「你諗清楚未，早啲講」，呢個早餐唔食到我反胃，但買到我反咗眼！成個買早餐嘅過程5分鐘，我已經見識到排我前面嗰個人都買到忟咗。買 $16 嘢，比 $106 姐姐，姐姐找咗 2 次錢都係找 $80 比人，人哋最後頂唔順，話找 $90，然後姐姐繼續數錢，用另一個 $10 $20 嘅組合，再找 $80 比人。人哋反咗眼，嘆晒氣話，仲爭 $10 呀！然後排我後面嗰個人，見到買早餐過程咁唔順利，我同埋另一個人都反晒眼，嚇走咗無買到 👋🏿…Read More

之前朝朝食，廚房出嘢都冇咁慢。隔咗兩個星期冇食，今朝走去買外賣，點知等咗20分鐘仲未有，真心接受唔到，我自己煮都煮完啦。最後職員退錢俾我，但都仍然好嬲。白白等咗20分鐘，搞到我返工遲到，仲要冇早餐食，真心嬲到以後都唔會幫襯！黃店又點啫，今次真心太離譜…Read More