K_IT's Profile

星期六既夜晚，近近地又黎左荃灣搵野食，繼續喺荃豐中心附近幫襯一些小食店，經過見到家嚐飯有張2人枱吉左就入左去，聽聞呢間餐廳少用油鹽，唔落味精，打正其號sell健康，始終食得多糖油鹽對身體都唔好。望左陣餐牌，我地就決定嗌套餐，辣蒜酒煮鮮露荀花枝扁意粉 & 紅酒燴牛尾意粉，由於唔鍾意南瓜既味道，所以要紅湯，餐飲就要凍檸水(少甜)。意大利雜菜湯，同一般既羅未湯沒兩樣，味濃，雖然餐廳標榜少鹽，但可能用多左茄膏，飲落都幾鹹，而蔬菜紅蘿蔔都煲得幾淋。辣蒜酒煮鮮露笋花枝扁意粉，朋友食完話麻麻地，味道都真係偏淡，少少辣味都食唔到，意粉亦好乾身，雖然係少油鹽啫，但都未至於要食一碟乾淨淨既意粉呀~紅酒燴牛尾意粉，紅糙米雖然健康，但我真係唔鍾意食，所以轉跟意粉，咁就出事嘞，個意粉都真係用滾水煮孰就算，一D味道都冇，何解唔用少少橄欖油撈撈佢呢，都唔係好唔健康啫。反而個牛尾就幾出色，煮得好淋好入味，咬落仲有少少黏口既感覺，份量都足夠，起碼唔會得條骨冇肉食，唯一係紅蘿蔔可能煮既時間唔夠，仲係偏硬身。最後就係凍檸水，己經專登要少甜，但仍然飲緊糖水咁，可能一時重手。其間見到老闆對住幾枱食客不停講野吹水，如果係熟客都還好，如果唔係都幾打擾，始終唔係個個都咁吹得，還者想靜靜地食餐飯呢~~~…Read More

諾亞半熟蛋糕專門店，呢個名聽左好耐，但遲遲都未有機會食得到，仲記得今年5月既時候，想買個溶心芝士蛋糕幫媽媽慶祝母親節，但居然所有分店都全部售罄，有夠誇張，直至今日放假，的起心肝買個試食一下。星期一既下午，一個人走去店鋪，已經鎖定目標就係比利時朱古力溶心芝士蛋糕，店員都好細心問我要幾耐先返到去，我答45mins，佢話返到去放入雪櫃就可以，冇俾乾冰過我。返到屋企雪左一陣，已經忍唔住拎番出黎，即刻開箱。一個要讚既位大家都知，就係蛋糕會附送紙碟餐具，咁隨時隨地都可以砌餅分餅，勁方便。好~講番個蛋糕，外形都幾靚仔，朱古力鋪得幾平幾滑，已經忍唔住食左第一口，朱古力味都真係幾濃，但又未至於苦，朱古力漿亦相當足料，所以會食到一層杰撻撻、厚厚地既朱古力醬，不過唔太食到朱古力應有既甜味。再黎就係蛋糕部份，我真係完全食唔到芝士既味道，可能朱古力味蓋過一切，還好蛋糕都幾creamy，而下層就放棄左大部份餅店都會用既消化餅底，改用上朱古力海棉蛋糕，我反而覺得呢個有點敗筆，因為朱古力醬+芝士蛋糕既texture太接近，用比較硬身既餅底會比較平衡。Overall呢個比利時朱古力溶心芝士蛋糕真係麻麻地，朱古力甜味芝士味完全欠奉，食多少少已經好漏好膩，但總算試過，睇其他食評好似香芒溶心比較吸引，下次有機會先再試啦~~~…Read More

今晚約左朋友食飯，襯佢未到先去定幾間餐廳拎飛仔，最後揀左間最少人既Green Waffle Diner。2個人唔嗌得多野，但鑊仔薯每次都係必點既菜式，今次揀左多寶鑊仔薯粒，意粉類就要芝士白汁長通粉，最後就以窩夫作甜品收尾。Meat Lover Skillet超愛呢度既鑊仔薯，好香好濃，薯仔切粒煎香，外皮帶點脆口，內裡就軟棉棉，配搭各種既配料，包括香腸、煙肉、牛扒粒、磨菇、炸薯粒、洋蔥，令單一既薯仔添上不同既味道，精華所在，當然係濃郁既車打芝士，熱力令芝士半溶依附係薯粒配料之上，拉起仲有一絲絲既芝士，呢件事實在太過邪惡，最後加上溫泉蛋2隻，厲害既係半熟蛋係熱辣辣既煎Pan上，仍然有蛋黃流出，令味道添再上一個層次，完全係畫龍點睛。Carbonara除左獲仔薯，我地仲嗌多個主食，雖然Carbonara係相當大路既選擇，但都唔係間間餐廳整得好味，Green Waffle算做得唔錯，卡邦尼汁既稀杰程度啱啱好，每一條通粉都可以沾上醬汁，食完都唔見有太多汁剩係碟面，而味道亦算唔錯，蛋黃忌廉汁都好香，Overall都幾好。Mango Strawberry Fresh Waffle食完2道主菜，我地就嗌左個窩夫做甜品，但呢個就令我有點失望，店名以Waffle作招徠，質素當然不能太差，但今次件窩夫真係唔太掂，好似仲未整熟咁，窩夫既基本外脆內軟完全做唔到，質感完全敗筆，唔太食到蛋香，生果味道亦都麻麻，可能唔係當做期，士多啤梨冇乜味，芒果都唔得甜，只有朱古力雪糕比較可取，唯一甜味所在。估唔到窩夫居然係最差既一環，可能係偶有失手，還好我唔太好甜食，而最緊要Skillet依然係咁好味，下次黎都會繼續嗌…Read More

放假日都大早起身，喺旺角唱完K-Lunch，再去長沙灣交收，尾站就去九龍灣陪朋友Body Check，晚飯就自然係九龍灣搵食。為免晚飯時間多人，所以我地早早5:30pm就去開餐，目標就係School Food，啱晒~呢間我未食過，可以試新野，正......問口店員好清楚講明用餐時間係75mins，冇問題先入去坐低，由於時間尚早，客人唔算多，大概三、四成滿，加上枱與枱之間唔會好迫，都叫做坐得舒服。睇左陣Menu，有人已經自動發板要點烏卒卒、廚師卡邦尼年糕，我都未知咩黎，冇所謂啦~咁反而仲有驚喜。先黎既烏卒卒，原來係墨魚汁飯卷，有2條一共14件，一啖一件，Size啱啱好，飯粒唔會鬆散，筷子夾起冇難度。黑咪蚊既飯卷，驟眼望只係見到米飯、墨魚，點知咬落仲多左份口感，原來係有泡菜。飯粒，煙韌分明，唔會一pat pat，墨魚煮得剛剛好，一咬就開，但不失墨魚既質感，而個汁甜甜地相當好味，但亦因為呢個汁，反而食唔出泡菜既微辣，但總括黎講，呢個值得推介。之後送到既係卡邦尼年糕，一如其名，咪就係卡邦尼汁煮年糕，朋友話呢個超好味，奶黃色既醬汁既加上煙肉香草做點綴，賣相都叫做吸引，不過呢款卡邦尼汁唔係杰撻撻個種，而係啱啱好可以掛落食物度，香濃creamy得黎唔會好漏，唔錯.....但另一主角年糕就麻麻地，雖然唔稱得上硬，但我覺得可以煮諗少少會更好，配上煙肉、洋蔥、粉絲，撈汁食最好。個汁真係唔錯，但我就覺得配上年糕不算太夾，因為年糕難煮得入味，所以只係得年糕表面有掛汁，內裡都係冇味，亦食唔到米香，如果配上其他主食可能會好D。密密食密密食，發覺都唔係好夠，所以我地就嗌多個水冷麵，炎夏間既一個消暑涼品，店員會問我地要唔要剪開麵條，當然剪啦，方便夾嘛~酸酸既湯汁加上碎冰，相當透心涼，再將碗底既辣醬撈衡，酸辣涼一下子感受晒，麵條屬於幼身，食落煙煙韌韌又唔糊口，再配上青瓜絲同薄薄既梨片，酸辣冰爽一下子感受晒，正。Overall所有食物都好味，賣相都幾好，隻碟就夠大，不過份量真係唔多，我地清晒枱面野食再坐多陣都冇俾人趕埋單，75mins既用膳時間，如果人多想食多少少野都未必夠，但我地人少少就啱啱好。:)…Read More

朋友要去巴黎草莓買野，近近地就去左元朗，每次入到元朗我都特別開心，事關呢處真係好多好野食，平貴都有豐儉由人，豆腐花、串燒、車仔麵、甜品、燒鵝、拉麵、放題、韓國野、扒房.....真係數之不盡。因為遲下要破財，都係慳D駛好，諗住去士林食碗牛肉麵，點知遠見鋪頭落左閘，心知不妙，原來休店至7月尾，於是轉戰附近既<小鍋米線>。記得幾年前第一次接觸<小鍋米線>，係由Celine介紹，仲話呢度係全元朗最好味既米線添。去任何食店都會試試招牌食品，一於要招牌小鍋米線跟南乳炸雞，唔好睇小呢個米線，配料相當豐富，雞肉、鮮菌、酸辣肉碎、炸醬、腐皮、芽菜、菜、秘制甜酸菜。由於小弟唔嗜辣，所以冇加任何麻辣，但放心，湯底相當夠味，比起譚仔既清湯濃郁得多，而甜酸菜令湯中帶一點點酸味，可以中和肉類/湯頭既油膩，呢點最為我所愛。其實呢個米線淨食配料都夠，鋪滿左成個碗，米線都完全被遮蓋，十個正.....餸食方面就要左南乳雞件，用雞中翼一開二，味道都唔差既，但實在太細隻喇，仲要冇去骨，所以都冇乜肉食，講開米線店既炸雞，都係荃灣<老闆娘雲南米線>既酥炸雞球最正，啖啖肉，可惜已經結業。元朗區都有唔少米線店，呢間係我心目中都數一數二，即使店名冇用花巧既名字，裝修冇特別佈置，坐位亦唔算寬敞，但仍然客似雲來人接人，好簡單，味道取勝。溫馨提示:鋪頭貼左張Memo，話人手短缺所以逢星期三都會休息一天，大家要留意囉.....…Read More

今日黎到九龍灣搵食，天氣實在太熱，完全唔想放煎炸熱氣野入口，知道得寶呢邊有間烏冬店，平平地就決定一試，2個人唔駛等即刻有位。晚上有2人套餐都可揀，但唔太啱我地心水，所以都係散叫。先點一個晚餐(蟹肉滑蛋湯烏冬+炭燒雞串)，我試左少少，唔.....麻麻地，嚴格黎講，呢個係撈烏冬，杰撻撻一Pat野，好似鼻涕芡咁，食完一滴湯都冇淨，而味道亦都怪怪地，雖然真係會夾到一粒粒蟹肉，但要我再食都咪搞。炭燒雞串，當然係雪藏貨煮熱，呢個從來唔得我歡心，雞肉永遠都係霉淋淋咁，完成冇雞肉既口感。而我就冇嗌餐，想食D凍野就點左海鮮芝麻醬冷烏冬，還好烏冬唔會煮得太淋，仲有少少咬口，而芝麻醬比起街買枝裝既稀，但就偏鹹偏酸，唔知鋪頭有冇重新調味，總括都算不過不失。飲品我地就揀左芒果水漾 & 茉香綠茶，其實都只係好普通既野飲，好彩都唔算太甜，未至於飲糖水。眼見星期六晚市都唔算太多客人，仲有空枱剩，除左價錢唔太貴之外都冇乜特別可取，我諗要等食物質素加強左先再考慮幫襯嘞.....…Read More

聖母醫院覆診完畢，諗住食埋Lunch先返公司，喺雙鳳街、銀鳳街、環鳳街兜左個圈，本想去茶餐廳吃個飯，但午餐大多都要$40，仲以為街坊小店會比較平，所以都係揀食車仔麵，經過呢間唔太多人，門口又寫住沙嗲車仔麵，好似幾吸引咁，於是就推門入去.....這店是半自助形式，先去檔前嗌野食俾錢，之後有位姨姨會幫你拎野食埋位，都幾得意。先講價錢，3餸麵+飲品($29)、4餸麵+飲品($33)，早餐時段會再平幾蚊，都唔算貴丫~食物方面，雖然冇細望每一種款式，但感覺都相當多選擇，比較深刻既係見到有酸齋、炸雞翼、煎釀茄子等等....見前一位客人有嗌到酸齋炸雞翼，一於照跟，要埋豬皮+沙嗲汁，飲凍檸水，開餐。老實講，我覺得呢3款餸都好好味，酸齋味濃有咬口，炸翼醃得入味，豬皮煮得夠淋，加埋微辣惹味既沙嗲汁，的確唔錯。值得一提係酸齋同炸雞翼會用碗仔另上，唔會浸到淋晒冇晒味，唔係間間鋪頭都會咁做，抵讚!!!其間都見到唔少中學生、街坊入黎堂食外賣，希望呢類型既小店可以繼續生存，俾大家有多一個選擇啦~…Read More

是日假期，前1日已經買定戲飛睇<Ted 2>，未夠鐘想搵處地方食野又Hea得耐，睇完Delifrance既野食唔太啱，所以決定去飲茶，一於平平地揀德興。12:30pm唔駛等位唔駛搭枱，仲坐近電視位，雖然冇聲，但都爽YY。好~睇下餐牌點心紙先，部份點心有分大細Size，就算人少都容易嗌野食，呢個細心位值得加分。我地2個人嗌左蝦餃(4件)、燒賣(4件)、牛肉、流沙包(3件)、叉燒包、馬拉糕、炸兩、椒鹽鮮魷、海蜇燻蹄。味道方面都係一般酒樓貨色，沒有什麼特別，但服務就唔錯啵，收碟換水都相當快，亦都好主動，又係一個加分位。記得好耐之前去過灣仔德興打邊爐，只係貪佢平又任食，睇下黎緊有冇機會再試多次，睇下有冇好D啦!!!…Read More

一路都會喺OpenRice搵好野食，但食評就好幾年冇寫過，對上一次已經係5年前，今日又再的起心機寫寫食評，希望會有恆心持續落去啦!!!話說星期六又黎到荃灣搵野食，好多餐廳都試過晒，反而荃豐、華都、荃昌呢邊既小店未有幫襯，今日決定過黎睇下有乜好野食，初步已經鎖定2間 -「轉角‧見」或者「創意品味」，但見後者坐位空間比較狹窄，所以轉角見.....餐廳有室外/內坐位，但天氣炎熱，當然揀室內涼冷氣啦 這裡有主要有5種食品: All Day Breakfast、沙律、意粉、漢堡、甜品，我地今次揀左白汁蘑菇蒜腸煙肉意粉、芝士蘑菇漢堡、花生奶昔老實講，意粉真係麻麻地，好似未煮熟咁，未有完全受水，咬落仲好糊口，雖然唔算好多Sause，但還好食落唔算太乾，亦都唔會太油，但意粉本身真係敗筆。反而芝士蘑菇漢堡就相當有驚喜，先講薯條，係我最愛既粗身薯條，份量都唔少，仲見到一粒粒鹽鋪係上面，唔駛點茄汁已經好好味，但有人話鹹左D，我就覺得啱啱好，不過真係好熱氣。再來就係漢堡，餡料有漢堡扒、蕃茄、芝士、蘑菇、洋蔥、沙律菜，賣相都幾吸引，件頭又大，冇可能一啖咬得晒，所以我要用刀叉切開逐少逐少食，一切嗰下，已經見到有肉汁流出黎，咬落都相當Juicy，但放心，唔會好油膩，夾埋蕃茄洋蔥等等既配菜一齊食，簡直一絕。本身漢堡跟餐係飲汽水，但黎到Cafe，點都要試下幾他野既，本想嗌咖啡，但突然見到花生奶昔既出現，呢個係其他鋪頭的確少見，一於就你啦! 初時都怕花生奶昔會好甜好糊口，但又唔係喎，相比老麥既奶昔就比較稀身，唔太甜，不過花生味就欠奉，只係有雲利會既甜味，下次都係試其他口味或是咖啡算數。意粉跟餐既紅茶，嗯.....冇乜特別。總括轉角‧見既食物都算不俗，尤其係漢堡，下次可以試試其他款式，或者試下早餐水準如何，加上價錢都唔算貴，再來既機會都好高。…Read More

本身想去西門町，但接近9pm都仲有人排隊，就連沙嗲王都仲有一大堆人等緊位，唯有四圍兜四圍兜，咁啱經過呢度有位，二話不說即刻入去。同一般日本野冇乜分別，配搭價錢都係咁上下，冇乜賣點之處。三文魚刺身(半磅): 大概得8~10片，又唔得厚切，咁就話半磅，好味就話啫，仲差過惠康賣果D燒雞泡魚干: 一見到我就會嗌既食物，佐酒一料日式香芒咖哩吉列豬扒飯(煲): 個味鬼死咁長，咪又係咖哩豬扒飯一個，一D都食唔出有香芒，最讚就係用煲上，脆卜卜既飯焦配上濃濃的咖哩，唔錯咖哩吉列豬扒湯烏冬: 相比個飯就差好多，咖哩一落湯就變得淡而無味女人街兩邊咁多野食，翻啅機會微乎其微…Read More

見前幾個食評都唔錯，特意過來一試，6點半都未夠，得一、兩枱客，不用等位兼且坐室內。豉椒炒蜆 - 份量都幾多，蜆都唔算太細隻，可惜唔夠鑊氣，D汁似淋上去咁，味道偏鹹沙拉蝦球 - 呢個幾好味，大大隻蝦又好咬口椒絲腐乳通菜 - 幾野味既炒菜煎蠔餅 - 好味，邊位脆卜卜，配少少魚露一流，但要襯熱食，一涼左就冇咁可口另外嗌左一個白飯、一枝燕京、一罐可樂，2個人食相當豐富。So Far所有野食都做得幾好，係鹹左少少。另外敗北就係唔夠冷氣，或者遲下凍D都會再黎過既 ~…Read More

6pm就去到，本身已經有位即刻入得，但未齊人，唯有拎張飛仔等多陣。2個人叫唔得多野，蟶子王都冇嗌到。鮑粒荷香飯: 好好味，飯冇話乾身，又唔會淋Pet Pet，餡料都好足，讚.....賽螃蟹: 未至於難食，但做得偏硬，早知嗌小炒皇好過黃金蝦: 比以前失色不少，蝦大細不一，還好煮得入味，但相比越華會，始終差了一截見好多人都有嗌一口牛，下次有機會試試先.....…Read More

本身想去荃灣果間，但見葵興都開左，位置唔太就腳，應該會少D人，所以就揀呢度。地方幾闊落，一D都唔逼，走廊闊得驚人，擺多張檯都仲得新開張，招呼相當唔錯，上菜速度加水收碟都好快速，大家唔駛急於落單，食完再落單都得，最緊要一張Order都冇漏，抵讚.....講番野食，種類唔算太多，但一般大路野都有刺身類: 甜蝦最好味，三文魚就好一般，幫襯當日冇吞拿魚，有點可惜，好彩由劍魚頂上，還可以喇 ~壽司類: 壽司手卷做得唔錯，最起碼塊紫菜脆既，飯既調味都好適中，唔會過酸炸物類: 蝦天婦羅幾好味，唔厚粉；一口芝士都OK，芝味濃D仲好添 ~燒物類: 正既有多春魚、牛舌、羊鞍，串燒麻麻地沙律冷盤類: 青瓜沙律、螺肉都唔錯一品料理: 大部份只屬普通貨色，反而甜甜的粟米就幾好味鐵板燒類: 薄燒牛肉、蒜片牛柳粒都唔掂，可以唔嗌埋單后仲有飯後果消滯一下，相當細心:)So Far食物環境都唔錯既一間日式放題，希望Keep得住水準啦 !!!…Read More

D櫈坐得幾舒服，又有電視機，人唔太多可以Hea一個下午....咖哩湯芝麻手撕雞麵，薯仔夠淋，咖哩又夠味，不過雞肉就唔太多，但主要都係食咖哩既啫~野飲就揀左蜜桃翡翠(薄荷+水蜜桃)，一般般，但勝在夠大杯。…Read More

差唔多10pm先黎到，坐左一半人都冇，唔駛等。望一望餐紙，除左點心之外，仲有麵食、雞絲粉皮等等，但主要都係黎試點心。芥末蝦春卷: 皮脆脆的，餡料得少少，但味道都唔錯既碧綠鮮蝦腸: 睇相都知，腸粉太厚身，仲要相當糊口，差......:(黃金流沙包: 流沙??? 完全冇囉，浄係食到鹹蛋味古法糯米雞: 餡料份量都OK，但實在太乾，差唔多一滴汁都冇，大家樂仲好食過佢:(大四喜: 蝦餃、粉果、芙蓉餃既皮都係太厚太黏秘製咖哩魷魚: 反而呢個OK喎，魷魚相當入味秘汁蒸鳳爪: 又係一個好黏好糊口既點心下次都係試過第二間好過~~~…Read More