kissyfoodies's Profile

閒日夜晚嚟到簡越食越菜, 呢度座位與座位之間唔會坐得太迫都舒服, 所以同朋友傾計一坐就成個幾鐘!食物方面先嚟小食,  呢度有5,6款米紙卷, 而我就揀咗鮮蝦米紙卷 ($42)。一碟有4件,  入面隻蝦都幾大隻.主菜就分別點咗撈檬同飯類, 先嚟香燒豬頸肉飯 ($55)。豬頸肉size唔細, 大約有10片, 對於大家唔係肉食嘅人, share嚟食都夠! 而味道方面有種炭燒味, 唔會太油. 三寶撈檬 ($52), 有雞翼、扎肉、豬扒，三款之中最鍾意係雞翼, 啖啖肉, 亦由於大大隻, 所以啲豬扒被遮住, 喺張相唔多見到!呢碟份量都唔野少, 啲檬粉都似食極都食唔完咁.  當晚嗌咗兩個主菜加一個小食就已經好飽, 因為主食份量真係幾多, 加埋2杯飲品, 每人大約$80幾, 性價比高! …Read More

銅鑼灣區都有幾間食放題, 而今次就揀咗希慎隔離呢間大喜屋.   呢間飲品、甜品都係填紙由職員拎過嚟, 完全唔駛行出去攞, 可以他他條條享受一餐放題。黑松露帶子沙律, 喺幾款沙律當中, 點咗呢款有黑松露又有帶子嘅沙律, 淨係呢兩款食材已經為沙律生色不少, 加埋酸酸甜甜嘅沙律醬好開胃.食放題最鍾意一次過點好多件刺身, 然後見到大大盤上枱勁開心. 呢度刺身味道新鮮, 一睇甜蝦刺身嘅蝦頭全部都靚靚仔仔冇黑色, 即刻再嚟第二round!! 食放題一向只精選幾款最想食嘅壽司款式, 免得冇quota食其他正嘢. 今次就揀咗黃金蟹棒燒、燒三文魚腩壽司、海膽拖羅魚生塔.  尤其係拖羅嗰款堆到豐厚, 再搭配一點海膽, 食完勁滿足。熟食方面, 沖繩黑糖網燒牛仔肉賣相好吸引, 中間係燒到粉嫩色!! 再加上牛肉塗咗黑糖, 味道甜甜地好好食, 係咁肉類選擇中最鍾意嘅一款.豉椒汁炒花甲, 一碟都有十幾隻花甲, 肉都厚身, 唔覺唔覺清哂成碟. 冬陰功煮海鮮, 第一次食放題點冬陰功, 原來都幾夠味.  湯底加有蕃茄, 所以辣中帶酸, 咁當然係冇泰國餐廳會加嘅香茅、南薑呢啲香料啦. 碗湯望落唔細, 入面有蝦、青口，仲有好多花甲, 最終係一個人飲哂成碗～今期Häagen-Dazs季節限定雪糕係Yellow Peach Frozen Yogurt 黃桃乳酪雪糕. 平時食放題多數係Häagen-Dazs或Mövenpick呢2個品牌雪糕, 見呢間有Milk top海鹽味, 所以揀咗呢款鹹鹹甜甜嘅雪糕嚟食, 對於怕食太甜係幾好嘅選擇. 大喜屋假日lunch每人二百幾, 最正係全程可以坐喺度等嘢食上枱, 啱哂我同朋友可以無間斷傾足兩小時~~…Read More

Happy Friday嚟到朗豪坊揀咗i CREMERiA Café, 可以坐喺靚靚嘅環境與友人品嚐芭菲雪糕,  本來諗住揀綠茶雪糕, 但最後俾日本直送嘅完熟白桃吸引咗.除咗雪糕之外, 呢度都仲有蛋糕選擇, 而我嘅焦點落咗喺後面Panna泡芙, 入面嘅Cream極豐厚, 好似好正咁.完熟白桃芭菲 ($98), 以雲呢拿雪糕配上完熟白桃同桃味果醬. 每個芭菲大概有3大片完熟白桃, 桃肉清甜豐厚, 食完一大滿足!單係杯芭菲賣相同呢間分店嘅Cafe環境, 加埋張雲石枱真係會令人不自覺瘋狂影相. 不過對住杯雪糕要快手影, 影幾張已經開始溶要停手品嚐呢杯咁靚嘅芭菲!…Read More

嚟到旺角廣華街嘅阿來食泰國菜, 餐廳環境光猛舒服. 加埋有卡位坐, 食得更舒服.由於唔係太餓, 所以呢餐以小食為主.泰式生蝦刺身 ($88), 一碟6隻, 味道夠哂鮮甜, 一人食幾隻都覺得唔夠喉.串燒沙嗲 ($78/6pcs), 呢度有雞肉同豬肉2款可以拼,  由於友人都比較鍾意雞肉, 所以6串都係雞肉唔駛爭~ 每串雞肉都係啖啖肉, 勁滿足. 而呢度落嘅沙嗲醬份量我覺得剛好, 唔會太濃重太鹹.金柚子鮮蝦沙律 ($68), 每次食泰國菜都鍾意點一份沙律清爽下. 呢碟沙律嘅蝦大大隻, 配埋柚子、椰絲, 同埋酸酸甜甜嘅醬汁, 食完寧舍refreshing, 不知不覺就清哂. 泰式鮮蝦炒金邊粉 ($53), 堅大碟, 插埋顆蔥又增加咗賣相~講返碟金邊粉炒得夠乾身, 由於個人比較鍾意食酸辣嘢, 如果呢道嘅pad thai再重啲酸辣味實會一口氣清哂!青檸梳打 ($22), 食泰國菜我鍾意點梳打呢類清爽型飲品, 我就揀咗加有兩、三片青檸嘅梳化去配濃重食物.  最後梗係唔少得甜品啦, 呢度嘅泰式甜品有 "芒果糯米飯" 同 "香葉椰汁西米糕" 2款.芒果糯米飯 ($58), 糯米飯一上枱係熱哄哄出哂煙,  配埋鮮甜芒果勁正. 呢類糯米飯甜品都係去泰式餐廳正過喺甜品舖點!呢間餐廳上菜都幾快, 坐低一陣話咁快就陸續有嘢食上.同埋價錢合理, 每人大約百幾蚊, 又夠哂飽肚. 而地點就最方便, 日後想食泰國菜又多個選擇唔駛特登走入九龍城都得.…Read More

呢間極尚大瀛喜喺觀塘分店已經食過幾次, 最鍾意係壽司類食品, 款式夠多之餘, 加上壽司飯細細舊, 等我有多啲quota試多幾款 😁 而今次銅鑼灣分店就第一次嚟, 環境又幾舒服同寬敞喎 👍🏻 另外, 第一次食放題係用APP落單, 呢舖真係自己食咩自己點~ 🙃喺未嚟食物之前, 先喺出面小食bar拎啲前菜沙律食.話咁快刺身到啦~ 三文魚同甜蝦望落色澤鮮嫩, 味道都幾鮮甜.壽司方面, 因為用APP落單太方便, 記錄埋你點過啲咩, 所以每款先點一個, 好食再encore~香蒽拖羅蓉軍艦, 拖羅蓉舖滿頂層, 再輕輕配上香蒽, 止下我想食拖羅嘅癮先 😁醬燒帝皇蟹棒, 蟹棒大又厚, 配上飯仔少少嘅壽司飯就唔會蓋過蟹棒嘅味啦 😆海膽醬黃金蝦, 蒜香牛油燒牛肉呢兩款都係我嘅心水, 尤其牛肉嗰款比較少起其他放題食到, 牛肉塗上蒜香同牛油好香. 講完刺身壽司又點少得小食, 先嚟蒲燒鰻魚. 每份細細塊, 唔夠喉再點過~ 醬燒牛肋串, 牛肉串燒塗上沙嗲醬, 冇得輸嘅配搭 😎每次食放題必點燒菠蘿, 甜甜地又幾juicy, 忍唔住又點多round.  另外呢間另一個最讚嘅係甜品, 有切得細細件嘅蛋糕款式擺出嚟俾人揀. 仲有雪糕雪條, 同埋最正係自製甜品杯, 吱軟雪糕再加toppings、馬卡龍... 食哂杯軟雪糕真係完美作結.假日下午嚟食, 埋單每人約二百蚊. 環境方面, 人少少都有卡位坐, 寧捨舒適又私密度高 👍🏻而食品款式選擇都唔少, 樣樣試啲都食到飽.…Read More

將軍澳中心裝修完之後, 好多新餐廳入咗嚟將軍澳, 當中包括呢間以日式簡約風的裝修設計, 感覺好悠閑舒適. 入座後見到枱面嘅餐枱紙, 先知呢間Cafe原來都係餐飲集團底下嘅新餐廳品牌, 即時想試下菜式水準如何~ 先嚟第一道菜係墨汁海鮮意大利飯 ($118), 墨汁味道尚算濃郁, 但講到最驚喜係佢嘅海鮮, 係食到鮮甜味道, 尤其係蜆肉同帶子就最正!!鐵板檸檬燒春雞 ($108), 外脆肉多, 雖然唔太食得出有檸檬味, 但配上嘅醬汁豐富咗燒春雞味道. 葡萄酒煮大蜆 ($98), 蜆肉同樣鮮甜味美, 份量適中. 蜆肉配上帶點甜味嘅忌廉汁再加埋陣陣蒜香辣味, 汁嘅味道唔會太重蓋過蜆肉, 好合我個人口味. 每點一分主菜再揀杯飲品可以減$10, 我就點咗宇治金時忌廉沙冰 ($45)見到杯飲品竟然會有埋抹茶雪糕勁surprise, 仲有灑埋抹茶粉喺面添!!! 抹茶味道好濃郁, 仲加埋紅豆喺底真係冇得輸~ Cherry Tokyo Cafe  嘅菜式既有日式同西式, 而今次點嘅菜式以西式為主, 整體味道不錯, 尤其海鮮食材仲保持到鮮味就最讚, 再配埋加有抹茶雪糕嘅宇治金時飲品就已經覺得好正!!!…Read More

放工約咗朋友嚟到鐵人旨花, 坐喺鐵板燒嘅枱前, 一路食一路睇住師傅幫你燒. 一枱大概坐到10個客, 師傅就會輪住逐碟燒, 我就可以同朋友好悠閑咁傾住計慢慢食！Menu入面有4個鐵板燒餐, 分別有$2,088同$2,588二人前set. 我就被海膽汁煮龍蝦吸引咗, 就揀咗伊勢海老鐵板燒.最先端上嘅係手作前菜, 分別有口感清爽嘅田園沙律配車厘茄蘆筍, 仲有薯蓉加幾片煙肉乾, 填填肚等美食嚟!呢盤就係師傅即將為我哋燒嘅A5和牛和東星斑. 眼見A5和牛色澤紅潤, 脂肪比例均勻, 未食都經已食指大動.汁煮東星斑, 口感好嫩滑, 加埋汁同洋蒽調味, 令星斑味道更鮮甜~緊接嘅係最令我期待嘅龍蝦!!! 睇住師傅由原隻龍蝦上燒燒下燒燒, 大大隻龍蝦啖啖肉, 睇見都吸引～海膽汁煮龍蝦, 龍蝦肉厚又彈牙, 加埋濃郁嘅海膽汁就更滋味.而最正嘅係龍蝦肉經已完全拆好, 令我可以好盡情咁品嚐呢碟龍蝦肉!熊本縣產A5和王牛, 牛肉要求燒到5成熟, 入面顏色呈粉嫩, 色澤吸引.  當咬第一啖已感受到牛肉和脂肪同時滿佈口中, 口感軟嫩.   另外牛肉沾上一點點鹽令肉味更出, 而蒜片就超濃郁, 加小小已蓋過牛肉味.和牛炒飯, 用上日本米, 口感軟綿綿又夠乾身. 炒飯配上和牛粒, 仲有細小嘅蘿蔔粒,蒽粒,雞蛋絲等增添味道.清酒煮蜆, 清酒味道比預想中更濃郁, 唔會因為煮過而令清酒味道揮發走. 蜆肉配上暖熱嘅清酒好正, 如果可以飲多碗就好啦!!1個set會有2款甜品, 而我就揀咗紫薯布甸.  估唔到呢個看似外表平平嘅甜品咁有驚喜, 皆因紫薯味道係極之濃郁!! 香港地食和牛鐵板燒平平地都要好幾百蚊. 今次一次過食盡東星斑, 龍蝦, A5和牛, 樣樣食材有質素又夠新鮮, 每人大概$1100, 勁盡興!…Read More

通常燒肉店俾我嘅感覺都係沉沉實實, 以啡木為主嘅裝修, 配上昏暗燈光.  而呢間熊本感覺就好唔同啦, 用上白色及淺啡木嘅配搭, 加埋燈光明亮及寬敞座位, 舒服嘅程度係會不期然慢慢燒.講返啲嘢食先~ 呢間任食兩小時嘅燒肉放題, 有齊雞、牛、豬, 仲有海鮮同蔬菜! 當中以牛肉就最吸引啦, 多達11款部位可以揀. 一次過點咗幾款嚟燒, 以長木板上碟望落寧捨吸引. 云云當中, 我就最鍾意醬燒牛排骨!而另一個吸引位就係燒海鮮啦, 尤其係呢份限量嘅特選熊本拼盤! 有生蠔、鮑魚、大蝦 、象拔蚌、扇貝5款, 講到最最最正就係象拔蚌, 肉質好鮮甜彈牙, 如果有得Encore 就好啦~ 一個個海鮮舖滿燒爐上, 餓住肚等食永遠係最漫長......如果海鮮拼盤食唔夠喉, 仲可以喺點餐紙上揀生蠔、大蝦同各種燒魚!除咗燒肉燒海鮮之外, 仲有即食嘅選擇. 不得不點嘅蒜香清酒煮蜆,  蜆肉浸有淡淡清酒香, 加埋濃濃蒜香, 食唔停口.一煲蜆總會遇到幾隻唔開殼, 而今次就唔會嘥啦, 擺落燒爐度等啲蜆慢慢開殼, 幾盞鬼.呢度仲有刺身食! 有10款刺身可以揀, 我就最鍾意帶子, 大大粒又夠鮮甜, 北寄貝同八爪魚都ok, 係略為切得薄咗啲.其實可以食嘅嘢又點止咁少, 仲有燒蔬菜、日式小食, 仲有飽肚嘅烏冬炒飯....當然我嘅重點落哂喺燒肉燒、海鮮度啦, 哈哈!最後加埋一杯Häagen-Dazs雪糕作結, 勁盡興嘅一餐燒肉放題!…Read More

仲有唔夠一星期就聖誕啦~ 嚟到Shine餐廳都有唔少聖誕裝飾佈置, 充滿住節慶氛圍 🎄黃金蟹餅配菠蘿莎莎 ($118), 單睇上碟好似好單調咁, 一塊蟹餅再加啲菠蘿、車厘茄.食落就發覺唔嘢少, 原因係蟹肉超多!!蟹餅外層炸到好酥脆, 當食第一啖發覺蟹味係極濃郁, 不過食多幾啖係有少少漏, 反而跟菠蘿一齊食又幾夾喎.極黑海膽意粉配三文魚籽 ($188), 平時唔會特別選擇墨汁呢類意粉, 但見海膽同三文魚籽咁吸引所以叫咗嚟試.以試管另上嘅墨汁唧落意粉度, 墨魚汁味道超濃郁, 再撈埋海膽汁之後, 醬汁味道超驚喜, 再加上海膽同三文魚籽鮮甜味道, 絕對係💯推介!!!SHINE Burger ($168), 呢個鎮店漢堡, 件漢堡肉勁厚又juicy, 再加兩個洋蔥圈喺上面, 搶眼度十足 💥配埋大大條又脆嘅薯條, 食埋呢碟今夜太滿足啦!!Lime Mint Soda ($44), 薄荷一向係我最愛, 呢杯加入咗唔少新鮮薄荷葉嘅梳打飲品, 配上濃味食物係最爽 🥂整體三道菜式味道偏濃郁, 最驚喜係 "極黑海膽意粉配三文魚籽" 嘅味道真係好正, 份量仲唔少添, 但一定要襯熱食, 我就係因為Burger中途插入, 將意粉閒置咗一陣, 轉過頭已經凍咗完全唔係嗰回事啦~…Read More

閒日夜晚嚟到Elmo’s Bistro & Bar, 眼見餐廳以開放式設計, 食客想有私人空間可揀坐餐廳入面, 又或想casual啲揀坐餐廳門外, 兩三個人點啲小食飲品傾下計, 感覺好chill.眼見餐牌都有唔少款式好似幾特別, 最後就揀咗受餐廳歡迎嘅Golen Chicken Wings 同廚師推介菜式.點完菜, 好快就端上一片香草麵包. 香脆嘅麵包沾上蒜蓉及橄欖油混黑醋醬汁, 簡簡單單嘅餐前包味道唔錯.Golden Chicken Wings ($78), 雞翼外層沾上蛋黃汁嚟炸, 食落勁香口又脆. 加上係用單骨雞翼, 所以蛋黃香係遍佈每一口, 忍唔住一食再食.另外都揀咗碟喺外面餐廳比較少見到嘅菜式, Parma Ham Spring Roll ($68).春卷入面放有芝士同Parma Ham, 濃郁嘅芝士味有少少搶咗Parma Ham味道.  另外旁邊跟有莎莎醬, 帶酸嘅莎莎醬反而平衡咗濃重嘅芝士味.Grilled U.S. Game Hen ($208), 紫薯蓉配上2粒鵪春蛋, 即刻搶唔少鏡. 而紫薯蓉入面加有脆米更添口感! 至於主角Game Hen, 外皮煎到脆口但又唔覺油膩, 而內裡肉質結質, 再沾上青醬、七味粉等調味醬料, 令味道層次又再豐富.睇嚟呢間餐廳唔係以菜式多元化取勝, 反之係以特別菜式吸引客人. 整體菜式味道濃郁, 而我最欣賞係Game Hen嗰碟, 連伴碟也好用心.…Read More

間中會嚟到觀塘區工作, 有時食完lunch都想買下台式飲品邊飲邊做嘢. 而我就冇咩特別話鍾情邊間台式飲品店, 因為每間嘅味道落差都唔會太大, 最緊要位置夠就腳. 歇腳亭飲品款式都仲有唔少係十幾蚊就買到1杯, 算抵飲.凍炭燒咖啡加芝士奶蓋 ($27), 之前飲過好幾次都係熱嘅, 今次失誤咗唔記得講熱定凍, 咁不妨試下凍啦.過往飲熱係最先嘆到頂層嘅芝士奶蓋, 再夾有濃濃炭燒咖啡香. 而凍嘅要用飲筒飲, 變咗先品嚐到咖啡味再隱隱帶出些微芝士奶蓋香, 所以都係熱嘅最好飲!呢度觀塘分店新開仲送咗一張Coupon Leaflet, 分別可以喺今個月凡買任何一杯減$3, 咁又多個理由再幫襯囉~…Read More

閒日晚上嚟到Cafe Siam坐滿人好熱鬧, 餐廳環境簡約得嚟又不失格調, 最啱放工上嚟食飯傾下計. 食到9點鐘, 食客開始散去先留意到餐廳望出去嘅環境都幾好feel.冬蔭蝦湯 ($98), 每次食泰國菜一定會點冬蔭功湯, 呢度嘅冬蔭功辣度適中又唔會太油膩, 仲蘊含陣陣椰香~ 而配料方面就有得揀蝦或雞, 我就揀咗蝦啦, 一碗大約有3隻大蝦. 由於呢度嘅冬蔭功湯唔會嗰種刺辣到飲唔到落去, 所以一飲就兩碗啦!燒豬頸肉伴酸子醬 ($115),  豬頸肉由大至細一字排開, 而我嘅焦點已落喺酸子醬旁邊最長嗰塊!!豬頸肉外層嘅炭燒味道好香口, 加埋濃郁酸子醬就更開胃, 忍唔住一食再食.  雞絲蕉花沙律 ($91), 喺10款沙律當中見雞絲同香蕉花嘅配搭未試過, 又見係餐廳推介就不妨一試.呢道菜式單係擺盤已夠花心思, 味道仲幾驚喜. 如果係想一份清淡嘅沙律就會失望啦! 呢碟沙律以蕉花同雞絲配上好濃郁嘅酸酸辣辣醬, 再加埋花生粒同椰絲, 味道層次豐富, 完全唔覺得自己係食緊沙律.紅咖喱燴燒鴨 ($125), 咖喱配雞、牛、豬就食得多啦, 見到呢度有燒鴨揀咁特別就叫嚟一試.雖然燒鴨係浸喺紅咖喱入面, 但食落咖喱味只落喺鴨肉嘅表面, 加上每片燒鴨切得都唔薄, 所以咬落去反而係品嚐到燒鴨本身嘅肉香.Young Coconut ($55), 見好多枱客都嗌個椰青飲, 所以都想試試.呢度椰青好大個, 打開椰殼見到滿滿嘅椰青汁好清澈, 飲落去非常清甜, 食完辣嘢再飲返個椰青特別爽!Cafe Siam整體菜式味道都唔錯, 尤其雞絲蕉花沙律最有驚喜. 餐廳菜式平均每碟$100, 加埋呢度嘅環境裝修, 著實不錯!!…Read More

行過Twinkle見到啲cake幾吸引, 左揀右揀, 最後就買咗綠茶, 焙茶, 紫薯3款返去同屋企人share食, 每件$45.  綠茶嗰款外型毛茸茸咁好得意, 食落綠茶味幾濃郁, 入面仲有紅豆粒.  綠茶同紅豆嘅配搭從來都唔會輸!輕羽紫薯, 有一塊像真度高嘅白朱古力羽毛插埋上面, 近睇都幾細緻. 切開之後, 就見到好大舊紫薯蓉喺入面, 紫薯味係意想之外嘅濃郁!  金抹焙茶, 切開見到唔同深淺嘅啡色, 由最頂嘅cream到中間外層嘅mousse同低層嘅海綿蛋糕都係焙茶.  焙茶味道唔單止濃, 層次仲好豐富, 係3款之中最鍾意食嘅一款.整體3款cake都唔錯, 鍾意嘅地方係味道夠濃郁, 唔係得過甜字. 雖然係細cake, 但 size 都唔細, share嚟食就最啱.…Read More

喺兩間Plato之中揀咗眾坊街呢間, 置身暗暗小巷裡別有一番風味.餐廳唔係好大, 但令人感覺relax, 同朋友嚟到飯聚唔覺唔覺就聊足一整晚.點咗一份價值$398 嘅二人套餐, 有2款小食, 1款意粉類同1款扒可以揀, 仲有每人一份甜品, 湯同飲品.睇落呢個套餐有好多嘢食~餐湯揀咗加$18升級至龍蝦湯, 龍蝦湯質感濃稠, 味道又夠濃郁, top-up加個蒜蓉包配嚟食就更正.     香蒜白酒煮蜆, 蜆殼入面浸有蒜香湯汁, 令蜆肉味道香濃, 又感覺juicy, 令人一食再食嘅開胃前菜. 呢碟雖然係套餐小食, 但份量一啲都唔小.食完濃味嘅白酒煮蜆之後, 就嚟碟清新嘅意式巴馬火腿伴蜜瓜平衡返.蜜瓜清甜夠水份, 食完呢碟之後即刻ready好食主菜啦~黑松露野菌煙三文魚意大利飯, 黑松露味道好濃郁, 加埋芝士片同煙三文魚點綴, 令呢碟菜式嘅味道更豐富. 安格斯西冷牛扒配紅酒燒汁, 揀咗7成熟嘅西冷, 切開呈現鮮嫩紅色, 口感煙韌, 本身肉味濃郁, 即使不加配醬汁都好好食. 而伴碟就有薯仔沙律, 食到呢度已經覺得飽飽.甜品4選2, 我就揀咗嗰粒四四方方嘅Tiramisu, 帶有微微咖啡香, 口感軟綿唔太甜, 啱哂我喜好.友人就揀咗Blueberry Cheese Cake, 淺嚐咗1啖, 係穩打穩紮嘅Cheese Cake味道.整體由前菜到主菜同甜品嘅味道都唔錯, 加上每碟份量係唔少, 兩個人嚟食真係捧住個肚走~以$398嚟講相對抵食, 食完勁滿足!!!…Read More

週末嚟到Beanswork, 餐廳環境感覺好簡約舒服, 令人好想飲杯咖啡慢慢歎.  睇睇Drink Menu, 呢度供應嘅咖啡都有唔少特別款, 而我就揀咗Dark Cappuccino ($38) 試試啦.  Dark Cappuccino用上深烘焙嘅咖啡豆, 感覺咖啡味道較平常嘅Cappuccino濃郁, 奶味亦稍為輕啲.  間唔時飲開齋啡嘅我, 會鍾意呢種Dark Cappuccino味~Eggs Benedict, Avocado Dressing ($88), 整碟菜式味道好豐富, 2 件Egg Benedict分別用上煙三文魚和Parma Ham 2款配料, 可以一次過嚐到兩種口味!!!  除咗沙律菜伴碟之外, 水果係用上西柚同橙兩種, 連配菜用料都咁豐富~ 份量方面都唔好睇少, 單係食1件都覺得足夠, 所以share 嚟食就最啱!講到Share 食~ 而另一份就係嗌咗All Day Menu 上嘅意粉, 包有餐湯同沙律. 餐湯係南瓜湯, 打成蓉狀嘅南瓜湯, 味道濃郁又帶有口感.  賣相方面, 簡簡單單咁放上一顆豆苗其實都已經幾好睇.沙律菜望落都幾新鮮, 以跟餐嘅沙律嚟講算幾好.冬蔭功蟹肉虎蝦意大利麵 ($118), 意粉上面沾咗唔少冬蔭功粉, 冬蔭功味極出, 嗰種濃郁程度好有驚喜.  雖然食食下會覺得有啲辣, 但會好似上癮咁一口接一口食個不停. 而虎蝦就跟有2隻, 烤過嘅虎蝦好香, 口感夠彈牙.奶茶焦糖燉蛋 ($52), 用上迷你鍋盛載, 加埋士多啤梨雕花, 簡約又靚靚地嘅配搭.味道方面, 燉蛋變成奶茶味, 茶味幾香濃, 口感又滑溜, 幾鍾意呢款口味配搭.單睇Beamswork 環境就如坊間Cafe店一樣簡約舒適, 品嚐過呢道嘅菜式之後, 更欣賞佢哋從菜單款式, 材料同味道嘅用心細緻 ❤️…Read More