foodie_loves_food's Profile

冇得去旅行，唯有留係香港食下船面當去咗。今日收工食呢間 “船皇”，店舖唔算好大，但都坐得舒服唔會好逼。Menu 主要係船面同小食，仲有飲品。湯面可以揀大、中、小辣。同埋有四款面可以揀，我揀咗金邊粉。本來想點 “豬肉+豬肉丸+豬潤湯面”，但豬潤賣哂，所以決定要 “牛腩+牛肉片+牛丸湯面”。湯面大大碗，好足料，面量適中食得飽。朋友的 “船皇湯面” 更加豐盛，成碗都係餸。落單時侍應哥哥話，由於冇哂豬潤，船皇湯面其他餸會俾返多 d。另外叫咗一份 “炸豬皮”，只係 $12，非常抵食。每人一杯 “泰仔奶茶”，又滑又香濃，嗰碗仲好有特色。夏日炎炎飲返杯凍奶茶，個人即刻醒神哂。…Read More

大學時期經常係水街揾嘢食，畢業後好少去西環。今日經過，決定試下呢間小店。小店最多坐大約廿人，星期五晚市大約八成滿，生意算係唔錯。地方細細，環境舒服。食物選擇不算太多，主要係飯、意粉同小食。避風塘雞翼單骨。$38 有十枝單骨，十分香口，作為飯前小食十分開胃。汁燒牛舌飯。七大塊牛舌，牛舌仲多過飯。無論汁、牛舌、定係伴菜嘅茹都十分出色。黑松露雜菌意粉。好多黑松露，意粉炒得好香，面質彈牙。兩個人埋單都只係百六蚊。總括而言，又平又好味。難怪係肺炎疫情底下依然好好生意。…Read More

明明今日放假，但早起左身，當然要去嘆個靚早餐先啦。呢間 cafe 細細間，大約只有十個位，weekend 想食早餐有時都要等下位。今日係 weekday，九點落到黎大約有五、六個客。唔駛等位，可以慢慢食。點左一份牛油果醬牛角包。牛角包超鬆軟，又唔油膩，係我食過嘅牛角包中最好食之一。熱辣辣嘅包加上滿滿嘅牛油果醬，簡單但高水準。番茄同生菜亦十分新鮮。早餐包一杯 Americano，我用 $20 upgrade 左一杯 Cappuccino。咖啡味道香濃，但稍為甜左少少。"連豬" 拉花好可愛。…Read More

收工後一支公，諗住普普通通食個飯。呢間小店開左一段時間，好耐之前食過一次，今日經過決定再幫襯。店面不是很大，大約可以坐廿位客人。當時大約晚上七點半，間舖大約七成滿。我和另一個單人食客搭枱，坐一張四人枱。店舖主要供應面食，例如招牌沁沁面。雖然食物種類不多，但食過好幾款，味道都很好。👆🏻落單紙。街坊價，食個面再加個餸都只係幾十蚊。埋單唔駛加一。抵食!我點了一個沁沁面，加8蚊加了豬腩肉。沁沁面的湯底是人蔘湯，人蔘味濃郁，食得出冇加味精。好味到當湯飲，飲左大半碗。特別要講下隻溏心蛋，食落有香濃嘅鹵水味，texture 好似滬菜嘅燻蛋。食到一半發現了一小截人蔘，果然真材實料。店舖嘅裝修、燈光，同埋食物嘅擺盤，令拍攝出黎嘅相一 d 都唔 ig-able。可能單憑相片你會覺得沁沁面唔吸引，食落先知真係好好味。平實但高質嘅小店，值得支持。…Read More

身為街坊，呢間茶餐廳開業左好耐都未幫襯過。今日有事要一早出門，專登去食個靚早餐先。星期日嘅七點半，餐廳只得一枱客人。早餐 manu 同大部份茶餐廳大同小異，價錢大約三十蚊左右一個餐。餐廳幾新，感覺好乾淨。加上其中一邊對住條好乾淨嘅巷仔，劏開門就變成 semi-outdoor，有去左 cafe 食 brunch 嘅感覺。叫左個早餐，沙爹牛面 + 多士 + 兩樣嘢 (我揀左炒蛋，餐肉) + 熱飲，都只係 $35。牛油多士外脆內軟，牛油味好香。炒蛋好滑，餐肉厚切。沙爹牛面好多牛肉。總結，高水準茶記早餐，一定要試!!!…Read More

今日路過翠苑，突然想食個燉奶。朋友話翠苑總店好出名，我地估分店應該都唔會差，決定入去試下。店舖地方唔大，大約六、七張檯，坐得幾舒服。呢個薑汁燉奶幾大碗，薑味正常，燉奶很滑。銅鑼灣糖水選擇唔少，呢間嘅味道未算好突出。但如果考慮埋性價比同坐得舒服，就非常值得推薦。…Read More

平時經過呢間餐廳，每次都有不少人等位。難得今日係星期五，幾位同事都唔急住返公司，就決定一試。雖然只係等一張枱號，但都等左近 15 分鐘。餐廳裝修精美，枱櫈唔會放得太密，加上高樓底，整體感覺不錯。環境上唯一缺點係幾 "應聲"，嘈吵程度有 d 似去左茶餐廳。呢間餐廳係做 fusion 菜，所以餐牌上有中式點心又有日式面食。Lunch set 嘅餐牌都幾多選擇，價錢由六十幾蚊嘅拉麵到近二百蚊嘅炭燒牛肉都有。我就揀左 $96 嘅千層豬扒擔擔拉面，跟餐有杯柚子蜜同一籠點心。侍應落單時有禮而細心，當我點擔擔面時，主動提醒擔擔面有 d 辣，問我要唔要走辣。點心小籠。有一隻綠色皮蝦蛟，同一粒小籠包。小籠包好多肉汁，蝦蛟有好多蝦肉，加上啱啱蒸起熱辣辣，比好多茶樓嘅出品更加好食。千層豬扒擔擔拉面。豬扒比想像中細塊左少少，但炸得幾香又唔油膩。擔擔面都幾辣，唔食開辣嘅朋友就可能食唔到了。柚子蜜冇乜特別，凍飲唔需要加錢。…Read More

呢間餐廳開係橫街，唔算好顯眼。平日夜晚唔算多人，唔駛等位。酸辣湯好大碗，大約係二至三人份量。酸酸辣辣幾開胃，但太大碗飲唔哂。鱔糊炒粗面，一次過滿足想食鱔糊同想食粗面嘅兩個願望。鱔嘅份量幾多，幾足料。味道濃左少少，但老派上海菜好多時都係偏濃味。生煎鍋貼有六大隻，皮很脆而且厚薄適宜。啱啱煎起好熱，入面係有少少肉汁。凍豆漿係自家製，飲得出好香嘅豆味，冇渣。而家好多餐廳都係賣枝裝豆漿，自家製嘅真係賣少見少。有時我會覺得好多上海菜連鎖店價錢偏貴，菜式又稍為過於精緻。呢間餐廳平實得黎做得返記憶中老上海嘅味道，值得推薦。…Read More

Bookmark 左呢間餐廳好耐，終於 "的" 起心肝試下。驚星期六晚會多人，所以早幾日 book 定枱。今次係我地第一次食 slow cook。餐廳唔算好大，分上、下兩層，氣氛幾好。男朋友係食肉獸，一坐低就話想食威靈頓牛柳。可惜waiter 話已經賣哂，下次可以 book 枱時預訂左先。冇哂威靈頓牛柳，唯有叫個安格斯肉眼。男朋友話好食，我都覺得味道幾好，牛有牛味。但唔熱嘅牛扒，感覺始終有 d 奇怪。side dish 加左個農夫包湯。南瓜湯好 "杰"，而且係凍嘅，味道同質感都麻麻地。肉醬芝士焗意粉就不過不失。鴨脾 d 肉都幾嫩。青檸特飲，味道有 d 似青檸梳打。結論係，呢間餐廳食物係 ok。只不過個人黎講，都係鐘意食熱辣辣嘅肉多 d。…Read More

呢間美式漢堡品牌係香港已經開業左一段時間，係金鐘同中環都有一間分店。由於我好怕排長龍同人逼，決定係熱潮過哂先黎食。平日晚上八點，餐廳入面唔算好多人，大約七、八成滿。男朋友同我每人點左個 Shack Burger。有 d 漢堡包係有分 single 同 double，single 係普通漢堡包，得一塊肉。而 double 就 "加大" 版漢堡包，有兩塊肉。個包唔算好大個，直徑同老麥嗰 d 包差唔多，但係內涵就高質好多。生菜同番茄顏色好靚，食得出係新鮮蔬菜。芝士係溶左落塊肉度，唔似得快餐店咁可以成片拎起。肉有濃郁嘅肉味，味道同口感比廉價雪藏肉好好多。而塊包嘅裡面係用牛油稍為煎過，令成個 burger 感覺更加香口。男朋友怕食唔飽，叫左個 Hot Dog。無論賣相同味道都只係 IKEA 小食店嘅水準，呢個價錢黎講非常唔抵食。我地點左一杯 Chocolate Cookies'n Cream Shake 一齊飲。 好香奶味，口感一流。我地兩個人飲一杯都飲到飽飽地，杯 shake 應該幾肥仔，減肥嘅女仕可能要忍下口。最後仲有個芝士薯條，味道不過不失。最後我地得出一個結論：呢間餐廳果然冇改錯名，最好食最值得推介嘅就係杯 Shake 同個 Shack Burger。…Read More

聽聞筲箕灣嗰間棋哥幾出名。今日收工經過銅鑼灣呢間分店，就一於試下。大約八點到，d 枱都坐到九成滿，得返最入面最近廚房個張枱，張枱附近嘅地下好油好滑。除此以外，衛生情況係 ok 嘅。簡簡單單叫咗兩個雙拼飯。燒鵝同想像一樣咁好食，叉燒正常水準。腩仔皮好脆，油雞都幾滑。雙拼飯送熱飲，凍飲就加 $3。…Read More

今日同屋企人食飯，一共五大一細。尖沙咀呢間牛角係海港城 3 樓 LCX 入面，方便飯局前後行一陣街。舖位唔算大，食嘅人都好多。由於我地 6:15pm 已經到齊，等左一陣位就有得入。如果七點後到，就應該有排等了。HSBC 信用卡做緊晚市盛合 (二人前) 嘅 promotion，一共有兩款。有一點要留意嘅係，每枱只可以點每款盛合一次。由於我地有六個人，嗌左兩款二人前嘅盛合，其他就要散嗌。之前都食過幾次牛角，食物質素有保證，呢度就唔特別寫。如果你好肚餓，戰鬥力驚人，當然應該揀 90分鐘放題。唔係的話，HSBC 呢個盛合都幾抵食。…Read More

星期日同朋友一行三人，去沙田嘅文化博物館，睇大英博物館藏品展。我地約左下晝三點半等，諗住黎呢間 cafe 飲杯咖啡食個 tea 先慢慢睇。點知一去到博物館，離遠就見到 cafe 門口排長龍，唯有放棄。點知當我地睇完展覽諗住走個時，竟然冇人排隊，我地一行三人即刻衝入去。明明同文化博物館只係隔左一塊玻璃，但一入黎個環境同氣氛即刻唔同哂。由於已經係下晝五點，我地幾個都好肚餓，以 tea 黎講都點左幾多嘢。Manu 上嘅食物同飲品選擇唔算非常多，但勝左咩都有 d。甜嘅、咸嘅、飽肚嘅都有。日式帆立貝鰹魚湯烏冬。除左帆立貝同鰹魚片，個烏冬仲有蟹柳、炸蝦球，好豐富，味道不錯。辣牛油水牛城雞翼。其實只係個醬辣，雞翼本身係唔辣。味道不過不失。芝士薯條。個薯條好大份，大份到可以當正餐咁食。Cappuccino，cafe 黎講算幾好。但朋友係咖啡精，飲開靚咖啡，佢就話普通。雙重朱古力沙冰，濃郁得黎唔太甜，上面嘅朱古力碎好脆，非常好飲。臨走經過隔黎枱，聞到好香嘅 waffle 味，下次一定要試下。總括黎講，氣氛同飲品係非常好，食品都係水準之上，價錢合理，難怪咁多人排隊。…Read More

今日晏晝同朋友一齊去九龍灣工廈試姊妹裙，由於大家都遲左出門口，唯有齊齊餓住個肚去試。試完已經三點幾，冇食 lunch 嘅我地決定行去附近嘅 Megabox 揾食。一去到 Megabox，發現有好多人、好多細路。原來商場 L5 搞緊 Peppa Pig 活動。為左避開人潮，我地即刻上左 L6。見 Kim's Spoon 有下午茶餐，餐廳又冇乜人可以坐得舒服 d，即刻噤飛入去。朋友叫左個紫菜卷配粉絲，飲凍柚子茶。紫菜卷味道正常，冇乜特別。粉絲就齋左 d，如果有少少肉一齊炒應該會好味好多。我就叫左個辣炒年糕配魚糕，飲熱生薑茶。年糕一睇個樣就知好辣，魚糕都幾大塊。雖然係下午茶餐，望落去唔算好大份，但其實好飽。埋單兩個人加埋啱啱好 $100。…Read More