精神分裂的個人專頁

母親節前一日，唔駛做節，突然口旱旱好想食一個有酒樓水準嘅乾炒牛河，心頭即時諗起潮明園，印象中廚房無論小菜炒粉麵都無得彈，於是由天水圍飛咗去上水食午飯。入到去所有卡位都係坐咗一個人，中間幾張圓枱冇人坐。卡位枱上有大大塊膠片做分隔，疫情下應該好安全，於是就搭枱喇。坐低咗，阿姐都認到我喇，我好型咁連餐牌都唔睇，唔該乾牛河，熱奶茶”......“我哋依家冇廚房，牛腩飯好唔好”，阿姐咁回應，失望，唯有食番食開嗰啲，穩穩陣陣。白飯碟上，再上小湯碗清湯牛腩，生菜底，牛腩不少，軟滑彈口但有少許痴牙，清湯其實頗咸，撈飯就啱啱好。奶茶依然香滑，附近有幾間茶餐廳奶茶都好出色，唔特別推介喇。疫情肆虐之下，化妝品店及不少食肆小店相繼倒下，連星期六下午茶時間街上都行人稀少。一間平常坐八九成客嘅粉麵茶餐廳，現在只有八九個客，而且解散咗廚部，斷臂自保，就算日後巿道好番，估計都好難請番咁好嘅中廚番來，可惜！…查看更多

沙爹醬同沙茶醬有乜分別，番查網上資料，係潮汕人仕由東南亞帶番本土，為迎合當地人口味，將甜辣度降低，咸香度提高。而"爹"發音同潮語"茶"發音一樣，文字表達就變咗沙茶醬。早餐送到，第一時間試舊充滿沙茶醬嘅牛肉，一入口即時吐番出嚟，完全係食緊一殼鹽，駛唔駛咸到咁。用湯沖走佢，其實唔錯，牛有牛味，彈力十足，唔韌，份量不少。最正係個炒蛋，香滑有濃濃奶味。煙韌多士大慨有3吋x3吋x1吋，淨係炒蛋多士搽埋牛油加埋飲品，已經係一份幾好嘅早餐。總括黎講係一份適合大胃王嘅早餐。…查看更多

星期日兩點食開果間金x冇位，焗住行去第二度搵食，點知越行越遠，去咗商場另一邊嘅盡頭，好深入，而且冇乜遊人行來行去。其實間舖開咗好耐，只係極少行入去，幾年前食過一次牛腩麵，冇乜特別記憶。今次係第二次幫襯，成個舖位做咗廚房，幾張大圓枱放晒喺走廊欄杆邊，變得好闊落，坐得好舒服，冷氣都好足夠。點咗牛孖筋雲吞麵，牛孖筋好香滑，微軟，切大件長條形，口感唔錯，份量多，唔走刺激路線；雲吞比較淡口，有蝦有肉，蝦轆好大隻；湯低唔咸。整體好大碗好充實好舒服。 …查看更多

經常幫襯車仔麵，合興係元朗區嘅最愛，呢間係新店，比舊店闊落不少，坐得舒服，冷氣又夠，店外唔係街市，感覺乾淨好多。佢哋嘅出品一向材料多夠大碗又夠辣，俘虜咗唔少街坊同食客。平常點開五個餸的，今次下午茶輕手少少點咗四個餸，油麵，必食嘅彈牙咖喱魷魚，入味豬腸（唔係豬大腸），帶甜味嘅辣豬紅，爽口豬皮，大中少辣揀咗唔辣......因為官方設定魷魚係分上，碗麵唔要辣，佢嘅咖喱醬份量相當於大辣，唔駛再加，太辣又要身水身汗咁行出門口。…查看更多

每年又到打小人日子，必定會去鵝頸橋“工作”，長時間置身人多煙多嘈雜不陷嘅環境，有得抖緊係搵個清靜地靜心一番啦。要冇人打擾，又舒適，又可以任坐幾粒鐘，最重要係顧客質素高，安安靜靜，一蘭係不二之選。坐低柯打咗一碗例麵，同上年先發現嘅加料一蘭精選套餐，有鹽味溫泉蛋，有叉燒，有可以浸到溶化嘅紫菜，同最有口感嘅黑木耳，唔駛再左度右加咩嘢料，今年送多隻鹽味溫泉蛋，滿足感又大幅提升。日式拉麵味道濃，油脂多，香滑可口，獨特風味，唔鍾意可以自己㨂少油少蒜少辣，不過咁清淡就唔啱我喇^o^…查看更多

平時行開呢邊, 都係過隔離"杜文活"食頹飯的,難得今日得兩個人排緊隊,幾大唔放過。店內寬敞舒適, 光線充足, 地方整潔, 冇一般茶記果種喧鬧, 冇打衝鋒嘅傳菜, 冇粗粗魯魯呼呼喝喝嘅樓面, relax一流。點咗招牌菜黯然銷魂飯, 凍奶茶, 將四四方方類似咖啡粉樽當杯用, 自動走冰,  茶味一流(抱歉無影相)個飯有大大件香軟半生熟煎雙蛋, 加咗豉油之後, 講真已經食咗半碗飯, 叉燒有四大件,  鬆軟入味, 略咸好餸食, 配埋靚米, 真係平靚正之作。…查看更多

Lunch 時間入到 YOHO MALL 嘅 Foodeli 走咗一轉, 想食甜品所以唔想食咁飽, 場內幾檔麵檔最吸引嘅反而係傳統車仔麵檔,原因有二, 一路直入Foodeli 係 雞蛋仔, 班戟, 燒賣皇后, 堂食唔考慮, 跟住係炸雞, 燒臘, 肉餅飯, 見到都滯,唔駛食甜品, 第一間見到有綠色蔬菜, 有熱水蒸氣出現,胃口即刻返咗黎; 第二係左邊一間麵檔縮咗入死角, demo相唔多吸引, 右邊一間比車仔麵檔更大, 綜觀全檔,我對佢哋嘅衛生程度抱有懷疑, 懷疑到唔會幫襯。講返個target先, 有一般正車仔麵檔應有水準,餸份量不少, 蘿白勁甜,魷魚爽口,豬腸入味,豬紅爽滑......呢次豬皮就失咗手啦,元朗另一間分店食過唔錯的。點失手法呢,軟淋淋油淋淋兼有油膉味,極之懷疑隔夜賣淨,同行友人支持唔住送晒俾我食,真係多鬼謝晒......值得一提嘅係咖喱汁比小辣汁辣得多,食得少辣嘅友人又分咗一半咖喱汁俾我,真係辣啲。辣菜脯幾惹味。…查看更多

第一次幫襯意樂, 食到貨不對辦但又美味嘅焗飯,, 真搞笑!夜晚 9:00後,已過繁忙時間, 餐廳寬敞, 燈光昏暗, 寧靜舒暢, 意外發現有不少一家大細光顧。菠蘿梳打特飲, 罐頭菠蘿粒打直砌碎, 相信加入了罐頭糖水及梳打水, 甜味足夠, 透心涼, 不錯。帆立貝海鮮龍蝦汁焗珍珠飯, 好難相信係焗飯,頂多都係燴飯, 多水多汁, 廚房未免太....... 內有帆立貝,大青口,大蝦各1件,蜆4件, 調味不錯,醬汁濃淡適宜,用燴飯角度已經相當滿足。…查看更多

記得當年有一款期間限定既咖喱薯仔批, 幾好食, 咖喱香香地, 回味之餘等佢出咖喱包, 一等就唔知等左幾多年, 終於俾我等到喇, 好興奮! 好喇, 叫左個珍寶餐, 兩塊包加兩塊牛加洋葱粒加咖喱醬, 唔駛問阿貴, 靈魂必然係咖喱啦, 皆因所有既味俾佢冚晒, 微辣 (好主觀), 微甜 (值得讚), 但有幾強烈既苦味, 咖喱可以整到有苦味, 究竟係咸到苦定係辣到苦, 不得而知, 可惜不快既感覺陸續有黎, coke zero 又係淡到苦, 薯條又乾又硬已經係指定動作, 唔覺得出奇....... 今次中晒伏, 冇辦法啦, 俾左錢唯有食埋佢, 好惡頂........…查看更多

就喺佢地未完全ready既時候已經入去坐定定, 叫左個咸菜胡椒豬肚雞腳魚蓉麵"毒辣"加炸韮菜餃, 上次叫大辣,稍嫌佢辣得唔夠雄渾, 今次ok喇, 仲有骨湯既鮮甜味, 湯既膠質有部份來自魚蓉麵, 麵質好滑, 同上次幫襯無大分別, 保持得好好, 雞腳係爽口有筋有趙口, 要比d心機趙, 味道比湯味冚晒, 不值一提~ 整體已經好滿意, 食完走人仲好回味.另外, 快d搬出去大馬路一帶, 你地絕對有能力同附近幾大巨頭對壘~…查看更多

十年前在上水區工作,可以一星期買三至四日外賣牛腩/筋飯, 必攞辣椒油!就咁食左三年,平時係切成薄片,好好食,師傅放假補上果個就會切成一舊舊,會稍差一點2011年10月27日再同老婆去幫襯午巿,同以前一樣咁多人,叫左牛腩飯,牛筋肚米,凍奶茶凍咖啡(小甜)一個白飯底碟上,夠熱夠大碟,牛腩另上,有湯汁生菜塾底,清香牛腩味,切薄片的(師傳依然無轉,開心),依然係微微彈口,牛味鮮甜,微咸,係因為佢地有用普寧豆醬去炆,唔同其他麵檔光靠重手五香粉帶起D味,咁會好刺激,但會蓋過牛肉味,至於咩係普寧豆醬,老一輩潮州人一定會知,咪係普寧既特產囉,潮州菜最注重鮮味,輔以各種醬料,所以唔好放過佢地既辣椒油,少少辣,開胃又唔會太搶味,餸飯餸麵都好一流至於飲品,水吧夠重手,我好欣賞的,咖啡奶茶都好濃,糖奶都好重手,唔想太甜就要記得叫小甜…查看更多

論中湯, 同區冇邊間可以同匹敵, 足料, 鮮甜又大碗盅頭飯, 肉夠嫩, 豉椒夠重手, 雞飯都幾滑刺激既牛孖筋, 香口既梅菜扣肉, 傳統一半豬肉一半蝦既雲吞, 並唔係現時流行既乒乓波雲吞點好食都冇喇, 2008年6月8日光榮結業, 永遠懷念........:(…查看更多

發現該店搬到旺角, 當然不能錯過啦~一個人幫襯, 當然點返印象最深刻既招牌牛肉麵~一大碗麵, 麵底唔識講, 黃色近似油麵既麵條, 但冇油麵果陣異味, 有麵粉香, 爽滑彈牙, 不俗呀~三大塊牛展, 一舊紅蘿蔔, 一舊白蘿蔔, 湯底依然極之鮮甜, 連湯都飲晒~ 事後完全冇口乾感覺~如此好店, 必要多多捧場!…查看更多

7月, 8月, 今日(2005/9/22) 都黎過~ 但今日問有冇book位=.=" , 話佢知冇, 佢地要求8:30 前交檯之後7:40 左右個場full 左, 連酒吧都爆埋~星期四喎, 生意好左就真啦~而且水準依舊, 招呼OK, 唔煩又唔係唔理人果隻~4 個人點左:醉轉彎,鎮江肴肉,炒蜆,生炒骨(是日特價), 素炒雜錦,蒸素菜餃. 其中最醉轉彎同鎮江肴肉夠香夠嫩夠滑, 極力推介.唯一遺憾係巿場冇鱔魚供應~ 選擇少左~…查看更多

叫豆漿($7, 味道OK) + 一客生煎包($15有4隻, 寸半直徑略嫌包底太焦, 多油最唔掂D皮係苦既, 又太硬淨, 好似硬膠咁, 舊肉都係死實實, 而且冇味!同時見到隔離檯個食客頻頻對佢\朋友話\"擔擔撈麵\"好難食, 早知去....(下刪數十字)成條街食肆林立, 呢檔唔會再去!…查看更多