MingMingNgNg的個人專頁

好耐冇嚟食，叫個半筋半肉麵。已經專登選咗要軟麵，落咗單，唔駛一分鐘就嚟到，速度好快，一夾個麵，一餅黐埋一舊，好明顯冇咩煮過。我已經揀咗軟麵，點都整一整呀，唔係做咩要俾我揀呢？我叫員工過嚟，我話，我揀「軟」喎，我夾起俾佢哋睇，佢哋起初好似過得冇問題。我繼續重申，你有得俾我揀，咁點解會咁呢，另一個員工冇耐地話，我換過俾你啦。不過，我知道佢哋攞到入去，都係倒，咁實在太浪費，所以，我話唔駛。我只係想話俾佢哋知，呢個價錢，真係唔可以就咁攞俾客人食。…查看更多

朋友個幾月前，話一齊去試吓雪糕拉麵。終於有機會試吓。的確幾有趣嘅。先講舊雪糕，睇落似軟雪糕，但佢堅硬嘅程度，係同坐飛機嗰杯Häagen-Dazs雪糕有得揮。所以可以放心影相，有排都未溶。（不過支雪糕係得半條，所以就咁影個表面就得🤣🤣）食嗰陣，我都諗緊食邊樣先，但都係忍唔住「咬」舊雪糕先。雪糕係花生味，好味。所以，結果忍唔住食咗大半個雪糕。但我記得….舊雪糕係用嚟溶落個湯度，等個湯滑d，同埋中和湯嘅辣味。由於我忍唔住食咗好多雪糕，結果個湯….我係覺得幾辣嘅。平時食拉麵，係會飲埋d湯，今次我就飲唔到喇。（p.s. 個雪糕筒，如果唔係一開始就食，咁你就放棄咗佢啦。因為浸淋咗….真係…….你都明啦）至於麵質係粗麵，我好鍾意食呢款拉麵，所以個人覺得好味，肉方面係半肥瘦，鐘意食肥膏，應該會好開心（但我唔太食肥膏….so….）。另外嗰半隻糖心蛋都好味。整體碗麵係唔錯嘅。鐘意食辣嘅，可以去試吓。唔食得辣嘅，可搵個朋友一齊去，然後介紹你朋友食，之後就迫佢俾你咬啖雪糕啦🤣🤣又試者，可以考驗你嘅定力，只係食少少雪糕，等個雪糕溶晒落個湯度，再食吓係咩味。（我好明顯係冇呢個定力…..）😅…查看更多

今日喺鰂魚涌嘅檳榔島敍食午餐。我叫咗個香濃喇沙煙肉長通粉都唔錯，賣相好靚，隻雞蛋都好好玩。🤣喜歡食濃味嘅朋友，一定會喜愛，但可惜，佢嘅煙肉實在太少，本身鐘意食煙肉嘅我，呢個午餐set要成$85，我就覺得唔太抵。因為我覺得我只係食緊喇沙醬撈長通粉…..如果多啲煙肉會食得開心啲😁另外我朋友叫咗咖喱叻沙海鮮米粉。我偷飲唔個湯底。湯底好飲，好濃郁，而且食材份量都唔少。我朋友仲飲晒啲湯添。如果有機會再嚟，我都會試呢個咖喱叻沙海鮮米粉。…查看更多

今日中午，同朋友一齊嚟食。11:35嚟到已經排了一條人龍。幸好第二轉就可以入去食。我叫咗個蝦湯底、粗麵，追加麵。舖頭地方唔大，坐位不多。（所以一定要早啲嚟排隊）湯底好濃，好有蝦味。本人喜歡食濃味，所以忍唔到一啖麵，一啖湯。所以蝦湯底係極之推介。如果即係follow佢哋嘅社交平台，仲送一份葱/木耳/海苔。點知…食到差唔多食完嘅時候，我追加嘅麵先出現。由於我在單上，選擇追加麵時，已同時選擇同時上（佢可以選擇後上）。所以一直以為，碗裡嘅份量已係追加嘅份量。當我差唔多食完時，追加麵才到。我望住碗嘅湯已經得返好少。我問職員可否加少少湯俾我。但職員話，加湯要再收錢，我話，我mark咗係同時上個麵，唔係後上，我以為個麵已經喺埋裡面，所以我近乎飲晒湯（好明顯係佢哋搞錯咗）最後佢都唔肯加咗少少湯，咁唯有乾乾的食咗個充滿鹼水味嘅麵。除咗呢part後加麵係失望嘅，因為我離開店時，口裡只有鹼水味。食物質素係高嘅。值得再嚟食。…查看更多

開返晚市，可以同朋友聚一聚。記得之前有個千層蛋糕好好味。可惜嚟到已經冇晒。不過本身都諗住食晚餐，唯有下次再食呢個甜品。首先，叫咗平安餃子、雞唐揚秋葵沙拉、大阪章魚燒。雞唐揚秋葵沙拉有驚喜。配埋芝麻醬、溫泉蛋，味道剛剛好，雞件嘅調味都好好，而家啖啖肉。之後叫咗個黑蒜油豚肉湯拉麵，同朋友share食。當然，唔似日本拉麵店嘅拉麵啦。但個湯底都ok。最後食埋甜品，香草梳乎厘。配埋雪糕，一流。最開心係，可以坐到榻榻米位置😍。環境清幽，的確係同朋友相聚、吹吓水嘅好地方。但榻榻米位置不多，要早啲去食先坐到。…查看更多

原來黄埔德美壽司，除咗刺身之外，都仲有好多嘢食。玉子，係必食嘅，賣相好靚，口感好實淨嘅，一口一舊，剛剛好。三文魚沙律，味道都唔錯，配埋蕃茄食，好Fresh。牛油果軟殼蟹壽司，好味。唔需要加豉油，牛油果嘅質地，配埋軟殼蟹嘅脆口，食落唔會太油膩，牛油果都幾大塊，包咗半舊壽司。喜歡食牛油果嘅我，食得好滿足。燒銀雪魚，比我預期中好食，燒得好入味，銀雪魚肉質好滑，配埋沙律醬一齊食，好match。配菜嘅薯蓉都不錯。燒豆腐，雖然得四舊，但都幾大舊，外皮煎到黄金色，但裡面嘅豆腐仲保持到好滑。配埋醬汁都唔錯。炸雞軟骨，ok啦，同出面嘅炸雞軟骨差唔多。另外仲食咗海鮮炒烏冬，賣相一般，所以冇影相，但食落，我覺得海鮮炒烏冬都最好味。烏冬好有咬口，感覺似稻庭烏冬。同埋炒得好入味。海鮮都好足料。下次再食，一定要補影返相。…查看更多

之前聽朋友講，呢間肉餅店係一定要試吓，仲要老遠都係出車去食。今日一行三人，一齊去食咗。餐牌勁多選擇，真係估佢唔到，多到唔識選擇。我朋友第一時間，選咗蒙古辣孜然羊肉煎肉餅飯。羊肉味好香，食落口有少少辣。至於孜然味係咩味，我都唔識形容…..好野味咁啦。肉質好味。另外有位朋友，選咗麻辣羊肉煎肉餅飯麻辣味唔會令你覺得勁辣，羊肉味同麻辣好夾，可以唔駛落豉油都得。因為我覺得落咗豉油，會失去咗佢本身調較嘅味道。我自己本身好喜歡食蓮藕，所以選咗咸魚蓮藕煎肉餅。雖然呢度有好多款唔同種類嘅肉餅，但我都係比較傳統，第一次食，試吓最傳統嘅款式先。咸魚加蓮藕，真係最夾嘅組合。味道唔會太鹹，就咁餸飯就足夠，唔需要再落調味料。而且肉餅嘅份量，剛好一啖飯一啖餸。唔會話食晒餸，剩返好多飯。下次嚟食，一定要試吓六重芝士肉餅飯。其待下一次再嚟食。…查看更多

下午茶時間，嚟到小王牛肉麵。我最鐘意食佢嘅半筋半肉麵。佢嘅麵質好係咬口，牛筋又大大舊（雖然唔算好多舊）但大舊肉及大舊牛筋，下午茶嚟講，個分量都ok。而且佢個湯，好有藥材味，可能我鐘意食濃味，所以我好喜歡😍。另外，台式滷肉鹽酥雞飯都好味。佢嘅滷肉唔係肉碎，係有一小片一小片嘅滷肉。鹽酥雞好入味。最正嘅係，下午茶時段，每份係$49，包嘢飲，我仲飲咗杯珍珠奶茶。而兩個餐嘅份量，都冇因為下午茶而少咗。我估分量同午餐一樣。所以，喺食下午茶嘅角度嚟講，我覺得係抵食嘅。…查看更多

好耐之前喺尖沙咀一間拉麵店，食過一次牛油拉麵，印象中都好似都係扎幌No.1，但嗰陣食嗰時，係日本人老闆，嗰間好好味，一試離忘。今日經過見到，又有牛油拉麵，梗係試吓。不過，呢間就一般啦，湯底冇其他拉麵店咁好味，感覺好似超市買嗰啲拉麵，用粉開嘅湯底，麵質都還ok，嗰兩片肉，還可以啦，但係舊竹筍就鹹咗啲。我叫咗個午餐set，加咗個細牛肉飯，個飯反而唔錯。說實話，個細牛肉飯仲好味過個拉麵。不過，個飯好似係同旁邊間店聯營，下次會試吓旁邊嗰間日式咖哩飯。…查看更多

東薈城新開Shake Shack，見到有獨家發售嘅牛油果Burger，仲要只售至15/5, 鐘意食牛油果嘅我，梗係試吓啦。有牛肉同雞兩款選擇，試咗個Avocado Bacon Chicken。係好味嘅，佢嘅煙肉食落好脆口，夾埋牛油果一齊食，再食埋件脆雞。唔會覺得好油膩。我朋友本身食素，佢叫咗個Shroom Burger，佢話中間嗰塊菇，煎得都幾好味，但佢最鐘意係中間塊芝士。值得一讚，係佢個包，冇完全切開兩片，所以Burger中間嘅料，唔會食到一半，喺底跌晒出嚟。所有醬汁都冇漏到周圍都係。👏🏻👏🏻另外仲叫咗個芝士薯條，薯條外脆內軟。不過，我鐘意芝士醬分開上。不過，最出色係杯奶昔。之前見過有人推介奶茶奶昔，即管試吓。果然有驚喜，第一啖飲落，奶味好重，但之後就茶味回返出嚟。真係好似飲緊奶茶咁。我朋友仲話，有茶餐廳奶茶嘅味道。中鐘意飲奶茶嘅人，一定要試試。…查看更多

昨晚同朋友食完嘢，想再搵個地方吹吓水。喺中環行行吓，見到呢間，就試吓啦。我哋叫咗個白酒忌廉青口配蒜蓉包。賣相都唔錯。佢白酒嘅香味好濃，令到個忌廉汁好清新，唔係好黏稠果種汁，所以唔會覺得膩。但我個人覺得青口係配角，蒜蓉包同個汁先係主角。如果鐘意食農夫包，係可以加錢轉為農夫包。不過，我哋都鐘意食蒜蓉包，咁梗係唔轉啦。本身想問佢哋有冇得再散叫一份（因為餐牌冇），但食食吓，發現都飽飽地。咁就留返下次再問啦。…查看更多

收工後，剛經過土瓜灣。朋友介紹呢手搖飲品店。梗係試吓啦。二話不說，就選擇酪梨奶昔（因為佢真係一整個牛油果放落去整）喜歡牛油果嘅我，梗係試吓啦。喺炎夏嘅日子，飲完真係透心涼。充滿牛油果口感，加上有點冰沙，口感Balance得好好。朋友選咗一杯鮮翠檸愛肉。飲落有燉檸檬的味道，愛肉都很好吃，相信係佢哋自家製的。朋友都讚好飲。下次再去試，一定會試吓貢品蒙頂黄茶。（因為佢寫住可以健脾消脂解膩，仲會送一片琉璃橘）朋友話佢嗰片琉璃橘好好味。可惜我已order咗酪梨奶昔，再飲一杯….就真係太多……唯有等下次啦😋仲有咭仔，儲印仔。遲啲試埋佢嘅小食。…查看更多

朋友介紹下，嚟到天水圍嘅穩世小店。由於天氣太熱，所以即刻叫咗個布甸牛奶冰，睇圖片以為size都ok，點知嚟到，食物size比預期中細份，呢個價錢，呢個size，我就覺得貴咗d，但味道係ok嘅，有濃濃嘅牛奶味。跟住叫咗杯玫瑰蜜糖茶，飲咗大半，仲可以添熱水😍。最後，見到旁邊的客人都食窩夫，最後都叫咗一份，同朋友share食。食完就明白點解個個都會叫一份。窩夫好香脆，配埋雪糕，一流。😋如果下次再食，會再試其他款嘅窩夫。…查看更多

疫情下，二人限聚令下，想同家人食High Tea。Rosewood 外賣tea set絕對係好選擇。（因為外賣仲有discount 😝)尤於食之前，我冇咩預期，所以冇每一個cake影相。最後後悔了。好多個cake都好好味，賣相靚。裡面有4款三文治、4款甜品、2件拿破崙同4件英式鬆餅。我最愛紅寶石朱古力芝士蛋糕。香橙果醬一流。雖然係外賣，但盒嘅設計，都會有嘩一聲感覺。每件每件慢慢與家人分享，都能喺疫情下歡度一個下午。…查看更多

今日入大澳行一轉，熱到不行。諗住買支嘢飲，點知見到有糯米糍買。勁鍾意食糯米糍嘅我，梗係試吓啦。我最愛係<芒果糯米糍>，仲要$12，二話不說就買兩個嚟食。佢哋問我哋係咪即刻食？我話係，佢哋就攞咗個凍嘅<芒果糯米糍>俾我哋。當你熱到爆時，食嘅時候簡直透心涼，不過重點係，舊芒果好大舊。呢個份量，市區買肯定貴一倍。同埋，個糯米皮好煙韌，連我老公都讚不口絕。跟住再同老闆娘講，個<芒果糯米糍>好得。老闆娘就話，「最緊要個餡好正。今日d芒果好靚，上星期就冇咁好」喜歡老闆娘咁老實🤣跟住見佢整緊<花生糯米糍>勁多花生，忍唔住又想買兩個。點知老闆娘好好，佢話「食晒一個好飽㗎」佢將一個嘅份量，差成兩個小糯米糍。就係咁，我同老公用$8，又食咗好好味嘅<花生糯米糍> 😍食完，喺附近行咗陣，又再經過此小店。原來佢哋有<榴槤糯米糍>，我就唔食榴槤嘅，但我老公超鍾意食，所以又行咗埋去睇一睇。剛好佢哋開始包緊榴槤糯米糍。我老公雖然食得好飽，都忍唔住又買一個嚟食。老闆娘打開咗個盒，裏面好多舊榴槤，仲問我老公鍾意食林定係硬嘅榴槤。之後老闆娘幫我老公揀咗一舊榴槤，起咗核。成舊榴槤就放咗喺糯米皮上面，直接包。跟住我老公一邊食一邊點頭。好唔好味我就唔知，但係我睇佢食個樣，應該係好好味。🤣下次再有機會去大澳，一定會再去買嚟食。…查看更多