fish2206's Profile

同媽咪行街行到攰，見到個朋友兩母女喺呢間餐廳行出嚟，我估應該都會幾好食，於是我同媽咪就入咗去試媽咪胃口唔好，見到餐牌有個小食拼盤，個賣相都唔錯，價錢都合理，於是叫一個，另加西多士，同兩杯咖啡個拼盤嚟先我已經O哂咀，乜同張相個賣相差咁遠嘅？？？（其實差少少都冇所謂嘅，但呢個又真係得意咗少少。。。）洋蔥圈乾嘅，雞翼未熟！！！（當然我可以同員工講話雞翼未熟，正常佢會換過，但我冇做到）（張相冇Ｐ過，只係第一身睇到）西多士冇乜特別，唔可以叫好好食咖啡比較淡，味道唔算好突出，可以接受嘅我知下午茶我唔係畀咁多錢就唔好咁多要求，但我真心失望！:(:(:(:(結論係：下次我唔會再去！！…Read More

媽子聽晚85歲生日，本身食過呢間晚餐唔錯就喺尋日訂位。跟住剛剛十一點半打嚟話聽晚full哂叫我取消個booking！！搞到我失哂預算，星期六要搵位畀家人食唔容易㗎，仲要有兩位係老人家添😓😓我真係未試過訂到位之後打嚟話cancal囉，幾得意囉！😡😡😡😡😡😡😡…Read More

成日喺廣華醫院覆診，每次經過都有衝動入嚟試，但試極都過門不入🤭，今日一於入去啦！地方都幾乾淨，燈光都唔錯，啲職員都幾有禮貌，所以印象唔錯！😄下午茶餐好多選擇，搞到第一次嚟嘅我選擇困難症上身，最終我都係揀咗吞拿魚熱狗拼薯條，再加杯熱咖啡熱咖啡嚟先，唔澀，夠熱，唔錯唔錯👍🏼隔多一陣熱狗嚟，我當堂打左個突，大熱狗，對我嚟講實在太大隻，好驚。我立即打卡畀我嘅好姐妹同我屋企人睇，佢哋都話做乜隻熱狗咁大隻，一個二個話好肯定我夜晚唔使食飯。。。波浪薯條好熱，我勁鍾意！☺️☺️至於隻勁大熱狗，吞拿魚爆棚，原來入面仲夾咗條腸，勁得！最終我真係食唔曬成碟嘢，但都係嗰句，好得！👍🏼👍🏼最終一句：呢間必有下次！！！👍🏼👍🏼👍🏼👍🏼👍🏼☺️…Read More

今日下晝去廣華醫院覆診，照舊等攞藥期間去食個下午茶。女人街有一間茶餐廳我必定幫襯，點知執咗唔緊要搵過第二間囉！行下行下就入咗嚟，個裝修好面善，我覺得我之前有嚟過嘅今日有啲肚餓，叫咗個吉列豬扒配薯條，熱咖啡碟野嚟到我真係O咗咀，咁大碟！？（你當我細食囉）啲波浪薯條又多，塊豬扒又大塊，一望就知我實食唔哂薯條好熱，仲要係我最愛嘅波浪薯條豬扒都幾脆幾juicy，又熱咖啡唔澀，睇個杯佢哋應該係用黑白奶慢慢食下抖下都坐咗成個鐘。你問我好唔好坐？唔。。。一般般啦！太差我就拿拿聲食飽就走啦！ 間餐廳細細聲播啲90年代初至中期嘅歌，咁啱我坐咁耐全程都播住Sammi啲歌（我唔係佢粉絲）我相信下次嚟開附近，呢間都會做我其中一間食堂:)…Read More

星期日家姐話請出尖沙咀下午茶，話出到國際廣場慢慢先搵食。一行四人，爸爸見到三樓唔同菜式，就話要食越南菜。三點半左右入到去唔算太多人，地方都幾乾淨，侍應都好快畀牌同埋斟熱茶，幾好招呼。爸爸同家姐叫個特式一人餐開心share，因為家姐怕爸爸一個人食唔哂，我同媽媽就一人叫一個普通一人餐。首先爸爸個生牛河到先，都算幾多件生牛肉啦，爸爸話好食之外就冇講咩喇！跟住我個生牛肉牛筋河到，其實我最主要想食牛筋啫，都有最少五六件喎，好諗，個湯味道唔錯，牛肉數量普通啦，都幾好味！我媽咪食燒雞扒河粉，塊雞扒都算大塊，我覺得個皮都幾脆，幾入味，唔算鞋口，唔錯！ 因為跟餐有小食，所以小食都嚟埋。爸爸個靚靚一人餐家姐揀咗炸軟殼蟹春捲，一碟四件，我覺得好脆，好好味！必食！ 可惜本身我唔食香茅，佢入面有少少，對我嚟講就要扣少少分！我個餐好普通揀咗個菜食，冇咩好講啦呢個媽咪個餐揀越南春捲，四小粒一碗，我冇食唔知，但媽咪話冇下次，家姐冇出聲，爸爸話好食。。。餐飲我哋叫咗咖啡，坐咗陣見未到就問佢做咩未到，佢哋都好好人話因為杯咖啡唔夠熱，要我哋等多陣。:) 飲落唔係滾，但夠熱喇！幾濃，好滑，唔錯！雖然我哋食緊時開始愈來愈多人，但都好靜。所以想靜靜地食一餐好味嘅越南下午茶，呢度我會再嚟！…Read More

星期六銅鑼灣下晝睇完醫生，對我呢個九龍人嚟講難得過到海冇理由咁快走嘅，死都行夠同食埋晚飯先走啦！同朋友食飽咗下午茶，到差唔多九點冇理由唔食晚飯嘅，行到皇室堡，間間食肆都要等位，上到樓，呢度同隔離兩三間冇人排，就揀咗呢間。橫掂九龍區食過都唔錯又耐冇食同朋友真係唔多餓，於是叫咗一碗烏冬，一個小食，同一碟壽司就算 (加$15有杯嘢飲㗎！不過只限叫一次)首先杯飲品到，我朋友飲嘅，巨峰提子梳打，我本身對對隻提子冇好感，不過都啜咗啖，好香提子味，唔假，梳打都好夠氣。我朋友讚嘅！再嚟小食，係雞軟骨，好熱，炸得剛剛好，因為佢話係黑椒嘅，所以好香，但唔辣！好味。跟住係個烏冬，蕃茄湯底吉列豬扒烏冬，個湯底超濃，我覺得好飲過尖沙咀某餐室嗰個，酸酸地，勁開胃。塊豬扒炸到好熱，好脆口，好正。加埋個烏冬唔冧，真係好得！最後嚟就係碟壽司，雜錦壽司，有兩隻我同個朋友都唔知係咩嚟，請原諒我哋孤陋寡聞，不過食落幾好味，件件都細細舊，一啖放哂落口，醋味剛剛好，魚都算新鮮，OK啦！我哋想再叫甜品，一嚟個胃冇位裝，二嚟人哋收十點冇時間，只好下次再食啦！:)…Read More

呢日晨早同朋友行書展行到咁死咁攰，行足大半日真係冇命，行完仲諗喺灣仔食晚餐好定返尖沙咀食好。最後我朋友諗起呢間嘢我地經過好多次都冇入過去，又話想試下，最緊要近碼頭唔使行咁遠，對腳都冇咁攰啦，於是就決定嚟呢度問餐。入到去第一個感覺好靜，好舒服。服務員好有禮貌，好nice。嗰時八點三左右啦，都半滿。打開個menu，唔多種類揀，不過都啱我食，同起碼唔怕選擇困難症發作。佢個價錢只包主菜，要前菜飲品同租品另外畀多少少錢，當然要加一啦！我同個朋友前菜一個揀沙律一個揀湯，主菜就就一個魚扒同一個牛扒，飲品一個咖啡一個奶茶，甜品叫咗一份雞蛋布丁。由於我地鋸扒嘅關係，咁要換過把刀，個服務生都好輕柔咁拎起把刀再靜靜咁擺過另一把刀喺枱上面，呢樣幾抵讚！首先嚟碗湯同兩個包（我叫沙律都有包食？？），我朋友話個湯上面滴咗啲佢話唔知咩嘅嘢做裝飾（我都唔知係咩），好靚，好熱，唔太鹹，又唔會好水，好飲！個包我同佢都覺得整得幾特別，熱，不過我嫌佢唔夠軟熟。再嚟沙律，都幾大豌喎！望落好靚好豐富，好多肉，菜夠新鮮，沙律醬剛剛夠，味道唔錯！主菜係魚扒到先，好大條魚，唔怪得冇問可以揀跟飯定意粉啦，原來set咗跟薯菜！據我朋友所講，係好食嘅！唔腥，切落去時啲肉唔會散哂出嚟，外皮仲整都好脆添！食完食條魚一條細骨都冇，超得！ 加埋個配菜係薯蓉同法邊豆，仲有蘑姑。佢話薯蓉有好多，有咬口，法邊豆剛剛熟，蘑姑都OK，配菜都做得唔錯喎。。。隔咗陣我個牛扒都到，都唔細呀。幾林，整得外面好香，冇蘇味，唔多筋。唔錯！配菜我揀薯菜，其實同我朋友嘅差唔多，只係多咗個蕃茄。薯蓉我覺得唔太重牛油味，有咬口同夠滑（佢入面仲有少少薯仔粒），法邊豆我冇咩意見，個蕃茄我就畀咗朋友食因為我唔食嘅，佢話都幾甜同多汁。奶茶我唔覺得有咩特別，感覺普通茶餐廳嗰啲囉。。。　但我朋友就話杯咖啡還可以，都幾滑最後一個甜品兩份食，唔係太甜喎！好香蛋味，都唔錯！不過可惜我同我朋友都覺得佢硬咗少少囉。。。。:)總結嚟講：呢間係有下次嘅！！！…Read More

今日去開九龍城買嘢，諗下好耐冇去順興啦喎，於是就去食個下午茶啦！去到都係咁好坐，見唔係太餓，餐牌寫菠蘿油係推介喎，我又真係唔知幾耐冇食喇喎，一於叫個，加杯熱咖啡多奶啦！首先嚟個菠蘿油，搞咩呢？個樣做咩要咁呢？平哂喎！！！又唔見舊牛油嘅？有冇畀錯我呢？睇見個樣已經唔多合格　　食落暖暖地，面個皮都脆嘅，不過底嗰層就有少少少咬唔開囉。。。入面舊牛油去咗邊呢？搽哂落個包度呀？溶哂呀？菠蘿油唔係咁樣呀！你做咩啫！！！？？？？杯咖啡加唔加奶對我嚟講冇咩分別，我自己覺得唔叫加奶可能會仲苦。。。。最後一句：冇去得耐，唔知點解搞成咁。九龍地大把嘢食，呢間，唔再去Lu。。。。。。。…Read More

今日自己一個去黃埔行街，兩點半見肚餓，下午茶時間，就四圍搵嘢食啦！行過呢條唔知乜嘅橫街嘅角落頭，有間唔多起眼嘅茶餐廳，我見佢門口啲menu又幾多款式揀喎，最啱我呢種人啦，一於入去一試！入面地方唔大，廿張枱都冇，但都坐得半滿，唔知係好食定咩呢？我今日好肚餓呀，見佢有意粉，咁就叫咗個，加杯熱咖啡添！唔貴喎，$33咋！同大多數餐廳食個意粉呢個價錢真係算平！隔一陣咖啡到，算熱，味道都唔錯，唔澀！跟住個意粉到，好大碟，出哂煙！ 味道唔錯，肉醬剛剛好，不多不少。不過我嫌啲粉乾咗少少，但整體上我係滿意嘅！:)另外我見坐我隔離嗰個女人食嘅薯條係我最愛嘅波浪薯條，於是我就再望下個餐牌，我見到有生炸雞脾可以配唔配薯條而配蘋果薯仔沙律，我諗只係呢個配搭足以令我下一次再嚟！(當然今餐都好好味啦！)…Read More

今日下晝去完廣華醫院，三點九剛好下午茶時間，雖然唔係好餓，但都係時候搵個地方坐坐食少少嘢。行到呢度，唔知點解好想入去，門面又唔係好吸引呀，真係唔知為乜！是但啦！入到去，地方唔係大，我諗得十多張枱左右啦！我行到最入，張張都坐咗人，其實我唔介意搭枱嘅！呢個時候老闆見到我問我幾多個人，我話一個人，佢叫我坐埋佢度，其實佢寫緊嘢，嗰時成枱都係嘢，佢都執好啲嘢，我真係唔好意思！到我落單，佢見樓面冇人仲親身幫我落埋單，我十級唔好意思！老闆好nice囉！今日我叫咗雞翼薯條，加杯熱華田！雞翼炸得啲皮勁脆，而且唔乾身添，我覺得好食過某連鎖店嘅雞翼嘅！(個人感覺) 薯條仲要係我最鐘意嘅波浪薯條，又係炸都脆口，真係食到唔想停口！ 杯華田甜度剛剛好，唔使落糖！(有啲地方一係過甜要加水，一係冇乜味仲要落糖。。。) 成個餐都係$32咋，抵！PS。其實我見到佢個常餐個配搭都好特別，可惜我唔肚餓。。。下次有機會再食！…Read More

今日honey生日，都唔知去邊食好，星期六食lunch周圍都好多人，又少地方可以訂位，就實行一路行一路搵！嚟到Urban，一般多人排緊隊，加上之前同honey行過幾次都話想試，於是就襯今日呢個好日子排陣隊！好好彩畀我哋第一次嚟食就排到個卡位！ Honey想食牛仔同魚，於是就哂佢啦今日！首先嚟個龍蝦湯。本身我好怕飲呢個湯，因為我怕腥，點知呢個冇，我覺得甜甜地，幾好飲喎！對我嚟講係有喜出望外嘅感覺嘅！再嚟上咗個Fish & Chips 先，好大條魚囉！個炸醬好薄，魚肉好juicy、好滑！薯條都好多、好脆！ 不過真係好大份，我同honey share 都食唔哂。。。最後上個牛仔肉，肉好易咬得開，好有肉味！個感覺就好似食buffet攞嗰啲燒牛肉咁，都幾好味呀！ 不過都係嗰句啦，份量都幾大㗎！個餐送飲品只限桃茶同汽水，其他就加錢。咁我食Fish & Chips 就當然飲汽水啦，但我honey 就飲桃茶。佢話陣桃味都幾香、唔假、幾吸引㗎！其實個餐加少少錢仲可以叫件蛋糕食㗎！我哋排隊時經過個蛋糕櫃已經見到啲蛋糕好靚，仲諗住今日honey生日可以食返件蛋糕，點知太飽食唔落啦。。。:(:( 不過唔緊要，下次嚟，唔叫咁多嘢，一定要食到件蛋糕同其他嘢為止！:)…Read More

Honey生日，喺附近食飽午餐又行咗陣，第二個胃呼喚我哋啦！ 我哋嚟到呢度，我就第二次嚟，honey第一次食。今次我揀咗食焦糖燉蛋，叫咗之後等咗大約十分鐘左右就有得食啦！熱辣辣，面啲焦糖仲霹靂啪嘞咁，又清甜！而且都好有蛋味！呢個有下次！我honey叫咗個芒果刨冰，等咗一陣就到喇！根據我honey所講，個刨冰都算大，好香芒果味，芒果粒唔酸，雪糕球陣芒果味唔假！好味喎！Honey話呢度太多甜品選擇，下次再嚟食過呀！…Read More

一年一度書展行咗差唔多八個鐘，同朋友真係腳都軟埋，難得我哋兩個九龍人過到海就喺附近搵埋食先返屋企。行過門口見呢間嘢好似好懷舊咁，啲嘢又啱食就入咗去食！(重要係有位同我哋想坐得舒服啲啫，太攰啦對腳)入到去有個叔叔熱烈推介我哋食二人餐，話多嘢食，又平，又多人揀！(雖然本身我哋都係想食呢個餐嘅)上菜都好快，紅湯夠熱，不過我覺得酸咗少少。個蒜蓉包味道唔係好濃但好香，好味！前菜我哋揀咗田螺，熱！特別個薯蓉，勁得！如果多啲就好喇主菜方面叔叔推介今晚餐廳得嘅西冷，果然唔錯，唔 蘇，有牛味，唔un，我食件食得哂我朋友食鱸魚，佢話魚皮煎得好脆，冇乜骨，好香魚油味但唔腥。佢都讚！最後有甜品，係焦糖燉蛋，細細杯，個面好脆，蛋好滑，我哋好鐘意！總結來講：我同朋友都好滿意呢餐飯同呢間餐廳，雖然第一次幫襯，但決定會再有下一次嘅！！…Read More

平日放假就當然諗住下晝喺屋企瞓返一大覺㗎啦！加埋近日寒寒地嘅天氣，你唔係唔瞓呀化？ 不過！世事就冇咁完美嘅… 就喺我計劃好同周公玩遊戲嘅日子，我爸爸堅持要我同媽咪陪佢出去食下午茶！我算！！嚟到黃大仙，大老闆話要食擔擔麵，我哋就近近地嚟地鐵上一層嘅上海廳。感覺佢嘅裝修同個商場好唔同，商場好光佢就暗暗地，商場時尚啲佢就懷舊啲。餐廳仲放咗好多懷舊擺設添！坐落都幾舒服！:)我哋三個叫咗兩個下午茶餐同一個午餐，因為下午茶餐冇小籠包。。。。:( 但要留意午餐冇(凍)豆漿送，下午茶餐先有，要飲就加少少錢啦！係！佢哋係冇熱豆漿嘅！啲麵都幾爽，擔擔麵我哋要少辣，勁香花生味！我自己唔食得辣都覺得冇乜料到，我諗叫中辣應該都得！下午茶餐個麵份量少啲啫，其實都唔細，我諗除非你好大食！小籠包夠熱，入面夠湯，皮都算薄，入面舊豬肉都好新鮮！炸春卷勁熱！入面好多菜！我擺咗幾個字先食都仲脆仲暖，正呀！豆漿都好香！又夠大杯！其實我自己鐘意飲熱豆漿多少少嘅，可惜佢冇呀，問過㗎喇！總結嚟講：呢間係有下次嘅！:):) (要注意係佢哋話咗我知夜晚係冇訂位嘅，假日仲限食個半鐘添)…Read More

我次次去親廣華醫院睇醫生或者行開附近，我都一定要去呢間麵包店買麵包食！其他連鎖店嗰啲我唔係好鐘意㗎咋，不過有時迫於無奈唔係成日出旺角我又冇計咋！呢間麵包店勁普通，街坊生意。但超級好味！ 我記得我第一次幫襯係我行過肚餓，去買咗一件酥皮蛋撻食，熱辣辣，又夠蛋香，皮又正，仲要平呀嘛！之後我就開始成日幫襯！呢日我唔係買包，我買大蛋糕！好大個！又香又軟，都係$6.5之嘛！我有一次買咗隔咗兩日先食，都冇硬！超正！我嘅總結：小店係值得幫襯嘅！…Read More