大食螞蟻的個人專頁

本來想食隔籬嗰間日式蛋包飯，點知人哋晚市一定要訂位，所以就嚟試吓呢間車仔麵。見其他食評推薦豬豬面餐，就叫咗個，另外叫咗個三餸麵，豬軟骨、冬菇、腐竹米 。豬豬面係有豬手，豬皮，豬紅 。豬手係滷水過嘅腦汁同其他餐廳有啲唔同，偏向台灣嗰種，有藥材味嘅滷水。炆得唔會太腍，有啲咬口。另外，豬紅豬皮味道就同大部份餐廳一致。豬軟骨都好好味，冇汁係偏甜嘅肉都炆得好腍唔會黐牙，最誇張嘅係份量，整整三大嚿豬軟骨，食完呢個餸都幾飽。每一個餸都可以揀唔同嘅執底，佢又腩汁沙嗲咖喱等等，仲可以挑選唔同嘅辣度，我見佢枱上邊有擺咗罐辣味雞粉，所以面冇叫太辣，但係我發現佢枱上嘅辣粉同後廚加嘅嗰種辣汁係唔一樣，後廚嘅辣汁係更加惹味 。埋單100出頭，真係幾抵食 。…查看更多

青衣城新開咗間Gelato嘅細booth，見佢又唔少特別嘅味道就試吓啦 。我就揀咗最 Classic嘅開心果味，最特別嘅南瓜味同奇異果雪葩 。首先對開心果味略失望因為佢味道偏甜開心果味唔夠突出同食普通雪糕冇分別 。南瓜味反而有驚喜味道好接近南瓜蓉可能係南瓜本身嘅Textures就好適合做Gelato，特別綿滑 。食落就好似忌廉南瓜湯變成雪糕咁但同開心果一樣都係偏甜。最後嘅奇異果味反而有驚喜！佢冇檸檬雪葩咁酸到苦，亦都唔會太甜，好好咁還原到水果清新嘅味道，亦中和返其他口味嘅Gelato，令到整體冇咁甜膩 。三隻口味，但份量唔大 。埋單七十幾，個人覺得唔太抵，外面咁多唔同埋Gelato嘅店唔少都做得好過佢，所以亦都唔會再考慮喺呢間食 。…查看更多

Galette都係有蛋既吸引我！！今日早放飯，同同事黎左呢間食crepe 同 Galette 既店 。 一個set 有飲品，一個咸Galette ,一個甜crepe，百幾蚊左右 。Galette 簡左classic 既火腿、蛋、 芝士 。蛋漿令整體更濕潤，味道更有層次 。但火腿加芝士會偏咸，唔係好岩清淡口味嘅朋友 。Crepe 我選擇咗檸檬蜜糖口味，酸酸甜甜，甜味比酸味重 。 風格一致，都係味道較濃 。 勝在每一啖都有味，唔會話食到最後無曬醬 。兩片睇落好似好少。但實際食完都好飽 。加上午餐價錢優惠，推薦一試 。…查看更多

同朋友去開尖沙咀見到呢間靚靚Cafe又唔使等位就入咗去食個Tea 。我哋分別叫咗個牛肉多士同芝士通粉（唔係好記得佢個實際名，不過入邊嘅成份就係咁上下啦）個牛肉多士，勁牛肉偏生，我估係一整塊牛，然後再切細嘅，所以中間嘅部份只有兩面就比較生，有啲難咬開。上面醬汁應該加咗芥末所以同牛肉好夾。芝士加澱粉係冇得輸嘅組合，上枱嘅時候熱辣辣好惹味，美中不足嘅係通粉係相對比較大條嘅，就唔會好似Mac can cheese咁黐汁，有時要食兩啖再點啲汁先至有味 。奶昔做得唔錯，唔會係化學味嗰種，唔記得咗影相，但整體嚟講，環境，以至到所有菜式都幾靚好適合影相打卡 。…查看更多

收工行過話買個外賣食啦 。見門口有個牌話外賣特價 ，就入去叫左個特價燒味雙拼飯同半隻既麻辣手撕雞 。 本來想叫叉燒拚燒腩仔，但店員話燒腩仔無曬，咁就推薦左改拼腩片 。總數95蚊 。本來價錢都算抵既 。但一睇番張單，對番個牌，發現燒味雙拼價錢多左三蚊？？ ？ 味道方面，雙拼飯入邊嘅牛腩比較韌，黐牙，調味都係平時食滷水嘢嘅味道 。 麻辣手撕雞嘅味道同平時食嘅辣油麻辣好唔同，唔會話太老嘅都係多肉嘅部位，整體不過不失 。 如果作為夜晚食飯而冇乜選擇嘅話嚟呢度食都OK嘅。…查看更多

之前一直想試試呢間茶記既牛角包同羅宋湯，可是一直無機會係呢邊食早餐。今晚同朋友食晚飯，就黎試吓啦 。我地叫左一個大滿足雜扒鐵板餐share, 仲有一般茶餐廳少見既雪糕紅豆冰同黑牛。落完單好快就上左餐包、羅宋湯。餐包有翻熱牛油搽上去有少少溶特別香。 羅宋湯係茶餐廳果種帶點辣味，但比一般既濃稠，強烈既酸甜辣，好開胃。大滿足雜扒鐵板餐最抵讚既係個黑椒汁，調味調得剛剛好，偏辣，係我鐘意既味道。肉排處理得唔錯，無雪味或者其他奇怪味道。紅豆冰用既係椰奶，唔係連鎖快餐既淡奶，呢個我有d意外，唔饮椰奶既朋友要注意啦。朋友就好中意杯黑牛，朱古力加可樂系記憶中既味道。…查看更多

見到呢間店有蟹粉小籠包食就嚟咗食午餐，點知發現冇晒蟹粉小籠包只好叫返普通版，另外怕唔夠飽，要多個手撕雞絲粉皮。外賣拎到返公司小籠包，仲係熱辣辣，肉汁豐富，被甩口，但係搭配豬肉嘅味道就剛剛好。熄晒四個都唔會太膩。另外嘅粉皮味道比較清淡，麻章味道香濃，雞絲青瓜嘅份量都多。粉皮大啲煙靭，因為有麻醬喺度，雖然係外賣，粉皮都冇黐埋一嚿嚿。總體嚟講價格比較合適，係午餐自選。P.S. 同好多小店一樣，店舖只收現金。…查看更多

：聽朋友推薦話呢間泰菜好抵食，今日終於有機會嚟食個午餐。我想食少啲碳水所以揀咗香葉肉碎生菜包，同行嘅朋友揀咗黃咖喱蟹肉飯。加$6或者$8可以叫嘢飲，選擇多多有泰式檸檬茶，泰式奶茶，龍眼冰，等等。我哋就叫咗例湯同埋泰式檸檬茶。另外三再加$15加咗青木瓜沙律同榴槤糯米糍。生菜包可以揀小、普通或者大辣，三種辣道，我哋揀咗普通。上枱後我即刻比佢嚇親，因為肉碎嘅份量大概係平時食嘅三倍。肉碎保留少少濕潤唔會太乾，調味亦都適中，唔會話太鹹或者太辣，生菜包住味道啱啱好。泰式黃咖喱蟹肉飯先至係最推薦嘅菜式，咖喱上面放滿蟹肉，就咁食蟹肉食咗少少嘅鮮甜味，同黃咖喱混合後味道都算夾。黃咖喱係正宗泰式咖喱，但係就唔會好大椰汁味，平衡到香料、辣味同香味。本來我淨係想試一啖，後尾竟然將朋友食剩嘅飯全部食晒，真係太好味啦。小食嘅榴槤糯米糍睇佢細細粒，但係入邊充滿着榴槤餡味道都不錯。青木瓜沙律就不過不失啦。整體來講好抵食，亦都適合大食嘅朋友們，個份量一定食得飽。…查看更多

煙肉脆爆雞部腿包。味道：雞太乾，邊邊位置無醬，得飽同雞，更乾。有醬既部分調味做得幾好。雞帶點辣，醬好好地中和左味道。大細：雞扒比脆辣雞腿包薄，個飽同其他大細分別不大。價錢：47一個餐，呢個質素來講都唔算平。總結： 比上不足比下有餘，但下次再食，我都係揀返脆辣雞腿包好啲。…查看更多

終於又到返屯門嘅日子，喺呢條宵夜街入邊有呢間買煎餅果子嘅舖頭。就買咗啲宵夜返去同屋企人食。喺度見到年宵市場入邊買$65嘅煎餅果子，喺呢度最平都係$28感覺好抵，我叫嘅係加辣醬，肉鬆同芝士。即叫即整入口已經加分，加上老闆送咗少少粟米成個果子嘅感覺就係甜甜脆脆帶少少辣醬嘅香味。加$18要咗個手打檸檬茶。本身想叫小甜，店員話呢個鴨屎香走得檸檬茶本身已經較低左甜度，所以就好安心咁樣叫咗原味。音樂又發現真係唔算特別甜，甘甘地。另外叫咗兩碗甜品。首先係呢個豆酪芋泥碗。賣相擺到好靚外賣冚蓋之前店員好好人咁問咗我要唔要影相先？🙈🙈 呢個款入邊有桃膠，佢本身冇乜味，所以混合左甜味嘅紅豆食感覺就啱啱好。甜品可以選擇加椰汁奶茶等等做調味，啲汁分開擺，所以就好方便自己調校味道哦。我叫嘅係奶茶，奶茶冇另外加糖，所以就中和左碗入邊嘅甜味。入邊豆酪其實就係類似豆腐布甸同啫喱之間嘅質感，大少少甜味，豆香唔係特別濃。最欣賞嘅係污泥佢仲有原始嘅質感，搭配其他嘅配料都好夾。芋圓三隻，各有唔同味道，但味道比較淡，我屋企人話食完唔係好分得出。但係個質感就真係做得好好，即使係凍食都唔會變硬，比較煙靭。另外叫咗個抹茶芋泥碗。入邊紅豆芋泥同芋丸三樣嘢，係同另一個一樣。唔同嘅係呢一個入邊加咗桂花凍，桂花凍比較甜就唔係我最鍾意嘅味道。但上面有一種新奇嘢叫馬蹄珠，我細妹話已經出現咗好耐，但係我就第一次見，入面真係有馬蹄🤣🤣抹茶奶凍質感比較似布甸，有少少唔均勻，但整體味道唔錯。總體嚟講，味道絕對對得起價錢。服務態度都比較好，有仔細確認我嘅要求， 欣賞。…查看更多

午餐去到呢間韓國餐廳食。時間較早，唔洗排隊，入去發現附近幾台都係韓國人，睇嚟食物應該幾正宗。侍應幫我哋落單之後即刻就送上小菜兩個人食竟然有七碟小菜，有一半係辣嘅啱晒我胃口，另一半就好重麻油味同行人好鍾意食。我叫嘅係海鮮豆腐湯，搭配一碗白飯婆個辣湯係傳統韓國嘅味道豆腐係比較結實嗰種海鮮方面有一隻大蝦同埋一啲魷魚貝類，大蝦食得出係新鮮嘅。整個湯係最基本嗰種韓國湯飯味道。今次可以話最滿意嘅係小菜配角，變咗主角。…查看更多

從荃灣店開始就鐘意左食齊柏林熱狗，見附近新開左間就賣左黎試吓。原來熱狗加薯條宜家賣到百幾蚊。叫完現場等pick up,幾分鐘時間拎到番屋企，薯條經已唔脆，好失望。熱狗方面，叫左芝士肉醬果款，整體同以前味道一樣，唯一唔同嘅係今次偏咸，可能係配料份量問題。整體來講，唔值百幾，無下次啦。…查看更多

出邊興起去咗唱K，K lunch 送咗TuneIn本來冇任何期待就叫咗個最安全嘅豬軟骨拉麵，一想來嘅時候係熱辣辣嘅，咁已經比我想像中好。一篇嘅豬軟骨亦都好入味，份量都多。但面紅湯底就好似出前一丁個棒丁麵，冇其他特別嘅地方。…查看更多

夏日炎炎路過見到呢間有雪花冰，可以食果斷入去試吓，自己一個人食，叫綜合冰怕食唔晒，所以最後選擇咗紅豆牛奶雪花冰。 冰上高有滿滿嘅紅豆，上面再覆蓋住一層煉奶，連埋冰食感覺啱啱好，唔會太甜，又唔會話冇味。食到中間先發現原來仲有落黑糖，黑糖混合冰嘅甜味同埋焦香味，消暑一流。店舖設計得好懷舊，環境亦都好舒服，枱面亦都清潔得好乾淨呢一點係比較滿意嘅地方。見到佢有午餐，下次會考慮帶朋友來食完午餐再share個冰，岩岩好。…查看更多

所謂 塞翁失馬焉知非福，搵錯餐廳排咗半個鐘隊，最後去咗附近呢間泰菜餐廳。入到去有個好特別嘅日式居酒屋嗰種Bar枱，用餐地方喺二樓。坐底發現餐牌有好多選擇，有泰式生蝦、青木瓜沙律、咖喱海鮮、串燒等等，選擇好多。最終選擇左牛腩青咖喱，青木瓜沙律，仲有一個最特別、但係唔記得咗影相嘅蟹肉蛋捲。青咖喱味道比較溫和，唔會太辣，牛腩不過不失，本來叫咗個薄餅諗住配咖喱食，最後發現薄餅唔係好啱口味，係似中式薄撐嗰種，唔係好適合配咖喱 。青木瓜沙律，上面嘅鮮蝦好新鮮，調味同青咖喱一樣都係比較溫和，唔太辣，酸酸甜甜好開胃。最後嘅蛋捲份量好大，一個大嘅蛋捲設成五件入邊有真蟹肉亦都混合左蟹柳，再加啲魚子同紫菜喺上面整體味道搭配得比較好，唯一要注意嘅係應該係煎蛋嘅時候落得比較多油最旁邊嘅兩塊入口就會成口油，唔鍾意食油膩嘢嘅朋友，要注意下啦。最後埋單兩位食四百幾蚊，同一個二人餐價錢差唔多，諗返，應該叫二人餐比較抵。整體嚟講環境加食物質素都唔錯，對得起價錢亦都係一個適合聚會嘅地方。…查看更多