超敏感味蕾's Profile

慶祝朋友搵到工，佢為報答我地幾位朋友一直對佢嘅支持…話要請我地食飯喎！咁梗係食大佢…食餐好啦。所以就嚟返之前食過覺得又就腳又好食又對得住價錢嘅i kitchen啦！首先送上係set嘅前菜《車打芝士焗美國薯仔，鮮蝦，辣蕃茄》。紅紅黃黃嘅外表已經相當能夠引起食慾，芝士配蕃茄醬焗薯永遠都係咁冇法令我拒絕的，薯仔肉焗完不會太乾，因為佢配上左濃濃嘅辣蕃茄醬，軟軟的薯肉加上溶左嘅車打芝士實在已係最高嘅享受，再加埋薯肉芝士入面有隱藏住嘅蝦肉好驚喜。食完依個酸酸辣辣嘅前菜，簡係胃口全開！之後係每次嚟食必定要追加嘅前菜《黑魚籽鮮蝦忌廉蛋》$20。小碟仔放著原隻蛋上枱，蛋嘅頂端打開左，見到入面蓋住厚厚嘅黑魚籽好吸引呀！入口啖啖海洋味…配上滑滑嘅忌廉蛋入面夾雜住粒粒黑魚籽喺舌頭上爆開，味覺衝擊非常之大！抵我地order你嘅！《鮮蟹肉粟米茸湯》每次依度嘅湯上枱都好似一幅畫，用鮮忌廉喺湯上面畫上一道有美感嘅痕跡。湯嘅味道好濃郁，從未飲過咁濃咁真粟米味嘅湯，清甜粟米味同蟹嘅海鮮味出奇咁夾…剛好清一清口中魚籽味和蛋味迎接主菜！對朋友銀包絕對不客氣地點左set dinner最強嘅《》$308。澳洲和牛雖然比不上日本和牛，但油脂分布都係很好的，牛味亦都非常香濃，完全對得起佢嘅價格。食牛牛最正當然係7成熟，上枱嘅牛牛煎到甘香脆封住表面…入面仲係嫩嫩多汁的，果然係話7成就7成，廚師好嘢！切一小塊點上盤邊嘅礦物鹽提味，入口帶出牛油脂嘅豐厚香味…口中濃牛久久不消散！正呀！幾個女子嘅晚餐當然要用甜點嚟結束，今晚特別想食《意大利芝士餅》$58。軟綿綿嘅 tiramisu 夾層係2層蛋糕2層芝士再灑上可可粉，簡單嘅甜品看上非常豐富！一啖入口濃濃咖啡味，中間嘅蛋糕層非常濕潤散發微微嘅酒香…雖然我未食過意大利正宗嘅tiramisu，但依個就係我食過最滿足嘅一個tiramisu 喇！幫襯左i kitchen兩次，兩次都令我好想為佢打食評…原因係雖然兩次去佢都坐滿，但樓上鋪令人認識嘅機會比地鋪少…佢質素亦比好多好多地鋪都好好多…真係好值得用少少時間去打篇食評呢！i kitchen，我好快又會返嚟食你，哈哈哈…Read More

過開佐敦上朋友屋企打機，途中見到依間賣刺身甜品嘅小店就諗起上人地屋企不能兩手空空！入去買D野上去開心Share食個4人下午茶啦！店面小小，２個甜品櫃加１個大急凍刺身櫃，主要係做外賣生意的！天氣咁熱食刺身同甜品就岩晒喇，入去即昤衝埋去睇左刺身先！！揀左每樣一盤價值$60嘅日本無頭甜蝦＆泰式刺身生蝦。上到朋友屋企即時解凍即時食！解凍後排列得整齊嘅甜蝦賣相好吸引，甜蝦肉質軟中帶爽，非常清甜...不過我就覺得甜蝦細隻，要１啖過食２，３隻先滿足到凡味蕾對蝦味嘅追求。哈哈哈解凍後嘅泰式刺身生蝦晶瑩剔透，D肉仲好厚添，同出街泰國食店嘅一模一樣！再點上買蝦時附送嘅泰式醬汁...非常鮮味，咬落爽口...趙完蝦肉後口中keep住好濃嘅蝦味，愈食愈開胃添！$60蚊食到咁多隻真係好抵呀，以後唔洗為左食生蝦去食泰國野了！最後就講埋順便買嘅藍莓芝士蛋糕，$14一件！好抵食之餘仲有名牌cafe嘅水準！入口質感好滑，餅底好香，食完個口回味住啖啖香濃芝士味，夾雜住酸甜藍莓...自己食晒一件都唔會太溜。下次應該要買一個會更加抵！！！…Read More

兩個為食朋友生日，一次過約埋佢地一齊嚟到其中一位放工附近嘅地方…一行四人去食喺ig見到有靚靚waffle嘅cafe charm's食個晚餐當係慶祝啦！店面設計少許夢幻，坐位闊絡！一邊嘅開放或嘅水吧，可以見到咖啡師同甜品師各有各忙，非常精彩！店員年青有活力…帶領我地到坐位後立即為我地送上清水同Meun，再介紹店入面幾款推薦菜式！照單全收…再另加waffle同飲品！女孩子食晚餐，通常都要有個開胃嘅菜式排最頭！〈扒海蝦凱撒沙律〉新鮮海蝦燒到岩岩好熟度…爽脆鮮甜，配上都係爽脆而且調味成酸酸嘅沙律菜！開胃至極！同枱四人都係為雞翼發狂嘅人，點都要叫個〈特級水筆城脆雞翼〉過下口癮嘅！外皮炸到非常香脆，一口咬落入面啲肉汁係滴出嚟的…熟度拿捏得好好！第二隻就試埋付上嘅醬汁…酸酸辣辣嘅汁，配炸雞翼…可以享受脆卜卜之餘又唔會油膩！全日早餐，對於我依啲瞓到勁晏嘅女子…真係不能拒絕，所以就喺夜晚8點叫份〈英倫早餐〉滿足下！煙三文魚，炒蛋，炒什菌，牛角包，煙肉………等等非常豐富！最值得讚嘅係個炒蛋…香濃牛油同蛋味，入口滑滑就去到喉嚨。另外炒什菌好野味，配埋蛋一齊食係一絕！誠意推薦嘅〈手工和牛漢堡〉！用料係A5和牛，聽完即點！上枱嘅賣相非常誇張…中間塊漢堡好厚好足料，配上伴菜粗薯條…細心嘅店員為我地分開2份，再由我地自己親手落力再細分！果然係A5和牛，入口甘香牛肉味…漢堡溶出啖啖牛油香溜入包中！另外要讚嘅係粗炸薯條，脆脆外皮包住大啖薯肉！依味係性價比相當之高嘅菜式！最後甜品時間，即係女仔嘅主菜時間！哈哈…因為朋友生日，我地就點個賣相最華麗嘅當作生日蛋糕俾佢地切！〈花樣，迷人窩夫〉大大球嘅雪糕，厚厚嘅cream，焦糖，朱古力醬，香蕉，長柄士多啤梨極度豐富嘅材料！送上嘅店員哥哥提我地要襯熱食先食品嚐到最美味嘅waffle！果然…暖暖嘅嘅waffle外皮微脆，內層軟綿綿配上冰凍嘅雪糕同水果…真係咁耐以嚟我食過最好味嘅waffle！絕殺推薦依個waffle！最後要講埋飲品，少女系嘅〈士多啤梨沙冰〉都係選用長柄士多啤梨的，因為喺開放式嘅水吧偷睇到佢原盒拎出嚟再加落機打成我嘅杯中物！其實依個沙冰有少少偏向smoothie系，因為佢喺入面有加埋香蕉，飲落啖啖果肉！另外嘅推薦係拉花系嘅飲品，見到朋友飲果杯係拉左隻可愛熊熊！下次再嚟一定要點返隻嚟欣賞！今晚每人大約先係$170，慶祝生日嚟講咁嘅價錢+菜式+材料簡直係超值！…Read More

平時行旺角都好少行過嚟依邊，今日咁岩陪朋友睇汽車用品咁岩行過嚟發現有間小小甜品店！咁岩有啲熱又有啲口淡淡…就食個甜品放鬆下啦！簡約整潔嘅裝修，坐底就即時有店員送上一杯水同meun！喺大熱天時係非常貼心嘅舉動呢！同朋友一人點一個甜品，我點左$58嘅〈芒果拿破崙〉賣相非常吸引，層層鬆脆嘅夾層…夾住濃濃嘅吉士醬！支叉一拮落去嘅脆扑扑響聲…滿充聽覺！芒果成熟度足夠…少酸多甜…夾埋拿破崙食完亦完全唔覺膩，自己1人食晒一整個唔覺得過份呢！朋友點左$56嘅〈士多啤梨三重奏〉，一士多啤梨三食！淨係睇都夠晒滿足…士多啤梨布丁，士多啤梨雪糕，士多啤梨yogurt…再加好多好多士多啤梨伴碟！為士多啤梨發狂嘅人必試！小小店鋪，大大誠意！好耐有食過性價比咁高嘅甜品喇，值得推薦！…Read More

咁岩做野頭嚟開依頭，做完就同同事食埋野先走啦…見咁耐冇去澳門食過豬扒飽，見到澳門仔個名就入左去喇！首先嚟個〈秘制炭燒豬扒包〉先，豬扒大塊到個邊都突晒出個包出面，秘制醬汁醃得非常入味，豬扒肉質非常鬆軟夾埋外脆內軟嘅豬仔包真係一絕！比澳門個大xx嘅更好味！嚟個小食〈黃金茄子〉食住傾下計先，$68抵食！向來鍾意食＂黃金系列＂嘅我見到meun有個咁特別煮法嘅茄子，即點！粒粒茄子外面都包住厚厚嘅咸蛋黃，肥膩之中係包住蔬菜食完都冇咁大嘅罪惡感，岩晒我！店員推薦〈古法炒蟹〉！香香辣辣嘅炒料蓋住大大隻嘅蟹，一手拎起一口咬落去…啖啖肉嘅蟹身，肉質鮮甜…醬料非常野味，夾埋真係好正！以後食辣蟹又多個選擇！點個有包做伴菜嘅〈咖喱香脆黃金牛腩〉當主食，咁就唔洗食個飯咁飽喇！$88咁大碟，又包又咖喱汁又牛腩，抵！夾起炸到香脆嘅牛腩再依自己喜好沾上咖喱汁，好野味呀！牛腩肉質好香軟，但外皮又脆脆的…口感好有衝擊！再試埋用麵包沾咖喱汁，更加試到咖喱嘅味道…非常濃厚，辣度適中，唔係好食得辣嘅朋友都可以接受到！最後嚟返個〈椰青大菜糕〉清一清熱！淨係上枱嘅賣相已經嚇呆左，原個椰青上非常豪氣！入面嘅大菜糕包含住啖啖新鮮椰青肉，清清甜甜非常消暑…好味程度係下次可以嚟淨食依個都可以諗下！Yummy！菜式看上簡單，但原來充滿自己嘅特色！俾到驚喜嘅一餐！ …Read More

約好左同事放工食飯傾下計，遇著下雨天…大家就諗住喺公司附近求奇搵啲野食下就算啦…此時此刻boss就喺房行出嚟介紹我地去一間喺附近工廈嘅i kitchen，佢話食物同服務都係一流…性價比超高！咁我地就服從上司去試試佢啦！去到門口店員已經企左喺門口招呼我地入座，店內燈光藍藍暗暗的，極有情調。一旁仲有bar枱，設計非常年輕！放工極之肚餓，好快地前菜已經上枱！〈鯛魚刺身配意大利蕃茄沙沙，檸檬泡沫〉淨係睇個賣相已經好高分，魚片嘅鮮味配上淡淡的檸檬泡泡…酸酸辣辣嘅蕃茄沙沙就夾埋甘香火箭菜嚟食！正到不行了！更加肚餓！！dinner set前菜追加$20可以再多一款前菜。〈黑魚籽鮮蝦忌廉蛋〉原隻蛋上枱，配上高級食材黑魚籽…海洋味十足！食第二啖驚喜來了，原來滑滑嘅蛋入面加左蝦肉…唔怪得咁鮮甜！餐湯〈鮮蠔南瓜茸湯〉，賣相好靚！湯嘅蠔味冇蓋過甜甜嘅南瓜味，非常夾！南瓜亦打得非常滑！主菜〈酥皮釀焗鵝肝羊扒〉嚟喇！依個真係連平時麻麻地食羊嘅我都覺得真係正，香脆嘅酥皮包住我最愛嘅鵝肝，羊扒岩岩好熟保存到juicy嘅肉汁！點都估唔到依3樣野會咁夾…鵝肝嘅甘香味令到羊扒嘅羊蘇味完全消失！Yummy！另外試左少少朋友order嘅〈烤帶子黑松露意大利飯〉。海鮮配黑松露為舌頭帶嚟衝擊，帶子烤得半熟，入口軟綿綿…甜甜嘅鮮味為下一啖意大利飯仲好準備！個飯根本淨係聞都正…黑松露多到好似唔洗錢咁多！飯粒嘅熟度拿捏得非常好，比起其他地方食嘅煮到軟晒嘅意大利飯簡直係開心大發現！最後當然都係要畫返個圓滿嘅句號啦！〈自家製焦糖蘋果批伴雲呢拿雪糕〉金黃色嘅批皮包住滿滿嘅蘋果，仲有凍凍嘅雪糕…香脆酥皮同軟軟酸甜嘅蘋果，再加埋雪糕，一熱一冷嘅配搭好正斗！學長輩話齋：食完飯要食返啲飯後果幫助消化！最尾黎個甜品為岩岩嘅大餐中和番晒！食物環境完全對得住個價錢，絕對可以話係超值！…Read More

近排天氣開始熱，本來已經忘記左雞煲喺依個世界上嘅存在……某日喺facebook見到住佐敦嘅舊同學like左間餐廳，就八卦禁入去睇下好似幾好味，就約左依個舊同學去食依間涮一鍋喇！雞煲未嚟之前點左兩個小食嚟開醫下肚先，第一個係〈家鄉醃螄蚶〉。我地同行4人都未食過螄蚶，依味小食係店員推介…係潮州嘅特色野，用秘制醬汁生醃的！用手打開個殼…見到紅色嘅肉…鮮甜味配上醬汁嘅少少辣，好開胃！另一個小食係有少少中西合壁嘅〈白酒煮花甲〉。依個係喺常規meun冇嘅菜式，期間限定咁岩有靚花甲先會有！大大隻花甲啖啖肉，啲白酒湯汁飲落勁甜…喺煮嘅時候精華出晒嚟！Lam Lam利呀！主菜嚟喇〈涮涮辣雞鍋〉之追加每人一鮑魚！追加鮑魚係$10一隻，即刻成個雞煲富貴晒！一打開個蓋陣陣香料味飄出嚟，除左雞仲有好豐富嘅配料：香蔥，莞茜，洋蔥，木耳，蒜頭！…即刻食左隻鮑魚先，非常彈牙…細細隻又估佢唔到鮑魚味咁濃喎！之後夾舊雞翼食下先，香料味冇完全蓋過雞嘅鮮味…平時食啲雞煲一味得個辣，辣到唔知食緊乜！但依個完全唔會…微微嘅麻香配上雞，真係雞都仲食到有雞味的！食完啲雞梗係要追加野食打邊爐啦，先嚟海鮮！店員提提我地食海鮮嘅話最好打嚟訂左先…今次我地好彩唔訂咁岩都有貨！因為我地樣樣都想試…店員就幫我地每樣野轉做半份咁整成併盆！幾樣海鮮都好新鮮…推薦大蝦，爽甜嘅蝦肉，夾埋香香辣辣湯底！好正！再嚟就係雜錦豬併盆雙併，都係因為樣樣想試…就每樣要左半份：豬黃喉，豬蹄筋，豬生腸，黑松露蟹肉餃，蟹棒，水洨筍！特別推介嘅係黑松露蟹肉餃，勁好味…岩岩熟嘅餃皮包住濃濃黑松露配上蟹肉鮮味，好特別！記得唔洗煮咁耐…餃樣爛左就浪費喇！火鍋冇牛食點對得住自己？〈A prime雪花手切肥牛〉！美國牛最正就係濃濃嘅牛味，7成熟岩岩好！一鈴兩食嘅〈脆炸響鈴卷〉！即叫即炸…上枱仲係出緊煙的，一食係：點少少泰式酸辣醬就咁食，香脆！二食係：怕熱氣嘅就浸落火鍋湯2秒先食，食湯嘅精華！總括依間小店比其他雞煲抵食，用料新鮮，醬料鍋料用心調配！仲有自家飲品…唯一係喺內街唔太就腳，不過又抵又好食…值得行多兩步！ …Read More

愛食燒肉嘅我聽同事介紹，拉左另外3位愛食燒肉嘅女子嚟到依間位於佐敦嘅燒肉店共進既晚餐！一入到店入面，完全聞唔到其他燒肉店嘅燒肉味…奇怪喇！明明枱枱客人都燒緊肉……店員見我地成頭問號就埋嚟解釋俾我地知，店中嘅爐係用陶瓷炭，火力持久均勻！另外係爐下面抽氣…所以我地就呼吸到比其他燒肉店清新百倍嘅空氣！依啲就係高級同細心喇！解答左我地嘅疑問…店員就送上茶同埋前菜俾先地邊品嚐，邊睇下食咩好！ 食肉之前都要食返啲菜打下底先！所以點左個〈溫室蕃茄沙律〉！主角溫室蕃茄被切到一薄薄的同粟米粒粒鋪喺沙律菜上面，夾埋酸酸甜甜嘅沙律汁…入口清甜，生津開胃！我準備好食肉喇！之後肉類就陸續上枱，店員為我地續樣介紹…話俾我地知點樣燒係最好食！首先我地燒〈牛舌（薄切）〉先！通常鍾意食牛嘅人都應該會鍾意食牛舌…薄薄嘅牛舌燒完金黃色的，個邊有香脆嘅口感！濃濃牛味！再嚟嘅就係擺碟擺得好靚好似玫瑰嘅〈豚頸肉鹽燒〉，睇住啲豚頸肉喺個爐上面慢慢熟，慢慢卷起…係一個享受呀！依個得店員姐姐出手相助，燒得好靚…金黃色的！燒完嘅豚頸肉好香，唔會油油的！淡淡嘅鹽味配上豚肉香…根本唔洗任何醬汁！〈厚切prime牛小排〉油脂分佈均勻，識食牛一定係食厚切！識食牛一定係食半熟！燒完出嚟有格格網紋，真係好靚……入口果陣牛味係濃到衝上個鼻，油脂分佈平均令肉質好鬆軟…但又不失牛肉應有嘅咬口！食肉就食下海鮮喇…每人一隻〈日本產帆立貝〉！大大隻配上牛油蒜容黑松露醬，放喺爐嘅最中心位都係岩岩好夠放咋！店員姐姐教我地：見到殼上面嘅汁滾就可以翻轉舊肉，再燒多陣就食得！一啖放入口，非常鮮味！諗都冇諗過原來配黑松露醬係咁夾…完全冇話濃得濟搶左個海鮮味，好正！最後嚟個〈汁燒原隻魷魚筒〉，依個唔洗自己燒…上到枱已經燒熟左靚靚喺度等我地食！甜甜地嘅燒汁夾埋魷魚嘅海洋味，一流！啲鬚就有啲似日本一包包嘅燒魷魚小食！送酒一流！另外想推介嘅係〈北海道啤酒〉，雖然唔係野食嚟！但食燒肉夾啤酒真係一絕，依個啤酒好岩女仔飲，甘甘甜甜好香麥味！服務好，食物正！咁嘅價錢真係完全對得住，他朝一日我會再返嚟食你嘅！…Read More

同朋友o係九龍城食完飯, 好似個胃就有o的位喎...又好似仲有o的是非未講完喎! 咁做咩最好呢? 梗係食糖水啦! 最愛榴槤嘅我點左個依度獨有嘅甜品: 榴槤女皇! 其實冇圖的話都唔知係咩黎, 原來就係原個椰皇裝住椰汁燉奶西米露加勁大球金枕頭榴槤肉! 入口啖啖椰汁香味,配上大大啖榴槤肉...非常濃郁! 原來依兩隻熱帶水果係可以咁夾嫁! 超正!…Read More

香港女仔大部份都鍾意食日本野!之前聽九龍城朋友講過依間鋪頭好味道, 咁今次就約埋3個八婆仔黎依度用日本菜式送是非啦!門口嘅設計好有日本風情, 招牌上嘅ICON係日文併成嘅面孔…特別易認! 鋪頭入面裝修係日式設計, 燈光柔和…令人好放鬆呢!坐低之後店員第一時間送上茶，前菜同meun…我地可以一邊食住前菜開胃一邊睇meun點菜！雖然店名係叫爐端燒，但食日本野當然都要食下刺身先安樂嘅！第一道菜係有五款刺身嘅〈雲丹刺身合盛〉：原板馬糞海膽，油甘魚，三文魚，八爪魚，牡丹蝦！勁鍾意食海膽嘅我見到板海膽已經吞口水喇…海膽非常新鮮，好滑好甘香…淡淡海水味完全冇掩蓋馬糞海膽嘅獨有鮮味！另外要讚嘆嘅係油甘魚爽口清甜，連平時唔太食油甘魚嘅我都愛上了！第二道上嘅菜係meun上大人氣嘅〈牛油果軟殼蟹卷〉。淨係睇個賣相已經好有霸氣…軟殼蟹大件過舊飯一倍之多！我肯定係即叫即炸即卷，完全唔係出面啲連鎖店整定的…因為入口嘅時候個蟹仲係有溫度，配埋香滑嘅牛油果同埋微微醋味嘅壽司飯…完全唔會覺得個軟殼蟹好油膩！岩晒女仔口味！排住隊等我地食嘅係津屋獨有嘅〈自家制腐皮餃子〉！薄薄香脆嘅腐皮代替普通嘅餃子皮，包住甘香嘅九菜豬肉…一咬落去有澎湃嘅肉汁走出嚟！食到我地lamlam利～另一個特別嘅菜式〈櫻花蝦炸豆腐〉，內裏白白滑滑嘅豆腐…外層包滿少女粉紅色嘅櫻花蝦！因為包滿細細嘅櫻花蝦…外層咬落比普通炸豆腐更脆，付帶住甘甜嘅鮮蝦味…口腔裏面嘅海洋味回味無窮！終於食到串燒！都係食啲特別嘅〈芝士雞肉丸骨棒〉！香濃嘅芝士包喺雞肉，雞軟骨打成嘅肉球外層…一口咬落去有2個層次嘅衝擊，首先係食到濃濃芝士香，再嚟係啖啖鮮雞肉…非常特別嘅自家制菜式，必試！再嚟串燒〈燒洋蔥豚腩片〉，洋蔥燒完勁甜，配上豚腩完全中和到油脂嘅肥膩…〈皇帝蟹海鮮鍋〉。依個上枱第一時間相機食先啦…勁大件蟹，勁大隻帆立貝，勁大隻蠔先$138？識食嘅一定係飲啖湯先…海鮮嘅鮮味，蔬菜嘅甜味，豆腐嘅清清豆香味非常咁夾！再嚟食隻蠔，肥美飽滿嘅蠔身喺口入面爆開非常甘香，對愛食蠔嘅人嚟講依個就係享受！再食主角皇帝蟹…啖啖肉，蟹肉絲新鮮有咬口…咬下咬下海洋味充滿左成個口！最後食埋鍋入面嘅配菜先係最緊要，因為啲蔬菜喺煮嘅時候吸晒海鮮嘅精華…比起平時清煮嘅菜更甜！完美嘅一餐不能缺少嘅係：甜品！由店員送上小小一球的紅豆雪糕，濃濃嘅紅豆味加埋入面嘅紅豆粒…好正！我想要多球呀！！！！！！特別一讚係店員服務非常親切殷勤有禮，細心為我地解釋菜式…這就是到小店消費嘅享受！比起連鎖店嘅冷漠假笑好大對比………Read More

難得星期一中午集合到３個都得閒嘅朋友出到黎就腳嘅太子食lunch！幾個後生女去茶樓飲茶又好似怪怪地…就搵到依間籠太子點心專門店喇！門口同裝修都係青BB好清新，好放鬆呀！冇平時去飲茶嘅嚴肅隆重感覺。一坐低就黎壺茶先，飲落淡淡米香…大家都好奇佢係咩茶呢？一問之下…原來係韓國玄米茶，不寒不燥！邊飲邊畫紙仔…睇下食咩好呢？最後我地４個女仔竟然點左１３個樣野，食力驚人呀。哈哈哈哈首先我地點左門口推介嘅老火靚湯－眉豆花生蠔豉雞腳煲豬骨。果然係無味精，飲落清清甜甜，好香豬骨味！雞腳岩晒我地４個女仔補下骨膠原，正！蜜味叉燒腸，皮薄叉燒靚！比起大酒樓果D疑似工場交黎嘅腸粉好食一百倍！鳳爪排骨飯！對於遲起身嘅我黎講平時飲茶係好難食得到…因為我去到已經過左供應嘅時間…點心店嘅好處就係食點心唔洗早起！排骨偏多肉少骨，肉汁應該係蒸時落左個飯度，D飯好香呀！香滑反斗糕！我食完發現應該係一啖一個嘅奶皇馬拉糕…對於唔食得太甜嘅我黎講岩岩好！籠太子蝦餃皇！重頭戲黎喇…人人愛吃的大蝦餃！一粒入面竟然係有唔止一隻爽脆鮮味嘅蝦…正到想搶埋朋友果粒黎食呢！鮮蝦燒賣皇！有蝦餃又點可以唔食埋燒賣…一樣係蝦肉大大粒，加埋豬肉冬菇鮮味十足！原隻鮑魚燒賣！淨係睇個樣都滿足晒！YUMMY！女孩子食飯，總要有個甜品結尾先得嘅。老闆推薦：椰汁桂花糕！好特別嘅配搭，平時桂花糕＆椰汁糕分開就食得多…估唔到合併埋一齊係會咁夾！淡淡桂花香加濃濃椰汁…甜而不膩。我地４個人，得３件…好味到係每人試半件後，用包剪揼決定邊個可以食埋餘下嘅一整件！四個人，13個點心埋單先係$289。非常抵非常滿足的午餐，下次出開黎太子再食過！…Read More

今日約左朋友去彭福放狗，去九龍城食ｌｕｎｃｈ經過好耐無食過嘅諾亞…見到出左新野，有三個口味！記得朋友最愛抹茶…好啦！就買件去同朋友開心ｓｈａｒｅ啦！個包裝盒好可愛，有對貓耳朵！依個卷卷嘅名堂係：京都抹茶鮮乳卷（價值＄８８）個蛋卷面頭鋪滿抹茶粉，厚厚嘅抹茶味蛋糕包裹住超級多嘅ｃｒｅａｍ！一行三人，所以將佢大分成三件…目測可以6個人分享都夠！蛋糕質感好厚實，超濃郁抹茶味！ｃｒｅａｍ好香滑…同蛋糕一齊入口個感覺出奇地夾，本身咁多ｃｒｅａｍ應該會好＂溜＂…但夾埋抹茶蛋糕同蛋糕上面嘅抹茶粉就岩岩好喇！喺陽光下，草地上用左５分鐘就清晒成個蛋糕，好滿足呀！己決定下次經過要試埋佢另一個味道，士多啤梨！！…Read More

女僕CAFÉ 喺香港興起幾年，今次終於搵到3個朋友志同道合嘅朋友一齊去ふわふわ喫茶店玩下！一行4人到樓下已經見到有可愛女僕派緊傳單，睇住水牌上到6樓…跟住得意嘅腳印就去到門口喇！一開門女僕親切地講句”主人,歡迎你返黎呀!”…之後就帶領我地到座位。店內裝飾係夢幻海洋風配藍天白雲，襯埋女僕嘅藍制服！坐底後可愛嘅女僕寶寶就將meun送上，向我地介紹餐單…我選擇左價值$118嘅魔法餐大蝦蛋包飯配飲品藍莓多多。另外同朋友share兩客小食:$38來自星星的雞塊+$45小動物併盤。４杯飲品先到，岩岩好可以一解同女僕寶寶傾計嘅口渴。我點嘅飲品係酸酸甜甜嘅多多味配藍莓嘅清新..好開胃呀！>w<小食來自星星的雞塊+小動物併盤好快就趕住黎俾我品嚐！原來小動物併盤係由薯餅，魚手指，芝士波，香芋波併成一隻貓貓樣，非常吸引！登登登登！！！主角來了！大蝦蛋包飯！我一向最愛食蛋包飯…依個飯嘅蛋好滑,入面包住濃濃蕃茄汁嘅飯..大蝦好香好脆卜卜！YUMMY！最後當然由甜品結尾, 係寶寶推薦嘅玫瑰蛋糕！細心嘅寶寶知我有養狗狗，為我畫上一隻超級可愛嘅狗狗！蛋糕好香玫瑰味＋清甜，為依２小時畫上完美嘅句號。4人總花費只係$668。今次嘅體驗實在難得，個個都食到肚漲漲咁走，亦同女僕寶寶傾得好開心！我決定左要再黎..因為我已成為左可愛寶寶＆美味蛋包飯嘅FANS喇！>W<…Read More