Cook n Eat的個人專頁

有人介紹公司附近一間burger店，今日趁機過去試吓，鋪面細細只做外賣，啱晒附近嘅打工仔。店面只貼出英文餐牌，其實都有中文版本嘅，除了一般嘅豬牛雞素，仲有海鮮同和牛漢堡可選，最後揀咗三重芝士和牛堡，再加$18轉套餐，有三粒香芋地瓜丸同埋飲品。和牛漢堡要等10分鐘，行吓街就返嚟取外賣。首先要讚吓佢嗰三粒地瓜丸，真係好好食，煙煙韌韌咁，裏面有啲芋融，值得推介！重點漢堡包都好好食，眼見有兩種唔同顏色嘅芝士，溶溶地食落好正！和牛漢堡都非常好食，而且好大件，好香！飲品就揀咗經典珍珠奶茶（珍珠要加$4 ），正常水準，珍珠夠煙靭，合我心意！…查看更多

疫情咁耐，已經好耐冇去旺角街頭掃街，今日難得幾口子出嚟行吓，路經呢間小食店，就湊熱鬧比小朋友認識咩係香港傳統小食。佢似乎主打炸大腸，雖然我平時都唔係特別喜歡，不過都叫串黎試吓，外皮都炸得夠脆，$16有切開五舊一串。臭豆腐$10一磚，老實講就唔係好臭，不過都外面都炸得夠脆身，加埋甜醬辣醬都OK嘅。另外有碗仔翅同埋生菜魚肉， $22一碗，都幾大碗，魚肉好多，碗仔翅唔記得落醋，感覺淡咗啲。掃街當然唔少得咖喱魚蛋同燒賣，魚蛋係細細粒嗰款，燒賣都幾好食，再加咗墨魚、牛柏葉和牛丸，都幾爽口彈牙，唔錯嘅。本身帶住小朋友掃街就唔係太方便，點知呢度咁岩隔離有個公共空間仲有枱櫈可以坐低，有別有一番風味。…查看更多

難得有閒情可以約人食個tea, 黎咗呢間Yell-owl試試。下午2點幾黎到仲有lunch set 和all day breakfast 揀，竟然有龍蝦食，而且價錢唔貴，就整隻試吓。這個「貓頭鷹超級全日早餐」真係相當豐富！除咗有原隻龍蝦（可選半隻），仲有egg Benedict, 蟹肉牛油果多士、豬肉腸、粟米粒、茄汁豆、薯餅、大啡菇、煙肉、蕃茄和沙律菜，真係好超級！份量好多！龍蝦都有手板咁大，肉同膏都好多，好開心呀！肉質都好好，夠鮮夠彈牙！另外個蟹肉牛油果醬都好食，不過蟹肉就唔係好覺，但襯埋多士食好好！egg Benedict 都值得一讚，連埋蛋汁一齊食塊煙三文魚，好yummy呀！其他配料正常水準，相當推介食呢個！另外我哋都嗌咗個午餐煎石斑魚，有沙律、餐湯和牛角包配送，三樣都好食！至於主菜，塊魚煎得好香，魚皮帶點脆，魚肉點埋個汁就無咁單調。連啲薯仔同埋蘆筍都令人覺得好味。飲品方面呢度都算多選擇，所以佢絕對唔係一間普通嘅Cafe，我選擇左Vanilla Latte（跟餐加$10 ），靚拉花加滑咖啡，完美配搭。呢間店真心令我有驚喜，九龍城果然有不少人世小店👍🏻…查看更多

記得之前食過觀塘有間自助串燒放題，諗住再去嘅時候發現原來已經改咗名，不過格局其實一樣，感覺熟食嘅食物款式係多咗啲，星期一至四夜晚都只係$238一個人，而家仲做緊二人同行九折優惠最開心係有每人半隻龍蝦餸，所以其實都幾抵食！第一時間梗係去拎熟食和飲品，飲品選擇都算多，有平時飲開嘅汽水、紙包和茶類飲品。熟食就有不同款式嘅沙律、小食、pizza、炸物、雞翼，最正係連海鮮都有，有熟蝦、青口和蠔等等，仲有糖水添！其實食熟食都已經好吸引，但係一定要留肚食串燒！串燒已經一串串吉好晒， 十分方便企理，有蝦、蜆、帶子、青口呢啲好嘢（仲有個網俾你燒，我記得之前係冇嘅，要讚賞下佢呢個進步）當然仲有不同款式嘅腸仔、丸、肉類和蔬菜類，我自己就推介菠蘿、多春魚、牛肋條和叉燒，仲有芝士丸和棉花糖！食物質素都算唔錯！食到咁上下，店員就自動送上芝士焗龍蝦半隻，估唔到仲有鮑魚和大頭蝦！龍蝦肉彈牙，讚！隻鮑魚都幾大隻！基本上大部份海鮮都新鮮好味，我諗只係開張期間先至咁送掛，如果唔係就真係太抵食了！😆😆其實甜品都有好多款，不過老實講我個胃都真係裝唔落了，只好淨係幫襯雪糕，雖然唔係大牌子，不過都OK啦！以呢個價錢可以任食燒烤，仲可以亮着冷氣、唔使自己慢慢燒，個爐識得自動轉，仲有咁多其他嘢食，真心推介！…查看更多

公司附近開咗間車仔麵店，午餐時間都幾多人幫襯，今日第一次入嚟，原來係行復古style，舖頭唔大但卻充滿懷舊色彩，門口嘅綠底白字膠牌、黑膠碟機、周慧敏同Beyond poster，嗰個通窿嘅公屋牆身，仲有嗰啲舊式收音機同埋熱水壺，好係80年代。點餐可以用紙剔或者QR code，五餸只係$56 ，以銅鑼灣呢個價錢來講都算抵，今日我揀咗瑞士雞翼、春卷、潮州爆汁牛丸、五香牛腩、魚皮餃油麵，每個餸至少有兩件，所以都相當大碗，牛腩好林又入味，仲有四舊，呢個抵賴，另外瑞士雞翼都好味，爆汁牛丸冇想像中咁爆炸，不過都可接受，魚皮餃和春卷不過不失。另外嗌咗碟油菜同埋鮑汁雞腳，份量都幾多，雞腳夠林夠入味，令人滿意。…查看更多

之前食過馬祖養生湯麵，感覺都幾唔錯，原來佢仲有任食任飲火鍋，相比起以前另一間同樣以養生鍋為招徠的火鍋店，馬祖呢度就價錢相宜好多。同一般放題店一樣，可因應不同肉類選擇而有不同價錢，我哋今日就揀咗個298套餐，有美國極上牛頸脊、西班牙黑毛豬、牛肩胛肉同埋無激素豬肉任點任食，除此以外當然仲有好多其他任叫食物和飲品。吸引我嘅係呢度嘅養生湯底，而且仲係一人一鍋，非常之方便，自己鍾意食乜嘢就落乜嘢。湯底都有12款選擇，花多眼亂，最後我就要藥膳養生清雞湯，老公就要藥膳椰子清雞湯。湯底好快已經送上，熱辣辣試一口，藥膳味不算很濃，清而不燥，有桂圓、紅棗、杞子等材料，而老公嗰個嘅椰子味都好出，兩個都好。試完湯底，就試吓d 牛。牛頸脊色澤紅潤，十分嫩滑，黑毛豬薄切同樣好味，其餘果兩款肉其實都唔差嘅，不過俾得呢個價錢梗係狂食牛頸脊啦！至於自助區嘅食物，同樣有驚喜，呢度好多特別款式嘅丸，包括冬陰功蝦丸、芫荽燒賣、芋泥貢丸、芝士小籠包（你當佢芝士丸好了，別想像跟小籠包有什麼關係，只是形狀相近）、芥末魚丸等，我覺得都幾好食。當然仲有粉面和蔬菜，連羽衣甘藍都有，仲有菜心苗，都好少火鍋會食。飲品和甜品選擇都多，仲有熱茶和暖的紙包飲品供應。整體嚟講我都相當滿意，絕對推薦給朋友。…查看更多

喜歡食雞煲既我，之前同朋友在屋企附近食過一次之後，又發現原來馬鞍山仲有另一間可以雞煲打邊爐，但基於宜家無得晚市堂食，就唯有買個外賣雞煲，然後自己買其他嘢打邊爐！呢間鋪位於村屋裡面，都近馬鐵站唔會難揾，雞煲有辣和唔辣，由於預埋小朋友食所以揀咗唔辣的「醬香雞鍋」，半隻雞$168價錢合理，即叫即整，都唔使等好耐，就pack好盒比我！佢知道我會打邊爐仲送埋兜湯比我用，非常貼心！店員叫我回到家倒落鍋煮多2分鐘，我相信係為咗避免煮熟哂d雞之後等到食嗰下就over咗，跟指引做果然無錯，d雞剛剛好，而且醬香味真係超香呀！半隻雞的份量都不少，還有洋蔥、蒜頭、芫荽等配料，味道好夠，所以食完啲雞即刻到埋個湯底落嚟，就可以打邊爐啦，十分方便！個湯底白白地色，估計係豬骨湯。…查看更多

今日同朋友嚟咗一間細細地嘅新餐廳，裝修簡潔但天花上的月球燈飾靚得不得了！襯番Luna呢個名，牆上的月蝕裝飾和假火爐影像都相當有特色！午餐有6款選擇，$88-138包埋湯/沙律及咖啡茶，相當合理！今日和朋友share要左「煎西三文魚併西班牙紅花忌廉汁」（$108）及「香煎羊架配薯條」（$138）。是日餐湯係蕃茄湯，蕃茄味濃，帶點兒蕃茄酸味，感覺不錯。不久，主菜來到，想不到羊架有三大件，煎得好香，羊羶味頗濃，喜歡食羊的有福了！肉質都腍，可謂色香味俱全，有趣的是薯條變了薯蓉，一樣好味，還有伴菜！感覺滿足！至於三文魚同樣大size, 魚肉唔會鞋口算滑，煎得唔錯，呢個反而配薯條，估唔到都幾脆，好味喎！最驚喜係個甜品，加$40有tiramisu，以為是一件餅，點知原來係一杯！仲有朵精緻的可食用花，賣相100分！味道都好！比起平時的tiramisu,這杯比較流質但同時有質地，甜度剛好，連花一起吃可以減低太漏的感覺，因為份量都不少，中間仲有一舊似餅底既東西，總之十分推介這個獨特的甜品！…查看更多

觀塘作為一個美食天堂，要試嘅餐廳永遠都未試完，今日呢間神木日本料理位於工廈裏面，感覺都好新淨，每張枱都有一個煙通，方便吸走燒肉的油煙，但原來仲可以坐出戶外，因為剛好呢一層就有個平台，見佢掛晒吊燈，相信夜晚會更有情調，今日系假日，人流不多，好讓我們可以慢慢食慢慢傾。午市定食都幾多選擇，我哋叫了一個「雜錦角切魚生丼」（ $98 ）同埋「鹽燒鯖魚丼」（$72），每個午市定食都配送中華沙律、沙律菜和麵豉湯，作為前菜來講都幾豐富，質素都唔錯啦！主菜方面，魚生丼主要有三文魚、油甘魚、蝦、玉子和蟹籽，款式來講唔算好多，不過質素都中上嘅，而且份量都唔少。而鯖魚丼都燒得幾好，肉質實淨，點埋醬汁更好味。另外我哋嗌左兩杯特飲，一杯係藍柑乳酪，另一杯洛神玫瑰花茶。藍柑乳酪真係淺藍色，乳酪味就少少似益力多咁味囉。而玫瑰花茶就真係見到好多玫瑰花瓣，仲有紅棗和洛神花，後者嘅味道酸酸地，非常醒胃，飲左呢杯真係覺得養生兼美顏！…查看更多

疫情以來，都好少掃街了，今日經過旺角呢個小食店，俾佢嘅炸雞吸引，決定外賣回家，但係雞都有雞翼、雞髀、雞柳、雞軟骨等等好多款式，仲有其他小食，好開心呀！根據佢嘅餐牌推介，必食同人氣嘢都幾多喎😂😂二話不說整隻招牌炸雞髀先，$32隻係即叫即炸，仲要係生炸，所以非常新鮮，而且係超大隻！出乎意料之外！外層粉漿唔算太厚，炸得勁脆，同時裏面嘅雞肉仲保持到嫩滑，而且唔會炸到出邊燶晒裏面都未熟，我俾9分！另外有鹽酥雞粒（細份$25 ），一口雞粒方便食用，又唔會太鹹，都OK。粟米薯餅（ $22 /五件）好似都幾抵，外表炸到金黃色，但係又唔係炸雞嗰種脆法，薯餅裏面還有粟米，味道都唔錯。最搞笑有個特色Oreo 西多士($25)，將麵包油炸但食唔出油膩感，加上Oreo餅碎和煉奶，喜歡甜品嘅朋友都可以試吓，我都幾鍾意，如果大份啲就好啦！拎走外賣之前，店員都會問你想落乜嘢調味粉，原來有好多選擇，包括咖喱粉、蕃茄粉、芝士粉、蜂蜜芥末等等，我都係叫佢求其落啲，反正食落我都分唔到咩味😂😂想即場食嘅朋友都可以喺佢呢度出面張枱仔食嘅，如果唔怕喺街度除口罩的話😷…查看更多

食完個快飯好似唔係好滿足，奬勵自己飲番杯嘢，廣告牌上的戀戀草苺好吸引，有果茶和優格之分，諗住果茶應該健康啲，要左大杯加芝士奶蓋（$45），話明真鮮果系列，真係好有草苺味道，不論是聞或飲都好士多啤梨，當然唔會酸啦！即使加芝士奶蓋都唔會搶左個味，係質地厚咗，同本身果茶兩個層次，溝埋飲都唔錯。另外我哋仲叫左杯「圓圓珍珠奶茶」（大$30），佢有分圓圓珍珠和黑糖波波兩個系列，分別主要係前者用兩款珍珠包括黃金珍珠和黑糖珍珠混製而成，而且只有圓圓珍珠系列先有大杯裝，既然未試過黃金珍珠就試吓啦，飲嘅時候雖然好難睇到飲緊邊隻珍珠，不過食得出一隻係煙銀啲，一隻就甜啲，相信煙銀啲嗰隻就係黃金珍珠，我覺得咁樣兩溝又真係幾好味喎，而本身奶茶底都做得好唔錯，又滑又唔會太甜👍🏻…查看更多

觀塘工廈樓上Cafe多的是，之前都去過幾間小店，今日去嘅呢間舖位相對細，只有三四張枱，有幅大大的彩色壁畫相當搶眼。Lunch hour主要提供all day breakfast和三文治，朋友今日點了一個「慢煮雞胸高營三文治」（$48），有炒蛋、生菜、蕃茄和慢煮雞胸，感覺清新健康，佢塊包都烘過，份量都有咁上下。我揀嘅係美式all day breakfast ($96)，相當豐富，有車厘茄、藍苺、沙律菜、薯角、切粒啡菇、腸仔、煙肉，另外加一款主食，我選擇咗慢煮雞胸，一啲都唔鞋，健康又好味。個配搭有蔬菜又有肉，而且都飽肚，味道唔錯。個餐仲配左一件麵包，可以揀牛角包或者堅果包，我揀嘅係牛角包，估佢唔到咁大件，有我隻手板咁長，好可惜我入嚟就掛住食，影唔到本身幾大個😂😂佢焗返熱，而且啲酥皮都好鬆脆，好好食呀！兩個餐會包細杯熱飲，可以加錢轉凍飲或者轉大杯，朋友仔飲嘅係凍Latte,我就加大要左Hazelnut Latte，香氣撲鼻，正！…查看更多

西沙茶座聽得多，其實附近都有其他嘢食，呢間King’s & Queen‘s 冰室位於西沙公路泥涌石灘附近，駕車或搭巴士/小巴都可輕鬆到達。冰室室內環境不算很大，但看得出老闆很用心佈置，有很多不同的主題畫，還有希臘異國的風情。室外有很大片的露天茶座座位，可遠眺泥涌景色。如果天氣好又唔怕熱，坐出邊都感覺很爽，不過今晚我哋就選擇室內。冰室主打家常特色小菜，今次點了以下的餸菜：粟米魚肚羮($88)，味道鮮甜，份量很大窩，足夠4-6人份量。 黃金蝦球($98)，蝦球香脆可口，皮脆肉嫩。啫啫滑雞煲($68)，熱烘烘煲仔菜，雞肉嫩滑。黑松露醬炒西芹蝦球($108)，黑松露清香，西芹清新爽脆，蝦球爽口。蝦醬通菜牛肉($88)，蝦醬味香濃，通菜及牛肉爽滑。冰室提供各式汽水及奶茶、檸茶/水，可供選擇。如果有多啲特色飲品就更加好了。另外此店採用日本高質素食鹽，餸菜全部走味精，令大家食得健康放心。…查看更多

好耐冇同呢位朋友兩個坐低食飯傾偈，難得今日可以拋開兒女齋，就嚟觀塘呢間黃店Cafe慢慢坐慢慢傾。呢度嘅裝修好簡約，木係傢俬配上少少綠色嘅植物，已經令人感覺好舒服。午餐由$62至$72不等，價錢唔貴，喜歡的話可以另外加$15要沙律、加$20要甜品，或者飲特飲就半價，難得咁開心，我哋梗係食盡佢啦！先來個田園沙律，份量都幾多，不過主要都係菜，只有兩粒車厘茄和少少黑醋，感覺相當健康。主菜方面，我揀嘅係日式鰻魚蛋包飯（ $70 ），賣相好靚，鰻魚上面有一大堆紫菜碎，蛋包飯嘅兩旁就有好多粟米粒，塊蛋熟得來又夠滑，煎得好好，鰻魚雖然唔係好大條，但係都好食，鰻魚汁都唔錯，整體好滿意！朋友要嘅係日式照燒雞扒飯（ $62），睇個樣就不過不失啦！至於飲品方面，我要左熱情果Smoothie，質地唔係好杰，甜甜酸酸味道都唔錯，感覺好清新。朋友飲嘅係熱榛子朱古力，拉埋花好靚呀！相信都好飲。最後就係甜品啦， $20可以揀Tiramisu或者cheese cake，我哋兩個都要咗Cheese cake，份量比我想像中大件，仲有少少朱古力醬喺面頭，味道唔會太甜，質地都ok啦，實淨得來又有點鬆軟。開心暢談兩小時，有機會下次再嚟過。…查看更多

趁未正式開學，同小朋友把握最後機會玩餐飽，今日嚟咗大美督嘉年華燒烤，好耐之前已經想來，因為佢個充氣彈床太吸引了！由於充氣彈床只開星期五六日，又想避開週末的多人，於是我哋週五黃昏過來，人潮唔多，小朋友急不及待已經沖去彈過不停，充氣彈床有工作人員睇住，夠高又好玩又安全，家長可以放心去燒嘢食了！其實除咗充氣彈床，嗰度仲有小型遊樂場、滑梯，同埋亦都可以買泡泡水、飛機等兒童玩具，連夾公仔機都有！不過淨係一個草地，其實都已經夠班小朋友喪跑放電。行入嚟先知呢度嘅地方真係超級大，燒烤位置分幾個區域，有露天草地燒亦有有蓋地方，而且燒烤亦都分享港式、韓式和重慶燒烤，價錢一樣，星期五六日成人每位$188 ，小童$118 ，限聚令之下要四人一爐，開爐費$50 。今日我哋就揀咗個韓式燒烤，幫我哋開爐嘅工作人員話，呢個爐係新訂返嚟直接韓國入口，同出邊嘅韓式燒烤不同的是，呢度係用備長炭燒，令到火力更均勻，而且都幾襟燒喎，我哋燒咗三個幾鐘，完全唔使換炭。可以享受炭火燒烤之餘，又唔使自己拎住隻叉，可以舒舒服服邊傾邊燒，唔錯啊！食物方面，一開始嘅時候佢會俾個標準裝你，有最基本嘅腸仔、丸、雞扒、牛扒和叉燒等，食完呢round之後，就可以攞返個盤去取其他食物，食幾多攞幾多，唔怕浪費。同時都會提供蜜糖、調味料、紙巾和餐具。食物方面，基本款式都有，是配合重慶燒烤，仲有蒜心、京蔥、韭菜、青椒等，喜歡都可以拎黎燒呀！我就鍾意佢既叉燒粒和牛仔粒，前者好入味又夠腍，後者黑椒辣得夠爽！但都幾辣，奉勸唔食得辣嘅人唔好試🤣食得太多肉會油膩咗啲，所以配合返粟米、車厘茄、菠蘿等蔬菜就平衡返啦！菠蘿係取標準裝時送的，好甜好味呀！佢仲有一兜油俾我哋燒翠玉瓜、雞髀菇等蔬菜時搽落去，咁就唔會過乾，呢個小貼士都緊要㗎 ！唯一美中不足是，星期五六日沒有任飲，只包兩罐飲品，當然唔夠啦，另外自費的話$10罐，正常價錢囉。玩到關門一刻走人，大人食飽哂，小朋友玩飽哂！…查看更多