四十四次日落's Profile

剛開業的時侯食過一次，已經覺得唔係咁得，最近睇到某人的blog，話幾好食，因為都幾信某人既口味，所以決定俾多次機會「八千代」。周六午市，冇咩客，坐bar位(原來都幾多野睇，之後再講)，order一碗味噌拉面，一客豚肉野菜餃子。等左陣，有野食，飲啖湯先，冇乜味噌味，同時有o的「臘口」，心知不妙，再食箸面，冇彈性，唉，覺得後悔入左黎，已經同自己講，冇下次。等左陣，餃子都到，煎得唔錯，個汁都ok，過關。買埋$97，真係唔平。原來機會係唔值得俾第二次既。坐bar位可以睇到廚房，不過唔該o的人做好o的丫，食飽想走既時侯，見到煮面o個位打開包面時唔小心將個面餅飛左去擺碗o個個工作台度，佢都即時執返架勒，不過係用個面餅抹一抹個工作台先囉，諗住佢會掉左個面餅，點知係掉落去煮，噢no~~~~~~，我係唔會再黎食架勒，希望食左呢個面既人兄唔好肚痛啦。…Read More

睇完呢度既食評，覺得唔錯就去試下啦其實就唔係太肚餓，所以本來只係諗住試下厚多士，不過睇左餐牌，一件厚多要$10，一杯鴛鴦又要$12，不過一個餐只係$23，仲多碗粉，而黎之前都想試埋雪菜，所以都係要餐。總共要左油沙厚多，雪菜肉絲米及鴛鴦。鴛鴦水準頗高，茶啡味十分平衡，又冇咩酸，唔錯唔錯。油沙厚多呢，唔知點解冇沙喎，咁我就自己加返落去啦，寸半厚既多士提供到外脆內軟既口感，味道咸甜適中，好吃。雪菜肉絲米果然係名物，青綠的雪菜爽口非常，味道方面，唔似坊間一味死咸，值得推介。雖然好飽，不過都係將成個餐食哂，足以證明食物美味，相信會一去再去。…Read More

在公司附近，lunch食左一個beef burger set，有一個包，薯條及支裝細可樂。order之後，約五分鐘有得食，包很巨大，牛肉幾乾，冇乜肉汁，肉味亦不足，不過勝在即叫即做，薯條反而幾好味。呢度作為lunch，都叫過得去。…Read More

周六晚上，七時到達，登記為第七張二人"木台"，直至八時十五分入座，果然旺場。點了三樣食物︰車站特別粉($58)︰湯甜而不鮮，不知是否多放了糖，牛肉嫩滑，肉丸夠肉味，很出色，柏葉爽口，牛腩稍硬，牛根及河粉正常。柚子蝦沙律($68)︰調味不足，蝦肉不爽口，柚子正常，菜絲幼身像伴碟，價錢比車站特別粉還貴十塊，不值。雞沙爹($22)︰雞肉不新鮮，醬汁好一般，價格完全反映質素。…Read More

與同事們連續OT左5晚，終於有一晚早過十一點收工，仲唔即刻搵o的好野食。十點九抵達，唔算太多人，嗌左一碗瘦伊、兩碗腩米。三個人用左幾分鐘就KO左三碗野，不約而同都覺得今晚既食物好高水準，湯夠味，腩夠林，有肉味，伊麵碌得剛剛好。大家都覺得好滿足。老實講，九記既水準係好飄忽，所以大家都可以一致咁俾9分，真係好難得。不過，其實只要揀o的冇咁多人既時段，唔難食到正常水準既~~~…Read More

好多人話呢度o的伙計態度唔好，其實有冇諗過係自己唔適合呢度呢？伙計諗住快快趣同你落單俾野你食，有o的人就o係冇乜得揀既menu度左揀右揀；人地話明食到咁上下先嗌餐飲，有o的人就梗係要叫埋，攪到冇位擺，人地緊係俾說話你聽啦。茶餐廳就係咁，出左名既茶餐廳更加係咁。所以，計我話，大家坐低前諗定食咩，咁咪可以享受到無比既速度感囉；當然，食野就緊係慢慢嘆啦，我去咁多次，又冇試過俾人話我食得慢喎，慢慢食，都係表示我欣賞佢地既食物唧。o係度介紹多一味，就係呢度既公司三文治勒，一睇就知澎湃啦，有咁厚既炒蛋都已經好味左一半，加埋其他配料，新鮮即整，真係唔使次次食茶餐同快餐喎。…Read More

每間茶記做既公司治都有o的唔同，各具特色。如上圖，呢度正路既蛋、火腿同餐肉都有，最特色就係有o的叉燒。舊叉燒絕對帶起哂成份三文治，由於中式叉燒經過燒烤處理，肉味突出，香口非常，配搭西方之文治，絕對出色過唔少不倫不類之fusion菜式。值得一提既，就係o個杯唔使錢，而食客又多數拎去洗刀叉既茶，原來係好有茶味既，下次請大家珍惜食物，唔好o徙左佢。…Read More

這裡是一間我間中都會去下既茶餐廳，除左為左食野之外，亦係為左感受一份獨特既人情味。無論早餐定下午茶，呢度都好多人，早餐就多街坊，下午茶就好多人慕名而黎。說實，老闆同伙計緊係對o的街坊好o的架勒，不過只要你融入到，或者試下感受一下，一定會feel到地區老店既獨特情懷。講返食物，如圖所示，食左菠蘿油、蛋撻同鴛鴦。面包係呢度既撚手，當然唔會差，新鮮出爐更好，蛋撻不過不失，鴛鴦一個字----正。剛巧，一位伯伯坐在對面，短談片刻，真有回到從前之感，正沉醉幻想昔日時光，奈何又要回到現在。…Read More

周日得閒無野做，去海怡工貿兜個圈。一心諗住食cupcake，所以一個箭步衝上黎babycake。真係花多眼亂，大大話話都有十幾款，與友人各揀三款mini版(@$12)，再加杯coffee。味道方面，揀左mint、lemon、banana、chocolate、mocha同cream chesse，話就話六個都唔同味，不過只係相差毫釐，都係好甜，當中lemon、banana、chocolate比較突出，好在有杯coffee中和下。其實唔算平，不過就貪佢就腳，又唔多人，不失為自己一個hea的選擇。…Read More

回歸日tea time，一支公黎左呢度，睇睇餐牌見到「焗餐肉蛋餐包」，覺得幾得意，一於嗌個試下啦。見到阿姐拎左個餐包入焗爐度焗左三兩分鐘，之後交左俾個男人，佢攪左陣就整好左個包勒。原來佢將個包上下切開左兩半，跟住就將塊炒蛋包住兩塊餐肉放左o係兩片包中間(見圖)。即叫即整，熱辣辣，未食已感覺良好，咬落去，包身少少脆，煎香左又咸咸地既餐肉，加埋餐包既微甜，十分滿足。老實講，本身呢款食物就同餐蛋治一樣極度普通，不過就係因為佢用左餐包，加左少少特色，令佢成個唔同哂。如果時新賣漢堡包都賣到出哂名，難保呢個包包可以打出個名堂。…Read More

上周六放工，一個人行去灣仔搵野食。黎到已經一點四十五分，小廚都仲係好旺，所以我一個人都要拎籌。等左大約十分鐘，有位，都係要同人搭「木台」，我當然冇所謂啦。order左雞扒藕餅飯，罐裝可樂。件雞扒真係超美味，燒得香口之餘，仲能夠保留肉汁，而且冇乜急凍後既感覺。藕餅都唔錯，不過就唔夠脆口，早知要哂雞扒啦。呢類港式飯，唔少得既就係豉油，加埋少少炸菜，特別開胃。…Read More

一行七人周四晚上gathering，七時半到達，只有另外一圍二人。小店子也不太焗促。點了三個14" pizza, patine(焗芝士薯條)，凱撒沙律，雞翼，另汽水果汁。小麥pizza底有淡淡甜味，有特色，用料新鮮，亦很足料，薯條十分美味，雞翼入味，全部即叫即整，十分熱辣。埋單$636，在soho區算是抵食。多謝店主容忍我們的嘈吵。走的時候是九點，全店幾近滿座。…Read More

首先，在此謝過web master之quick response，兩小時便開左呢個record俾我打comment。最近越開越多漢堡包店，所以呢間新開張，即時搵埋同事一齊lunch去試菜。一般選擇也能在此找到，如normal burger (Atomic)、cheese burgar、beacon & mushroom等。圖中所見係小弟試左既cheese burger。安格斯牛肉漢堡肉味香濃，但稍欠肉汁，配菜鮮甜，芝士、醬汁及面包一般。值得再試。…Read More

見到咁多食評大讚呢度既菠蘿油，今天就黎試一試。一坐低，嗌左個菠蘿油，一杯「央走」。由於黎呢度買包既人流多，所以菠蘿油的菠蘿包好新鮮，個包新鮮，當然係好好食啦，上面o個層菠蘿好脆，包包就好軟，帶微暖既包將塊牛油微微溶化，一個菠蘿油本應如此。「央走」糖份雖高，奶味不及花奶，但就令啡味茶味更突出，是日之驚喜。港式茶餐廳應有的嘈吵及伙計的友善，在此能享受得到，希望茶餐廳文化能發揚光大。吃罷，本來不太好的心情，像今天的雨後陽光般令人感覺舒泰。…Read More

與友人於結業前一嘗這兒的tea buffet。一入場，環境很好，梳化加茶几很適合下午茶閒聊，唯有一桌貴客在食雪茄，對其他不吸煙的食客有一定影響。魚生算新鮮，沙律也好吃，中式食物不到水準，之前在此酒店飲宴時已覺中菜頗差，甜點有約十款，也不錯，一壺大吉嶺茶最合心意。奈何，以此價錢，稍貴。埋單才知係芒果做主題，唔怪之得咁多芒果食物啦。…Read More