Gothra's Profile

天婦羅鈴木剛搬咗去同集團嘅“山下”鐵板燒旁邊。樓底高咗, 價錢平咗少少, 抽風亦增強咗, 除咗天花之外, 油鑊前亦新加咗一排抽氣, 唔會食到啲衫一陣油味。主廚Suzuki san同副廚Shingo san都係出身於Tempura Ginza Onodera, 炸功有保證。當日嘅野菜方面有豌豆, 鮮白合, 楤木芽, 蓮藕, 菇, 而海鮮方面有來自天草嘅車海老, 櫻鱒, 櫻花虾餅同穴子兩食, 中間有冷盤螢烏賊作間場。食物全部出色, 廚師同經理Felix都非常友善健談。最後可以選天丼或天茶, 值得一提係我個人認為Suzuki san嘅天婦羅Kakiage係最港最佳之一。…Read More

經食物快遞服務叫咗$164一份海皇美極粉絲煲。嚟到時嚴重貨不對辦, 相片同出品完全兩回事。只有切碎咗嘅微型帶子同蝦粒, 調味亦差劣, 超重胡椒味。食咗1/3真係頂唔順其餘倒咗。之後我同餐廳Customer Service反映, 佢哋話收到, 明白我嘅不滿 “食物賣相同相片不符” 。我話唔係賣相喎, 係用料由帶子改成微型粒貝, 中蝦改成蝦毛再切粒喎, 另外97%粉絲。咁樣質素仲收$164你Rip off到我一次都唔會返轉頭啦。集團咁嘅經營理念怪不得越做越差喇。…Read More

五月頭襯餐廳仲係Soft Opening時諗住人少少去試吓, 位置應該係Sase之前位置。鈴木師傅係Ginza Onodera出身, 佢嘅天婦羅應該算較接近舊式少少, 例如似一宝/天海嗰種類型吧, 我個人係欣賞嘅。舞茸香味濃郁, 來貨質量不俗, 師傅亦俾得慷慨。車海老頭, 穴子, 蕃薯都好食。而是日MVP會係甘鯛同天丼, 前者外脆內嫩, 而後者其實個白飯已經煮得非常出色, 而件Kakiage亦算係我係香港食過嘅三甲之內。要提一提餐廳樓底比較矮, 用餐當日抽氣方面未十分足夠, 但以我所知係六月頭已經完成咗改善工程, 遲啲會再去探吓鈴木師傅同佢團隊🙏🏻…Read More

“鹿兒島特等厚切豚肉定食”, 寫到明厚切但就一年薄過一年, 剛剛五月頭係銅鑼灣旗艦店食嘅基本上只等於其他同類餐廳例如Porker或大戶屋嘅正常厚度, 甚至更薄豬扒偏瘦, 外面層炸粉同件豬扒上嘅時侯已經甩開咗一半, 點完豬扒醬之後完全分離白飯只係微暖，接近室溫, 但Refill時嗰碗飯又好熱喎。即係第一碗飯係裝定哂, 放係盤度放到涼咗先上俾客人。 呢個問題基本上幾家Tonkichi分店都一模一樣, 流水作業, 浪費食材究竟係我對一個都成三百幾蚊嘅定食要求太高, 定係餐廳集團對自己出品越嚟越冇要求？…Read More

呢間分店剛開張時食過一次印象唔錯, 估唔到今時今日可以退步至止。繁忙時間都可以直入有位, 果然事有蹺蹊。諗住耐冇食燒鵝所以食好少少, 叫咗$112燒鵝髀飯, 鵝髀微暖嘅, 有少少所謂嘅荔枝柴香味, 但咬落去啲皮竟然係極級勁韌, 完全無辦法咬得開（見第一張相）最後唯有Lur返哂出嚟, 攪到我狼狽非常。從來未食過啲咁韌嘅食物, 隻燒鵝唔知放咗幾耐先有咁嘅效果。咁都夠膽上俾客人, QC完全不知所謂。以後都唔會再俾機會棋哥嘅所有分店。…Read More

一向都欣賞呢度嘅壽司飯, 今次到訪感覺又再進步咗。醋酸味較之前再調重咗一丁點, 溫度微暖, 有咬口。十五件午餐再追加咗幾件, 全部都好食, 要嚴選最喜愛的話會包括以下：地金目鯛, 千葉 銚子平政, 鴨川小肌, 熊本赤身, 沖繩 7日中鮪腹, 沖繩 7日大鮪腹, 和歌山 13日 （追加）赤海膽, 天草 （追加）鯖棒, 下北半島鮟鱇魚肝配西瓜奈良漬 （追加）閒日午餐冇分時段坐得舒服食得滿足, 約兩小時攪掂。呢排疫情冇咁嚴重會Resume返定期再訪。…Read More

竹達征司師傅 Adachi san係我初接觸Omakase後認識嘅第一個日本師傅, 由上環Sushi Ginza Onodera, Ta-ke, Sushi Kami到依家, 終於擁有屬於自己嘅鮨店, 非常戥佢開心。鮨店空間感十足, 有一個約可以坐到8個人嘅L型Counter加一個VIP房室。當日最欣賞嘅包括姬鱒, 赤身醬油漬, 牡丹海老, 赤貝同鮪手卷。以目前所見, 鮨店入貨, 食材處理, 餐牌設計都與姐妹店Sushi Kami大同小異, 期待之後可以慢慢滲入多啲Adachi san嘅個人特色。…Read More

今次初訪千葉先生同另一集團合作嘅新鮨店, 雖然仍係試業階段, 但無論各方面感覺上都絕對地做到更上一層樓。鮨店嘅Counter枱並非傳統嘅一條直線或L型, 而係做成微曲形幾何, 令到最左或右兩旁嘅食客都可以比較清楚見到企係中間嘅師傅及旁邊嘅客人。交流上會比較容易舒服, 空間設計上值得一讚。今次選咗短Menu [究 Kiwami]真鯒(牛鰍) 愛知縣伊佐木(雞魚) 愛媛縣長崎小長井真蠔蜆出汁茶碗蒸小肌 愛知縣墨烏賊 千葉縣目光魚 愛知縣墨烏賊 千葉縣時不知鮭 北海道鮪赤身 愛爾蘭鮪中腹 愛爾蘭馬糞海膽 根室青柳 三重縣玉子燒車海老 熊本縣穴子 對馬島海鮮湯羹干瓢卷蕨餅師傅準備咗兩種不同濃淡醋味嘅去配不同嘅材料。第一件嘅小肌質感, 鹹度, 與赤醋酢飯配合極佳, 而且以小肌作壽司嘅開頭可謂藝高人胆大(又或者純粹見識少)。時不知鮭從來都係我最偏好嘅Neta之一, 非常好食。鮪赤身醬油漬及中腹, 尤其前者, 算係我半年來食過其中最好嘅Maguro。最後想提來自對馬島嘅穴子, 絕對係個人食過有限嘅鮨店之中全港最佳。…Read More

十多年前係砲台山上班時試過一次, 對食物印象不太深, 只記得位置頗特別, 隱藏係一個舊“商場”嘅二樓。近來對壽司興趣加深所以想嚟試下加藤師傅嘅壽司。午市主要係壽司定食, 服務員表示可以Ala carte追加但選擇不多, 例如Otoro等就冇準備到, 要晚市才會有。定食包括八件壽司加吞拿魚蓉卷。壽司飯傾向較濕方向, 也不錯。中鮪腹, 鰈魚邊及鮭魚子最特出。但卷物質素就普通。幾欣賞餐廳嘅氣氛, 有啲八九十年代香港初期鮨店嘅感覺。最後一提見到之前頗多食評對餐廳服務有意見, 但我近期兩次到訪, 服務員同加藤師傅都態度友善, 大家可以放心。…Read More

主廚兼老闆Tango san係見城出身, 開店前更專誠到東京西麻布Sushisho Masa跟Oka san “修練”。因為剛巧我曾到過壽司匠 . Masa, 所以最初引起我興趣一試, 比較一下, 後來更成為我其中一間定期拜訪嘅鮨店之一。Sushisho壽司匠嘅特色係唔會好功整咁上咗哂酒餚先上壽司, 次序隨廚師喜好, 梅花間竹咁估佢唔到。但其實我只食過鮨㐂嘅午市壽司廚師發辦, 壽司為主唔包酒餚, 所以呢方面比較唔到哈哈。呢度用嘅主要係赤醋壽司飯, 軟硬度, 溫度控制佳, 調味唔算太酸。嚟幾次壽司飯都好Consistent, QC非常唔錯。先想提一下呢度嘅茶碗蒸, 基本上每次嚟都跟貼時令, 例如上一季嘅燒螢烏賊墨汁茶碗蒸; 同今次嘅海鮮茶碗蒸, 材料誇張地豐富, 都出色。壽司方面最後兩張九公格相大概睇到今次午市Omakase嘅陣容。綜合之前幾次用餐經驗之後我尤其欣賞以下。呢度嘅海膽選料肯落本QC佳, 例如呢幾個月市面上充斥住啲劣質嘅馬糞海膽, 我之前亦不幸係另一鮨店中招。所以師傅呢段期間就決定主力選用成本較高嘅白海膽甚至赤海膽。當然呢樣會隨市場上面海膽質素再改變。小肌調味選向為強調鮮味而唔係傳統嘅重鹹重酸, 又係另一番景象。野生鮪三兄弟, 鯖棒壽司, 鰯壽司都好。而壽司匠嘅Signature piece鮟鱇魚肝配西瓜奈良漬就當然正啦。個人認為Tango san無論技巧, 入貨, 材料處理同與客人之間溝通上, 都非常出衆嘅一位師傅, 值得支持。…Read More

餐廳係商場M層, 有啲難搵, 好彩之前係附近返工所以記得路, 最後順利到達冇遲到。壽司主廚Araki san之前係Nobu工作, 我天真地以為出品會比較Fusion, 但原來都唔算。師傅握功好, 壽司飯醋味適中, 咬口偏向點點軟嗰個方向, 壽司Size頗大件, 幾啱我食。個人最欣賞嘅包括經較長時間熟成嘅大鮪腹, 雖然似係養殖嘅但處理得宜, 非常肥美。金目鯛, 毛蟹肉配馬糞海膽，白蝦三文魚子都料靚而且俾得慷慨。整體服務食物都滿意, 必然會再訪😋…Read More

上環天海Nagasawa san嘅天丼全港數一數二, 知道佢哋姐妹店開張, 而且仲開係我公司附近, 所以急不及待試業日第一天就衝過去試下。餐牌價格親民, 約平上環店三分之一。室內設計簡潔感覺舒適, 亦唔覺有油味。叫咗特上天海丼試下, 整體炸粉偏薄而且上得平均, 飯亦好👍🏻蝦唔錯, 比現時香港其他集團式嘅天丼專門餐廳都好少少。天婦羅鯖魚配梅肉可以用精彩嚟形容, 有鮮味又唔會成口油。竹輪非常正。青梗菜有些少甘味，Balance返。最後嘅天海蛋有功架, 雖然好似熟咗一丁點, 但可能只係我吹毛求疵, 依然流心😍👍🏻餐牌上見到有軟殼蟹天婦羅超級吸引, 下次再試。可以預見呢度絕對會成為我嘅飯堂。…Read More

前壽司角唐師傅嘅新壽司店。L型壽司Counter約有8個座位, 另外有兩三張Table。近期疫情有減退迹象所以中午嚟到都頗滿。第一次到訪先試12件壽司午餐, 包括以下：鰈魚 Karei帆立貝 Hotate ***針魚 Sayori烏賊 Sumi ika縞鰺 Shima aji鱒魚 Salmon *蝦蛄 Shako天然鮪 中鮪腹 Chutoro *小肌 Kohada*金目鯛 Kinmedai馬糞海胆 Bafun uni *穴子 Anago ***傳統江戶前壽司, 手法平實帶子, 小肌, 穴子都非常出色, 值得支持。…Read More

加完班諗住食完晚餐先返屋企, 因為係星期日所以選擇比平日少, 而且落緊雨唔想行嚟行去, 係Openrice見到呢間二百幾個好評得兩個負評, 應該冇乜問題, 估唔到我會係第三個。諗住食好少少, 見係呢度嘅推介所以叫咗個“燒美國頂級肉眼扒” Medium五年熟。一上枱已心知不妙, 表面乾哂, 一切落去感覺唔似煎而係似炸到少少脆咗咁, 大約八成熟左右。上面冇鹽亦冇配任何汁, 亦冇俾鹽或胡椒我自己落, 咁唯有自己攞但就見唔到啱配牛扒用嘅粗鹽。真心未食過咁難食嘅牛扒, 我好後悔做乜要食哂佢, 第二朝（亦即係我寫緊食評呢一刻）個胃仲係頂住。呢一份加一後成三百幾蚊嘅肉眼扒, 絕對唔合格。…Read More

知道朋友鍾意食仙台牛舌, 所以帶佢嚟試下。落單時只有“上等牛舌定食”, 原來極上牛舌係要預先訂定先有得食。個女侍應較Concern去Sell我哋Join餐廳個Membership多過落單哈哈。茶碗蒸係蒸到老哂, 但又唔太熱, 差。兩份牛舌都燒到十成全熟而且薄切, 頗硬, 極差。相中咁樣已經係1.5份, 份量頗細。後來睇返另一位師兄食評原來轉咗個廚, 可能因為咁燒得差咗咁多啦。唯有用個芋蓉撈飯食, 唔駛回頭嘅一間餐廳。…Read More