candykit's Profile

食咗好多年，幾乎每次去牛棚參加活動都會去食。生滾粥當然係即製，連腸粉、炒麵都係即製。腸粉滑捋捋，個自家製豉油調得好好味。唯一嘅缺點係老闆one man band，出餐有啲慢，適合慢活人士。…Read More

平時會去生記食迷你粥同煎魚餅，但生記星期日唔開，於是要搵其他食。坐忘有好多like，價錢又唔貴。星期日開11點半，11點3去到，已經有人喺門口等開門，夠點開門，眨吓眼就坐滿一半人；人人都係叫豬軟骨，小妹都叫咗份，肉嘅份量好多、入口即溶，非常好味；咖哩色份量啱啱好可以撈晒啲飯。如果一定要喺雞蛋裡挑骨頭，就係薯仔生咗啲，翠肉瓜、紅蘿蔔可以保持爽口，但薯仔真係要軟綿綿至好食。…Read More

去石門影完櫻花，喺附近搵嘢食，石門站隔離嘅京瑞廣場有好多選擇，見呢間差不多有二百人like即管試吓。叫咗晶瑩蝦餃皇、飽菇蟲草棉花雞、XO秘醬蒸鳳爪，除咗個蝦餃叫做食得吓，棉花雞嘅魚好肚根本未發夠，鳳爪蒸唔透、仲係硬嘅；啖茶無味。加埋茶錢，一個人$92蚊，簡直嘥quota。…Read More

Risotto怪出沒注意：早兩日見到介紹，今日去JCCAC上堂，專登早啲出門口過嚟試。好失望：個湯ok；個飯好鹹、主菜魷魚就無味；杯檸檬茶飲水咁、一啲茶味都無。唔會有下次，完。…Read More

見到網上介紹，見近近地，專登坐叮叮去食番餐。食飯時間好多舖頭門口都要排隊，佢哋卻沒有，都心知不妙。叫咗碗細嘅叉燒油渣麵，叉燒好味，湯亦清甜，豬油渣反而一般般，自家製麵條亦無想像中的彈牙。要咗隻限量版鴨髀，諗住好好食…餐牌寫18蚊卻加了價變成28蚊；老闆娘話改漏咗張餐牌…小妹認為唔係第一日加價，到底有幾多人中伏？18還可以，28就不值得。檸檬茶係自己加糖水的，這一點抵讚。辣菜脯惹味。總括嚟講唔會專登再去…食過就算……Read More

公司剛由北角搬到觀塘，人生路不熟，終於迷咗路。咁就畀小妹喺鴻圖道搵到呢頂廚師帽。自自製意大利粉以後，就好少喺外邊食意粉；太好食喇，返唔到轉頭。 但餐牌上嘅黑松露忌廉汁蘑菇意粉，又實在太吸引，於是就叫嚟試吓！首先嚟嘅係餐湯，飲唔出係乜嘢但好好味；跟住係凍檸茶少甜，真係一啲都唔甜，仲有五片檸檬。主角終於都出現喇！賣相非常之漂亮，有高級餐廳嘅水準，配料多、味道好；小妹最後連碟底都舔得乾乾淨淨。絕對會有下次！ ！ ！…Read More

店舖裝修明亮，坐位寬敞、舒服。可惜店舖位置不佳。點了招牌七彩餃子各一隻，一碗有晒七種味道的確幾新奇。但除了餃子、麵食，就甚麼都沒有了，而且包餃技巧只是一般般，一隻鬆、一隻散，餃心又不夠熱。如不是睇著簡介，根本就不知道自己在吃甚麼哪一種味道。雖然不是很差，但也不好吃。新鮮感一次就夠了，沒下次。下次還是會選擇斜對面幸福美食的韮菜餃。技巧明顯高幾班，價錢又平一大截。他們的柴魚湯更是一絕。輸在沒有堂食吧！…Read More

平日下午一點半到達，隊號叫到108，籌號郤派到404。等到兩點三都只叫到130...雖然是這樣忙，員工仍然好有禮貌，抵讚。辦完私事，四點多再回去看看有無得食。籌號已叫到489，理論上籌號過了半個鐘，就不會補發坐位。但最後亦能成功食到。最難忘係香蔥吞拿魚軍艦，小妹就覺得比大拖羅還香。三文魚有薄切和厚切之分，薄的真係非常薄，但不乏魚香。其他壽司亦不過不失。結果吃了9碟$12蚊的，非常滿意，會再排隊幫襯。…Read More

開完會搵飯食，深水埗非常多選擇。晚飯唔著食太多、想食清淡啲。就試吓呢間新開越南菜。與其講係越南菜，其實似星馬菜多啲。裝修幾靚，但如果隻藍色再淺色啲會好睇啲。舖面有3個伙記，人手充足，服務亦過得去。揀咗2人套餐；有炸蝦餅、咖哩雞煲、馬拉盞炒豬肉四季豆、白飯兩碗、龍眼水兩杯（小妹加8蚊轉咗杯青檸梳打，但餐牌明明寫住特飲加10蚊，唔知點計，哈！）。炸蝦餅唔錯，味道及醬汁淡口，但亦不失淡淡嘅蝦香。咖哩雞煲餸唔太多，但好多咖哩汁，夠晒餸飯。馬拉盞炒豬肉四季豆，亦唔鹹，有淡淡嘅馬拉盞香味，就係豬肉少咗啲。餐牌上3個餸有個價錢，下面又一個套餐價，有啲亂。小妹見好多人都要問一問伙記至明白，好彩伙記態度亦唔錯。反而兩杯飲品都偏甜。似乎係用洗碗公司嘅碗筷，個飯碗太淺，比較難用。…Read More

魚湯濃郁，米線滑溜，份量不少，味道亦不錯。初初開張時有一是是正正嘅男經理做收銀，不時出門口拉客，又同客人傾計，感覺親切。雖然近來加入了蒸魚套餐和燉湯等美食，但員工比以前少了，變成全女班，在餐廳內大大聲用普通語高談闊論自己的家事。令人有點不自在的感覺。…Read More

小妹好鍾意飲湯，天氣熱，唔想食飯，本來想食米線。小妹係順德人，見到呢間門口寫住順德魚湯料理專門店，就即管入去試吓。結果小妹揀咗蠔仔紫菜泡飯，一大湯碗，目測有10幾20隻蠔仔，隻隻都相當肥美，只係落咗少少胡椒粉，一啲都唔腥，仲煮得剛剛好，非常juicy；魚湯清甜，仲有兩大片生菜，同6、7件豆腐卜。舖頭裡面大大隻字寫明，免費添米線/米粉/飯/魚湯；因為已經清晒碗，一滴魚湯都無得淨、好飽，所以無添食。但隔離檯真係有位哥哥添食米線，雖然姐姐態度一般，不過真係食得過。畀錢嗰陣，仲見到有人食原條黃花魚米線，雖然魚唔係好大條，只係同個湯碗一樣咁長，不過賣相亦相當吸引。…Read More

聽講有人喺藍屋賣雞，所以專程去試吓。因為牌照問題，唔可以坐喺舖面食，要食一係就買外賣，一係就買完攞過隔離舖裡面嗰幾張凳、同bar檯食。不過唔知係唔係因為牌照問題，店員完全唔會理你；明知你過隔離食，都依然係畀你外賣膠飯盒、外賣膠湯碗、同即棄餐具，仲要用膠袋入住。OK，食完自己清潔係常識；食飽就一膠袋自己放入門口個大垃圾桶，店員連檯都唔會抺一吓。門口寫住主打奇香雞，雞無雞味，用大量中國芹菜同香料醃製；阿姐好明顯唔識斬雞，啲雞斬到碎濕濕，仲好多碎骨、滿口油。反而個例湯，同跟飯嘅蒜蓉莧菜就不錯。份量亦夠飽肚。…Read More

星星名店，怕多人，一直無試過。噚晚搵食期間，唔見人排隊，於是試吓。杯茶淡而無味；需知道食點心，杯茶好緊要！古法糯米雞，超鹹；但糯米蒸得幾軟熟，膶腸好甘香；不過雞肉唔夠滑。豉汁鮮肉釀茄子，茄子一般般，餡料幾好味。陳皮牛肉球，不過不失。香芋牛肉腐皮卷，餡料碎濕濕，完全食唔到係乜嘢，但外皮炸得唔錯。晶瑩鮮蝦餃，至好味；皮薄饀靚。杞子桂花糕，一般般；其實桂花糕好難做得難食。陳皮紅豆沙，至為驚喜；好香陳皮味，起沙，唔太甜。總括嚟講唔難食，亦唔太好食。…Read More

開業當初，即係未搬去新舖之前；無骨雞翼的確幾好食。每朝都見到老闆喺度用心處理雞肉；態度認真，炸時用心。但自從老闆雄心萬丈去咗開分店，食物質素就一落千丈。老闆不再主理，所有炸物都變得油淋淋，唔食得！轉戰煎釀三寶，初時味道都幾好；薄薄嘅魚肉，煎得非常甘香。但早兩日去買，食物完全唔熱，青椒同魚肉中間滿是豆粉，根本未熟透。其他魚蛋、豆腐、矮瓜都係凍冰冰、硬骨骨、乾爭爭一啲肉汁都無。完全徹底失望，唔會再有下次。…Read More

呢間餐廳都開咗一排，一直無乜意欲去試。但早兩日附近幾間想食嘅餐廳，唔係菜色唔啱食，就係無位。見呢間幾企理，又有位，就試吓！餐廳主打漢堡包，其他枱枱都係食漢堡，不過小妹就麻麻。所以揀咗招牌海鮮意粉。同餐牌張相一樣咁靚，有暖碟，相當好。有1隻小龍蝦、1隻帶子、4隻青口，意粉軟硬適中，醬汁好味。小龍蝦鮮甜，蝦身從中間已經切開，不過食起上嚟始終有啲難度。帶子都幾好，但似乎有啲過火。青口有1隻有少少沙，尚可，味道偏淡；如果加醬汁煮一陣，會好啲。總括呢講，唔錯，服務幾好，坐得幾舒服，少貴。…Read More