haydeneats's Profile

呢間茶餐廳主打泰國菜，三個人幫襯叫咗個二人套餐，諗住唔夠先再奇加野，點知個二人餐超大份，三個人都飽飽。小食二選一，可以揀泰式香茅雞翼或者泰式炸蝦餅，我哋就揀咗炸蝦餅，一有兩件完整嘅，再切開一半，點太識甜酸醬。另一個小食就係泰式酸辣無骨鳳爪，其實都係只有少少辣，而且個辣味主要係來自啲生洋蔥。蔬菜又係二選一，可以揀唔辣嘅泰式炒雜菜，或者佢話辣嘅馬拉盞炒通菜，我哋就揀咗唔辣嘅炒雜菜，味道正常發揮啦。主菜可以揀泰式青咖哩雞或者紅咖哩鴨胸，因為唔想食鴨胸所以揀咗青咖哩雞，啲雞已雞髀肉為主，個青咖哩汁都幾好味。跟兩碗白飯同埋兩杯特飲，$280落樓，每人一百蚊都唔使，幾抵食。…Read More

記得舊年班friend帶我去順德威威嘅時候喺順德容桂食過一間已煎焗排骨聞名嘅小店，佢嘅味道到而家都令我回味無窮，原來香港都有類似嘅烹調料理，就係今日試咗呢間喺佐敦上海街嘅小餐廳。順德嗰間最出名係排骨，如呢一間喺佐敦嘅亦都係已排骨出名，所以雖然佢有好多款式嘅餸可以做乾蒸，不過第一次幫襯都係試咗排骨，上枱嘅時候隻碟熱到痴咗線，可能係因為呢個乾蒸嘅方式令到啲排骨黐實隻碟，攤一陣等佢凍返少少嘅時候用隻貼筋剷起佢嚟食，排骨都幾新鮮，望落去唔覺得佢落咗好多醬料，不過個味道就好惹味，送飯一流，最正就係呢度竟然係$5就可以白飯任裝，我開頭以為係宣傳口號，點知原來真係$5任食，好得人驚，我覺得佢應該加價囉。…Read More

試了一家性價比高的潮州菜，味道不錯價錢合理，而且裝修也很好，坐得舒服。我哋一行三人叫咗個二人套餐再加多一個蠔餅，每人二百幾蚊都幾抵食。套餐包括呢一個鹵水鵝肉拼盤，入面除咗有鹵水鵝肉之外，仲有紅腸、鹵水蛋、鵝腎、豬耳仔同埋鹵水豆腐墊底，個鹵水唔算好香不過唔係一味死鹹所以我都覺得ok，鹵水鵝肉都唔係好韌。套餐嘅湯我哋揀咗鹹菜胡椒豬肚湯，呢個湯做得幾好，鹹酸菜唔會太鹹但係有唔會去到冇曬味，豬肚洗得好乾淨同埋煲得好淋，少少胡椒掉下味唔會太辣。可以揀一款餸，我哋就揀咗沙茶牛肉炒芥蘭，個沙茶醬都唔錯，有花生粒嘅，啲牛肉都幾嫩。加咗個蠔餅，正確啲應該叫蠔烙，呢個做得都算正宗，起碼入面有薯粉，啲蠔仔都幾新鮮。最後我哋仲加咗兩個糖水share，就係上面嗰碗馬蹄片綠豆爽同埋下面嗰碗清心丸甜湯，呢兩個都幾好食。最後飲埋功夫茶。…Read More

呢度嘅set lunch menu都有幾多選擇，由價錢平嘅60幾70蚊至到價錢貴嘅120蚊左右任君選擇，今日就揀咗個魚生定食同埋一份鰻魚飯，魚生定食質素唔錯但係過鰻魚飯就強差人意。如山定食有兩件三文魚、兩件墨魚、兩件章紅魚、兩隻隻蝦仲有一隻鮑魚，都幾新鮮。加錢轉做拉麵都幾大碗。兩個餐都跟一碟小食同埋一碗麵豉湯。鰻魚飯就麻麻地，鰻魚比較薄身同埋整得唔夠乾身，飯就感覺上唔係完全嘅日本珍珠米，所以口感差少少，不過價錢嚟講都算抵食嘅。…Read More

雞煲都真係要辣嘅先好食，今晚為咗就個friend所以嗌咗bb辣，雖然味道都唔錯，但係總覺得如果正常麻辣應該會更加正更加惹味。兩個人叫咗半隻雞嘅份量其實都非常之足夠，佢啲雞嘅肉質都唔錯，而且都真係有雞髀位雞翼位而唔係半隻雞舊舊都係雞胸雞骨咁樣，配料炒得好鬼香，紅洋蔥、蒜頭、薑加埋蔥，好惹味，入面仲有上海年糕片，吸晒個雞煲嘅精華。雞煲食到咁上下梗係要放湯打邊爐，其實因為已經有啲飽，所以只係嗌咗雲吞同埋蝦滑，兩樣都幾新鮮幾好食。…Read More

天氣轉凍就自自然然想食蛇羹，想起食蛇羹就會嚟到觀塘呢一間，一來足料，超多蛇肉，二來食蛇羹餸蛇湯，所以真係好抵食。每一張枱都有一兜檸檬葉同埋一盒蛇羹專用薄脆，佢啲薄脆真係脆㗎，加咗又真係好食啲嘅。佢有A餐同B餐，其實都係大蛇羹或者細蛇羹再加蛇湯同埋一碗糯米飯，非常和味，不過今日因為約咗人食晚飯未夠鐘，天寒地凍先至走嚟淨係食蛇羹，冇食到糯米飯。另外佢依家仲有雞翼，印象中以前係冇嘅，下次有機會都要試下。…Read More

堅正的粵式小菜，book咗七點半都要等一陣先入得，全場爆滿，真係唔book位都唔港洗指意walk in食得到。我哋叫咗4個餸，買四個都好多好食。黃金豆腐粒外層又薄又脆，裡面又軟又滑。脆皮炸大腸脂肪比較少，外層炸得好脆，而且d豬大腸都幾乾身，點甜酸醬，邪惡但好味。川椒豬手嘅豬手唔係炆到淋晒嗰種，而係保留豬手嘅彈性兼一d都唔韌，雖然叫川椒但係只係少少辣，整得好入味。咕嚕肉差唔多枱枱都有叫，真係好食，佢個質感做得好好，炸得黎又食到豬肉嘅軟熟，唔係一味硬或者一味軟。…Read More

知道呢一間素食店喺灣仔已經開咗好多好多年不過都係今日先至第一次試到佢嘅手勢，評價係價錢比較高份量比較少味道只屬一般。叫咗幾樣嘢最好食就係呢個琵琶豆腐，豆腐入面好多材料，而且都幾新鮮，唔係一種整定晒喺度有人叫先至炸出嚟。第二好食嘅就係呢一鍋竹笙素生翅，一小鍋都有8碗仔左右，入面d竹笙、木耳絲等都好新鮮。排第三日就係五柳仙斑(即係芋頭魚)同埋香脆蜜瓜奶，呢兩款嘅未到都只做一般，芋頭魚比想像中細條，炸蜜瓜奶原本以為係一條，點知已經切咗一半得一粒。佛門齋滷味就最令人失望，$72一碟細size真係性價比極低，真係可以skip唔食都無損失。…Read More

非常出色的老派經典粵菜真係唔係咁多地方可以食到咁正宗嘅味道。菜膽杏汁白肺湯，個杏汁唔係用杏仁粉開，唔會有好假嘅杏仁味，豬肺同埋菜膽煲到好似融入咗個杏汁湯底入面，非常和味。煎釀鯪魚絕對係花功夫嘅懷舊菜式，開咗條鯪魚攞曬啲肉出嚟攪碎然後讓返入去個魚身度，少啲功架都搞唔掂，點埋佢嗰個秘製醬汁味道更加出色。臘味煲仔飯真係唔能夠睇少，啲臘腸同埋潤腸非常靚，潤腸有微微嘅酒香真係好正，啲臘肉更加出色，肥瘦分明，食到脂肪部分嘅油香又食到瘦肉部分嘅鹹香。最後個綠豆沙用嘅臭草令到成碗糖水嘅味道大大提升，昌哥嘅功架果然名不虛傳。…Read More

呢間burger店真係犀利，成日有新款burger出，計之前嘅脆脆支竹羊漢堡同埋白鱔漢堡之後，今次就係魚+羊嘅漢堡包，個名都正，叫做「魚羊」味可可漢堡，其實就係玩食字玩個「新鮮」嘅「鮮」字。羊佢係用紐西蘭羊肉漢堡扒，至於魚就係用佢哋嘅招牌龍躉魚柳，$133其實都真係幾抵食，因為塊羊肉漢堡扒同埋個龍躉魚柳都幾大件，成個包非常厚身，食嘅時候真係要稍為禁扁少少先至勉強可以一啖咬晒成個，味道唔錯，件羊都幾juicy，食落去就有一種好豐富嘅感覺。餐飲加錢轉凍嘅americano，畀埋咖啡冰真係好有誠意。…Read More

深水埗明物之一就係呢間小食店，可以坐低食，又可以企喺街邊食，當然可以外賣啦，三種我都試過，最奇怪嘅就係明明都係同一間舖頭出品嘅腸粉，但係唔知點解都係企喺街邊食最好食。我揀咗15蚊六條腸粉，冇加燒賣冇加魚蛋冇加豬皮，因為聽講呢一度主要都係食腸粉，其他嗰啲配角都係麻麻地。腸粉好食，個混醬一啲都唔混帳，我鍾意多麻醬多芝麻，因為我覺得咁樣食落去會特別香，同埋如果甜醬太多嘅話會搶曬啲味，所以我鍾意high少少甜醬然後狂撈麻醬。…Read More

同個friend喺深水埗黃金商場睇完電腦之後佢忽然之間話想飲返杯咖啡，上openrice search附近嘅coffee shop就見到呢一間小店，行過去大概七至八分鐘左右，地點有少少隔涉，不過就係因為咁所以可以靜靜地傾下偈，環境唔錯咖啡都好飲，我哋叫咗一杯Matcha Latte，另一杯就係Flat White，兩杯嘅味道都唔錯，尤其是我杯Flat White，奶同埋咖啡嘅份量都好balance。Matcha Latte Flat White …Read More

北京片皮鴨兩食都幾抵食。片皮前見到隻鴨嘅真身，一d都唔細隻，真係幾抵食。片出黎嘅肉仲多過d包鴨肉用嘅蒸餅皮，份量都幾足。面而且隻鴨唔係好肥，食咗冇咁大罪惡感。啲鴨肉唔會好韌，不過鴨皮就略嫌佢唔係好夠香。除咗青瓜絲同埋京蔥先之外仲有黃色嗰啲酸蘿蔔絲，用嚟包住片皮鴨嚟食就冇咁滯啦。第二食就揀咗鴨肉絲炒韭菜花，炒咗韭菜花之後嘅鴨肉絲比較韌，鴨肉絲嘅size係比較粗嘅，可能就係因為咁樣，所以煮過龍導致佢比較韌。…Read More

懷舊的老上海味道真的可遇不可求。窩貼厚厚的皮蒸焗煎的火喉做到恰到好處，點醋吃就是懷舊的味道。酸辣湯和砂鍋雲吞雞之間選了不辣的砂鍋雲吞雞，此砂鍋雲吞雞份量十足性價比高，十多顆上海菜肉雲吞加上半隻雞，雞算大隻，令湯像是少了點，不過入味好味，讚。炒上海年糕選了配三鮮，火腿片雞肉絲黃芽白，可惜年糕質感偏軟，如煙韌點估計口感更佳。松鼠黃魚貨真價實，百多元價錢CP值高。甜點選了豆沙鍋餅，份量比想像中要大，竟然可分到12件。…Read More

入到嚟梗係要食羊肉米線啦，一揀就揀咗大碗size，咁究竟有幾大碗呢？用咗對筷子嚟讀畀大家睇。其實一開頭見到碗麵都好似唔係好多羊肉，好彩原來寶物沉歸底，一路隔一路食都有好多羊肉，而且羊肉啲味道唔錯，算係冇乜騷味啦。另外仲叫咗韮菜餃米線，啲水餃味道都唔錯。而且都有幾多粒韭菜餃，唔會好孤寒得幾粒。之後仲叫咗個拍青瓜，可惜呢個拍青瓜唔係好入味，有少少失望。菜脯任加都幾正，兩個人食咗133蚊，價錢都算合理啦。…Read More