為食暴龍's Profile

長期大排長龍，所以都好耐無食，今日真係滿心歡喜，因為⋯⋯今日午飯時間（一點十五分）居然零人龍，入到去仲要係半滿狀態。唔通我真係咁幸運？今日點咗個辣魷魚、豬腸、魚蛋配清湯粗麵加菜脯（$6x）。辣魷魚好夠辣，軟身，但有啲咸；豬腸好似煎過並，微焦，薄身，乾淨，幾香口；陳皮魚蛋，好似淡味咗，轉咗供應商？之前好似唔係咁樣味道；粗麵微爽，無過淋。今日揀清湯加菜脯，湯底偏清。如果從未試過會覺得被人氣消磨；回頭客會覺得失手；常客會明白自家制就係咁，唔會日日一樣味。…Read More

途經油麻地想食米線，想搵一間未食過嘅米線鋪。兩餸下午茶餐，唔加餸，唔要貴餸，最平$39。但我居然要加加佢啦，叫咗個三餸$48，包括慢煮12小時豬軟骨、五年陳皮魚腐、藤椒雞（+16）米線，配黃金雞湯底（+$6），跟無糖冷泡茶。豬軟骨嘅軟骨部份好淋，好入味，但純瘦肉部份就有點鞋。魚腐陳皮味好香，但魚肉味偏淡，好似好水咁。雞肉滕椒味好正，帶麻帶辣，雞肉好滑，知道唔會係鮮雞，但都有雞味。米線量多，要求爽口做得到。湯底有少少胡椒味，唔辣，但變相唔夠雞味。服務值得一讚，叫咗幾次員工都樂於解答問題。…Read More

如果唔係幾日前訂位應該食唔食，點解咁講？因為前幾日就係walk in食唔到即刻訂位囉。先上咗個湯，呢個湯無得輸，完全為呢餐飯開咗個靚頭。湯料夠、豬肺香口、唔咸、唔油，夠濃郁。一定要叫！咕嚕肉都係要試，唔肥唔瘦，皮脆肉實，但旁邊嘅糖餅，後生可咬一口，年紀大要避避。炒蜆炒得香口，好食，香辣。可以叫，但人少就可以叫其他試。豬油撈飯，豬油、豉油加上蒸飯，我平時晚飯走飯都忍唔到食咗幾啖，又係必叫。蒸飯真係好味好多，煲飯無得比。豆腐係滑嘅，但七味粉同椒鹽味唔夠，有啲失色咗。粟米係真係要試，外香內甜，唔柴。今晚廚心情靚，咸蛋黃俾多咗，所以某啲部份咸咗啲。鮮魷係滑到口嚨，無牙都咬到，但今次入貨好似中等咗？一餐飯個半小時，人客太多，人手有啲不足。今次試唔哂，一定要再見。…Read More

一行三人去食lunch，叫咗個車打芝士蕃茄牛肉醬螺絲粉，意式四重奏芝士薄餅同全日早餐。螺絲粉-醬汁香杰，但偏少，掂唔到醬就會淡，但味道係優質嘅。薄餅-對同枱人好大衝擊，因為佢應該有blue cheese啲friend，都幾重味，但本人可以接受。望落白la la，但芝士幾香，又滑。全日早餐-雖然係最貴，但係堅好食。芝士蘑菇釀雞翼最香口，車打芝士腸唔肯定係咪自己最愛嗰隻，有爆芝，粟米脆片點茄汁豆好好味。南瓜忌廉湯有三個，有一個人唔喜好，自己飲咗差唔多兩碗，勁香口，無錯，係香口。凍飲正常款。…Read More

食過大埔同旺角，味道係有自己俾自己嘅信心保證。平日見佢九排Z形，今日居然零人龍，當然就入去回味下。其本$37兩餸一麵，$46三餸麵。自己叫豬腸、咖喱齋、粟米豚肉餃子配油麵跟麻辣汁，承惠$50大元。豬腸實身，唔係淋款，唔騷，可惜最後疑似食到沙，「實實」聲。咖喱齋大大舊，炆得夠時間。餃子實身，肉厚，鍾意面粟米，香甜。油麵真要試，雖然叫油麵，一啲都唔油，無坊間嗰陣味。整體滿意，但男士應該唔夠飽，建議加底加餸。…Read More

帶住今世情人（老公）同前世情人（仔仔）到佐敦搵食，見到呢間曾經被介紹嘅鋪頭響年初四唔駛排長龍就入咗去。叫咗個兩粉，一小食同送咗個前菜。炙燒手撕雞湯粉絲拼米粉（$68）- 燒過嘅雞絲真係香到爆，先試原味湯底，清雞湯味易入口，再拮個檸檬，係如虎添翼，鮮酸味令人流口水。雞絲唔鞋，加埋個炙燒香味一絕。當中嘅陪菜腸粉亦係有趣地方，再試啖辣醬，整體真係非試不可。十三飛（$80）- 湯底濃濃，同雞湯完全唔同風格，配上乾蔥又係另一風味。安格斯肥牛係正常原味，唔會差。牛肋肉夠淋夠入味，比肥牛吸引。食埋腸粉就好滿足。西多雞翼（$38）- 糖漿甜牛油香，點會唔好食，加埋香脆，真係要快手享用。蝦片（免費）…Read More

今日同老公、仔仔、奶奶一行四人首次惠顧，叫咗三個一人午餐鍋再加碟萵苣。一人鍋包括菜籃（生菜、鴨血四片、粟米兩舊、南瓜三片）、手打丸（牛、鯪魚、蝦各二）、主菜（拉麵、紅薯粉、苕粉、白飯四選一）、配菜（牛肩、豬肉、羊肉三選一，安格斯加$10）同飲品（汽水，特飲加$12-$30）、湯底（蕃茄、重慶麻辣、山珍鮮菌）。菜籃同手打丸都好鮮，似乎並非隔夜貨。主菜試盡三款麵，紅薯粉勁快熟需要快手處理，拉麵亦似新鮮貨需要時間烹煮，苕粉最有驚喜，應該係薯粉表親，口感一樣但厚啲闊啲，滑亦不爛。豬肉、牛肩正常貨，安格斯就食出另一層次。蕃茄湯底濃郁偏酸，麻辣就有正常so味。萵苣鮮甜，正。$88一鍋，萵苣$28，免茶免加一。抵到爛，一定會再幫襯。…Read More

千挑萬選選中佢，發現唔係最抵食，但還可接受。二人餐有三個餸，一飯一菜，兩飲品。其實我唔喜汽水，應該選一間唔跟飲品，錯咗。而份量二人唻講算少，好彩之前食咗串燒。兩大一細剛好，唔會太飽或者肚餓。豉椒炒蜆，蜆肉數過有廿三隻，略嫌豆豉少，但味道整體不錯。鮑魚雖然得兩隻，都算大隻，幾淋，果皮味香。椒鹽鮮魷太多粉，小朋友愛吧，成人一般，啲汁可以杰返少少。炒飯量亦正常二人份，正常味道，唔咸，亦唔香。整體中規中矩。…Read More

三月初，多次踩場撲空。三月底，取單準備初嘗。四月初，終於買到其他人口中抵食夾好味嘅「飯Hub」。只係一日，款式轉咗，無咗之前好想買嘅韓式豚肉辣豆腐湯飲。相信應該係月月轉牌，因為幾日後再望，餐牌沒變。既然天意，唯有再選，決定轉⋯⋯黑醋豬軟骨飯（$45）琴日明明$40，一加加五蚊，雖然貴咗一成，但性價比仍然高。豬軟骨炆得好淋，骨係大骨但完咗咬到，軟身入味。米係珍珠米，粒粒分明，加上飯素，份量接近小童/女士兩碗。再配上麻醬沙律菜同半隻糖心蛋，感覺頓然清新咗。印度奶油雞飯（$42）跟據嗰勢，上月有賣應該係$38。雞係脾位好淋夠入味，蕃茄奶油味香唔辣，小朋友都可以食。米，配菜如上。三個人食兩盒，飽到嘔呀！其餘款式（每月十二款），一定要再試。…Read More

老公問我想食乜，但重九嘅中環會有咩食呢？其實都有幾多！最後老公決定去鏞記，一間我從前就好想試，但永遠經過都唔記得嘅「新」酒家。鏞記對我唻講應該係「舊」酒家，但內裡嘅裝橫並無歲月嘅痕跡，係因為家族問題定係追上潮流，作為食客，我都無謂考究。兩大一小叫咗一份例牌燒鵝、一碗白飯、一籠帶子鳳眼餃、一碗柴魚花生粥、一籠原籠馬粒糕，最後唔夠飽叫多一碟本地生牛肉麵。燒鵝 - 例牌唻講都算細，係因為去咗大部份骨定係碟大？自家製醬汁帶微微花生味，幾香幾特別；燒鵝皮脆肉嫩，是為瘦鵝；伴碟可能係甜紅豆，都做得幾出色。白飯 - 正常。帶子鳳眼餃 - 近潮流？簡單鮮味。柴魚花生粥 - 唔係我鍾意嘅粥底，偏淡，有柴魚味，非傳統味道。馬粒糕 - 鬆軟香口，唔會甜到漏。牛肉麵 - 牛肉滑，生麵爽，但點解跟上嘅湯有疑似豬潤嘅腥味？呢度嘅價位唔低，三個人承惠$650。…Read More

有啲口痕，又有啲口渴，但又就到晚餐時間；唔想食咁飽，但更加唔想唔食，所以就唻呢度食少少嘢。新吞拿墨西哥粟米脆片 - 粟米片帶有淡淡嘅黑椒味，香脆；新吞拿魚醬混合牛油果、車厘茄、雜豆同少許辣粉，新鮮、健康、刺激、豐富嘅感覺未來豬柳漢堡 - 豬柳有黑椒味、實肉；羽衣甘藍無澀味、爽；再配上新鮮蕃茄同蛋黃醬，滋味經典紅豆冰 - 紅豆椰奶比例1:3。紅豆少、唔夠香；奶味唔算重、份量過份咗；雖然少甜版係吸引，但整體真心麻麻地…Read More

“No monkey? You need to clean the kitchen afterwards” 一個同chef有趣的開頭， 令到成餐飯都好開心。今日係我都老公嘅拍拖慶祝日，帶埋阿仔去赤柱遊走下，出下汗。響完全無計劃嘅情況下入咗去一個comments唔差，但居然一枱客都無嘅印度餐廳。唔同五點幾太早？唔緊要啦，人少少仲舒服。仲連大廚都出唻同我哋傾計，笑下。Mulligtwany（扁豆湯）扁豆味唔係太重，反而香料味較為突出，偏咸。湯亦比較稀，唔似西式濃湯。但特別，可以一試。Paneer Pakora（芝士波？）中文名唔太記，不過味道同我想嘅唔同，不推但可試。Chicken Tikka Masala（蘑菇燒雞）應該係雞胸但一啲都唔鞋，唔辣，香料味唔會太重，好適合小朋友食。配埋烤餅/麥餅，小朋友當pizza食。Dal Makhani（咖喱黑豆）一定要推，黑豆磨到微蓉，好有肉醬感覺。黑豆味香濃，個人真係食到一口接一口。配飯配餅都一流。Naan（烤餅）配咖喱無得輸，不過應該係基本嘢。Indian Fried Rice（印度炒飯）本身係叫檸檬飯，不過sold out，chef見我地有小朋友就推我地食呢個。又係無得輸，生菜爽，蛋味香，配咖喱直情贏，不過淨食就略咸。Roti（麥餅）點解咁似烤餅？外形一樣，味道都好似，係比較扎實少少。整體玩得食得好開心，會再唻。…Read More

朋友，好耐冇見啦，最後一次見面已經係2019年。兩年，足足兩年，今日我哋終於響朗豪坊重遇。你嘅香港滷味味究竟同當年台北嘅味道係咪一樣呢？但我影像中嘅你只有滷味同飲料，但唔緊要，只緊要好味。滷味（花干，貢丸，鴨血，鑫鑫腸）-滷味汁似乎調到香港人口味？味道偏淡，但適合一家大細享用。花干入味，貢丸爽口，鴨血唔腥，只有鑫鑫腸偏淋本人不推。鵝油香蔥雞肉飯-應該叫雞肉魯肉飯？油脂充斥碗底，但鵝油香味欠奉。雞肉奉上去骨雞胸，但滑溜唔鞋。伴碗酸菜唔鹹，空口亦可。板橋夜市蚵仔酥-略嫌炸粉少厚，但蚵仔肉質實淨唔腥抵讚。藍蝴蝶水蜜桃-香，甜，一滴不留。…Read More

響市區搵一個又大又舒適嘅餐廳同全家人食飯唔係一件容易嘅事情，仲想要有空間俾小朋友玩真係難上加難。今日，今日俾我搵到啦，但可惜疫情關係樂園嘅部份暫停開放。唔開心嘅事唔講啦，去返美食部分。法式龍蝦湯（$58）蝦味濃郁，夠滑口，酒味唔重唔苦，值錢相宜，絕對值得試！鮮蜆香辣蒜蓉意粉（$118）蜆味鮮，意粉煙煙靭靭，少許辣味好引人。全日早餐（$138）辣椒乾多士有驚喜，蕃茄烤出燒烤味，茄汁豆居然有蕃茄蓉，羽衣甘藍沙律嘅醬汁好fresh，香腸、煙肉、牛角包、滑蛋都係水準之作。…Read More

響元朗覓食真係好痛苦，因為好選擇真係太多啦…… 仨口子漫無目的咁四處找美食，但老公陪住阿仔所以都係覺得食飯類／用刀叉食比較方便。響無預設嘅情況下就走咗入Chef Mind試下啦。想食珍寶炒飯（蝦、雞、西班牙腸），點知個飯係辣嘅驚個仔食唔到所以叫咗個唔辣嘅意粉，點知阿仔瞓足全程激瘦我。不過個意粉質素好有驚喜意大利野生牛肝菌火腿意粉 ($60)—外觀上比滿滿嘅芝士碎吸引咗，雖然係好邪惡，但本人勁like呀！再試就係意粉，”al dente”，並非騙徒，本人真心讚歎，住家價錢高級享受。其次再試火腿同牛肝菌，牛肝菌味道香濃，火腿唔咸，可惜火腿比牛肝菌多。而醬汁就比較重手，如果唔係佢嘅廚師CP值滿分。但依家我都可以俾90。整體就有80…Read More