siusinggg's Profile

呢間重慶小店，味道好正宗～食完會想再encore～🍅蕃茄鍋濃郁得嚟好自然，雞軟骨丸子口感真係好過癮，六十幾蚊食到咁高質，真心抵！😋✨ 蕃茄雞軟骨丸子冒菜小火鍋唔食得辣嘅朋友一定要試呢款！湯底係每日用新鮮蕃茄慢慢熬出嚟，酸香順喉，飲完唔會口渴。雞軟骨丸子手打製作，咬落真係「嗦嗦聲」咁爽脆，吸咗蕃茄湯之後更加鮮味。配埋索湯嘅寬粉、豆皮同金菇，真係好滿足！✨ 重慶燒烤三款▪️炭烤五花肉：肥瘦比例啱啱好，燒到外脆內嫩，焦香十足▪️秘製烤雞翼：外皮香脆，咬開肉汁keep到，醃得好入味▪️烤韭菜：火候控制得幾好，乾身唔油，孜然香氣好突出（真係要趁熱食，風味更佳～）✨ 解膩配搭▪️紅糖冰粉：冰涼滑溜，紅糖味醇厚，食完辣嘢嚟一碗好舒暢🧊▪️凍檸茶：茶底濃而不澀，檸檬清香，同濃味食物好夾🍋💡 溫馨提示✔️ 湯底有貴州酸湯同蕃茄湯可選，辣度可以揀BB辣/微辣/重慶辣，好貼心✔️ 下午茶套餐性價比高，打工仔福音✔️ 晚市人氣旺，建議早少少去…Read More

星期日下晝經過食個下午茶，第一次試呢間，入到去舖頭幾大，裝修都新淨，座位都算闊落，但冷氣唔夠，好焗下。嘢食一到就勁多蚊滋，仲飛埋落去杯飲品到，幾個人一齊喺度撥蚊滋😖😖😖嗌左幾樣野食芝士鹹牛肉三文治 （烘底）呢款算係最穩陣，啱啱烘好熱辣辣。日式豬扒炒烏冬豬扒好鹹，但係個烏冬又冇乜調味，炒得唔夠乾身，唔好食！黑椒牛肉炒意粉一樣都係唔夠味，冇鑊氣。食完成餐飯，冇意欲想再嚟，野食要再改進，唔好浪費左個裝修同地理位置。…Read More

官也街附近嘅葡富軒，環境幾好，有澳門嘅葡式風情，坐得都幾舒服。啲侍應好nice，會主動介紹菜式，服務幾周到。⭐️必試嘅馬介休球，炸到金黃色，外脆內軟，鹹鹹哋好香口。⭐️葡式炒牛肉夠晒鑊氣，牛肉嫩滑，個汁好濃郁，撈飯一流。⭐️葡式鴨飯好正👍，飯粒吸滿鴨油同香味，鴨肉入味，真係忍唔住一啖接一啖。喺官也街行到攰，過嚟食餐地道葡國菜，真係幾滿足。份量足，價錢合理，遊客嚟講係一次好地道嘅美食體驗，值得推介！…Read More

黑山羊湯飯，羊肉幾淋身，湯底有淡淡藥材味，唔會太重羊羶。飯量夠飽肚，湯汁入晒味，食完成身暖晒。味道普通，無乜花巧，正正經經一餐飯。五十四蚊冇飲品，抵唔抵見仁見智，但凍天想食碗暖嘢都可以一試。…Read More

呢間麵包舖個麻糬蛋撻不嬲都好出名，依家仲新出咗金寶湯忌廉粟米撻，睇落好似件精緻小首飾咁！我又忍唔住試，話晒都係童年回憶😆😆⭐️金寶湯忌廉粟米撻個撻殼焗到金黃鬆化，「咔嚓」一聲碎開，裡面係滿滿嘅忌廉粟米餡，仲有粒粒甜粟卜卜脆。食落去好似將成個嘅粟米湯，裝咗落件牛油曲奇裡面，個口感得意到呢～甜度啱啱好，唔會「漏」喉嚨，真係有驚喜！⭐️鮮牛油蜂蜜鹽可頌一拎上手已經聞到陣牛油香，面頭嗰浸蜂蜜同海鹽，鹹鹹甜甜咁，即刻將個牛油香引爆出嚟！個味道複雜過TVB劇情，但又夾到天衣無縫。食完成個口都係餘香，忍唔住啜埋手指啲蜜糖添。今日份嘅快樂同卡路里 quota 都順利超標完成！而家14:30後買任何烘焙產品，仲可以半價加飲品，下午茶想食少少嘢就啱晒！👍🏻好抵！仲外賣咗一件拎走，跟佢個袋有指示點樣翻熱，加熱左仲好味😳…Read More

呢間餐廳之前食過一次覺得都唔錯，今次回頭再食，味道都仲keep到唔錯，但係上菜嘅速度真係慢到好得人驚，慢到忍唔住去同朋友輪流去隔離零食店買嘢，嘢食都仲未嚟，但係客人又唔係多，完全未坐滿！嘢食擺低咗連餐具都冇俾份，嗌咗薯格薯條拼盤，茄汁都冇俾又係要追問😖😖😖 之後幾樣餸都冇乜心機影相！…Read More

呢間餐廳一直知佢出名，營業時間仲要唔長，有d菜式賣晒就冇，今次特登趕喺佢開門前去到，已經見到有幾個人等開門。咖喱牛腩撈麵咖喱汁好香，撈勻每條麵都掛到汁。牛腩炆得夠淋，帶少少筋位幾好咬。麵質保持彈牙，唔會糊口，好惹味👍🏻煎雞蛋蝦米腸粉腸粉煎得香口，外層微脆，入面依然滑身。蝦米同蔥花份量適中，估唔到加埋雞蛋簡單配搭好夾，好香蛋味。腐竹糖水聽講又係必嗌，原來呢度係膠樽裝，好似飲品咁，糖水清甜唔膩，食完嘢飲返支好正。臨走仲買咗一支拎走。牛雜麵湯底清甜，飲得出係熬過嘅。牛雜處理得乾淨，炆得夠淋。蘿蔔都入味，整體份量足夠，係碗實在嘅牛雜麵。呢間我會再回頭，係值得排隊，味道實在，製作認真。想食d傳統口味嘅話，呢度係個唔錯選擇。…Read More

其實我自己都幾鍾意食雲桂香，鍾意呢種雲南小窩米線多過譚仔，耐唔食都會掛住，但呢間分店真係做得幾差，俾過幾次機會佢，都真係搞唔掂！個辣度超級唔穩定，不嬲嗌開中辣，試過兩次覺得唔辣，今次又辣到食唔到，完全係觸摸唔到，次次食嘅味道都唔一樣，之前嚟到都鍾意嗌凍檸茶，但係個味道又係好飄忽，完全唔夠膽嗌，穩陣起見都係飲返可樂吧啦，配料就正正常常，同埋環境成日有蚊滋，枱面又好似抹唔乾淨！正路喺商場入邊真係唔會咁，應該係個衛生環境清潔得唔夠乾淨。…Read More

冇幾耐之前朋友生日食咗一次，覺得好味，服務又好！我仲特登寫咗篇食評讚，隔咗個幾月回頭再食一次，但今次真係好失望！上次同今次都係由2位唔同既男侍應招呼，服務態度都超級好，有禮貌！但今次中間只係問左一位女侍應一句，佢態度同語氣即刻好差，實在嚇親，乜咁大對比嘅！買單俾錢嘅時候都係黑面！芝士肉醬薯條，張相應該都見到焗到燶咗！芝士忌廉焗菠菜過份量少咗勁多。肉醬意粉個碟邊濕晒唔知咩事，唔知以為自己去咗茶餐廳。封門牛柳配神戶燒肉汁意粉，嚟到一啲都唔熱，只能夠講係得返小小暖，完全影響晒成碟嘢。夏威夷式薄餅，應該係即整，嚟到都仲熱，不過不失。龍蝦汁西班牙海鮮飯，呢款真係好唔掂，完全一pat野，實在太濕。海鮮亦冇鮮味。…Read More

出開旺角，試左呢間台式料理，真心唔錯，諗起都心思思想再去。⭐️紅燒牛肉麵係我至愛，個湯底飲得出係落足心機熬，味道清甜又有層次，飲完唔會口乾。啲牛肉炆到好淋好入味，揀咗關廟粗麵，煙煙韌韌又掛到湯，每啖都係滿足。⭐️麻辣牛肉麵都幾有驚喜，佢唔係得個死辣，而係麻香同辣味慢慢滲出嚟，食完成個身暖笠笠。轉咗新竹米粉，索湯真係一流，滑溜得嚢又夠彈牙，同濃味湯底出奇地夾。呢間餐廳有樣特別之處，牛肉可以揀片切或者角切。可以跟返自己嘅喜好揀！值得一讚👍🏻👍🏻👍🏻片切 ：肉質比例比較多角切：因為比部分較多⭐️炸雞排絕對係水準之上，外皮脆卜卜，入面啲肉依然保持到肉汁，食落唔會乾爭爭。我仲落咗鹽酥雞粉，仲正！⭐️台式炸大腸就更加係驚喜，炸得香脆到不得了，完全冇異味，唔點野就咁食都一樣咁惹味。飲品我叫咗粒粒白桃四季春，清甜嘅白桃味加上真實果肉，解渴又解膩。朋友杯桂花烏龍都唔輸蝕，桂花清香同烏龍茶嘅甘醇融合得啱啱好，飲完個喉嚨好舒服。整體嚟講，由主食到小食再到飲品，樣樣都整得夠認真。係嗰種食完之後，會令人想再去既感覺！另外調味料都可以買返屋企，仲有其他醃製小菜，喺屋企都可以食到嘅台灣味道！…Read More

今日試咗牛氣火鍋嘅午市半自助，感覺幾抵食。蕃茄湯底係驚喜，唔係得個酸字，飲到淡淡茄蓉同洋蔥嘅甜味。最特別係蔬菜區有羽衣甘藍，打邊爐好少見。滾兩滾就食得，索咗蕃茄湯之後依然保持到爽脆口感，比普通蔬菜有層次，健康得來又好味。半自助形式幾好，自取區有齊蔬菜、丸類同飲品，肉類就係定量。我叫嘅係午餐set B, 有牛、豬、雞, 各100g 肉類質素對得住價錢，油脂分布幾靚，輕輕一涮已經好嫩滑，同個蕃茄湯好夾。甜品方面有驚喜，除咗軟雪糕，竟然有近年好hit嘅巴斯克芝士蛋糕，表面烤得焦香，入口綿密，芝士味濃而不膩。另外仲有清爽嘅豆腐花，豆味幾出，食完火鍋用來清下口就最適合。整體來講，百零蚊有個質素唔錯嘅午市火鍋，有特色蔬菜同甜品選擇，係個幾舒服嘅午餐體驗。$108 +1服務費…Read More

今日專登去試咗碗潮州滷水車仔麵，揀咗招牌嘅豬雜麵配幼麵，食完覺得相當滿意。個滷水汁絕對係精髓，色澤深沉但入口溫和，鹹度恰到好處。香料味好豐富，食完成個口都係甘香餘韻，證明個滷水膽夠晒火候。豬雜份量十足，有齊豬腸、豬肚、豬脷同豬肺。最值得讚係處理得乾淨，完全無異味。豬腸滷到軟淋入味，豬肚就保持到爽脆口感，一淋一爽，層次好豐富。今次特別揀咗幼麵，麵質爽口彈牙，比油麵更能掛起滷水汁，每啖都食到湯汁同麵香嘅完美結合。幼麵索汁能力強，但又唔會過淋，同濃郁嘅滷水出奇地夾。整體來講，由滷水汁到豬雜再到麵底，每個細節都做得好好。味道傳統得來夠晒平衡，食完成碗真係好有滿足感。鍾意食滷水嘅朋友，呢碗豬雜麵絕對值得一試。…Read More

今日突然間想食台灣嘢，呢間都見好多人食，weekend 食飯時間通常都要等位，但係真係唔係好想等，所以決定外賣自取，都唔算等得耐，好快有得拎。秘製嘉義雞肉便當 (冷吃）OpenRice 自取 $63幾款小菜嘅味道都好出色炒椰菜，粟米，同埋粉絲，呢個搭配好豐富。雞肉上面有紅蔥汁，個汁超級惹味，送飯一流。但係美中不足嘅地方就係雞肉到，有部份雞肉好鞋，少啲牙力都咬唔郁，食完個飯成個口都好攰😖😖但係因為佢出色嘅醬汁，我願意之後俾多次機會佢，可能係個別部位問題。…Read More

今日朋友約喺尖沙咀食飯，想食泰國菜。就揀咗呢間，但個地點都比較難搵，可能因為小出尖沙咀，都搵咗一陣先搵到。今次我哋一行四人，想食嘅嘢實在太多，大家都好鍾意食泰國菜。蒜蓉包好香口，咬落去好鬆軟，香濃嘅蒜蓉味。小食拼盤四個人嗌呢款啱啱好，每樣一件，我自己就超鍾意食魚餅，辣辣地加埋泰式香料味，一流。中間仲有炸蝦片，食到尾傾下偈慢慢再食埋👍🏻👍🏻冬陰功媽媽麵其實成餐飯我最期待係呢一道菜，但係又唔覺得好驚艷，好普通嘅冬陰功公仔麵，脆皮豬肉仲好肥，完全食唔到。泰式鳳爪可能我自己唔係特別鍾意，又覺得一般般調味唔夠濃。生蝦生蝦真係我嘅最愛，點泰式辣醬，個感覺即刻好似返番去泰國😆😆😆馬拉盞炒椰菜苗有時泰國菜成日食炒通菜都悶悶地，今次就揀椰菜苗，好惹味。整體嚟講呢間餐廳都唔錯嘅，份量好大，除咗冬陰功媽媽麵，我都好滿意👍🏻下一次再嚟尖沙咀想食泰國菜都值得再嚟…Read More

呢間舖頭耐冇食就會掛住，食過好多次，長期都好爆場！今次同朋友兩個人都嗌咗唔少嘢。⭐️雪菜肉絲麵成碗麵都鋪滿雪菜肉絲，一d都唔手軟，雪菜切得夠碎，個味道啱啱好，唔會太鹹。麵條係標準上海幼麵，掛湯又彈牙，正！⭐️酸辣雲吞麵雲吞超大粒，白菜豬肉餡，一啖咬落去，肉汁同湯汁一齊爆出。配埋酸辣湯真係可以食到一滴都唔剩低🤭🤭⭐️粢飯呢個真係我最愛，係即叫即整，上到枱係熱辣辣，仲會問你使唔使一開二..或者一開三，方便同人share👍🏻👍🏻 外層糯米軟糯，裏面油炸鬼脆口，肉鬆嘅鹹香同菜脯嘅爽脆，真係冇得輸！另外仲有小籠包同煎菜肉包，個人感覺就無功亦無過，唔算好驚艷。見到好多人外賣粢飯，自己有陣時趕時間唔知食咩都會買返條👍🏻👍🏻…Read More