leotse's Profile

為咗揀部Notebook出國，少不免要去做高登仔，坐住部神駒去到北河街落車，啱啱好喺呢間舖對出，本來我係想食雲吞麵嘅，又不過呢度有個平日限定嘅午市套餐，時間啱啱好又無謂miss咗佢吖，咁變心快過打針嘅我就入咗去食喇。四款拉麵可以選擇，基於海老湯底喺香港較少人做，就揀佢試試。叉燒都可以揀厚切或火炙，當然火炙比較吸引。配菜可以揀蔥或椰菜，椰菜似乎唔太夾就揀返蔥。麵都係揀返硬身啱我口味。小食除咗炸雞外就唔太吸引我，再加支汽水，$78真係同茶餐廳唔會差太多。汽水估唔到會係用玻璃樽裝，雖然容量少啲但啲汽係比罐裝多，所以我係鍾意樽裝多啲。一個人食就通常會坐吧枱位，可以見到廚房嘅運作，因為我揀咗個煮麵位坐，有女職員問我會唔會覺得熱，幾細心唔錯。炸雞先到，我從來無期望過跟餐嘅炸雞會係即炸，果然一食就知係預先做起，微暖同唔太脆。雖然肉汁唔多但肉厚，感覺似係來貨唔係自家做，沒有期望就沒有失望。拉麵嚟到，估唔到舖到咁滿，仲有預計以外嘅蔥白同肉碎添。叉燒有經過充份火炙程度，亦有一定厚度，但咬落去除咗火炙香外，叉燒嘅調味唔太明顯。由於肥膏唔多，就算火炙咗佢都唔會話好有油香，好睇但又未到好食。湯底就相當濃郁，蝦味極重，以價錢計我好難想像佢會咁濃蝦味，但又唔會話好鹹，飲完又唔會口好乾。櫻花蝦就浸到軟晒唔脆口，可能佢地係放櫻花蝦乾去煮所以咁濃味掛？總之湯底我就好滿意。拉麵顏色比較雪白，食落去好似唔喺硬麵質地，唔通我剔錯？除咗硬度之外個麵就無話太特別，滑係幾滑但唔夠咬口，無咩碱水味算係優點，但佢係全碗麵最大缺陷。價錢而言呢間拉麵店算係偏中下游，湯底質素我都幾欣賞，可惜啲麵整成咁晒咗碗湯啦。…Read More

前排去觀塘食蛇，咁啱見到間蛇舖對面有間拉麵，作為偽日本人當然要去八下間拉麵店主打啲咩，原來係醬油拉麵系，而唔係香港最主流嘅豬骨拉麵。仲要有數量限定嘅slow cook叉燒拉麵，喺日本食過slow cook雞肉叉燒後念念不忘嘅我梗係唔會放過呢間舖啦。門口嘅告示牌雖然有大大張拉麵相，但吸引我嘅其實係左上角唔起眼嘅真叉燒拉麵，賣slow cook叉燒嘅拉麵全香港應該一隻手數得晒。因為我嘅目標只有一個仲要限定廿份，入去前先同店員確定無賣晒先入去，真係有種一係唔食一係我就要食最好嘅霸氣，咳咳。既然只有一個人，坐喺吧枱位就好正常，我都好鍾意睇住廚房嘅運作，呢種位置啱晒我。睇到枱頭有蒜頭辣醬胡椒粉同醋，再加埋個水壺真係日本常用嘅冰水壺，未食加定分先。拉麵嘅湯頭就分濃淡兩種，濃嘅會加入背脂即係豬肥，雖然京都系嘅拉麵係以濃厚見稱，不過食醬油湯底就梗係食清湯，我覺得醬油湯底唔應該落豬肥，好易冚過醬油味嫁嘛。等咗唔係好耐碗拉麵就嚟到，睇落幾大碗而且叉燒份量唔少，計落幾抵食喎。Slow Cook嘅叉燒梗係要帶啲粉紅色啦，但因為湯係熱湯，浸係湯裡面都會變熟好似生牛河咁，所以第一時間梗係食返塊叉燒。Slow Cook叉燒量多之餘並非燈影級，唔會一下就畀熱湯淥熟，帶微粉紅嘅叉燒食落的確夠軟熟，而且會多一份煙韌嘅口感，除咗醬油味外，仲會畀你一種類似風乾火腿嘅味道，無令我失望。麵係最常見果隻黃色鹼水麵，醬油湯底十居其九都配呢種麵，雖然我自己就唔太鍾意鹼水嘅味道，但佢嘅鹼水味就唔太明顯，食落口彈牙唔會過淋，令人滿意。用豬骨煲嘅湯，就點都會有油花嘅，不過睇下湯面嘅油花其實唔多，絕對配得上清湯呢個名。飲一啖，醬油味突出而不失豬骨同木魚嘅鮮味，飲真啲仲會飲到薑味，好有日本嘅感覺，喺香港屬一流水準，就算走到日本都唔失禮。以為咁就完？少年你太年輕了，枱頭仲有一支醋，一加落去，由豬骨風變成魚介風，用清鮮嘅味道作結，就唔覺得有罪惡感啦。無論湯底、叉燒都唔會輸畀日本嘅拉麵，價錢亦同日本相差無幾，唔想食香港主流嘅豬骨湯底，呢度絕對係個好選擇。…Read More

香港嘅拉麵店，我最鍾情就一定係漁場台風，佢係咪全港最好食我唔敢講，避免某某黨走出嚟話某某先至係世界級，但我可以肯定漁場台風一定係全港宅味最濃嘅拉麵店，啲宅味唔係貼幾張poster整幾件figure就扮得到，而係連員工、食客都係非等閒之輩臥虎藏龍，唔知咁講店主會唔會怒った呢？適逢三週年慶祝，出咗兩日限定嘅海膽拉麵，真係要神咁早出去排隊，果然未開舖已經排一百幾十人，前面有人用tablet打太鼓，後面有人話爆咗幾袋UO…呢啲嘢你唔會明嫁喇。當日只賣一款海膽拉麵唔需要頭痕，只要揀好湯底濃淡同埋落唔落蔥就得，不過麵質都可以手寫決定軟硬，我就一定食硬身嘅。講起上嚟我其實無食過漁場台風嘅拉麵，因為我鍾意食沾麵多啲而沾麵只有午市會做。雖然係最忙嘅週年慶，枱面都唔會七國咁亂。牆身有好多客人同餐廳嘅互動，裡面真係好多宅嘢…咳咳。唔使好耐拉麵就已經做起，呢日排長龍都咁高速真係要用摩打手做嘢。湯底明顯比其他拉麵舖少，可能濃湯嘅意思就係唔去兌水掛。個濃湯味道就真係好重豬骨味，飲落亦夠漿口，鹹味重少少啦，或者正常濃度會更適合我。聽講今次嘅豬肉係荷蘭豬，荷蘭豬又係咪真係荷蘭叻啲荷蘭好食啲呢？咁佢梗係出色過荷蘭叻果個渠頭啦，瘦肉嘅部份就韌少少但係肉香味濃，肥肉部份就入口即融充滿油香，平時街市啲豬肉梗係比唔上啦。呢度嘅叉燒又比其他舖頭嘅厚肉，啱晒我。週年慶嘅麵聽講係特製，我無食過呢度嘅拉麵底所以比較唔到。落單時要求咗硬麵，呢點毫無疑問做得到，食落口硬度夠又唔會未熟。麵條掛湯能力亦強，吮麵時可以將豬骨湯一齊吮入口，唔會比沾麵遜色喎。食拉麵溏心蛋就唔少得嘅，不過隻蛋蛋唔見咗？得返阿黃係度？平時溏心蛋我就成隻啪，既然佢搞成咁我直頭打散佢連埋拉麵一齊吮落去。就算無咗蛋白都仲有濃厚蛋黃香，一樣令人滿足。話明海膽拉麵，說好的海膽呢？咁係得返呢舊嘢姐？之但係，泡嚟嘅？食一啖，師父明白了。點解隻蛋骨肉分離無咗蛋白，因為個蛋白用咗嚟打泡，否則單單係海膽又點會係白色？咁即係有無海膽味呢？係食得出嘅，但味道梗係無直接食一板板咁濃，$50就唔好要求太過份。只用蛋白嘅聰明之處係蛋白幾乎無味，所以就唔怕蓋過海膽味，同理我覺得唔好同個湯溝埋一齊食，否則就只會食到豬骨味。$50蚊可以食到一碗完整嘅拉麵，計埋燈油火蠟人工舖租點都無可能有錢賺，絕對係感謝祭殺必死，為咗以後都有得食週年限定，係要多啲幫襯嘅。…Read More

雖然米芝蓮係飲食指南，不過佢哋鬼佬嘛，講到香港菜，真係識條鐵咩。生抽皇黃秋生就唔同，雖則佢都係半個鬼佬，但最少係香港土生土長，佢話好食嘅，我信嫁。早排見到佢去屯門食海鮮食得咁開心，梗係跟，做唔成影帝都可以食影帝餐嘅﹗餐廳就酒樓格局，無咩特別，最多就係坐房同坐大廳有唔同收費。平時食飯就頭痕揀咩食，今次簡單，黃秋生食咩我食咩，唔夠飽就搵伙記推介，完全係思想殘廢餐。唯一要揀嘅，咪汽水定啤酒囉，畀我見到佢哋係玻璃樽版本，一定係飲汽水，啲氣「鋸」好多～影帝餐第一道係白酒忌廉煮花甲烏冬，花甲係啲肉係飽滿到貼邊而唔係空殼公司，抵食吖，同埋就算有忌廉汁係度都食得出隻花甲嘅清甜。作為好酒之人我當然希望白酒味再濃啲，不過食得出白酒嘅香味已經好夠。而忌廉就比平時食西餐嘅白酒忌廉黃身同多幾份甜味，量多但唔係水汪汪，就算攤凍咗入口都唔會好膩。烏冬本來無太大期望，又估唔到佢食落夠滑溜，口感唔會過鬆散或太結實，唔係我買開十蚊幾包果種純醫肚Cheap貨。泰皇芝心蝦丸就係成粒手榴彈咁嘅炸芝士蝦丸，香脆嘅麵包粒食落去無油膉味，裡頭包住嘅蝦丸亦彈牙唔係一口麵粉，而且仲有個一咬就爆嘅芝心，除咗要小心啲芝士係口裡面爆出嚟，仲要注意唔好畀滾熱辣嘅芝士顏射哦～雖然佢係一碗蕃茄薯仔海鮮湯，但並唔係橙紅色，呢碗湯都應該係我人生中最貴嘅蕃茄薯仔湯喇，佢係用咗瀨尿蝦同沙白去煮，真係一聽就知佢鮮味。飲落就好老實，蕃茄味唔重，海鮮嘅鹹鮮味比較明顯，咁嚟得呢頭食飯海鮮先係主角嘛。飲完湯梗要食埋湯渣，可以見到十隻八隻瀨尿蝦隊落去煲，真材實料嫁﹗薑蔥鮑魚煲聽個名好似晒咗隻鮑魚，不過佢地係用鮮鮑魚而唔係乾鮑，而鮮鮑味道其實幾淡，配薑蔥簡簡單單就相當好。呢個薑蔥鮑魚，爆香咗大量薑蔥蒜，再加埋強勁嘅鑊氣，淡味都升級成惹味。而且鮑魚夠大隻又夠嚼頭，真係唔會比乾鮑輸蝕。蒜茸粉絲蒸元貝雖然屋企有時都會整，不過屋村街市仔要又大又靚嘅元貝唔容易，既然呢度有大隻元貝，梗係唔可以錯過。個元貝殼大過我隻手，肉就有掌心咁大，咁大粒元貝真係可以話係肚滿腸肥，食落啖啖肉又唔會黐殼，加埋蒜香粉絲真係無敵組合。呢度嘅招牌菜焗芝士龍蝦呢個無理由唔食啦，我要了解吓咩叫做有芝士香無芝士臭嘅芝士。睇報導話用咗三種芝士，小弟不才唔會食唔到係邊三隻，不過有芝士無拉絲，應該都無水牛芝士。首先由個頭開始食，啲芝士味確實香濃，同埋食落去面頭微脆裡面就似蛋糕咁軟熟，幾有趣而且我鍾意。焗過嘅龍蝦肉並無焗過龍，口感唔韌而且有肉汁，扯起成舊龍蝦肉然後好似雞髀咁一啖咬落去，真係好爽。食完終於明咩叫有香無臭嘅芝士，應該係指佢無芝士果種奶膻味－－雖則本人係連羊奶羶都唔怕。雖然食咗好多海鮮，但係見秋生哥食過鹽油焗奄仔蟹，一場嚟到唔嗌又好似可惜咗啲。望住啲蟹黃漏出嚟咁款，梗係一啖啜落去阿黃度。阿黃同大閘蟹黃其實幾相似，味道一樣都係鹹中帶甜。呢隻奄仔蟹嘅蟹肉明顯比大閘蟹肉厚紥實，唔似大閘蟹食完個黃就無肉食，同埋唔使等咩九圓十尖一年一造咁悽涼，幾時都有得食。食海鮮，最緊要食得夠鮮，有咩鮮得過係海邊食先？再加埋有影帝加持，個朵夠響嘢食夠鮮，值得食啦。…Read More

上次喺大圍搵到間平靚正嘅日本嘢，我個返鄉下（I mean日本）仲多過我嘅老死又話想去試下，諗起又好耐無喺果邊踩單車，就決定踩完單車再過嚟吔。以前運動完可以大吃大喝，而家老喇，反而係攰到食唔到咁多嘢，就揀啲特別想食嘅啦。魚生飯本來就唔特別，不過呢碗山形角切魚生粒珍寶赤蝦飯，多出嚟隻蝦就真係夠大隻喇，純目測佢有成六吋長兩隻手指粗，蝦肉口感結實帶黏性唔會霉爛，再啜埋個清甜嘅蝦腦，感動。魚生粒就符合預期，都係三文魚吞拿魚油甘魚呢啲，睇個色澤都知品質唔錯，魚生粒嘅份量甚至乎多過飯添﹗點刺身飯可以換購三文魚頭鮫，我係相當鍾意食三文魚頭嘅，應該話我鍾意食熟嘅三文魚多過生嘅，因為煮過嘅三文魚啲魚油逼咗出嚟更好食。有時啲餐廳嘅燒三文魚頭，就真係得個頭無肉食，呢度仲有埋個魚鮫位，價錢相同肉量Double up。雖然魚頭係樣衰咗少少，但食落去肉質就好細滑，而且魚頭皮（唔係柒頭皮）燒得香脆嗦嗦聲。而魚鮫就幾厚肉，魚肉夾起嚟唔會散但入口即融，又伴隨住魚油嘅甘香，呢個價錢真係自己整都無咁平。明太子手羽個樣脹卜卜好似BB嘅雞髀仔咁，賣相相當吸引，見佢咁脹卜卜就知裡面釀咗唔少明太子啦。雞肉咬落去雖然肉汁唔多，但肉質唔會霉，雞皮如果再脆口啲就更好。裡面嘅明太子份量同預期一樣多，辣味唔會好強，加杯啤酒就爽喇。今次食嘅款式同上次唔同，不過一樣水準唔錯，尤其係呢度價錢夠街坊，又唔使係旺區排大隊，同埋我喺度返屋企仲快過由旺角返呢。…Read More

每次去尖沙嘴都唔知食咩好，因為實在太多嘢可以揀，但得自己一丁友去食又食唔到幾多嘢，所以好多時都係食吓小食或者食碗麵就算，查到有間拉麵店新開，有比較少見嘅櫻花蝦沾麵，試吓無壞。由於係新開而且係三點幾鐘，無咩客人係件幾正常嘅事。店裡嘅裝修都真係幾樸素，木枱同木色筷子好似食魚蛋河咁嘅款，加上一個唔知係特色定係甩色嘅牆身，其實成件事幾時光倒流又意外地夾。沾麵有四款而且有得揀冷暖麵，要食就梗係食冷麵嘅。除咗沾麵仲有三款拉麵，仲可以揀麵嘅軟硬度，或者走唔走蔥筍，細節位做得幾足啵。上枱喇﹗睇個樣都幾足料，沾汁嘅櫻花蝦鋪到滿晒，沾麵除咗叉燒溏心蛋筍乾蔥呢幾樣基本嘢之外，仲有海帶芽呢個味噌湯常客。一手摸落碗沾汁度，個碗熱到辣手即時一縮，好明顯個碗係比沾汁更加熱，咁樣做就有保溫效果。雖然小處有著眼，但沾汁就不過不失，個汁唔會過鹹亦食到蔬菜嘅清甜，唔需要加湯割都可以成碗飲晒。另外櫻花蝦的確用咗唔少，但一清晒櫻花蝦個汁就無晒蝦味，不如攞部份蝦去煮沾汁咪仲好。沾麵呢邊都係大堆頭，啲配料基本上冚晒成碗麵。但佢真係得個樣唔錯，沾麵係結實得嚟無彈性，口感自然唔好，無落鹼水可能係原因，但其實可以喺麵粉上著手，其他舖頭無鹼水味得嚟都可以彈牙，無理由做唔到嘅。而叉燒可以話係燈影叉燒，三塊加埋都唔夠人地一塊厚，除咗要讚一下刀功外，就梗係要彈塊叉燒無咬口，切到咁薄完全食唔出究竟入唔入味，尚幸有啲火炙味點綴下，成件事無咁寡。溏心蛋個樣的確係溏心嘅，但係睇色水就知唔夠入味，軟熟度可以但好細粒，照計細細粒應該容易入味先係嫁…老實講呢度嘅基本功真係做得麻麻，有注意到細節位，主動加水同埋禮貌良好係件好事，但去餐廳食嘢，梗係嘢食質素排先。仲要拉麵唔係平嘅菜式，以呢度嘅定價，其實有更抵更好食嘅選擇啦，不過開業初期，應該有進步空間嘅。…Read More

旺角搵食有時都幾頭痛，乜都有代表要花更多時間諗食啲咩，本來想食拉麵但行過廣華街見到隻蟹喺頭頂，午市套餐食松葉蟹咁有趣，又真係唔怕改改選擇嘅。見到上面隻蟹就諗起日本間蟹道樂，不過蟹道樂個個都話唔抵食，唔知呢間又會係點呢？就因為呢塊板搞到我停係度，蟹全部都係蟹嘅午餐，一舊水都唔使有蟹喎。本來想食拉麵嘅，不過呢類舖頭嘅湯底無咩可能比得上正式嘅拉麵店，不如食個蟹膏飯啦。午市嘅套餐唔貴，但晚市嘅級數就高級好多，當然價錢都貴咗好多，雖然啲食物係好吸引，但窮鬼如我就唔太捨得食喇。舖頭裡頭嘅空間就相當細，只能夠坐八個人仲要係互望果種，而且全店只有一個員工，樓面收銀廚師都係佢，想做死人咩，再加上偏離旺區，真係唔知開午市賺唔賺得返成本。裡頭裝潢走簡約風令人舒服，細地方真係無謂搞太多破壞空間感。一幅大字同一個擺設，睇落又好似大戶人家嘅氣派。暖水壺入面裝嘅係玄米茶，溫度夠熱之餘又唔會淡茂茂，夠晒暖胃。先嚟一碗味噌湯，睇外表似乎無咩特別，一飲，的確係無咩特別，因為一啖就知其實唔係蟹湯。除非佢成煲湯只有一隻手掌咁大嘅蟹，否則有蟹水的話個湯係一定有種無法掩飾嘅海水鮮味，呢度只不過係將煮好嘅味噌湯再加返松葉蟹肉絲落去，真係一飲就知呃我唔到。不過佢松葉蟹肉都幾多，味噌湯唔會太鹹，加埋筷子托係蟹形又幾得意，過到骨啦。飲完碗不過不失嘅味噌湯後梗係要食主菜，松葉蟹膏飯。雖則個賣相就唔係咁好，不過個蟹膏有幾大舊就有目共睹，而且蟹肉都唔惹少，呢個價錢佢都出手幾闊綽。蟹膏就確係幾清甜，份量亦唔少，蟹肉就嫌佢比較乾身無咩水份，無咗味噌湯幫佢補水就搞成咁，唔係即拆始終係差咁啲，情願佢浸一陣暖水，雖然會走咁啲味但食落軟熟啲贏返。白飯反而比預期理想，佢有將飯素同白飯預先撈勻，而唔係就咁灑喺最頂就算，所以即使落得唔多飯素，每啖都會食得到。同埋啲飯粒嘅咬口唔會過綿而有黏性，估唔到最出色嘅竟然係個飯。雖然成餐飯唔係特別好食又無咩驚喜，但以呢個價錢可以食松葉蟹其實都唔可以要求太多，而佢又符合我嘅預期，合格啦。…Read More

厚德街市裝修過後，原本郵局的位置變成了美食廣場，果然喺領展呢啲吸血鬼下，呢個咁當眼嘅位置無可能畀公營機構蝕錢。新開嘅美食廣場畀我想像中大好多，以前做郵局果陣都唔覺有咁大，你話佢係僭建我都信，政府嘅嘢…郵局咁大當然要分拆上市以求賺到盡，最當眼果間舖就係呢間豪園小食，雖然畀財爺昆咗去搞美食車，但佢撐得住仲成功做到上舖頭，咁犀利梗係值得支持嘅。呢度最出名嘅係食雞，咁梗係要叫雞，睇下係咪they do chicken right. 呢度算係專做外賣生意，始終九成客源都會係將軍澳街坊，好在都仲有幾個位畀我同朋友坐低吹水，男人嘢唔通返屋企講畀媽咪聽咩。睇宣傳品好似幾受TVB歡迎，可能因為上過電視劇啦，雖然我已經無睇好耐。 呢度有slow cook嘅雞翼，一講起slow cook雞就諗起日本食過slow cook雞肉叉燒，的確係極品。Slow cook雞翼有個幸福住家雞味，唔知食完係咪會開心好幸福。幸福住家雞即係蒜頭洋蔥口味，而其實我屋企從來無試過咁煮，可能我屋企唔夠住家啦。Anyway，啲雞翼夠大隻就加分嘅，真係唔知點解兩大美式連鎖店啲雞隻隻都營養不良咁怪雞，你知啦，保持低質其實比保持高質更難。隻雞食落去真係滑溜嘅，slow cook下雞肉係有啲帶紅，呢個唔係唔熟係因為slow cook本來係咁。蒜頭味幾濃郁，而洋蔥經過長時間烹調近乎融入醬汁中，我覺得呢隻雞再加啲花雕酒就正囉﹗一間茶記到唔到家，一個係睇乾炒牛河，另一個一定係沙嗲牛肉，個汁真係間間都唔同，通常要舊茶記先好食。呢度嘅沙嗲牛肉包算係不過不失，牛肉唔會用鬆肉粉乸到無咬口，沙嗲味係有啲接近舊茶記但諗唔起差啲咩。一個包澱粉質有限，仲要兩個男人分，都係叫多兜撈麵先。撈麵就有三隻味，為咗驗證自己嘅味覺無錯，整多碗沙嗲撈麵先。沙嗲汁個色水就差唔多，而且唔會太稀，但花生香就比較弱，唔算出色但唔難食，真係估唔到暫時人生食過最正嘅沙嗲汁會喺荷蘭。個麵底就比較有趣，質感似大光麵但味道就有福麵嘅雞粉味，對此我表示中立。重頭戲開始，車打芝士雞翼（$25）梗係襯熱食先，有邪惡無流心有芝士無拉絲嘅炸雞翼，芝士份量夠大方味道都幾濃，雞翼就算得返一條骨，個Size都比兩大連鎖店大隻，仲要唔係粉多過肉，而且即使被芝士浸住，炸漿仍然夠香脆，真係唔到你唔服。鹹蛋魚片嘅熱潮下，當然要叫個黃金脆脆雞翼（$28）應一應境。少咗啲芝士，可以見到吸油紙上其實無咩油份，真係唔知點解兩大連鎖店又油又唔脆…除咗鹹蛋黃外，個雞翼仲有啲蒜頭喺面，鹹香又惹味，最緊要係啲雞翼炸完仍然有肉汁，好過食果啲貴一貴嘅魚皮啦。食咁多炸嘢，無理由唔口渴，雖然令人最爽嘅係汽水，但佢哋嘅檸茶有啲特別，梗係叫返杯試下。佢哋嘅檸茶見唔到檸檬，因為一早已經打成蓉。雖然篤檸檬係幾好玩，但好多時會手賤篤到過酸。而呢杯檸茶BB（$10）茶味清而不澀外，甜度酸度都夾得幾好，仲可以飲到果肉我就幾鍾意喇。雖然睇餐牌個價錢好似好貴，但諗真雞店啲雞水準咁差都三四十蚊一個餐，女僕炸雞店租畀你仲要四五十添，計落我哋嘅港產出品咪仲抵食夾大件，真係winner winner chicken dinner。…Read More

有日去銀行入數，見到呢間拉麵店個名有啲熟口面，查吓原來係日本嘅連鎖拉麵店，主要集中喺廣島，咁我喺日本見過都唔意外。由於佢係連鎖店，喺香港不過係兩年，已經有五間分店，呢個速度其他人真係望塵莫及，咁如果佢哋做得出色嘅就真係無所謂嘅。雖然係午飯時間，但係有幾多人會晏晝食拉麵吖又唔係平，所以係唔使等位。而且平日午市仲可以用優惠價換炸雞或者餃子，只不過佢都係急凍貨姐，食唔食都無所謂。叫咗個炙燒豚肉味玉拉麵，湯底嘅醬油味都算明顯，但係豬骨味就薄咗啲，可能係想突出個醬油風掛，個人希望豬骨味更突出，始終你個油花都唔係少…都係無謂太奄尖。拉麵可以揀軟硬，我就不嬲都受硬唔受軟，而佢又真係做到偏硬身嘅麵出嚟，據知佢地嘅拉麵係自家用小麥粉製造，咁佢食落去確實有別於味精拉麵個麵底，雖然麥味唔重但勝在無鹼水味，收貨嫁喇。溏心蛋一切開個蛋黃流晒出嚟，以溏心蛋計其實佢算係太生（半凝結先叫溏心而家叫流心），不過我鍾意。味道雖然係淡啲，但隻蛋仍然食到醬油味，水準都唔錯。輪到個叉燒，的確係五層肉嚟，瘦肉就較多同埋偏厚身，口感幾軟熟，味道亦唔差醃得夠濃味，食落仲有啲甜味。但燒烤味唔夠強而且無咩熱度，有啲懷疑佢係一早燒好定係有柯打先燒，如果係有柯打先燒咁就真係要叫佢辣耐啲先得，啲油花燒過香好多嫁嘛。本來對呢間拉麵店無咩期待，畢竟佢係連鎖式經營好難有驚喜，雖然有啲瑕疵不過佢都算係令我滿意，係偏遠嘅將軍澳區嚟講唔排除佢會係做得最好果間。…Read More

打開FB就見到Openrice介紹將軍澳新開拉麵店，原來係都有啲名氣嘅俺流塩らーめん，見佢新張期內有蜆肉拉麵，呢個口味少有喎，就搵個晏晝去試。舖頭雖然喺商場二樓佔地亦唔大，不過完全開放式設計睇落更加開揚有空間感。雖然肯定會揀蜆肉拉麵，不過都要睇下其他口味嘅。呢度主打鹽味湯底，同香港主流豬骨湯底係兩回事，所以呢度嘅拉麵口味睇落都係走清淡路線，好似紫蘇啊柚子啊都係極少見佢配豬骨湯底呢類濃郁湯底，價錢喺香港嚟講都唔算貴。另外見到個芝士辛辣拉麵，成件事真係好邪惡。可能因為蜆係要即場煮，感覺上等候時間比一般拉麵為長。啲蜆喺碗麵上面堆咗個小山，賣相都唔錯。湯底呈乳白色，明顯佢有豬骨湯喺入面，但飲落去味道幾清淡唔覺得好味精，而且隱約飲到蜆嘅清甜，食完唔會感到口乾，我就幾鍾意個湯底嘅。佢哋用嘅蜆肉都幾大隻飽滿，大過五蚊銀，雖然稱唔上鮮甜但就好有咬口，而且蜆嘅數目亦唔少，值得讚嘅。敗筆就喺個麵底度，明明叫咗硬身麵食落一啲都唔覺得係硬身，亦都有啲鹼水味但幸好唔算強，入口又唔夠彈牙，個感覺真係覺得食緊味精拉麵個麵餅⋯同埋個湯碗做得比較淺，所以啲麵壓到好死實，一夾就成大團麵夾上到極重，夾到我手痛都未夾到一小撮麵，陰功。以限定品個價錢其實會有更好選擇，好在佢常規拉麵個價唔貴加上湯底少見，同時呢區又比較少拉麵店，相信都可以喺度站得住陣腳。…Read More

所謂三軍未動糧草先行，識咗十年嘅好兄弟話要請我食飯賀我唔使揸兜，有得做大爺梗係奉陪啦，全盤佢話事我等食，揀呢間嘅原因佢話個名夠誘人喎，果然大家都係男人。個場嘅位置雖則都係尖東好易去，不過都兜咗一圈先搵到，個招牌又真係唔太顯眼。門口見到外賣自取個價錢都幾吸引，唔知好唔好食。入到去會見到啲魚，感覺比放一片片嘅魚生新鮮得多。喺尖東開餐廳做埋酒吧都係好平常嘅事，賣酒水比賣食物仲好搵啊。既然呢間餐廳食日本野，餐牌用返日式繪畫都係好合理嘅。先嚟個沙律清清腸胃，見佢個蟹肉蟹籽沙律寫明係用QB sauce而唔係mayo，姐係由卡夫奇妙醬變成日本用料？就睇下有咩特別。個沙律份量就較少，慶幸佢無加大量嘅QB醬落去，好驚啲餐廳落大量沙律醬然後啲菜出水變晒白濁液，呢度嘅沙律就無呢個問題。雖然蟹肉份量唔多，個兜亦令我有啲密集恐懼，起碼啲沙律菜夠清爽唔會老，合格有餘。麻甩佬聚會肯定有酒，見到日式四極呢個名就相當有趣，究竟有邊四極？睇返材料有抹茶、冧酒、wasabi、清酒、菠蘿汁同毛豆，夾得埋嫁？係時候要冒險喇。倒出嚟果然係泛綠色，聞落去已經有wasabi味，不過飲落又唔辣喎，首先會感受到wasabi嘅辛，之後會有菠蘿嘅甜，同時帶鹹甜感覺又唔差，有驚喜喎！劍魚腩刺身就食得多，用嚟做香茅橙汁劍魚腩？會唔會晒咗啲材料嫁？睇相片佢個做法接近泰式，侍應話啲劍魚腩浸過檸檬汁加橙汁，食落去又真係酸酸甜甜幾醒胃。同刺身比煮過嘅劍魚腩少咗啲爽口但滑溜依然，加上香茅炸蒜等材料又幾香口。原之味火焰卷有幾火焰？我仲以為係好辣，原來餐廳係碟嘅兩旁加咗易燃液體，然後點火，呃like一流。材料除咗面頭舊火炙三文魚仲有辣味吞拿魚做餡，更有魚子醬，食落辣度唔高但個味就幾出，不過就有啲掩蓋咗三文魚同吞拿魚嘅鮮味。日本餐廳叫刺身是常識吧？小小地揀咗個最平嘅刺身拼盤，上枱嘅刺身同餐牌寫嘅有出入，用料好似升咗級，既然佢畀得我我就真係唔客氣喇。最前面嘅係鰹魚刺身，香港就比較少見，食落去似鯖魚秋刀魚咁味道帶微甘，肉質較綿軟，平時食慣鰹魚乾，估唔到刺身味道都唔錯。甜蝦同油甘魚鮮美；帶子味道清甜，口感結實彈牙。最值得一提係件拖羅，嫩滑之餘仲入口即融，實在令人感動。最近藜麥相當盛行，但我仲未食過只知佢又係咩健康食品（通常健康等於唔好食），見到佢有海膽藜麥意粉，斷估有海膽味道差極有限掛，可以一戰。個意粉用咗扁意粉，就更能夠掛醬汁。意粉食落去就相當濃郁夠鹹香，似乎係用咗日本嘅海膽醬做醬汁，當年我都靠佢嚟送白飯慳錢。不過有一個唔好處，就係令原條嘅海膽嘅甜味唔夠突出。見到呢個藍莓鴨肝柚子雪葩咁奇特嘅組合，真係好難唔柯打一客，話晒都係兩個極端嘅食物，夾得埋嫁？唔食唔知原來真係得，煎咗嘅鴨肝其實唔算肥膩，而且外層仲保持到香脆，柚子雪葩自然係清新怡人，兩者都可以入口即融成一體，呢個正反兩極鹹甜組合非常出色，我同朋友都由黑人問號變成感歎號。未入嚟之前以為呢度只係賣大路日本菜，估唔到佢係賣創新口味，更估唔到佢又真係做得唔差，個鴨肝雪葩都真係大膽得嚟又好食真係城市驚喜﹗…Read More

一年之中總會去車公廟同車公吹下水，但通常拜完就行去沙田又或者出旺角搵食兼返歸， 今次就試下喺大圍搵食發掘新嘢。查查下見到原來呢頭都有唔少冬菇亭熟食亭，而呢間號稱係全港第一間冬菇亭賣日本料理，偽日本人當然要去會一會佢。舖頭出面就係美林巴士總站，一出去就有巴士出觀塘，啱晒我。對冬菇亭嘅印象主要都係大牌檔，大概係普通乾淨同埋食小菜飲大啤，男人嘅浪漫咁嘅格局。呢度似乎開咗唔耐，睇落地方就幾整齊，大圓枱吧枱卡位都有，一家大細嚟又得，情侶偷食…呀唔係，搵食都唔失禮。我哋得兩個人自然睇下有無二人套餐食啦，佢有三款二人套餐，睇落就相當豐盛，而且下面寫住免加一添， 不過近期手頭緊都係慳住食好啲。然後我睇中咗呢個自選配搭晚餐，選擇都幾多而且仲可以加小食，價錢又唔貴。朋友想食忌廉蟹肉薯餅我又啱，我想食餃子佢又吔，見張點菜紙無寫只可以加一客，膽粗粗點晒兩款兩客，得咗，實係車公保佑。小食當然會上枱先啦，忌廉蟹肉薯餅同餃子我就點都唔信係舖頭自己整嘅，但呢個唔重要，最緊要佢夠熱辣辣，薯餅外脆內軟，餃子亦香脆飽滿，入貨嘅水準都唔錯，食得過。喺咁多款丼飯中其實我想揀雲丹丼飯同油甘魚飯，但哪有錢？就淨係揀咗香蔥油甘魚飯，希望唔會揀錯。個丼飯一上枱就知無死錯人，油甘魚可以見到泛出油光，魚生片切得夠厚身之餘仲有五片之多，以呢個價錢就真係相當抵食。油甘魚味道鮮甜肉質細嫩，白飯軟硬適中外仲加咗唔少飯素，有良心呀。朋友就點咗個蟹丼，就咁睇條小蟹柳都幾似蟹腳，不過佢始終都係扮晒蟹。唔計蟹柳其實個飯都充滿咗蟹肉同蟹籽，佔咗碗飯嘅三分一，但講到味道就唔及最珍貴嘅松葉蟹膏，清甜鮮味得嚟唔會帶腥味，成碗飯嘅精華所在啊﹗原條嘅燒魷魚筒有我前臂咁長，夠大隻。魷魚爽口彈牙唔會霉，而且醬汁量點到即此，味道亦唔會太濃郁，可以食到魷魚原有嘅鹹鮮，加多杯啤酒就更好喇﹗如果話冬菇亭搵到中式正嘢無人會意外，呢間據稱第一檔冬菇亭日本菜嘅驚喜就夠大喇，以呢個質素係旺區食相信都要貴返兩成先抵返租金。…Read More

自己對韓國其實無咩好感，唯二鍾意嘅係韓國菜同韓國菜（自行理解），尤其喺英國嘅日式燒肉唔常見，韓式燒肉就成為咗代替品，食得仲密過喺香港果陣。呢間舖雖然旺角都有分店，不過旺角估計人多難等位，就走去樂富呢邊，屋村地方應該坐得舒服啲又唔使咁趕。果然就算正值晚飯時間，都可以順利walk in有位，如果係旺角要等卡位真係睇吓時運高唔高。即刻睇個餐牌，見到有二人同三人套餐，睇落又唔算貴，不過裡面無燒肉都係散叫啱我啲。 我係好鍾意食燒牛舌，所以叫咗客，呢度嘅牛舌係薄切版，個人比較鍾意厚切多啲嘅老實講，不過以份量計佢咁多塊其實都幾抵。塊牛舌食落去唔係爽脆嘅口感，而係比較軟熟嫩滑，仿如食高級牛肉。作為港豬當然要食吓同類，佢有隻濟洲島黑毛豬五花腩，唔知又有咩唔同？睇見佢紋理分佈都幾平均，同時又無話太多肥膏，似乎唔錯。塊五花腩無經過醃制都幾大膽，證明佢對塊肉好有信心。食落果然無令我失望，肉香夠突出同時無膻味，有丹麥豬嘅感覺，少少油脂令味道更豐富，果然一分錢一分貨。喺愛丁堡食過韓國人開嘅餐廳，仲係米芝蓮級數嘅燜豬肋骨，熱辣辣食都OK，一凍咗甜到飛起，鬼佬就係鬼佬…返到嚟香港試返亞洲口味，就揀咗個細嘅紅燜牛肋骨。雖然係細Size但份量唔細，可以兩至三個人分。牛肋骨都幾大舊，嫌麻煩可以叫店員剪細舊易入口啲。牛肋骨肉食落就似長時間燜煮嘅牛腩，幾乎係入口即融，而且唔會得個甜字，加埋個汁夠我送幾碗白飯。無碳水化合物就唔會飽肚嘅，既然叫咗燒肉就唔揀石頭鍋飯避免熱氣，就揀水冷麵嚟食。冷麵嘅麵條幾滑溜，湯底帶酸夠醒胃，配燒肉食就可以消除油膩感再食多啲，亦啱晒夏天悶熱無胃口時食。食燒肉又無理由唔飲酒，但啤酒略嫌普通，燒酎唔係我杯酒，就試下隻韓國農酒。倒出嚟米白色，同日本嘅濁酒有啲相似，查一查原來農酒即係韓國濁酒，比我算中比我算中比我算中。農酒飲落去甜甜地，有啲似日本新年果陣飲嘅甘酒，酒精度就比甘酒高，不過無咩酒味適合氹女仔飲。喺拉絲芝士炸雞部隊鍋充斥嘅年代，食返啲正常嘅韓菜係件愉快嘅事，而且水準都幾好。食到差唔多準備埋單去食甜品之際，阿姐遞咗盤橙過嚟，雖然只係值十元八塊，但又估你唔到喎。…Read More

我諗喺香港地，老夫子算係人所皆知嘅卡通人物，知道佢開咗餐廳就自然好想去，耐人尋味下都好呀。一上到去都估到會有好大隻老夫子喺度恭候大家， 咁啱到咗萬聖節仲有萬聖節版本添。舖頭外仲見到啲老夫子公仔可以購買，隻大番薯都真係幾得意，之不過我又唔想抱住個老男人瞓覺囉，就算要抱都抱陳小姐下話。內部嘅裝修都幾現代化，如果唔係用老夫子，而係一啲現代藝術畫作，我估大家都以為係高檔西餐廳。你咁樣望住我會唔好意思食嘢囉～另外有一間好大嘅房畀一班角色包圍，睇到有啲眼花添。仲有架好啱小朋友坐嘅車型餐區，隔開班小魔怪一流呀﹗係時候叫嘢食，個餐牌都係老夫子嘅嘜頭，果然係主題餐廳。另外萬聖節自然有應節嘅菜式啦。 揭開餐牌第一件事係搵下耐人尋味喺邊同係咩，原來佢係瑞士汁乳鴿一隻，究竟兩者有咩關係呢？實在係耐人尋味。其他菜式名同食材一樣近乎完全無關係，純粹玩味性質，當學下四字成語吧。 先叫杯嘢飲，呢杯係道高一尺（秦先生玩意：菠蘿黑鑽石特飲），咁其實黑鑽石即係涼粉，雪碧菠蘿涼粉飲落唔會有咩特別，但有大大個棉花糖喺上面，呃吓like係唔錯嘅。叫坐享其成嘅瑞士汁牛河，同干炒牛河唔同，瑞士汁牛河屬於濕炒河，其實我就鍾意干炒牛河多啲嘅，但瑞士汁又真係港式西餐風格，打和啦super。佢瑞士汁嘅量我覺得多咗少少，但味道甜就唔會難入口，同埋都幾大兜河粉，菜心大條及清甜無渣，牛肉份量亦唔少食落唔會柴口，唔錯啦。身為食肉獸唔會食碟牛河就飽肚，食返塊扒先啦，叫入木三分嘅精選西冷牛扒，相當大塊同厚身，叫咗五成熟亦都做得到唔生唔熟，食落去幾嫩口唔會韌或者有筋，唯一唔好係肉味稍淡，個人比較重口味無辦法。叫百發百中嘅法國焗田螺，見佢無咗個殼，同埋以價錢嚟計田螺就應該係罐頭喇，不過佢有個蘑菇喺底，睇落又有啲似田螺殼，咁嘅做法幾細心我幾欣賞。田螺唔會太細隻，鹹鹹哋配埋蘑菇嘅清甜都幾夾，不過我個重點完全放咗係底下薯蓉度，牛油焗薯蓉嘅惹味真係以行動證明係做好。埋尾唔少得甜品，叫得意忘形嘅香橙梳乎厘就夠晒大個，而且仲有老夫子喺上面添，不過因為係男人我就好捨得切開佢嚟食嘅。切開個梳乎厘睇吓，裡面做幾綿細嫁。食落去口感亦都一如外表夠鬆軟，味道又唔會太甜，裡面仲有啲橙皮添，水準唔錯。不過橙味就唔算太突出，可以落更多橙皮就更好啦。通常主題餐廳都係貴夾唔飽，有時啲裝修仲呃鬼你，不過呢度裝修就相當落本，另外以主題餐廳而言食物價錢算係公價，份量無話呃秤，食物質素亦合格，雖然會比普通餐廳稍貴一啲，但鍾意老夫子嘅人亦不妨嚟影相打卡。…Read More

又一個過江龍沾麵登陸香港，今次係好近我嘅觀塘區APM，一聽到個地方好熟口面，一望果然上手就係麵屋武藏，真係拿拿聲試咗先，唔係到時執咗笠就唔知點算，始終呢個位腳頭唔好啊。其實一開店嗰時，聽到個風評一般都有啲驚，尤其是上手令我勁失望，希望今次無事啦。本身喺下晝未到晚飯時間去到，但係沾麵賣清，要六點半先再供應，就周圍行下先。到差唔多六點半已經有人喺度排隊，好彩我得一個人好快就入到去。佢哋就唔係提供冰水，係熱辣辣嘅麥茶，不過我就唔著緊呢樣野，就算係日本有時都係比綠茶你飲。佢哋個廚房係開放式，可以睇到廚師煮麵，又可以乘機偷師。其實佢就有兩款沾麵，一款係普通嘅叉燒，另一款係豚角煮，價錢就相差無幾，咁梗係點豚角煮啦，肥膩好多嫁。聽講佢哋嘅餃子都幾出名，不過睇落份量都唔少，食完沾麵未必食得晒，就唔好浪費喇。亦都有唔同嘅小食，不過點解鱈魚係屬於空唔係海？因為都好多人同一時間點沾麵，所以都等左一陣，不過十零分鐘等得過嘅。首先試吓碗湯，餐牌到寫佢碗湯大概係六十度，食落果然唔算好熱，甚至我懷疑係咪真係有六十度，不過個沾汁的確係唔錯，味道唔會太鹹，豬骨同醬油味平衡得唔錯，飲落去唔會好漿喉，細心啲品嚐甚至會食到啲甜味。麵條亦幾又有咬口，而且冇乜鹼水味，但我會鍾意佢再硬身啲，或者係太多柯打一齊落影響到質素。細心啲睇麵條中間其實有條坑紋，店方話係方便將沾汁帶上麵條，增加咗表面面積更易掛沾汁，呢點我同意嘅。豚角煮夠肥美已經可以加分，食落去有味噌同薑嘅味道，肥得嚟有少少辣平衡返，帶甜之餘又有炭火嘅氣息，尤其係肥油同炭香混合係頂級享受，絕對係高水準作品。隻蛋就自己睇相喇，啲蛋黃流晒出嚟，隻蛋又夠滑溜，而且真係食到醬油香味，係掂喎。最後就梗係要加啲清湯落個沾汁度飲晒佢，佢個清湯其實係鰹魚汁，但鰹魚味略淡左啲，想飲濃湯就因應返自己嘅喜好加幾多鰹魚汁喇，不過個清湯一樣唔算太熱，可能有啲人就唔太鍾意，我就係其中之一。一開始因為聽到個風評就唔抱太大期望，但食落去完全係喜出望外，如果佢能夠保持到今次嘅水準，我諗佢會喺香港沾麵嘅頭幾名，不過佢嘅份量少咗啲，只係去到我六七分飽。…Read More