kevinleebr's Profile

其實呢間小店都開咗有一段時間，一直都無意欲去試，老實講，心裡面成日都會覺得，響葵涌廣場呢種地方開漢堡薄餅店，做出嚟呃下細路就得，邊會好食㗎?! 點知試過一次之後，足以完全改觀!!寫呢篇食評當日其實係第二次食啦。水準保持得好好，價錢亦無變。本來今日無諗住要食Burger咁heavy，其實呢個都係臨時改變嘅決定，但只係食第一啖就知道決定無錯。今日點咗個L3 set，澳洲穀飼牛漢堡配薯條及薑檸水。買票後坐低就得，佢哋會送過嚟俾你。好快就俾咗杯薑檸水俾我先，記得上次飲過佢嘅薑檸水，覺得好淡唔夠甜，今次就真係剛剛好，抵讚。大約等多五分鐘多啲，個漢堡都送到嚟啦。睇見個高度就嚇親，但按一下個包就知道係幾咁鬆軟，由於個包有烘過，所以熱熱地，又軟又香真係加晒分，好在我口大，第一啖咬落去，食得出件厚漢堡牛肉非常重嘅牛味，超正，剛剛熟嘅牛肉非常juicy，肉汁沿住個包一路流落嚟。而更值得加分嘅係牛肉上面有塊燒過嘅芝士，煙煙韌韌，配上新鮮蕃茄，生菜，同埋燒蘑菇，呢個漢堡肯定係葵芳最好食嘅漢堡。薯條亦係新鮮即炸，唔會有油益味，不過薯條份量比較少，我覺得可以再多少少。食完個好味嘅午餐真係人都開心啲呀!…Read More

屬於美式意菜餐廳嘅Pepino，最初可能俾人覺得美式嘅一定會係好大份，總之就係以份量塞飽你，但其實Pepino嘅菜式做得相當精緻。餐廳入口其實比較奇怪，因為要穿過自助餐餐廳先可以嚟到，最初都唔知點去，要問咗自助餐餐廳員工先知道。入到Pepino, 裝修同外面有好大對比，因為入到去真係覺得好有意大利風情。侍應安排我哋到窗邊坐，位置相當光猛，可以一邊食飯一邊望下街景，感覺好開揚。好，係時候要點菜啦，今日試吓Set Lunch，但唔好睇佢係Set Lunch,其實真係做得相當精緻，賣相亦相當討好，睇下啲相就知道。頭盤: 係Mozzarella芝士配蕃茄及羅勒葉。意大利食過，佢哋會將沙律蕃茄鋪底，上面放一球Mozzarella。而Pepino嘅做法就會切好晒蕃茄，夾羅勒及Mozzarella食，感覺會比較有層次，加上黑醋，絕對係畫龍點睛。主菜: 我點咗香煎三文魚扒配羅勒汁。三文魚煎得剛熟，唔會好老，輕輕用咗黑椒調味就已經足夠，配搭新鮮菠菜及薯蓉麵團搓成的配菜，相當滿足。甜品: 最後到甜品部份，今日係Tiramisu，口感相當幼滑，面頭嘅焦糖脆脆真係好好味。再配搭一杯熱咖啡，真係可以畫上完美嘅句號。差啲唔記得講，其實佢哋嘅餐前麵包都好好味，總共有四款，上枱時熱熱哋，搽牛油真係幾好食。如果我都係附近返工，間唔時嚟食個set lunch真係好囉!…Read More

夜晚八點幾行過電車路, 原本諗住同Babe去羅富記食個粥, 經過機利文新街口, 見到呢間Baraka既易拉架banner, 又有意粉pizza又有咖喱, 好似都好多選擇喎! 見到個banner上面既咖喱相, 我就開始有D流口水啦!! 咁不如今晚試下呢間野呀!Baraka呢個鋪位, 轉左手好多次, 以前響旁邊中環中心返工, 成日都落呢條街食飯, 呢個鋪位以前間餐廳簡直係食垃圾一樣, 而家就轉左做呢間小小印度咖喱餐廳. 鋪面好細, 只係放得落三張檯十二張椅, 去到門口既時候, 最近門口張檯係剛剛食完既, 見佢又食完羊膝又食完Roti咁, 好似好正喎, 咁我地就坐左入去第二張檯, 第三張檯就坐左一對夫婦, 成間鋪以為就坐滿晒啦, 後尾黎左個唔知係印尼人定係馬來人, 走左入黎之後就直接去左後面上左樓, 原來上面重有一層.夜晚佢有兩個set同埋A-la-carte, 咁我睇左價錢之後, 覺得都係set抵食, Set A係印度咖喱, 而set B係意粉Pizza等等, 咁黎得呢度, 當然係要食下佢D咖喱啦! Set A有炸魚薯條, Masala雞肉, 咖喱羊或者羊膝, 由於Babe唔食羊, 我惟有忍痛轉左佢做咖喱魚啦, 跟一碗飯同埋一塊Roti, 飲品可以選擇餐湯或者係汽水, 但係我地就加錢要左Mango Lassi, 最後重有個甜品Apple Crumble添炸魚薯條新鮮即炸, 炸魚剛剛好, 唔會乾晒, 好好味道, 薯條亦都好新鮮, 不過炸魚既份量就少左D, 太好味啦, 兩個人食真係唔多夠.Masala雞肉味道好好, 食過重慶大廈既咖喱王好多次, 都覺得幾好味, 但係呢度既水準不但止唔差, 我覺得係好過佢地添!咖喱魚呢款係乜野咖喱我都唔知啦, 係黃咖喱黎既, 魚塊份量比較少, 但味道幾好. 重有幾舊咖喱薯仔.Roti好新鮮, 好好味道, 佢係即時做架!!餐湯其實就係好似羅宋湯咁既雜菜湯, 由於有好多香料, 個湯其實係好好味道既!Mango Lassi值得加錢轉黎飲, 味道唔會太甜, 好香滑.Apple Crumble我地食完飯之後佢先至即時整架, 絕對係誠意之作, 蘋果係切片既, 上面再兩球雲呢拿雪糕, 兩個人食份量剛好.呢一晚食得好開心, 因為, 幾檯食客都一路食一路分享. 我地食食下, 就同旁邊對夫婦傾計, 佢地都好nice, 佢地又係第一次黎呢間餐廳, 由於佢地又係唔食羊, 所以轉左個咖喱蝦, 佢地都好滿意個晚飯呀! 後來, 旁邊黎多一對退左休既夫婦, 佢地都係叫左我地呢個餐, 但就無轉到任何野, 叫左個羊膝, 我多口講左句: "個羊膝都幾靚喎!", 跟住佢就誠意權權咁切左一塊羊膝俾我試啦, 我都拒絕唔黎, 真係唔多好意思呀!! 但係佢地又真係好客氣喎. 原來佢地都係第一次黎呢間, 見我地傾緊計, 講緊羊肉, 知道我好想食, 但係又無得叫, 所以就好客氣咁切左一塊俾我. 羊膝完全唔"蘇", 又唔會好鞋, 配埋佢個咖喱真係幾好食之後我地三檯客就一路食一路分享食經, 又講下邊度咖喱好食啦, 邊度食羊正宗, 呢餐晚飯食得好開心PS. 呢度可以添飯架!!!…Read More

以地點而論, 位處機場二號客運大樓, 對大部份人黎講的確係交通不便, 不過對於住響愉景灣既我, 去機場食飯不失為另一個好選擇. 向來呢區既韓國菜館就只有愉景灣既韓一館同埋東涌大食代入面既韓國菜, 自從Terminal 2開左之後, 呢區附近就多左好多食肆可以選擇, 舍廊居係其中一間. 呢間絕對係高質素既韓國餐廳, 輪環境, 向窗一邊座位外望terminal 2既停車場以及Mariott, 裝修簡約, 由於位處機場, 地點真係唔多就腳, 相信黎幫襯既都係東涌人比較多, 以及機場收工既人, 間唔中都有D準備上機既人會拖埋行李入黎食既, 所以基本上係唔使訂位, 入到去就有很坐.今晚order左個黑鱈魚湯以及一客牛肋骨. 黑鱈魚湯非常鮮美, 魚肉唔會煮到老, 份量足夠二人分享. 牛肋骨我地自己燒, 牛肉好鮮嫩, 入口即溶, 另外叫左兩個白飯, 兩個菜兩個飯, 二人份量剛剛好. 好坦白講, Terminal 2 咁少人, 我都好擔心佢地會捱唔住, 唔知幾時會支持唔住, 但如果佢真係要關門大吉, 咁我覺得係一個損失.…Read More

今時今日估唔到銅鑼灣重有D咁既質素既餐廳生存得到既?! 話說今晚我同女友諗唔到食乜, 於是去左金百利睇下, 佢就俾佢個傳單上面個所謂"Q版火焰雪山"甜品吸引左, 見佢個餐又唔係貴, 只係$88蚊就有湯, 田螺, 主菜加個甜品, 銅鑼灣區黎講都係平啦, 咁就上去試下啦. 一上到去已經唔對路, 門口無人不突止, 入到去又無人理, 我地見到有張四人枱咁咪坐埋去囉, 隔左好耐先至有個肥佬拎埋兩杯水同埋餐具及墊枱紙黎set 位, 連menu都無呀! 咁都算啦, 我地都係諗住照張傳單叫. 我就叫左個大蝦鵝肝牛柳, 我女友就叫左個帶子拼美國西冷. 我地問佢, 有無得要求幾多成熟架?! 佢就話, 無架, 廚房整出黎係咁就咁. 咁我地都算啦, 諗住牛柳差極都有限. 先黎兩個紅餐湯, 正如其它食家話齋, 唔熱架! 重要難飲到不得了. 個蒜蓉包脆過餅乾, 跟住到個主菜上場, 我第一次見識到乜野叫做鵝肝, 原來係同郵票差唔多大, 塊牛柳大約有0.7 - 0.8厘米厚左右, 唔怪之得唔需要理會幾多成熟啦, 配上一個酸酸地既怪汁, 我都唔知呢一碟野叫做乜. 我女朋友塊西冷亦都係完全熟晒, 但就厚過我既, 大約有1.5厘米厚, 配上同樣既汁, 兩件帶子, 雪藏貨色, 竟然可以做到完全無色澤, 乾到不得了. 餐飲我晨早叫左杯紅酒, 我女友叫左個雪糕涼粉冰, 我千請萬請, 我塊牛柳食完紅酒先至到, 呢杯紅酒亦係我人生第一次. 唔知係我無知定係挑剔, 杯紅酒係冰凍架!! 有無搞錯呀, 除左白酒之外, 我真係未試過飲冰凍既葡萄酒架, 個感覺真係好奇怪. 主菜食完, 先至上隻田螺, 都唔知係咪照過輻射, 隻田螺細得出奇, 個薯蓉唔熱既, 上面既芝士重有D變壞既味道. 到最後, 原本我女友好期待既Q版火焰雪糕上場, 個所謂火焰雪山, 上面俾火燒過既部份唔係啡色架, 係灰色架, 好似食緊衣紙咁. 最好食就係下面個雪糕, 好食都唔關佢事, 係牛奶公司既!埋單$194蚊, 我真係唔係好願俾. 服務差, 食物差, 環境亦差. 千其唔好去食呀!…Read More

o的o野食都唔錯，我可能好好彩，唔洗半粒鐘就可以入去食。先o黎一碟花生好好味，之後叫左個大千雞、？？四季豆、咕嚕肉，當然就重有個招牌擔擔麵啦。大千雞好好味，？？四季豆就略嫌大多油，咕嚕肉都唔錯，擔擔麵就好正，出面真係食唔到呢種麵。好可惜無凍豆漿，只有熱暖豆漿，但都飲得出的確新鮮。好食還好食，大家有無覺得個價錢太貴唔係好抵食呢？…Read More