Markcheng130's Profile

The Right Place全新午餐餐單，可以話係樣樣出色。已經多次幫襯，今日呢餐特別滿意，所以特地寫評論支持一下。招牌烤法式三黃雞(例) 配時令蔬菜單睇圖片，已經知道隻雞皮脆肉嫩。完全可以話係宣傳圖片與實物完全相符。三黃雞肉質嫩滑，有油脂香氣。即使外賣自取，已經唔係上枱即刻入口，依然是色香味俱全。燒雞本身係跟一碗白飯，但你可以request轉意粉。此店的意粉並非就咁用熱水烚熟就算，而是用蒜蓉炒香，相當惹味，同燒雞超夾！底下嘅蔬菜亦不要睇小，係認真炒香烹調過，食落爽口，並唔會因為伴碟而hea住交貨。呢點相當令人欣賞。跟餐南瓜湯，亦係綿滑好飲，質感creamy。除此之外，我食過幾次嘅黯然銷魂飯亦係非常優質，雖然無圖，不過大家信我，叉燒的確係肥瘦適中有焦香，比大多數燒臘鋪都更加有心思。…Read More

此店以希臘乳酪作招徠，在甜品店林立嘅香港地之中，算是略為罕見。廢話唔多，直接進入食評。火龍果芒果希臘乳酪芝士蛋糕味道：成件蛋糕味道最突出嘅係消化餅，之後係淡淡微酸嘅乳酪味，而水果味就排到最後最後，只有非常輕微的芒果香，幾近於無。火龍果味更是從頭到尾都沒有出現過，但火龍果本身就無咩味，呢點非戰之罪。口感：間店雖然強調希臘乳酪，但食落並無咩特別「乳酪feel」，同一般奶凍差不多。好多其他食評稱讚佢「輕盈綿滑」，呢一點我不否定。畢竟用咗希臘乳酪，自然會比純cream cheese輕盈啲。不過，如果賣到$88一件，都只得一句「輕盈綿滑」值得講，咁就真係好普通了。當你將乳酪芝士蛋糕連同兩層jelly一齊放入口中，你會明顯感受到jelly嘅質感，而乳酪嘅質感就不太有辨識度，導致每一口都好似食緊有乳酪味的jelly，再加上小小水果味的餘韻。餅底就是消化餅底，同市面上隨處可見嘅cheese cake餅底無分別，但由於乳酪味同水果味都不出眾，結果就是餅底喧賓奪主。賣相：整體都係紫色漸變，都幾養眼，芝士蛋糕同水果jelly層次分明，好睇。蛋糕上面有兩粒芒果，外表就同佢嘅味道一樣，唔生唔熟又唔甜，令件蛋糕外觀直接downgrade咗，一大敗筆。總結：不難食，但也不會特別好食。除咗外觀之外，成件食哂都無咩記憶點，製作技巧一般，無突出之處。$88一件regular slice，真係試一次就夠。…Read More

你以為你食緊炸豬扒蛋包飯，錯，你食緊嘅係租金炸豬扒蛋包飯，價格：$90蛋皮：口感尚算鬆軟，但無咩蛋香，水準非常一般。飯：睇落似茄汁雞肉粟米炒飯，但啲飯濕淋淋、痴笠笠，亦都無半點炒飯香。與其話炒飯，不如話係撈飯。至於雞肉同粟米份量更加是極少，幾近於無，茄汁味亦都好淡。豬扒：柴、乾、無肉味，除咗外皮算係脆，稱得上一無是處。成個餐就只有個沙律叫合格。如果你expect佢擁有其他食評嘅水平，你注定失望；如果你唔介意支援一下租金，歡迎幫襯。…Read More

見荳子出咗新菜式，咪幫襯下，結果中大伏。原條牛肋骨，真係得一條骨，同得個樣。 $244，一條硬掘掘、直筆甩一條骨。全部可食用嘅肉加起黎，不足2 Oz，依附喺條大骨上面。令我回想起中學讀文學讀莊子《庖丁解牛》。不過啲肉真心少，相信就算庖丁復生，都未必可以喺條骨度割出肉。 肉質一般，仲有咬唔開嘅筋膜，但肉味都OK濃(當你辛辛苦苦刮啲肉碎擺入口，一定feel到味道好濃，係濃濃嘅辛酸)。 最不知所謂嘅一點：個菜式頭三個字叫「啤酒烤」，但啲肉食落係完全無啤酒香。有啤酒味嘅係另外嘅一小兜啤酒燒汁，要撈黎食。既然肉還肉，汁還汁，就唔應該叫「啤酒烤」，應該叫「配啤酒汁」啦！ 至於芒果莎莎，淋咗喺條骨上面，無咩味道，食唔出明顯清香同鮮甜，亦凸顯唔到肉味，完全缺乏陪襯作用。 佢個上菜方式應該改成：啤酒燒汁趁熱淋上去，而凍嘅芒果莎莎就另上，咁就叫似樣少少。目前係完全不合理。 底下嘅雜菜數量不多，大概有4-5片青瓜、紅蘿蔔切成嘅薄片，薄薄捲起，無咩特別調味，勝在夠薄，如嫦娥羽衣輕薄，食落有秋天嘅味道：好似一陣西北風。 至於薯蓉，風格相當consistent，極少，都未認真食到咩味已經無哂。 成道菜得個樣，份量極少，味道一般，盛惠$244。好彩我無打針，外賣自取唔需要加一，賺咗嘻嘻👏！ 強烈奉勸：除非你想要佢條骨煲湯，或者你屋企隻狗想要舊骨頭咬下，否則千祈唔好買呢道菜！！！…Read More

Doraya以魚生刺身聞名，炸物亦有不俗的評價。我幫襯多次，其炸雞、炸蠔、吉列海鮮、雞皮餃子、拖羅、左口魚均令我感到滿意。今日，我經openrice外賣自取購買吉列豬扒便當，滿心以為豬扒應該與其他炸物有同樣水準，結果卻是大失所望。直接講重點，分享下對豬扒評價：肉質：明顯不算多汁，瘦肉偏多，脂肪少，引致口感較乾。雖然未至於韌同柴，但咬上去並非賞心樂事。肉味方面亦乏善足陳，沒有鮮美之感。食落似普通雪藏貨，感覺只比大X活稍佳。炸皮：的確很脆，而且厚度硬度適中，不會有割口之感。然而，當你咬開之後，炸皮就會主動與豬扒分離。情況是即時解體，上層炸皮、下層炸皮、豬扒本身，分散成3個獨立個體，猶如三國鼎足而立。以一間高級日式餐廳而言，此豬扒表現並不合格。再加上$128價格，性價比極低！食番普通午餐便當好過！另外一點令我不滿的是，Doraya味噌湯一直都有擺放菇類增加口感，是我欣賞的地方。但今日呢碗味噌湯居然無咗啲菇！！失望！！補充一點，我外賣自取取得食物之後，只用了5分鐘路程，便已就座開始享用食物。因此，時間對食物質素的影響微乎其微。…Read More

見佢自稱燒味至尊，咪買少少燒肉加餸囉，半斤60蚊。哇，返到屋企一打開盒，就知道中大伏，沙離篤黎嘅？一盒肉，得面個三四舊個樣勉強算係正常，底下全部瘦肉骨頭，慘不忍睹，真係攞去拜神都嫌樣衰。至於口感味道，都唔駛講啦，係質素係10蚊一斤果啲，唔新鮮、油膩、鹹到嘔。色香味皆無，我非常懷疑係斬料賣剩果啲，見人外賣自取就趁機搞掂。呢間嘢賣啲頭頭尾尾比人，唔抵食都算，職員服務態度又差，而且環境唔衛生，地下有油漬，唔推介！…Read More