食家勤's Profile

朋友介紹正宗印度咖喱，今日路經佐敦決定試一試。星期日既六點，一開門已經有兩枱外國客人，相當受外國人歡迎。木牆、沙發、 咕𠱸，加上員工態度友善、積極，坐得舒適之餘亦令整體感覺格外親切，無論兩個人定一班人都有氣氛又溫馨。點完餐之後員工就上左個胡椒餅做前菜開開胃，加上印度既辣汁特別野味！青檸梳打唔算特別，但係杯Mango Lassi味道濃郁、解辣一流不得不提既係佢既牛油雞同牛油薄餅！牛油雞除咗普通嘅咖喱同牛油之外嗰日加咗蕃茄味，整體感覺creamy、唔太辣、容易入口，加上鬆軟既牛油薄餅，配搭一絶！搞到就算食都飽飽地都仲想叫多碟下次一定要試下其他咖喱同薄餅嘅配搭！…Read More

行過見倒三色海膽飯半價就吸引左入去食，餐廳寬敞舒適，枱櫈新淨，除左沙發有啲唔夠深之外，裝修設計都幾好，日本餐廳黎講價錢合理，味道確實係幾好食。不過有三樣野要留意下。第一，雖然係半價，但係加一都係照計返原價。第二，單價過二百先可以碌卡。第三，個飯同poster就大細、海膽數量同其他料既量黎講都有幾明顯既分別。個人黎講我情願佢mark高少少價錢加一照計返半價既價錢，碌卡明白既但係poster 同個飯唔好差太遠🤦🏻‍♂️ 我都心滿意足嫁喇。宜家個飯既質素確實係幾好，但同預期始終有啲落差。食物值得推薦。…Read More

上次試業階段食完我愛慢煮一路都心思思想再食多次，咁啱朋友又想食慢煮就再次我愛慢煮😋今次餐廳重新換過餐牌，配上更多既選擇、更好既食材，就連餐牌既紙都換上更文青既紙質同排版，可見老闆既細心同精益求精既態度。值得一讚👍🏻US安格斯頂級西冷牛扒肉質比之前既更有口感。果然慢煮處理下牛肉既味道得以保留，全塊牛肉亦都均勻受熱、咬口一致連貫。最有驚喜既係48小時羊後膝肉質煮得非常腍，羊既味道濃郁得黎亦唔會太羶。炸蕃薯條番薯既甜味配上黑松露，互相配搭、更有特色，比一般普通既薯條高一個層次。芝士溫泉蛋大啡菇大啡菇配上溫泉蛋，水份充足、滑溜，加上適量既芝士同調味，豐富既口感同味道，放喺口中慢慢品嚐更加體會到佢既精細。澳洲檸檬青檸特飲甜中帶酸，非常配合同開胃。飲品略甜，喜歡甜既就一流！新鮮濃郁嘅荔枝味加上接骨木花既清新，可口解渴！餐廳創新用心，食物處理毫不馬虎，員工友善，確實係一間好既餐廳。推薦！…Read More

星期六晚六個人食，本身諗住叫個四人慢煮星級盛宴再加個二人慢煮套餐不過發覺啲野食太似就叫左個四人慢煮星級盛宴再另外叫啲小食，成個餐有慢煮肉眼牛排12安士，咸蛋黃炸大雞肶2隻，烤豬仔脾4支，西西里肉醫芝士焗意粉，美式搖搖海鮮盤，烤雜菜同1壺酒類或特飲。肉同埋薯菜一齊上，不論牛排、雞肶同豬仔脾全部都味道都非常之濃郁，就連配菜既紅蘿蔔都沾上左美味既肉汁。意粉除左好味既肉醬，上面仲鋪左層濃郁嘅溶芝士，好食！…Read More

有時鬧市中要搵間坐得舒服、食得開心既餐廳都唔係咁容易。下午茶時段路經美味小鮮肉就比佢有排場既門口吸引左入去享受一下。入到去空間寬敞、坐得舒服，足足有四十幾個位，中國特色擺設，完全唔似一般女人街既餐廳。各式潮州粉麵飯、小食，仲有不同火鍋配料，啱晒唔同人既口味！最後叫左個自家製潮洲牛丸、自家製潮洲豬肉餅河粉加凍檸茶。凍檸茶甜左少少可能落重左手，但茶底幾好味。飲管係獨立包裝，比一般茶餐廳、粉麵店衛生得多！湯底清甜可口，河粉有口感、唔會一夾就碎。豬肉餅同牛丸果然都係自家製既好，食得岀自家製既用心之餘亦有濃口既味道，確實係確好河粉！…Read More

銅鑼灣鬧市中一個充滿歐洲色彩既餐廳，除左擺設、沙發、街景之外，最鍾意就係佢既紅磚牆，特別有外國風味。飲品除左自助既蘋果汁、橙汁、氣水同茶之外，亦有歐洲啤酒、紅酒白酒、Cocktail，應有盡有。自助小食除左沙律、炸物、德國漬物同水果，仲有Cold Cut既意大利巴馬火腿、挪威煙燻三文魚、英國燻牛肉、英國火雞火腿同德國蘑菇火腿。Cold Cut既誠意小食媲美酒店既自助餐。自助餐亦可以另叫主打既脆爆鹹豬手同各種主菜，亦有其他小食。脆爆鹹豬手果然名不虛傳，皮脆有口感，鹹味強烈得黎亦唔會太重味，可以多叫多食！芝士卡邦尼意粉味道有啲淡，略嫌芝士味不足63度溫泉蛋配黑松露醬，一啖放落口全口充滿濃郁既蛋黃味加上嫩滑既口感，加上黑松露醫配合少量既鹽，彌補左普通溫泉蛋味道單調既不足，好食！忌廉芝士蘑菇釀雞翼都值得一提，雖然睇落普通，但加上不同既調味，一口咬落去嫩滑得黎味道豐富！𣎴同種類既腸，真正歐洲風情。西班牙海鮮燴飯配檸檬汁，開胃開胃！三款微辣既串燒，非常惹味！整體唔算多款式既食物但係款款都精心製作，自助餐大吃大喝一流！…Read More

牛扒好多地方都有，不過好既牛扒就唔係度度都有。一直想去普慶坊既我愛慢煮試一試，點知就已經喺附近開埋分店！上環地鐵站一岀行兩分鐘已經見倒我愛慢煮四隻大字，非常方便、易搵！目前雖然仲係試業階段，但係一般既套餐，包括牛扒、肉眼、烤雞、長通粉、薄餅等等已經齊全。飲品除左咖啡同茶之外亦有特飲同手工啤，啱晒唔同人既口味。黎得我愛慢煮就緊係試牛扒啦！好快我同朋友就揀左平鐵牛扒配牛油卡真辣蝦仁同平肩胛肉眼扒配食煙三文魚溫泉蛋大啡菇。另外仲叫左青檸薄荷特飲同熱情水果特飲。一般既青檸薄荷特飲，一係就太多氣、一係就太酸，但係呢杯清甜得黎亦都唔會無青檸既味道連氣都恰到好處，係難得我滿足既特飲。熱情水果特飲我朋友就話飲落似芒果多啲，不過整體都有濃郁既水果味，好味！標準既沙律前菜，可口。脆薯條配黑松露，絶配！經過慢煮處理，牛肉既紋理得以保留，肉質更加比一般煮法嫩口同入味，加上適當既調味，更帶岀肉味既濃郁，一絶！煙三文魚溫泉蛋大啡菇一啖食落去三種食材既味道相互交雜，非常豐富既口感同味道！牛油卡真辣蝦仁，蝦仁既味道比較淡不過調味做得岀色，食落都非常可口。鋪頭位置唔多，不過坐得舒服，三五知己享受個豐盛既晚餐係一流既選擇！…Read More

星期三中午板上Griddle，食飯時間比較早，有大量空位，唔洗等。餐牌上多唔同種類既鐵板餐亦有啲比較標準既午市套餐。最後就揀左個青魚飯，有中華沙律同粟米做配菜，再加野飲，標準配套。青魚既味道唔算非常特岀，不過以份量黎講就十分滿足。起初喺到諗點解咁標準既日本餐無配湯呢，原來湯係自助式，可以岀去任拎，而且白飯亦都可以自己添加，簡直係大食人既恩物！$50黎講都算係個唔錯既選擇，下一次一定試下佢既鐵板餐！…Read More

星期六中午約左去朋友屋企，諗住附近食完野就去，就喺呢個時候朋友就提議仲強烈推介食粥，以為佢講笑，原來係認真，就半信半疑咁行去十大粥麵專家。去到都幾爆，好彩啱啱好有位，一睇都只係覺得係間裝修比較靚既粥麵店，以為會貴原來一碗粥都係$35左右，咁就叫左碗皮蛋瘦肉粥加支豆漿都係四十幾蚊。碗粥黎到，一試，我終於明白點解朋友強烈推介，皮蛋同瘦肉互相配合、唔會遮蓋左大家既味道，粥入味之餘亦唔覺有味精既味道，食過咁多皮蛋瘦肉粥，我唔敢講係最好食，大過我心目中既十大一定有佢份！超抵食！…Read More

星期三一時慶起想食餐豐盛啲既就惡左旺角韓牛食任食韓式燒烤，結果我個朋友就咁比我拉埋一齊食星期三晚唔洗等位，不過都有半滿。地方都算大，枱有足夠空間擺野食，唔驚唔夠位擺野食。食物方面真係有好多種類，不論冷盤熱食生肉野飮定甜品，基本上應有盡有，refill既速度亦唔慢，唔洗驚你心宜既野物比人拎晒要等。雖然係咁，感覺上食物既質素唔算太好，如果想食得便食得食飽選擇多，絶對可以一試。不過如果追求食物質素就要諗下喇。…Read More

星期五晚去開銅鑼灣又想食日本野就同左一眾既朋友去左大户屋，原來以為要等好耐，最後好好彩地都係等左大約五分鐘就入得。餐廳日式以木為主既裝修，燈光充足，入互去特別有精神，食飯都開心啲個人覺得大户屋都係間既標準既日本餐廳，基本上一啲日本大路既選擇都有。咁啱食嗰日就係除左魚生飯之外又想食少少蕎麥麵，大户屋就滿足晒我既需求喇。佢地既餐都係基本配套樣樣足，湯、前菜同主食等等。雖然我既餐係魚生飯加蕎麥麵，但係兩樣主食既份量一啲都唔少，味道都有咁上下水準。正！…Read More

去尖沙咀睇戲前食個早啲既晚餐，搵左搵就去左DK Bar & Restaurant。六點半倒時間尚早無乜人，環境舒服，最啱做左成日野想放鬆下食個飯去。入座後一黎就比左碗蝦片比我地，微辣、脆卜卜，非常之可口，我不停食、佢不停refill，人生一樂也！回歸正題，野食揀左杯refresher、burger同卡邦尼意粉，野飲清甜、burger做得精緻味道老不錯，卡邦尼意粉味道濃郁，不過略嫌少少膩。整體感覺不錯，可再食！…Read More

今次想食粉麵類既午餐，搵左搵發現做越南野既芯越。十二點半左右行到門口岀面排左四五班人，都係直接叫個外賣拎走食快捷啲。睇餐單見倒午餐同下午茶賣既野差唔多但係下午茶就平$5$6左右。最後揀左扎肉雞絲撈檬，感覺上配料切得太粗，食落既口感好似食檬粉而配料就好似平時既餸咁，同撈檬既撈字有啲唔相襯。另外，不論係扎肉定撈檬個汁都係太咸，食落無酸味就得個咸，連平常食得重味既我都覺得有少少太多。份量足既，食完飽肚，不過如果可以改善一下就好喇。…Read More

其實觀塘食飯真係好多選擇，不過就要左搵右搵，除左商場、地鋪，其他基本上都喺大廈裏面。今次就揀左台灣餐廳哈豆，都係大廈既餐廳，上到去見太多人排隊就外賣算。餐廳環境裝修用心，人多地方細但枱櫈既擺放拎地方睇落唔算太擁擠。食物方面叫左個香腸肉燥飯，份量都算充足、比一般肉燥飯大，料亦都足，除左基本台灣腸、肉燥，亦都有菜同半隻蛋，台灣腸上另外加左少少碎令到成個飯味道豐富外口碎都有唔同層次。今次無叫野飲，下次可以試埋。…Read More

想簡單食個便飯經過見倒牛什，餐廳半滿就入左去。選擇就係平時見既粉麵飯嗰啲，最後都係普普通通咁揀左個牛腩飯食。牛腩量都算多，仲有少量既菜，成個飯簡直係標準配套。一開頭以為呢類型既餐廳牛腩飯都係咁上下，不過佢岀奇地幾好味，牛肉炆得軟熟又入味，食落口感唔錯，呢個價錢呢個味道，我心滿意足。不過有樣唔好就係啲快子同傳統茶餐廳一樣都係放喺個筒入面，而個筒放左幾耐又係無人知，衛生真係差少少，隔離枱成個筒都污糟但員工見怪不怪理都無理。…Read More