chiuchiuchiuchiu's Profile

匆匆忙忙約食除夕飯，見呢間喺女人街地點方便，而且OpenRice 有得訂座，就揀定呢間。雖然無影餐廳環境相，但係好有特色，加上食物，好有大排檔feel。屋村三鮮：有雞腎、墨魚、豬腸，好有「肥姐」味道，讚！侍應哥哥highlight 「瑤柱」招牌走地雞，有兩個醬，一個類似泰式醬，另一個係蔥油醬，我比較鍾意蔥油醬。雞係滑嘅，唔點醬都夠味。淮山杞子螺頭湯：侍應哥哥話係每日限量，我地4個人，每人飲左3碗，抵飲又好味！ 我朋友想飲杏汁豬肺湯，但我麻麻，我諗佢會再黎試。黑松露蝦多士：脆！連個沙律醬都係撈左黑松露。羊腩煲：今年都好似無凍過，第一次食羊腩煲！羊有少少羶味，夠冧，仲包一碟生菜。…Read More

大部份丼鋪都閒閒地賣百幾二百蚊，呢度啲價位係散叫百幾蚊、lunch set就六十幾至百鬆啲，齋睇價錢平過好多丼鋪。一坐低，奉上麵豉湯，俾我睇住餐牌飲，但冷氣有啲大，碗湯好快凍左。上丼時， 亦上埋一小碗前菜關東煮，hea hea 地都開心。價錢平左，份量細啲是常識吧，正正岩哂啲女士或者要控制食量啲人士。我地分別叫左火炙三色丼、三色丼同和風牛肉丼。刺身丼最緊要新鮮，呢兩個刺身丼唔可以話驚為天人嘅新鮮，但價錢黎講都已經合格。反而餐牌話必食嘅牛肉飯，朋友嫌佢無汁咁款，要求加汁先食到。而為食嘅我見隔離檯散叫嘅海蜇，份量超滿，我地都叫埋，仲加配芝士年糕。最後，仲有甜品雪米磁完結。另，朋友好滿意店內播嘅日本歌，首首都大熱好聽，讚有品味。…Read More

邊爐lover上次過門不入，今次open rice 訂座，超期待，點知愈期待愈失望。地點喺海運，所以最滿意係個海景，而笑位係不時有人喺外面推垃圾桶。亦因爲地點，都預左貴，預左份量精緻，每人埋單近6舊！不過，服務同食物嘅 CP值好低。諗住叫嘅野好多都無，最失望係無台灣特色嘅豆皮。餐牌有5款滑，諗住叫鮑魚滑同溫體牛滑，叫果陣話得鮑魚滑同蟹滑。叫左鮑魚滑，食到中途醒起未黎，追單先話無鮑魚滑，唯有試蟹滑，但都係要追單先黎。加上佢話無溫體牛滑，但佢有貴3倍嘅溫體牛片，條氣chok住。蔬菜選擇超大路，簡直世界級normal，完全唔覺食緊台式火鍋。仲要呢個價位，我唔expect 係加水唔係加湯囉服務方面，明白哥仔好多碟執，成手都係，但執到漏哂水，檯同地濕左都無理。食完呢餐真係令人想買機票去台灣食！…Read More

之前有朋友食過好推介，趁除夕約班朋友去試下！有朋友事業心重，又有朋友嘅老細唔識趣5點半先話開會，等左個幾鐘先齊人。但鋪頭好好，無催我地，我地等嘅時候，叫左個椒鹽白飯魚，無影相，好味偏辣，即刻叫埋啤酒。終於等齊人，先黎刺身併盤。算新鮮，係象拔蚌有一半有啲腥。刺身後，就係一輪蒸海鮮，元貝好厚肉，讚！另外有兩款蜆，珍珠蜆同石頭蜆，其中一隻珍珠蜆有沙，同阿姐講即刻換過隻俾我地。而石頭蜆就被阿姐形容佢比較頑皮嘅石頭，好同意，因為蒸左3轉先全部開哂。海蝦、鮑魚同蟶子係正嘅，但蟹先係最不得了，爆膏！厚肉！鮮甜！I love it! 再黎係蟲草花蒸雞烏冬底，又一邪惡之物，蒸左啲雞油出黎，再撈勻烏冬。烏冬偏重口味，蒸雞非常好食！食完邪惡野，食返啲菜清清，仲有少有拎黎蒸嘅馬友，我個人對魚麻麻無食到，朋友就話少少腥。經各樣海鮮精華加上兩個蟹蓋蟹膏，個粥超級好味！甜到有奶黃味！飽住都每人食左兩碗！ 2018 大滿足完結！另外，如果全檯人like 同share 鋪頭FB，有得轉一次幸運輪，我地只贏左兩支啤酒，隔離檯就正啦，獎左隻龍蝦呀！…Read More

12月女團生日會去呢度食。訂位時，因我地有8個人，要先落訂留位，另外，因為有人下星期生日，喺頭7尾7生日黎食，有哈根雪糕火鍋送！超開心！ 講返主食，刺身無得輸！吞拿魚係拖羅，蝦有甜蝦同牡丹蝦，帶子同其他北寄貝、螺、希靈魚都好新鮮，我地叫左 3 round，都係第一round最好，另外兩 round 有啲冰。 呢度仲有比較少有嘅醉鮑魚同花膠，但都好一般。手卷要喺出面buffet station 拎，每人每次可拎2個手卷。海膽手卷係mini版，味道幾好，又唔會浪費我啲quota。但唔記得影相。另外叫左啲特色迷你飯，但麻麻地。薄燒和牛係推介！必食！熟成岩岩好！天婦羅都幾多選擇，上檯仲熱熱地，唔錯。甜品種種好多，女生至愛！…Read More

之前喺呢度飲過茶，服務係正常嘅，食物質素中上嘅。我見呢度promote 中秋圍餐，就預早一星期同家人食中秋晚飯。 之前訂左檯，講左話食 1988個餐，但無要求落訂。一行7大兩小坐低叫呢個餐，侍應阿姐話乳豬沒哂，要轉燒鵝，我有屋企人岩岩做完手術有傷口，唔食得燒鵝，R佢送碟例牌叉燒，原本阿姐話唔得，再同另一個應該高級啲嘅阿姐就話可以送，我地就話咁起菜。點知轉個頭，侍應阿姐又走黎話連燒鵝都無，要轉小菜，我地一檯人起鬨，即刻話乳豬全體變小菜？！價錢差好遠喎！阿姐又走開左，無講轉咩小菜定再轉其他野。我地只係開左茶，未開汽水，所以決定拉隊走人，高級阿姐同疑似經理喺門口出現了解，我媽仲同佢up左一輪，經理又話俾返乳豬我地！！痴綫！又話賣哂！唔係熟客啫，咩玩法？我接受唔到囉！堅持say good bye!全場其實唔爆，約7成客，我唔明點解可以咁。雖然我喺呢度食左呢餐，我都好想寫低呢份食評。…Read More

幫朋友上屋搬下屋，雖然未搬哂都算大成功。朋友請我地黎呢度食晚飯。平時呢間金坊超級多人，就算訂左位都要等，但今日喺山竹前夕，即刻有位，唔駛等！仲有吉檯！我地三人行叫左三餸一湯，同野飲。我request食蝦餅，所以朋友叫泰式拼盤，有齊蝦餅、魚餅、香葉包雞、春卷，岩哂我地呢啲貪心豬s海鮮炒粉絲，我地嫌粉絲少太多海鮮，真係賤骨頭。冬蔭公滾住，愈飲愈辣，多料！每人都可以飲到2-3碗。南瓜咖哩海鮮，原個南瓜上！呢個咖哩點蒜蓉包一流！…Read More

同荃灣之友有飯局，梗係叫佢搵食咩，就揀左呢間韓國小店試下。 身為餓底嘅我地，都叫左唔少野，不過無做大嘥鬼，做左大size鬼，飽到呢。原本諗住我地兩個都想試蝶豆花芒果奶，臨叫果陣突然預感個奶係咪椰奶，好彩問一問，討厭椰奶嘅我即刻轉香橙芒果疏打。蝶豆花芒果奶上檯時，配堆一小杯芒果汁，有小小心思。主食方面，我地叫左：大韓無骨豬手，配埋泡菜、醃蘿白包生菜食，個韓式醬有啲唔同，有少少南乳味感覺。講真豬手好普通，唔識有幾大韓。海蜆大醬湯，目測湯嘅顏色以為好辣，飲落只係微辣，蜆好大隻，得一隻無開口，豆腐大舊，翠玉瓜偏少。三式手工韓閣水餃，有小牛排、泡菜同炒絲豬肉，每款3隻，共9隻都幾多，都係普通、合格咁啦。海鮮煎餅，原本係鐵板上，但我地坐面壁位，檯太細，野食又多，阿姐好快反應幫我地轉個碟。個煎餅算多料，佢配左蛋黃醬，但我覺到配佢檯上支辣醬仲岩食。總括黎講，啲野食唔伏，但無驚喜，一試無妨嘅。…Read More

T同學素愛日本，生日飯就同佢黎食日本野。成棟太子珠寶大廈都有好幾間食肆，要排隊等lift, 但條龍唔算長時間可接受。餐廳環境好日本，半開放式廚房。啲檯都幾密，其中幾張檯喺落地玻璃窗隔離睇到維景嘅。樓面侍應得兩位，佢地好忙，但回應客人算快。小食叫左鰹魚沙律、明太子蛋卷，感覺普通，而芝士魚餅夠熱有爆芝感覺。刺身叫左（上）五點刺身，吞拿魚油脂夠平均。燒物方面，牛油帆立貝都唔算細粒，燒厚牛舌熟度岩岩好，中間粉嫩色！蒲燒特大鰻魚果然係名物，好肥美多醬汁，送飯一流，淨食就咸左啲。黎稻庭唔可以唔叫烏冬，叫左海鮮蕃茄湯烏冬，超足料，但比較上次食冷烏冬，我都係鍾意食冷烏冬。埋單成惠 HKD 13xx，正常尖沙咀價位，而我地自備蛋糕就收左50蚊切餅費。因為我地電話訂座，無限時交檯，其實餐廳都早收，十點半就打烊。…Read More

朋友介紹呢間百樂門星期六日公眾假期全日點心6 折，趁星期日同屋企人去試試。地點係kcc，同葵興地鐵站相連，落雨打風都唔怕濕身。而且係商廈，星期六日人流極少，一到即有檯，完全唔駛等，仲好自助咁諗坐邊張檯。開左茶，睇下點心紙，都係啲大路點心，仲有多一張早茶特價點心紙，選擇算幾多。見6折，咩都想食，但得3丁友，只好叫啲貴啲啲嘅！第一樣食貴啲啲嘅梗係灌湯餃！全名係竹笙花膠灌湯餃，係食到竹笙，但花膠就唔多覺，都係平價灌湯餃質素，豬肉、蟹柳、冬菇咁。另外食貴啲啲嘅梗係搵啲有蝦海鮮類嘅點心，包括：蝦餃、燒賣、蝦腸、鮮蝦菜苗餃、蒜蓉蒸鮮魷。蝦餃好大粒，多蝦，但皮略厚。腸粉質地幾好，唔會太琳。燒賣就麻麻，好大舊豬肉無剁碎。蒸鮮魷啲調味料太多又未攪均，太重口味。整體食物同服務都係一般，但以6折黎講算係假日之選。…Read More

今日飯局選址選左我地兩者返工中位數地點 - 圓方，圓方啲餐廳大多走貴價高檔路線，睇呢間啲comment都唔算貴。我地兩條女叫到成檯野食，叫左5食 1湯 1甜品 2啤酒，每人三百幾蚊，野食都唔錯，份量唔算大份可試多幾款，坐得都舒服，檯與檯之間有空間感，可再返兜之選。小籠包多湯三杯雞夠入味，多雞蚵仔煎係台式煎法，有粉漿底，但第一次食蚵仔煎有通菜鹽酥帶子似避風塘炒炸帶子多過鹽酥上湯津白同酸辣花枝羮超級normal擂沙湯丸熱辣辣好流心，完美結束飯局…Read More

出面打邊爐通常限時限刻，所以諗住黎呢度夠偏，一定唔會有呢個問題。我地4人叫左兩個2人餐。叫完，傾住計等，等左好耐，我地超肚餓嘅樣出哂黎，侍應哥哥好識睇眉頭眼額，好有歉意咁黎話我地原本選海膽唔夠新鮮，所以要改俾帶子我地。出餐時，廚房應該真係出左一啲狀態，先出3隻蝦俾我地食住先。因為都等得耐，侍應哥哥主動送左jar 飲品同送多隻毛蟹俾我地。都等左成粒鐘，好多人等到呢個位應該會爆，但侍應佢地又明顯有跟，你又會諗呢度唔多客，叫先整先發現問題，耐又正常，咁我地都由佢啦。講返食物，佢啲刺身都幾新鮮，帶子好甜。毛蟹係預期嘅細，都多膏多肉，拆蟹果陣我地最靜，呢個工作真係好倦。因為兩個餐，可以有兩個湯底，叫左豬骨白湯同壽喜燒。未落野去滾前，齋飲白湯都好好飲。我地用白湯滾海鮮，壽喜燒滾肉，所以白湯到尾都唔肥，再飲好甜，但我都係鍾意未落野前湯嘅味道。牛、豬片同海鮮拼盤嘅質素都唔錯，肉類好重肉味，牛落窩拖兩拖，剛熟 ，very good。海鮮唔算特別肥美，但新鮮嘅。圖為二人份蔬菜拼盤，略細份。甜品麻糬，雪過，食落涼涼地，心理上似用黎中和火鍋嘅熱氣。…Read More

4位邊爐lover聚會當然係打邊爐，呢間第一次試，大家都好滿意！絕對可以encore。 首先，飲品除啤酒外都係任叫，而啲飲品絕對唔hea，我地叫左愛文芒可樂沙冰，出面叫韓國鋪頭都要成50蚊杯，仲要勁大杯又好飲！ 湯底都好多元化，叫左冬瓜卜卜蜆海鮮鍋，勁多蜆，冬瓜煲到最尾先食，甜到不得了。我地加左每人30蚊嘅海鮮拼盤，睇落得3款海鮮其實有4款，珍寶蠔、大蝦、馬刀貝、卜卜蜆，全部都好生鮮，啲蠔熟左都唔會縮到變蠔豉，真珍寶size，但下次未必會叫，其他任叫嘅配料都夠。配給人頭份嘅有火鍋拼盤、響鈴魚皮，其中兩款餃係最出色，響鈴超巨形，滾耐啲先好味。肉類有兩款：安格斯 Prime Grade 牛肩脊同西班牙 iberico 黑毛豬肉片，平時我對牛係有偏愛，但今次不得不說啲豬確係比其他火鍋鋪好食好多。任點配料唔算超多，但應有嘅都有，而且質素唔錯。重點係芝士獅子狗同7寸大蟹柳，出面買好貴架！另外，啲台灣係橫薄切嘅，原來咁樣黎打邊爐，易熟又好味。台式火鍋仲有得點小晶包同蕃薯圓，我比較保守，對咸煮麻麻。…Read More

今次5大1小飯聚黎呢度，因為旺角方便大家返屋企，而且OpenRice 訂檯有88折。坐低見8點前，有happy hour 買一送一，叫左兩支Erdinger Dunkel，邊飲邊睇食咩。我地叫左個 2人 dinner set加散叫左幾樣。首先上檯係果樣好吸引嘅牛油果蟹肉沙律，睇樣贏哂，但其實係攝影效果，實際唔大份嘅。朋友試圖切5份，一切即散，最後係切開堆啲青瓜變左撈起咁撈埋拼盤嘅醬汁同爆珠一齊食，味道清新。仲叫左焗芝士菠菜大啡菇，同個樣一樣，味道非常normal。仲有兩樣normal 前菜小食：buffalo wings 同tomato mozzarella salad，normal 到連相都無影。 白酒煮蜆，都幾多幾大隻，味道一般。小朋友見到呢碟話係龍蝦，其實係白汁紅蝦偏意粉，小朋友少有地叫添食，但我個人覺得膩左啲。餐廳上菜前預先問定駛唔駛幫手切開，讚！好怕切。至於好唔好味呢，同行友人覺得太咸，我比較重口味，而且啲皮夠脆，個人覺得好食。呢客威寧頓牛柳走精緻路線，份量偏細，酥皮好脆，但牛柳略為過熟，無加鵝肝醬混入啲菇度，切開時啲菇易散哂，又少左份油香。而攪笑位係，點解連呢碟嘅伴菜都有爆珠呢？咁鍾意用爆珠伴碟？？抹茶心太軟，過熟唔流心，但食嘅時候唔算熱，唔鍾意。仲叫左個疏乎里pancake，做到疏乎里texture，但應該焗耐左，少少鞋。…Read More

今次一行十人去打邊爐，之前未食過呢間，選佢嘅原因全因OpenRice 訂位7折優惠。食飯當日打黎confirm booking 先記得問有冇圓檯，原來全部都長檯，即日又咁多人好難轉場，即管試下。我地開頭叫左兩個鍋，黃金芝士雞煲同鴛鴦鍋 （芫茜皮蛋 x 蕃茄），但我地實在太多人，張檯實在太長，淥野食好唔方便，最後忍唔住要加多個鴛鴦鍋（芫茜皮蛋 x 麻辣），十人三鍋。黃金芝士雞煲勁多芝士，好韓風，但食兩三舊已經開始覺得膩，加湯後，原本諗住會有忌廉雞湯效果，但完全唔係果樣野，味道太淡，似開稀左咁。追加芫茜皮蛋湯底，因為堅多芫茜皮蛋豆腐。蕃茄湯就有人造感覺，陣咪好假。而麻辣就唔夠麻唔夠辣，但用黎淥紅薯粉就好夾，我地仲食左3份紅薯粉添。其實叫嘅火鍋配料都係大路野，應該7折關係，偏細份，其中比較出色嘅係黃金魚皮，明顯即炒啲咸蛋黃上啲魚皮，又脆又香口。埋單時，先留意到7折只限火鍋配料，鍋底同飲品係無折嘅，每人二百幾蚊，正常價錢。如果下次人少少，二至四人先黎，比較岩坐。…Read More