yume025's Profile

知道希慎樓下開左新foodcourt，趁經過銅鑼灣過嚟食個飯，見到八時神仙草開左分店，就同朋友講好左食完飯嚟食返個甜品。我地食甜品嘅時候已經大概9點幾，由於foodcourt唔算好多位，好好彩都成功搵到位置，不過估唔到平日夜晚甜品鋪嘅人流都非常多，超多人買。因為之前見到啲人打卡食手捧冰好似幾吸引，趁天氣唔太凍，我都叫左個手捧冰。冰嘅選擇都頗多，由$58-86不等，而我今次叫左個最普通嘅冰。但估唔到嘅係個冰嘅製作時間要等咁耐，一個冰等左差唔多20分鐘先有。可能實在太多客人等，朋友叫嘅冰仲耐，接近半個鐘先有，唔知係咪漏左單。今次食嘅係芋薯圓嫩仙草雪花手捧冰($58)，坦白講攞到手嗰刻覺得有少少失望，因為賣相唔算好吸引。不過始終我揀嘅係最平嗰款，所以都無得好講。雖然覺得個冰好頹，但如果為左雪糕要貴成十幾廿蚊又好似唔係好值得。依個手捧冰上半部分係雪花冰，下面底層係仙草，側邊有芋圓、地瓜圓同埋紫薯圓。雪花冰食落軟綿綿，而且神奇地會有拉絲，食落係入口即溶嘅感覺，冰嘅口感係唔錯。但芋圓就差咁啲，分量大概有8粒，覺得食落係偏淋身口感，唔算好煙韌。整體而言，以依個價錢同等候時間覺得麻麻，未必值得花咁長時間去等。亦可能係我一開始期望太高，覺得有啲落差。我個人嚟講食過一次就可以，因為以芋圓甜品嚟講，覺得銅鑼灣有其他更好選擇。…Read More

終於有機會一試依間之前喺牛舌關注組頻頻見到嘅餐廳。餐廳喺銅鑼灣同荃灣都有分店，今次去嘅係銅鑼灣分店。餐廳空間其實唔算大，不過有一排bar檯可以對住廚師食野。lunch set有9款選擇，當中會包埋湯、沙律、炒飯、漬物、罐裝汽水。(但留意返有個別幾個餐係無包括炒飯)自從有一次食放題嘅時候接觸到牛舌燒物之後就愛上左依樣野，加上佢牛舌咁出名當然係要叫依個餐。前菜漬物係胡麻醬豆腐，一啖凍豆腐配一啖麵豉湯啱啱好。沙律加左醋，特別開胃。炒飯金黃色，食落粒粒分明。主菜方面牛舌有6大件，超級厚切，睇落色澤誘人，中間仲係粉嫩，火候控制得啱啱好。覺得依個燒物好出色，咬落好淋唔會韌，調味方面都啱啱好，食落juicy超香口，係會令人食過一次就念念不忘嘅牛舌。成個餐非常抵食，絕對食得飽。我覺得cp值高，而且又好食，如果中意食牛舌嘅一定要嚟試下。我之後都回頭左幾次餐廳，都係為左牛舌而嚟。當然餐牌上面仲有其他鐵板燒菜式望落都好好食，如果同幾個朋友一齊嚟，就可以share食。…Read More

喺星期六日無book位嘅情況上嚟，人流唔算好多。不過因為餐廳位置唔大，最後被安排左坐吧檯高凳。見佢有個一人輕盈下午茶($98)，考慮到想食得light少少嘅情況下決定叫依個餐。而且加上佢包埋一杯飲品，可以任點餐牌上任何一款飲品(酒精除外)，依個選項都幾吸引。我今次點嘅主食係招牌法式吐司，飲品揀左凍提拉米蘇咖啡。兩樣野都係餐廳人氣之選!而且擺盤非常吸引，打卡一流。因為係輕盈版本，法式吐司得1件(如果叫正常版本嘅話會有3件)，然後側邊有雜莓、香蕉。同埋有楓糖醬可以自己淋，不過我覺得本身都夠甜所以無特別再額外加。佢嘅法式吐司係外脆內軟，裡面屬於比較偏淋身嘅口感，蛋香味都好重。而且欣賞佢食落會有肉桂嘅香味，平時喺其他地方好少會食到肉桂味嘅French toast，適合中意肉桂嘅朋友。另外提拉米蘇咖啡都好值得推薦，除左賣相非常吸引之外，味道都好濃郁。上面仲會有一塊lady finger餅乾，浸埋咖啡一齊好好味。而且飲落好有層次感，面嗰層夠哂creamy，Tiramisu味道非常突出，飲完之後都覺得超級飽。覺得依度係一間幾適合同朋友聚餐，悠閒歎下tea嘅cafe。唯一一樣美中不足嘅係出餐速度一般，今次依個set都等得比較耐。不過下次都會想再嚟試下其他甜品同飲品，覺得有幾款飲品睇落都好吸引。…Read More

最近發現大角咀依邊開左好幾間新餐廳，又開始想試新野！餐廳喺利奧坊依邊，不過可能因為利奧坊都唔算太旺，中午會有上班族但夜晚就感覺上都係附近居民會過嚟。中午有lunch set，同朋友睇完一致都覺得唔錯幾吸引，就喺幾間新餐廳中揀左決定食依間。我試嘅係手撕牛肉意粉($78)，lunch set包左前菜及飲品。前菜可以揀餐湯、沙律或者Parma ham 蜜瓜。點完餐好快手就會上麵包，我地三個人嚟食，一共有6塊每人可以食到兩塊。麵包有附埋番茄醬，或者檯上亦有橄欖油同黑醋可以點。個人中意點番茄醬，酸酸地夠哂開胃。而且麵包熱辣辣，食落又鬆軟，幾好食。前菜我揀左餐湯，是日餐湯係椰菜花湯，飲落非常creamy濃郁，另外見到隔離檯食沙律都幾大份。正餐方面，意粉擺盤賣相唔錯，可惜有我唔中意食嘅火箭菜😂。牛肉分量都唔少，煮得夠淋而且調味都好足夠。另外特別要讚嘅係意粉，煮得夠al dente，食落彈牙，完全係我中意嘅口感。而且掛汁，配埋香濃嘅番茄醬，好出色。雖然一開始睇落分量正常，但原來食食下發現意粉嘅分量都幾多，夠哂飽肚。另外朋友叫左大蝦香辣蒜片意粉，評價都唔錯。我地一致認同意粉好好食，質感煮得啱啱好。同時蒜片意粉都好香口，一上碟嘅時候香味四溢。整體嚟講，係一間食物質素好又高cp值嘅餐廳，好值得試下。…Read More

依間餐廳喺大角咀人氣好高，而且亦都有好多人介紹過，所以成日都好多人等位。店鋪Qr code點餐，非常方便，中午lunch set會包埋小菜同紅茶，都可以加錢換其他飲品(其中芋泥鮮奶都係個幾多人選擇嘅品項)。同時套餐仲會有包埋小菜小黃瓜，有醃製過酸酸地好開胃。月見蚵仔魯肉飯蚵仔分量非常多，粒粒都飽滿漲卜卜咁，而且食落鮮味十足，喺香港其他地方都好少食到咁鮮甜嘅味道。另外滷肉肥瘦適中，食落香口，再配埋中間流心蛋黃，用嚟撈飯簡直一流。鹽酥雞魯肉飯唔好睇鹽酥雞得4粒，但全部都勁大舊。食落好脆，炸粉唔會過厚而且仲可以鎖住肉汁，夠哂嫩滑同香口，唔會話過於油膩。同埋鹽酥雞嘅調味都啱啱好，唔會過鹹。依個炸物配埋魯肉飯一齊食簡直係邪惡又完美嘅配搭，好多時嚟食都會揀依個餐，啲分量多到每次都食到超級飽。…Read More

依間餐廳知名度好高，身邊朋友個個食完都大讚，而我自己都食過兩三次，覺得係間高質pizza店，非常適合同一班人聚餐食。同朋友3個人中午嚟食，唔洗等位即刻有得入，我地總共叫左3款野食一齊share，食到超級飽！香蒜芝士焗麵包依個蒜蓉包絕對係每次嚟必點嘅野食，個樣望落十足pizza。一共有12件，食落蒜香味非常突出，而且芝士分量都好多，兩樣夾埋perfect match。另外會附埋茄汁，不過我覺得佢茄汁偏酸，唔點醬反而會好味啲。Half Queen Margherita / Half Summer of Love 1967pizza分左13吋同18吋，款式選擇都多，如果想一次過試唔同款，最適合就係叫half half。佢會用價錢較高嗰個嚟計算。我地3個人叫左13吋，分左6件，但每件都好巨大，見到已經令人食慾大開。Margherita雖然係最基本款，但濃郁芝士配上番茄醬嘅配搭仍然無得輸，而且加入左羅勒嘅香味令pizza味道唔會過於單一。加上pizza係厚底，食落有口感同有麵粉香，好食！另外一款summer of love 1967 都係個好熱門嘅選擇，上面係滿滿嘅菠蘿，而且仲係新鮮菠蘿，唔係罐頭。pizza底搽左蜜糖，食落甜甜地，配埋菠蘿一齊食都幾fresh，係唔錯嘅配搭。香菌派對意粉本身其實比較想食紅醬意粉多過依個白汁意粉，不過食落又發現幾有驚喜。蘑菇嘅分量頗多，加上佢嘅白汁唔會好漏，食落覺得好似無咁heavy(雖然應該係錯覺)。而且佢嘅意粉質感好al dente，令我覺得好滿意。…Read More

雖然間餐廳好多地方都有分店，但估唔到第一次食竟然係入嚟東涌。因為同朋友揀平日食，outlet人流唔多，餐廳大把位置坐，不過依間餐廳裡面嘅位比我想像中少，空間唔算好大。反而見到比較多人係外賣，見佢外賣做緊優惠比較抵食。餐牌主食主要係蛋包飯，同朋友3個人每人叫左一碟蛋包飯，另外再加多左半份無骨炸雞。但不得不提，餐點嚟到真係有啲出乎意料之外，估唔到原來佢食物分量係咁多。烤牛肉蛋包飯($98)送到檯之後侍應會幫手切蛋包飯，如果想影相打卡的話可以同佢講聲，佢會等影完再切。只可以講依個蛋包飯真係超大碟，除左牛肉之外仲會有沙律菜拌碟，最欣賞嘅佢蛋包飯唔係齋白飯，而係有用豉油調味過，裡面仲夾雜左少少蔬菜，配埋滑嫩嘅蛋真係唔錯。而且覺得牛肉嘅分量都多，啲汁食落都夠濃味，非常適合撈飯。醬油蒜頭炸雞($108)叫左半份炸雞share，但無諗到分量原來都頗多，大概有8件炸雞左右，而且裡面加左年糕同薯條，望落已經覺得吸引。炸雞口味都係比較偏甜，覺得幾惹味，啱哂我口味。另外要大讚嘅係薯條，炸得好香脆，好好食！我瘋狂食左好多，不過年糕反而就麻麻地，口感方面差左少少比較偏硬，如果再煮淋少少會更好。但同朋友嚟食嘅話，非常推薦叫炸雞一齊食。由於食物分量比想像中多，最後我都食唔哂啲飯，見到隔離檯好多都share餐點食，下次嚟嘅話應該會2人share蛋包飯再叫其他小食。但覺得間餐廳係幾適合同朋友一齊聚餐食，食得好滿足。…Read More

依間鋪睇落唔太起眼，如果唔係朋友食過話一定要試嘅話，我都好自然忽略左，畢竟大角咀咁多野食。店面唔算大，不過見生意都唔錯，餐廳主打福建菜，香港嚟講比較少有。而且好難得見到有賣粿條，即刻決定食。餐牌選擇其實少，麵嘅話得兩款，一種係配招牌活肉，另一個係配好姐精選。見好姐精選係一堆內臟嘅組合，包括豬心、豬脷、豬頸肉、豬耳、豬鼻、鵝腎。但睇評論似乎係活肉比較多人揀 所以我今次都揀左活肉試下。鮮骨湯粿條(招牌活肉) $59由於湯底加左胡椒粉，胡椒粉同蔥嘅分量可以選擇，另外活肉搭配既嘅豉油亦可以揀辣度，而且仲有送埋汽水(轉菊花茶+$5)。活肉係一盤咁另外送上，側邊有芽菜伴碟。肉望落分量絕對唔少，我叫左微辣，佢係用左黃椒，我覺得辣度都幾足。同埋後尾先知活肉原來即係豬嘅"面豬登"位置，平時無咩點食依個部位嘅肉，食落有種驚為天人嘅感覺，肉質滑而且口感幾爽，重點係咬落淋身夠嫩，配埋佢嘅豉油perfect match，第一次食真係覺得好驚艷。至於主食粿條都好好味，由於以前食過粿條都知道佢係好似闊身啲嘅河粉咁，食落非常滑順，而佢嘅湯底雖然比較清但又唔會係淡而無味嗰種。粿條同活肉嘅配搭加埋非常出色，兩樣野都覺得好食，分量又比得好足。同埋香港真係比較少機會食到，好有特色。我食完之後都即刻介紹身邊嘅人試下。…Read More

本身諗住求其喺京瑞搵啲野食，經過間鋪見到有下午茶，門口個阿姐又招呼我咁，就決定食依間。見佢餐牌選擇其實同午餐都差唔多，我揀左個回味醬骨架麵，撈麵嘅選擇有4款，不過因為唔食得辣，就揀左個日式撈麵，另外餐飲仲可以配珍珠奶茶，唔洗額外加錢。不得不說野食送到嘅速度非常快，叫完無耐已經有得食。日式撈麵都幾大碟，麵質爽身而且掛汁，唔會太dry。至於個麵汁就正正常常，好似平時日式燒汁咁甜甜地，我諗如果想特別啲嘅話可能叫口水汁會比較惹味。個主菜醬骨架有兩件，可能因為下午茶關係，見平時啲人食午餐嘅話應該會有3件。個醬骨架幾大舊，食落都幾似豬軟骨，啲肉好淋味道濃郁，個人覺得幾好食，唔怪得睇食評咁多人會揀依道餸，佢成為全個餐嘅重點(個撈麵同佢相比，味道就顯得有啲普通)。雖然成個餐睇落有啲頹，但勝在食物分量夠多，而且仲有杯珍珠奶茶送，都幾抵食。如果想揀個飽肚又快速嘅餐食，依間餐廳未嘗唔係一個選擇。…Read More

自從media介紹過依間鋪之外基本上每次經過都見到大排長龍，而且鋪裡面細，位置比較少，要有足夠耐心排隊先食到。我好耐以前曾經買過一次外賣，但始終都係想堂食一次，試真啲佢啲味道。臨近復活節前可能比較少人返工，中午經過見到前面得3-4個人排隊，機會難得就即刻諗住排。好彩嘅係咁啱有客走，所以都入得好快，等左5分鐘已經可以入。裡面座位設計都好日本style，坐bar檯對住開放式廚房可以望到廚師煮食。拉麵間唔中有期間限定款式，不過我今次都係衷於初心揀左蝦丸(蝦豚骨拉麵)。拉麵有兩款可以揀，我今次揀左幼麵，另外油量都可以揀，如果想食清少少可以揀少油。基本上野食都嚟得好快，睇個賣相唔錯，佈滿櫻花蝦，裡面內附3塊叉燒肉、半隻糖心蛋、紫菜。佢叉燒嘅色澤吸引，呈現嫩粉紅色，食落非常軟熟。覺得佢嘅湯底非常濃郁但又唔會過於油膩，蝦味非常突出，每一啖都食到蝦嘅鮮味，不知不覺都飲左好多啖湯。幼麵嘅軟硬度煮得啱啱好，不過見身邊好多人都係叫粗麵，我諗粗麵應該會相對比較掛湯。整體嚟講覺得碗拉麵係幾好食，但坦白講我又覺得未至於要大排長龍等成粒鐘入嚟食，如果少人排隊嘅話覺得可以一戰。…Read More

其實之前已經食過一次其他分店，嗰陣時第一印象係麻麻。咁啱行開太古城，就諗住下午茶時間搵間餐廳同朋友坐低飲下咖啡傾計，見依間鋪都幾多人排隊，就諗住嚟依度食，比多第二次機會佢。因為唔太肚餓，同朋友叫左碟意粉、pancake一齊食。覺得佢意粉啲款式睇落都好唔錯，不過朋友強力推薦辣番茄蟹肉扁意粉，就一於叫嚟試下，而甜品叫左經典英式伯爵茶梳乎厘，飲品方面仲叫左杯伯爵茶鮮奶咖啡。辣番茄蟹肉扁意粉($98)覺得擺盤睇落幾吸引，不過食落辣味都幾足，對於我依個平時唔太食得辣嘅人嚟講覺得幾辣。但成碟意粉係好食嘅，中意佢意粉嘅質地夠彈牙，而且佢係用扁意粉索哂番茄汁嘅味，少少微酸再加上辣，非常惹味。經典英式伯爵茶梳乎厘($158)pancake即叫即整，要預留啲時間叫。覺得佢嘅賣相望落唔錯，打卡一流。一共有3件梳乎厘，淋左啲伯爵茶醬。側邊有3粒黃豆粉蕨餅、2件瑪德蓮蛋糕、香草味雪糕同埋忌廉。如果一個人食嘅話分量真係幾多，同人一齊share食會比較好。不過坦白講覺得個蕨餅同細蛋糕就好麻麻，唔會令我有想食嘅衝動，反而個雪糕仲好食啲。因為之前食過其他分店嘅pancake，覺得唔係好得。初時以為可能係分店問題，但無諗過今次再食依然係有同樣感覺。佢嘅pancake外表睇落正正常常有返咁上下厚度，同平時外面食開嗰啲都無咩分別。食落雖然有蛋香，但裡面嘅texture就好淋，係入口即溶，但覺得有啲over左，自己唔係好食得慣依種口感，反而覺得會係蛋漿未煮熟嘅感覺。至於杯伯爵茶鮮奶咖啡($42)都幾好飲，伯爵茶味道算係頗為突出。總括而言，覺得意粉同飲品都唔錯，但梳乎厘就麻麻，唔係好適合我。不過餐廳環境係ok，食物賣相都吸引，係幾啱同朋友聚餐打卡。…Read More

之前聽朋友提過觀塘分店唔錯，知道銅鑼灣都有分店後就一直都想過嚟試下，今次揀左晚市嚟依度食。依度係Qr code落餐，夜晚都有set可以食，係主食再配一杯價值$30嘅飲品。不過睇返餐牌，$30都係限普通嘅咖啡/茶/汽水。其餘飲品已經超出，如果要點嘅話就要補差價。至於set上面嘅餐點同主餐牌比都只係相差$20。如果係咁嘅話，我覺得單點餐牌上面嘅野食會抵啲。今次嚟食叫左兩個main dish加兩個小食，大家一齊share食。喺未點餐嘅情況下先上左一籃小食，原來係餐廳每檯都會贈送免費嘅小食薄脆，配埋千島醬一齊食幾開胃。主菜方面點左個大蝦配香草牛柳，牛排揀左5成熟，熟度啱啱好，中間切開呈現粉紅色，食落夠淋，就算唔洗點汁都已經好夠味好好食。大蝦有3隻，好爽口，伴碟仲有薯蓉，依碟菜唔錯。另外叫左碟喇沙帆立貝意粉，無諗過喇沙會配意粉，而且食落感覺又幾match。帆立貝有3粒，喇沙好惹味同埋濃郁，意粉索哂啲汁好入味，而且幾彈牙。覺得依碟菜式幾新奇，值得一試。小食方面如果叫set再加配會平少少，我地叫左碟韓式芝士炸雞。炸雞嘅外皮夠香脆，不過個人覺得比較似美式炸雞多啲，芝士醬味道濃郁，炸雞肉質都好嫩滑。不過私心嚟講韓式炸雞都係中意甜辣味道多啲。另外仲叫左個黑松露薯條，薯條分量頗多。雖然肉眼見到薯條灑滿黑松露，不過食落就覺得唔係好夠味，我諗佢嘅薯條應該本身無咩味道，係靠黑松露，但因為黑松露灑喺面，所以變相裡面唔係太入味，如果薯條落多返少少鹽會更加好。個人平時幾中意食薯條，但可惜依道薯條無令我有食哂全部嘅衝動，所以都有少少失望。不過整體而言撇除薯條之外其他野食都唔錯，而且環境都坐得舒服。同埋落單嘅時候唔小心叫多左碟意粉，嚟到先發現，即刻同店家講唔小心落錯單，佢都態度好好咁幫手cancel。…Read More

平時真係超少入嚟科學園，發現科學園原來都開左唔少新嘅餐廳。不過今次同朋友都係嚟左依間好多地方有分店嘅sensory zero食，主要係朋友話好耐無食而且食物質素唔錯。餐廳環境都幾舒適，空間開揚，同埋見側邊仲有個位置可以坐塌塌米，好似好relax咁。食物嚟講價錢唔算平，基本上大部分餐點都要超過$100，不過款款睇落都幾吸引。可惜因為唔算好肚餓嘅關係，最後都係叫左個意粉，如果唔係其實都想試下佢個All day breakfast。慢煮雞胸肉茄汁扁意粉（$92）本身諗住個意粉都係平平無奇，但食物嚟到嘅時候有成功引起我嘅食慾，雞胸肉已經切好一塊塊方便食用，而且值得一讚嘅係雖然雞胸，但係食落都好嫩滑，一啲都唔覺得乾柴或者口感好"鞋"，可能同慢煮有關，覺得幾好食。而意粉質感亦都頗彈牙，唔會話煮得好淋，個人幾滿意個口感，配埋番茄醬酸酸甜甜幾開胃。而且有啲意外嘅係碟意粉嘅分量都幾多下，雞肉亦比得好足料，唔似平時去開cafe食物分量都偏少。加上見其他朋友叫燒春雞、豬排飯嘅分量都好多，大家都話食到好飽，令我覺得依間餐廳嘅性價頗高。另外，其實聽朋友講sensory zero一定要必試嘅係朱古力飲品，可惜我本人唔太好朱古力，唯有睇住朋友飲。見到成杯野嘅第一感覺就係超級朱古力，連個杯柄都沾滿左朱古力，佢仲會專登提供濕紙巾，都幾貼心。朋友形容好好飲，朱古力迷應該幾適合，而且都幾啱打卡用，非常吸睛。整體嚟講雖然價錢唔係平，但環境同食物分量味道都唔錯，下次同朋友聚餐都會再考慮。…Read More

依間韓國餐廳都係有一次無意中發現，因為佢嘅地點真係有啲隱蔽，唔喺平時最多餐廳坐落嘅嗰幾條街，而且附近都比較多車房，連經過嘅路人都唔多。係一間名符其實嘅家庭式小店，店裡面空間細，見人多嘅時候會喺餐廳門口開埋摺檯坐出面。成間鋪都非常韓式，老闆係韓國人，一入到去已經聽到佢地講韓文，電視播住韓文節目，比人一種地道嘅感覺。而餐牌上面所賣嘅野都係好典型嘅韓式美食，中午同夜晚餐點會有少少唔同，不過都係得單點，見學生餐先會有包埋飲品。而最令我期待嘅係見到依度都有得食韓式炸雞，我超中意食甜辣炸雞，見到張圖已經覺得吸引加上見價錢又唔貴，就即刻叫左半份。另外叫左個紫菜包飯同埋粉絲炒年糕。紫菜包飯估計應該本身已經整好哂，落完order之後好快就送到，另外一齊送到嘅仲有前菜，有三款(泡菜、豆腐、黃瓜)。紫菜包飯方面有三款味道可以揀，今次試左原味，不過估唔到$30依個價錢竟然都會有10塊，見到嘅時候即刻覺得好抵食! 味道亦係好唔錯，幾足料同埋麻油味幾香。粉絲炒年糕嘅分量亦唔少，裡面仲夾雜左啲魚糕，而且年糕頗為煙韌，口感十足，不過我覺得都幾辣，對於唔太食得辣嘅人嚟講要瘋狂飲水，但味道嚟講係正常發揮。今餐最令我期待嘅就係炸雞，可能因為即叫即整，所以都等得比較耐，其他餸全部食完之後依碟炸雞先嚟到。不過一嚟到見到佢嘅賣相已經覺得不得了，就算要等咁耐都係好值得！ 炸雞有6件，但估唔到分量比想像中大件，每粒炸雞都淋滿左甜辣醬，食落非常香脆可口，而且雞肉好嫩，肉汁完美地鎖住，非常juicy。食食下嘅時候老闆仲走過嚟教我地可以將炸雞沾住炒年糕嘅醬汁一齊食，會更加惹味。不過我覺得佢本身炸雞嘅醬已經非常充足，就咁食已經好正。不得不提依個炸雞真係會令人食上癮，雖然邪惡但一路食會令人覺得非常滿足。性價比超高，以依個價錢嚟講超級抵，下次一定會再叫炸雞食！…Read More

平時好中意食鮮芋仙，行過apm商場見到有就諗住買返屋企食，但食完真係有啲失望，之後應該都唔會再買依間分店。叫左個芋圓五號，但返到屋企打開發現最主要嘅芋圓竟然無左....一打開見到嘅係一層冰，然後撈到最底又有一層冰，總共兩層，應該係店員最後要淋芋圓喺面嘅時候唔記得左，鬼掩眼又淋多左層冰，結果變左真係齋食冰而且其他配料都少得可憐，珍珠同花豆都係得嗰幾粒，覺得比$45食係完全唔值!因為太遠水路，已經無得再返去間鋪叫佢補返，但心裡面真係有啲不忿，唯有喺openrice度比個負評佢。…Read More