三三食不盡's Profile

雖然新正頭係應該食d新年應節食品，但我已經由年三十冬菇花膠鮑魚，食到今日年初五lunch都仲係食緊蘿蔔糕。。。我同男朋友講我頂唔順喇唔想再食乜糕物糕或者做節嘅餸喇XD佢問我食咩，我話不如是但喺屋企附近睇下有咩餐廳先再決定啦！結果見到呢間金枕頭勁多人，雖然未食過但感覺可以一試！爆曬場都等左兩三個字先可以入座（但同時間隔離餐廳係得少少客人）今日勁full但人手緊缺，好彩呢到有得QR code落單，所以又唔算等好耐就上菜又冇出錯！黃咖哩雞 （$78）好香口同埋夠入味，如果唔食肉可以叫黃咖哩豆腐！飛天炒通菜 （$65）通菜炒完仲係好嫩。菠蘿炒飯 （$78）用半個菠蘿殻上好香，而且夠乾身粒粒分明。串燒沙嗲牛4串 （$64）唔會好老，加埋沙嗲汁更惹味！泰式珍多冰 （$25）同青檸冰 （$25）都係解渴之選，但我更偏好青檸冰酸maymay幫我解曬新年應節食品嘅膩感！整體CP值高唔怪得咁多人食啦！…Read More

爸爸話好耐未食過炸雞，今日喺朗豪坊行完街黎左新開嘅Bingo & Cook食韓式炸雞XD呢到好多staff都係韓國人，落單記得直接指餐牌XD雖然言語不通，但好好笑容同好nice！裝修係韓式大排檔風格！我地叫左蜂蜜黃油炸雞半份（$130）唔敢叫全份，怕食唔落其他野！無骨啱我呢種懶人，啖啖肉外皮香甜酥脆！泡菜餅 （$128）夠脆，係我每次必叫item！涮涮牛肉鍋（$320）牛肉質素幾好,配埋海量蔬菜加年糕！！原味炸雞配芝士雞球半份（$130）爸爸話唔夠喉所以叫多半份炸雞，爸爸鍾意原味多d話咁先食到嫩滑多汁！飲品方面，我飲嘅係Mango Milks，飲品解渴好重要！整體都唔錯，不過新開超多人，最好用openrice book定位！…Read More

本身食過幾次都冇問題但今次真係忍唔住要比差評😵‍💫😵‍💫😵‍💫借人多為名唔比條魚個客睇？！明明餐牌寫明2斤（$580）話時價要加多100蚊都ok冇問題😒上到枱條魚細到目測唔過斤半都已經蒸好冇得唔要😵‍💫同佢爭論左好耐先肯用返餐牌580個價錢食落先知條魚好唔新鮮死左好耐咁☠️☠️☠️個腮冇光澤瘀瘀黑黑極度搵笨😒😒😒大家黎呢到食飯食飯叫魚記得一定要佢拎條魚黎睇下新唔新鮮同埋幾大條！！！…Read More

今日去左尖沙咀行街，行到攰見呢間神山麵屋門面幾四正，就決定今晚食拉麵！本身我想試呢到出名嘅沾麵，但天氣凍想食返湯麵！所以我叫地之卷拉麵配土佐豆腐（$138）個湯底好濃郁，勁重菇菌味！叉燒都算大塊，另外豆腐外脆內軟滑！跟餐飲蘋果焙茶（+$8）冇茶澀味唔錯！男朋友就叫左神山豚燒叉燒沾汁麵（$95）男朋友未食就話呢隻麵唔同一般拉麵，食落係比其他外邊嘅麵條粗身同彈牙！沾汁係滿滿嘅豚骨+魚介湯頭，果然係皇牌！飲品佢就叫左蘋果汁 （$28）小食方面，我地叫左神山手造餃子（$48）同神山炸雞（芥末醬）（$48）餃子個皮好薄唔會食到成口粉，唔似機整！而神山炸雞配上芥末醬香口得黎又唔會好膩，d雞仲要大大舊！呢到環境ok而且都幾多人食，繁忙時間要排隊！等天氣冇咁凍我要黎食返沾麵，今次只可以偷食男朋友嗰碗一兩啖，唔夠喉XD…Read More

今日男朋友生日，但又想近近地食餐飯，決定黎Homeland！我地叫左Pizza（$388）如果揀唔洗加錢嘅item會仲平，不過男朋友生日由佢發板啦！煙三文魚凱撒沙律 （+$18）煙三文魚份量好多，菜亦夠新鮮！廚師精選濃湯 - 忌廉蘑菇湯，蘑菇蓉好多好香濃，法式鮮打龍蝦湯 （+$18）鮮味十足，蒜蓉包夠香口脆身！墨西哥雞肉芝士餡餅，滿滿芝士啱曬芝士控！香煎澳洲 10oz 安格斯肉眼扒配薯菜（$88）牛肉夠嫩而且都大塊，薯菜唔求其！男朋友怕唔夠飽仲追加小食 - 脆炸粗直薯條 （+$58）其實食物份量好夠，叫埋薯條反而太飽，不過薯條就算唔點醬都好夠味，點埋黑松露醬更好！飲品方面，男朋友飲草莓蜜桃梳打 （$24）而我就飲榛子朱古力 （+$24）呢到整體感覺好warm唔似餐廳，而係似去朋友屋企食飯咁，果然係Homeland！…Read More

尋日見到朋友仔喺社交平台share食餃子，就醒起自己好耐冇食餃掂，所以今日收工決定同男朋友食佢！狀元九鼎湯係必食，但單叫一碗冇咁抵，所以我食親都叫有得跟埋湯嘅餃！元貝豬肉餃（湯餃 $50 七隻）個湯依然好清甜，冇落味精！元貝豬肉餃仍然係滿滿元貝！野生松茸素餃（煎餃 $58 七隻）松茸味道好濃，我覺得煎會更好食！壽喜燒牛肉餃（湯餃 $54 七隻）係男朋友點名一定要叫，因為一咬開就爆曬汁XD而香煎軟心芝士餃（煎餃 $57 七隻）爆多粟米加埋重芝士好正。我仲叫多份四川涼皮（$32）我已經叫小辣，但男朋友都話幾辣，如果唔食得辣要慎選！飲品方面，我飲蜂蜜檸檬薏米水（$28 支裝）男朋友就飲凍豆漿（$15 杯裝） …Read More

好耐未食過炸雞，今日行完街黎左Bingo & Cook食韓仔。。。野XD呢到應該全部都係韓國人？落單記得用返英文或者直接指餐牌XD雖然言語不通，但佢地好好笑容同好nice，成日滿場飛睇客人有咩需要！我地叫左甜辣無骨炸雞半份（$140）唔敢叫全份，怕食唔落其他野！無骨啱我呢艇懶人，啖啖肉，好香脆！仲有串年糕同腸仔，所以都唔算少。韓式辣炒小章魚（$220）上菜先發現有好兩大駁粉絲，食唔曬。。。但個辣都唔惹小好味，不過怕辣就要小心！泡菜餅 （$128）我鍾意佢夠脆，就算我地掛住食其他野攤凍左都仲好脆！辣豬肉炒粉絲（$128）個辣同韓式辣炒小章魚唔同，男朋友食唔到太辣都食到！飲品方面，我飲嘅係柑橘奶昔（$78）男朋友就飲士多啤梨奶昔（$78）食咁多炸野/辣野，飲品解渴好重要，呢到飲品大大杯而且奶昔好香，推介！…Read More

朋友仔叫我一定要食金色不如帰，今日男朋友收工早決定食完再睇戲。我叫嘅係貝汁醬油拉麵（$128）一上我就聞到好香，原來入面有黑松露醬同埋牛肝菌！而湯底係由蜆、豬骨、魚三重湯底組成，好鮮甜嘅湯底！低溫叉燒大大塊，難怪令東京店連續5年拎米芝蓮一星啦～男朋友叫嘅係白豚骨拉麵（$115）相對冇我嗰個咁香濃，但都唔錯！小食我地叫左個一口芝士脆豚（$70）勁鬆脆！飲品方面，我飲嘅係白桃焙茶（$38），男朋友就飲蘋果焙茶（$38）我鍾意食黑松露，唔怪得朋友仔推介我黎食啦，要再食多次先得！…Read More

中左細獎嘅男朋友決定今日食豪少少，所以黎左銀座炎蔵燒肉食和牛二人前set！前菜有白菜辛奇（泡菜）同炎蔵沙律，碟沙律好大兜！食定多d菜打底以免便秘XD另外仲有個和牛咖哩飯幾香口，但今日主角係和！牛！呀！呢個餐包上等牛舌＋炎蔵和牛4點盛＋虎蝦2隻～本身包支酒但揸車就不了，轉飲巨峰提子乳酸梳打同白桃乳酸梳打！牛舌個口感夠曬爽彈，最怕出面食到d牛舌勁鞋XD虎蝦大大隻仲已經好細心挑曬腸！炎蔵和牛4點盛包括和牛芯芯＋和牛鞍下＋和牛友三角＋和平羽下 翼板肉芯芯肉質細軟，羽下即係翼板肉肉質比較有彈性且嫩口油脂足，鞍下肉質油花均勻，友三角油花多之餘牛肉鮮味濃郁。老實講靚牛唔洗點太多調味，我都係有時點一下粉紅岩鹽去提高肉味濃香，但大多數時間都係就咁食原汁原味嘅和牛！！食左咁多燒肉食個甜品，檸檬雪葩好fresh可以解下膩！真心係高質嘅和牛燒肉，希望可以再食多次啦~…Read More

一早決定今日要食紅葉茶屋，事緣我早幾日碌IG見到人地食雪糕芭菲好似好正咁，於是叫男朋友今日陪我行完街食！雖然一心想食甜品，但都要食左正餐先XD我叫嘅係特盛黑麻油濃厚豚骨湯拉麵 $118 湯底不錯好香，叉燒大大塊~配嘅餐飲係冰雜莓&香橙紅茶 $20男朋友話食飯先表現到佢d男子氣慨？！所以叫左牛肉壽喜燒定食 $138 配嘅餐飲係凍檸茶 $15 個壽喜燒汁偏甜，牛肉份量算多而且幾嫩我偷夾左幾塊食，入面仲有d菜/豆腐/冬菇~小食我地仲叫左旬之野菜 $68 有鑊氣夠香口 炸牛肉薯餅 $35 薯餅如果係2件會更好 炸餃子 $38 外脆內juicy甜品方面，鎌倉紅葉茶屋特製軟雪糕芭菲配期間限定夕張蜜瓜雪糕 $75 係今日主角，最頂係期間限定夕張蜜瓜雪糕，好濃蜜瓜味！跟住仲有紅豆味銅鑼燒＋抹茶口味銅鑼燒＋抹茶忌廉＋抹茶凍同埋自家製白玉塞滿隻杯！建議兩人share食，因為都幾大杯！男朋友唔鍾意食甜野，但好鍾意佢個抹茶味銅鑼燒，茶味比較重~Overall 無論主食定甜品都幾好，可以encore！…Read More

我同男朋友鍾意食嘅菜式好唔同，而泰國菜係難得滿足曬我地兩個嘅口味！今日去沙田還書，順便行街食飯，見呢間Nara Thai Cuisine幾多人，我地又耐冇食泰國菜就決定食呢間！首先坐低我就即刻猛食兜蝦片（$15）我今日喺公司忙得滯冇食lunch好餓XD食完先用QR code點餐！我地叫左鹹蛋青木瓜沙律（$98）我呢個辣妹推介呀，但如果食唔到辣最好少辣！泰式炒通菜（$68）菜夠嫩兼惹味！泰式炒金邊粉（$128）男朋友鍾意呢個香口！我就反而鍾意Nara特色炒飯（$108）多d，我呢個唔臭米氣嘅女人都讚，係因為足料而且夠乾身唔濕漉漉！飲品方面，男朋友飲嘅係海鹽焦糖泰式奶茶（$42）而我就揀左好fresh嘅鮮芒果沙冰（$55）見隔離枱好多都叫冬陰功湯，下次可以試下！…Read More

今日同朋友仔B晏晝做完spa，附近就係Donki行完一陣見肚餓，住呢頭嘅B負責發板帶我去食小野人KOKA 係燒烤呀（心心眼）呢到係用QR code落單，同埋每個位都有個爐for熱住d食物，細心位加分！因為B唔食牛，所以我地只有叫雞同豬仲有菜，其實想叫埋熱賣No.1嘅大漠烤羊肉串 （5串 $48）但B話尋晚食完羊就下次再叫！烤雞肉 （2串 $28）、烤雞翼（1串 $28）同烤雞脆骨 （2串 $28）表現正常！香蔥豚肉卷（1串 $28）香蔥同豚肉原來都幾夾，我地都好鍾意！Ｑ彈小豬頸肉（6串 $42）豬頸肉好肥美XD烤韭菜（1串 $18）同芝士蒜蓉烤茄子（1份 $48）係要燒烤店先會整到咁香口！飲品方面，我飲嘅係草莓乳酪奶昔（$42）而B就飲原味乳酪奶昔（$40）個奶昔好濃，唔會好似水咁稀，仲有奶香tim估唔到將軍澳都有高質燒烤，下次去附近做完spa可以再食！…Read More

男朋友終於趕起project，話要食好d唔想再食頹飯！今日出開銅鑼灣買野，Openrice見到呢間和居和居好似唔錯，就食呢間啦！男朋友一坐低就咩都都唔理叫左三文魚刺身（兩片 $48）、深海池魚刺身（兩片 $63）同三文魚壽司（兩件 $50）XDD刺身好夠新鮮，唔錯！我就唔算好肚餓，所以主要叫串燒燒阿波尾雞翼（一串 $45）、雞軟骨串（一串 $28）、辣芝士雞串（一串 $33）、豬腩肉串（一串 $35）、燒茄子（一份 $60）我特別鍾意豬腩肉個調味好惹味，辣芝士雞串好唔太辣啱啱好！男朋友除左刺身同串燒，仲叫埋日式炒烏冬（一碟 $85）配料有菜有肉！無論係刺身、串燒定烏冬都幾好，整體都唔錯！下次可以再黎，可惜今日男朋友揸車，唔係就可以叫酒飲！…Read More

今日要幫公司去旺角做野，做完想自己食埋野先返，咁就可以偷懶唔洗返到屋企又要煮又要洗！不過今日個lunch食到好飽唔係超肚餓，所以我決定食餃掂手工餃子雲吞專門店XD至尊松茸豬肉餃（湯 $80 七隻）餃子皮彈牙又多料松茸好香！再加埋狀元九鼎湯冇落味精個味好清甜，直接飲又得連埋餃子一齊食都得，我今次專登冇叫凍飲淨係飲個湯！壽喜燒牛肉餃（煎 $58 七隻）壽喜燒牛肉好嫩滑，一咬落去就爆汁，有圖為證XD我食第一隻餃子咬到第三啖都仲爆緊汁，真係超誇張！餃掂真係會食上癮，食幾多次質素都咁好！而且就算自己一個黎食都唔會尷尬XD…Read More

今日首先要去灣仔小店買野，加上我心心念念想食返嫩雞白布湯闊麵，所以去左食露面手工拌麵料理！明明係星期六都勁多人全店坐滿曬，好墟冚！我叫嘅自然係我心心念念嘅嫩雞白布湯闊麵（$70）d雞好滑嫩，麵身好煙韌湯底勁濃郁，值得再食！男朋友食嘅係麻麻辣辣牛展Biang Biang麵（小辣$68）我食左幾啖試味，個麻辣牛展好入味，夏天食拌麵其實係爽嘅！小食方面有上湯松茸娃娃菜（$32）同芥香麻醬雞絲粉皮（$44）前者娃娃菜吸滿上湯，後者估唔到大份到好似主食咁多XD飲品方面我飲嘅係凍極品陳年龍鳳檸蜜（$32）好香濃，而男朋友就飲凍蜂蜜百香果茶就fresh d（$10）！見隔離枱個油撥辣子魯肉好似唔錯，下次試埋先！…Read More