linuslsy's Profile

想在火炭食個lunch，去咗呢一間西餐廳，位於駿景商場，唔太方便，火炭站行去都要6-7分鐘，但係絕對值得。無論環境，食物品質，同服務，都相當唔錯。餐廳設計簡單，座位舒適，適合三五知己傾吓計，或者休息吓。叫咗個lunch set，餐湯係蓮藕薯仔濃湯。聽到有蓮藕，感覺好fusion, 個湯好濃薯仔味，有蓮藕細粒，好有口感。主菜係雞扒配紅酒汁，雞扒相當嫩滑，煎得啱啱好，個紅酒汁配埋薯蓉同雜菜，相當好味。主菜都有好多款揀，仲有all day, 價錢實惠，值得一試…Read More

行開旺角想食台灣野，見到呢間價錢相宜，就入去試下。門面裝修傳統，有台北橫街地舖嘅感覺，但店內都幾窄，2人ok, 多人去就有d難搞。我哋叫左個2人餐。小食揀咗手撕雞同牛筋頭，手撕雞幾香麻油味，不過略嚴太多雞皮，如果會食牛肉麵就唔需要叫牛筋頭，因為味道一樣嘅。另外揀左元州牛肉麵，呢個麵真心唔錯，湯底有藥材香味，有三大塊成半寸厚嘅牛肉，牛肉炆得好香冧，麵底都唔錯。個餐仲包兩杯飲品。下次會試下佢個鹽水豆腐。…Read More

呢間位於聯和墟球場對面嘅小店真係值得支持。今次係第二次光顧，一行5人未開舖就到，員工好友善招呼我哋入去坐。二人套餐有四款；我哋叫嗰個$248，非常抵食、有兩條春卷拼兩隻雞翼，一個黃咖喱牛腩配法包同薄餅，黃咖喱牛腩值得一讚，咖喱香濃，牛腩炆得好冧，另外仲有好多配料、套餐仲有個馬拉盞炒通菜， 加2杯飲品同甜品。另外加左個越式蒸粉包，有4個，好大個，雖然皮厚左d,但餡料十足。我地都叫咗豬頸肉撈檬，份量十足，有好多塊豬頸肉。我老爸極推金不換牛肉炒厚河粉，色香味俱全，牛肉仲多個粉。最後，雖然二人套餐只包2份甜品，但係佢哋就送咗5份俾我地，非常貼心。經過聯和墟，可以一試。…Read More

好耐冇去過花月庭食自助餐，見OpenRice有特價，第二時段午餐，3-5pm，只係$238（包服務費），就當食個Early dinner。去到見到人頭湧湧，幾乎全場滿座，心諗應該唔會太差。食物雖然不至於好高質，但係有驚喜嘅。冷盤有生蠔、青口、蝦、魚生，壽司等等。沙律吧都有齊基本嘢。熱盤選擇都幾多，試過嘅海鮮蒸蛋白、咖喱雞、香茅肉粒都唔錯。仲有燒牛肉、生滾粥同麵檔。我自己鍾意食甜品，選擇多，同質素都唔錯。飲品有齊咖啡茶檸等等。如果用消費券付款，送鮮橙汁。另外， 55歲或以上，連加一，只係$208，呢個價錢真係相當超值。…Read More

去大嶼山行山，諗住住一晚食個自助晚餐，冇諗過係超伏嘅。先唔講質素，講吓食物嘅種類，一般以為自助晚餐應該有嘅野好多都冇🥴熱食同冷盤都極少種類。d熱食菜式同大X樂嘅碟頭飯好相似。同埋唔知點解好多都係咖喱、巴東菜式咁樣。就連最基本嘅炒菜都冇，得一盆烚嘅椰菜花紅蘿蔔（不過佢寫話係炒雜菜）。冇果汁; 唔好諗住有咖啡機就有latte and Espresso, 咖啡機係出熱水同埋齋啡；茶包有兩種，都可以加檸檬沖杯檸茶嘅。雪糕當然唔係任攞啦，係佢裝俾你嘅。生果只有西瓜、蜜瓜同萍果。質素之低真係超乎我想像。大部份食物你望落去都唔新鮮。未試過食自助餐，連三文魚刺身都唔敢食。個粥係白粥，配料竟然係葱同榨菜嗰d。沙律吧無沙律菜，得幾種豆同埋一種貌似枸杞嘅菜葉。d豬扒、雞好硬。海鮮什錦嘅下蝦都係霉嘅。平時食自助餐唔會1 round 就唔想出去，仲要攞碗烚菜扎肉魚蛋食。呢個經驗真係好難忘🥴🥴要讚嘅就只有員工服務都尚算唔錯…Read More

見OpenRice有咁好嘅評價，所以去試吓。餐廳環境清靜，適合一至兩個人食個lunch, 休息下，傾吓計。員工全部係年青人，雖然唔特別熱情，但服務ok。不過食物嘅質素就有待改善。我叫咗個lunch set，包一片蒜蓉包，蒜蓉包又細片又硬。主菜係蒜蓉蜆肉炒意粉，份量細，意粉又硬又無味，蒜蓉好少，奇怪係加左大約一茶匙現成乾蒜，影響口感，也怪怪的。add on嘅芝士豆腐蛋糕（$30），有豆腐香味嘅，但芝士味就食唔出，而且都幾細件。整體來講，食物質素同預期有一段距離。…Read More

下午茶時間黎到呢間cafe，見到裝潢時尚，座位舒適，網評都唔錯就試下。食物選擇相當多，除左all day menu, 仲有tea set。我地叫左個牛油果炒蛋多士配蜂蜜綠茶。有半個牛油果，多士脆，算唔錯。驚喜嘅係個tea set麻曙流心多士，多士topping 係一個雪糕球，中間麻曙流心溫熱軟綿綿，而多士相當脆，三者配合相當好，十分美味，絕對值得一試。配一杯Earl grey latte都只係$58。而且食物擺碟好靚，絕不馬虎，值得一讚。…Read More

第一次光顧呢間餐廳，成間餐廳都係熊仔公仔，雖於公仔有啲舊，但對於小朋友來講仍然相當吸引。我地兩個人叫左個帶子risotto 同埋香草雜菌闊條麵，味道唔錯，價錢都算相宜，份量對於男士可能少一點。另外叫左個焦糖燉蛋，較遜色，焦糖太厚，所以不香脆，有點硬，而蛋卻不熱。我地叫左野等左超過30分鐘都未黎，先發現員工無落單。其實呢個年代，一個大餐廳，員工已經唔夠，仲靠人手抄寫落單，實在太落後。知道漏單後，員工連番道歉，都趕緊出番我地嘅食物，態度良好。整體表現不過不失，也可一試。…Read More

見咁多食評讚個燉湯，就去試下。叫左個花膠排骨燉雞湯套餐，除左燉湯，主菜係醋香排骨，加個灼菜，一杯飲品，一小碗飯同甜品紅豆仙草，承惠$119，價錢都尚可。個湯係正嘅，足料加上有椰香味。個醋香排骨都算大碟，味道都唔錯，但可惜只係微熱，個飯都係唔熱，大打折扣。小舖經營，事先整定都無可口非，但起碼要熱先啦。另外，order 同取餐都係自助，但枱面同地下都唔覺清潔過，M記乾淨啲。去到時得一個食客，兩個員工都在一起傾計睇電話，同佢所話嘅「米芝蓮」真係唔多對稱。…Read More

再一次光顧呢間玩具咖啡屋，仍然被老闆收藏嘅成千上萬大小玩具同埋休閒舒適嘅環境吸引。呢度係一個小型嘅玩具博物館，有不同種類嘅玩具擺設，就算唔係玩具迷，都會被吸引。食物亦相當有質素。今次叫左個vegan all day breakfast, 有半個牛油果，炒蛋，一塊多士，一個啡菇，一個蕃茄扒，薯角，加沙律菜，用料新鮮，亦十分美味，絕對適合女士們。我每次必叫嘅咖啡，質素亦唔錯。加上環境寧靜，店員亦很友善。由於cafe非身處旺區，顧客唔太多，我覺得係可惜嘅。但自私黎講，太多人可能就會破壞寧靜嘅環境😅😅不過我仍然希望向多d人推介呢間餐廳，因為真係做得唔錯!…Read More

一向係黃金海岸自助餐捧場客，因為食物種類繁多，環境舒適。鑑於疫情，久未光顧。近日疫情緩和，立即網上預約，見主題吸引，做和牛龍蝦，而且預約爆滿，所以好期待。但到場發現食物種類比以前減近一半。而且質素一般，特別是熱盤，甜豆炒帶子，甜豆是老的，牛肉餃子、薯餅是不太熱及硬的。加上全部由員工分發，難以選擇自己喜愛嘅食物同份量。而每位客人送半隻凍嘅龍蝦，亦唔見有吸引。我明白疫情下要保障顧客安全，所以改為員工分發食物，用咗不少資源，而無法提供多啲唔同種類的食物。但減少種類就要提升食物質素，如果真係貴精不貴多，相信顧客係可以接受嘅。唯一要讚嘅係員工，大熱天時在戶外執拾，照顧客人需要，大汗淋漓，但仍然彬彬有禮，服務周到。如果無任何改善，相信唔會再光顧。…Read More

星期五下晝tea time 走入呢間小小咖啡店，店舖好細，只得幾張細枱，但簡約文青佈置，感覺舒服。叫左個bagel 配牛油果，啡菇同炒蛋，加一杯Latte。bagel賣相相當唔錯，牛油果份量多，唔似好多cafe只得一兩片，啡菇配炒滑蛋十分美味，仲配左沙律菜，整體都好夾。latte都好香，呢個組合只係$80幾蚊，實在超值。但如果只係想怱怱填包個肚就唔好入去喇，因為出菜係慢嘅，但正正係咁先俾你可以享受下片刻寧靜，再慢慢品嘗美食。係個好適合一個人或最多兩個人休息下嘅地方…Read More

見到老虎堂賣甜品，諗住飲品咁受歡迎，甜品都應該有返咁上下，但係完全失望。叫左個紅豆芝麻湯圓，大就夠大碗啦，但係入面只係得兩三粒紅豆，稀到滾水咁嘅，完全唔覺得食緊紅豆湯。間連鎖海X粥店嘅紅豆沙都不如，兩粒芝麻湯圓甜得好過份。另外，個仙草+紅豆+波霸+芋頭，每種份量都好少，同鮮芋X實在相差太遠，兩碗加埋$90，真係完全唔值。加上店員兩邊走，等左成5分鐘都未有人，一定無下次。奉勸佢都係博心做好飲品算喇。…Read More

呢間黃大仙嘅人氣飯堂，果然名不虛傳。星期六中午時間有超多人等位。我哋叫左咖喱吉列炸蝦定食同滑蛋豬扒丼。先講過炸蝦定食，只係$59，包茶碗蒸，三片三文魚同埋一杯餐飲。真係從未見過咁抵，加上食材新鮮，味道相當唔錯。豬扒丼好大碗，豬扒都脆口又唔太肥膩。值得一提嘅仲有佢午市嘅無限追加，有茶碗蒸，炸蝦壽司，sashimi 大部份都係$9 ，另外追加一大碗關東煮都只係$18。真係十分化算。個味道絕對喺日本食堂感覺。唯一可惜係無晒甜品賣。但一定會再去。…Read More

黎到長洲除左必試芒果糯米糍，都離唔開要食下海鮮，沿海旁一列嘅海鮮餐廳，間間都拉客，話幾平幾抵真係好難比較，見OpenRice 呢間算少負評就即管試下，$268任揀四菜，揀晒海鮮都可以，我地揀左白灼蝦，豉椒炒蟶子，蒸扇貝，蒜蓉白菜。個蟶子濕濕碎碎，無鼓椒香味，唔覺係食緊蟶子。四隻扇貝每隻係好似個五毫子咁大，都無蒜蓉香味。不過二百幾蚊，一分錢一分貨，當食過普通嘅晚飯而唔係心目中嘅海鮮餐都可以嘅。似乎附近幾間都係差唔多。…Read More