找素真漢子's Profile

今日真漢子為大家介紹位於土瓜灣炮仗街嘅「早稻石磨腸粉」，特別鳴謝我的 vegan 朋友介紹我嚟食，真係冇介紹錯。😊星期日早上，好多人都仲訓緊覺，佢哋已經接單接到手軟，雖然人人都話香港飲食業巿道差，但似乎「是金子總會發光」係冇錯。🌟無論堂食定外賣都係先响門口落單，我就先比錢，但都見有啲顧客係食咗先埋單。素食腸粉款式有非常之多，真漢子就為大家試咗三款。3️⃣大家呢排成日詬病香港餐廳用預製菜嘛，呢度就即叫即做，不過咁啱我就遇著繁忙時間，所以等咗 30 分鐘，我諗平時冇咁忙，應該 20 - 25 分鐘都 ok。⏳💪🏻 健康上素腸 $25即係最基本嘅素腸粉啦，餡料有杏鮑菇，紅蘿蔔，粟米粒，脆肉瓜。其實呢個係個 base 嚟嘅，即係好似三原色咁，三款素腸都係咁演變出嚟。🎨腸粉真係好正，皮薄又滑，口感少少煙韌，但又唔會食擦膠或橡筋咁。豉油作為腸粉好重要嘅配件，當然都好好味啦。更驚喜係佢哋嘅蒜香辣醬，其實係辣椒油，小辣而多香，各位素友就算唔食辣都要加少少試吓（不吃五辛者除外）。🌶️🍄 姬松茸上素腸 $28即係加咗姬松茸嘅素腸粉，的確係濃味咗，加多 $3 都抵嘅。☺️🌼 蟲草花上素腸 $28由於蟲草花味道冇咩特別，但幾爽口，所以呢個腸粉口感較豐富，但除外都係同健康上素腸分別不大。😅幫襯腸粉可加 $8 要一樽石磨豆漿，豆味不覺得特別濃，似一般街買到豆漿嘅味道，但 $8 咁大樽都係必叫嘅。😉堂食有座位可供約十人坐，但多數人都係外賣多。現場見到有個小朋友，以為佢係食客個仔，原來响度幫手嘅，佢又醒目，有禮貌，又唔會好老積，真係好生性，唔好話佢父母，連作為食客嘅真漢子都倍感安慰。👦🏻💚…Read More

今日真漢子為大家介紹位於尖沙咀 K11 購物藝術館嘅敍 . 小麵，為香港首間蘇州麵店。開得响 K11 以為好貴啦，唔係喎，價錢係非常親民。🫰🏻餐牌上嘅素食選擇出奇地多，真漢子當然盡試啦，今次叫咗：🍜 蘇式湯麵（配兩款或以上澆頭優惠價）雖然呢度仲有一款素麵係「素雜錦煨麵」$60，但蘇式湯麵係呢度招牌菜，當然要試啦（注意麵係蛋麵）。湯麵原價要 $60，配兩款以上澆頭特價 $49。😃澆頭即係陽春麵上嘅配料，有冷亦有熱澆頭，咁啱都有素嘅選擇喎。我揀咗一冷一熱配搭，麻香拌萵筍$19 同紅炆大素雞 $39。🥬🐥麵條仲可以揀「蘇式陽春麵」或「姑蘇闊條麵」，我就揀咗加菲貓都鍾意食嘅闊條麵。湯底本身係豬骨湯或雞湯，落單時可選全素嘅菇湯。🍄個麵嚟到時，見到其實係比一般上海麵粗少少，麵質都算靚，有啲咬口，而且麵嘅份量夠多。湯底初初食比較清淡，但起碼放心冇比錯肉湯，而且慢慢食開始食出菇湯嘅鮮味，因為唔咸又唔油，所以可以放心暢飲。👅麻香拌萵筍望落細細碟，但都幾襟食。萵筍非常爽脆，有淡淡嘅麻油香味，表面仲加咗少少黑白芝麻。素雞好少食到好食嘅，呢個紅炆大素雞就超哂班。一咬落去，竟然係煎到表面好香脆，而且用醬油同蔥炆到好入味好鮮甜，除咗配麵，相信配白飯都好正。😋🫖 凍荔枝紅茶 $42呢個茶真係境界好高，此話怎講呢？一般荔枝茶一定有多少甜味，先令你飲出荔枝味。但呢個茶，端到埋個鼻度未飲都已經勁香荔枝味，但飲落去好似全冇甜味咁，但你又飲到佢濃濃嘅荔枝味 + 茶味。好好飲呀，究竟係點做到㗎？😂 ⚪ 蘇式素菜包 $32有兩個，個包又係好好食，非常鬆軟，味道亦好好。真漢子唔知正宗蘇州菜係點，但感覺都係類似上海嘢。我幾鍾意呢度環境幾靚又坐得舒服，同埋價錢確係抵食。下次經過尖沙咀不妨嚟試吓。☺️…Read More

純素無五辛餐廳「愛家」响九龍灣重開，大家期待嗎？利申真漢子之前係未食過愛家嘅，今次去睇下有咩好嘢食先。😋Open Rice 資料話九龍灣 B 出口行 11 分鐘，今日熱成咁，真係令我好擔心呀。响港鐵站睇清楚，Eastmark 應該係 A 出口先真喎。跟住其他人一齊行，原來往 MCL 戲院行多一陣就到喇，路程 5 分鐘度啫。嚇死寶寶了。😱咁啱仲撞到 Tempehola 嘅兩位朋友，同埋寄賣台灣「藍天畫布」有機棉嘅 Macy 添，佢哋原來都係愛家嘅長期支持者嚟㗎。💪🏻實體餐牌好少嘢揀，QR code 嘅餐牌多好多，我都 cap 哂比各位靚仔靚女睇。不過似乎好多食品都未 ready，大部分都寫住「已售罄」。真漢子今次試咗：🍜 越式悠樂湯河 $68 送飲品，加純素荷包蛋 $16全日套餐劃一 $68（選擇困難嘅朋友可以少一個考慮因素 🤭），送指定飲品（除咗圖中嘅楊梅汁，仲有熱羅漢果蜜）。成日覺得素食餐廳，尤其純素嘅，價格都定得幾貴，但呢個價錢真係好抵食，仲要係旺區喎。👍🏻餸有三塊扎肉同啲紫菜，配埋九層塔同青檸。Macy 話扎肉嘅青色係因為用荷葉包住整嘅，不過我就食唔到荷葉味，似普通素扎肉。湯底用紅蘿蔔，沙葛等材料淆製幾小時，所以飲落都幾清甜。河粉好爽滑，而且份量好多。😙對純素荷包蛋印象，真漢子只係食過佛友源嘅版本，雖然我係「佛粉」都覺得幾把鬼，所以呢次都不抱期望。但食落去，無論外觀，味道同口感都係勁似真嘅煎蛋，而且最重要係堅好味。據知蛋黃係綠豆造，但個蛋白就不得而知。$16 雖然少貴，但未試過嘅素友值得試試。☺️送嘅凍楊梅汁，雖然免費，但一啲都唔 hea，唔會太甜或太酸，咁酷熱嘅天氣飲都幾清新同消暑。😎🧋凍植物奶茶 $20之前响 Green Common 飲過，覺得唔係好掂，見呢度有就點嚟試下。嚟到見到個樣都伏伏哋，飲落就...鍾意飲港式奶茶嘅固然覺得風馬牛不相及啦，但當佢係一杯唔關事嘅飲品，都講唔上好飲。😥🧁 朱古力蛋糕杯 $25都幾好味，朱古力味幾濃，蛋糕夠鬆軟，又有啲朱古力碎响入面。🍫餐廳另一賣點係送餐機械人，如果有食過一粥麵，Oliver's Super Sandwiches 嘅都唔陌生啦。不過呢度果個就著 tuxedo 嘅，幾高檔。見識過送餐機械人嘅都知佢哋幾論盡啦，一係就未送到就當自己到咗，一係就停咗响度唔識走，今次都見到呢啲情況。我諗呢個階段，送餐機械人都係帶比大家歡樂多過實際用途嘅。🤡🤣…Read More

早前尖沙咀結咗業嘅「齋啡」，而家响長沙灣開返喇，真係戥長沙灣嘅街坊高興呀。今日第一日試業，真漢子嚟試吓啲嘢食同咖啡先。☺️其實呢度前身都係 cafe 嚟嘅，叫做「白千層」，佢哋裝修有個我覺得好讚嘅特色，而齋啡都有保留嘅 - 就係靠牆有幾個位有張好窄嘅枱（類似上 lecture 果啲但仲細張啲），剛剛擺到一杯咖啡同一件蛋糕，啱哂 I 人毒自飲啡同靜靜地睇吓書。相反附近有間叫 Contrast 嘅 cafe， 個鋪同裝修夠哂張揚同浮誇，比較啱啲 E 人打卡同 socialize。😎咁耐冇食，梗係試吓佢哋最招牌嘅 all day breakfast （$138）同紅絲絨蛋糕（跟餐加 $48) 啦。另加一杯 flat white （原價 $48，跟餐減 $20）。☕佢哋嘅 all day breakfast 係少數可以食得飽嘅，我意思唔係啱啱夠食，而係捧住個肚果種。我鍾意佢哋生果嘅比例好多，因為我愛食生果多過沙律菜（當然沙律菜份量都唔少）。😂一般 adb 嘅麵包都係細份啲，但呢次個酸種麵包勁大件，而且個鷹嘴豆醬超好味，食完好滿足。另外 keep 住有 impossible 豬柳配純素芝士呢個特色。🐽🧀唔少得係又靚又好食嘅紅絲絨蛋糕啦，咁耐冇食，覺得好似仲好食咗。咖啡質素當然高啦，同埋各位素友如果慣咗口叫轉植物奶，呢句都可以慳返，因為呢度嘅奶一定係燕麥奶嚟嘅。🥛長沙灣區之前雖然都有素食餐廳，例如佛友源同三寶素食，但素食 cafe 自 Cafe Imagine 之後都後繼無人了，所以今次真係值得慶賀。題外話呢區嘅 cafe 密度真係超高，計埋齋啡，非集團式嘅都有 6 間，唔信下次過嚟數吓。🤣…Read More

話說真漢子响 OpenRice 見到大角咀有間叫「思思茶丼」嘅餐廳，客人嘅圖片有素食之餘仲十分精緻，於是有一晚收工就去睇下（當時資料寫營業到晚上八點）。😙餐廳位於大角咀比較偏僻嘅地段，睇住地圖終於搵到，抬頭一望，心諗：「亞視，呀唔係，Bar Pacific 嚟嘅？」。問咗店員都表示冇飯食，唯有走啦。😥七月份佢哋改返啲資料，星期一至五同星期日都係開上午 11 點至下午 4 點，星期六全日休息。所以今日再嚟睇下。果然見到「思思茶丼」喇，巧開針。🥰招牌當然係丼飯啦，$55 至 $108 都有，豐儉由人，包溏心蛋，涼菜及即磨炭燒咖啡/麥茶。素食丼飯表面上只有椰香咖哩素肉絲丼 $55 ，但睇真啲，某啲丼飯都可以轉成素版嘅。🧐例如牛蒡扒肉燥丼，味醬滷百頁豆腐肉燥丼，肉燥都可以轉為咖哩素肉絲。同埋就算你叫其他肉燥丼，肉燥都可以轉為素肉絲（或者走肉燥減 $10）。所以就算你唔係食素，純粹唔食豬肉（例如印尼姐姐），或者好鍾意食咖哩，都可以咁樣轉法。↪️雖然丼飯係日本嘢，但呢個咖哩唔係日式（對我嚟講係好事 😂），味道偏向馬來咖哩口味，好香辣，但又唔會太辣。不過我問咗店員，咖哩係有奶嘅，肉絲係台灣產品，純素無五辛。☺️肉絲唔係扮肉果種，有啲似腐皮扭成條狀，食落好彈牙。配料仲有洋蔥絲，紫菜絲，木耳絲，冬菇絲，腐皮絲。就連溏心蛋都好好食，所有嘢都係水準以上。👍🏻個丼飯唔要飲品或湯，可免費轉成一份細嘅本地水耕菜藜麥沙律（單點 $38），醬汁可選柚子油醋汁或和風胡麻醬。蔬菜都十分新鮮，而且雖然話細份，其實份量都相當多，大胃嘅素友可以挑戰吓。😉小食試咗「香煎上素牛蒡扒」 $53，都幾大塊，牛蒡扒本身都有味道，而上面仲加咗啲燒汁同白芝麻，食落幾香口，如果鍾意飲兩杯嘅，口淡淡用嚟送酒都唔錯。🍻 （問咗牛蒡扒都係台灣產品，亦係純素無五辛）。由於要咗沙律冇飲品，真漢子就單點一杯美式咖啡。佢哋採用 100% Arabica 嘅咖啡豆，大大杯凍美式咖啡都只係 $28, 好高質素又抵飲，而且坐得舒服（當然啦，係酒吧嚟㗎嘛 😆），好過同人逼 Starbucks。而且單點任何飲品都可以特價加一款小食，變相自製茶餐。☕幾欣賞「思思茶丼」呢個 idea - 酒吧反正日光日白唔開門，用嚟做一間風格完全唔同嘅餐廳，成個能量都唔同哂，又唔會浪費咗啲地方同租金。當然最開心係素食選擇多之餘，嘢食又非常好食，同埋性價比超高。衷心希望佢哋可以愈做愈好呀。🥳👏🏻後記：食食吓有個著住「思思茶丼」圍裙嘅女士經過，我同佢打招呼，佢問我係咪食素，同覺得啲嘢好唔好食。我話好食呀，你係老闆？佢話佢係雜工 🤣。我 Google 吓思思茶丼，發現原來佢就係「媽子廚房」嘅主理人喎，仲上過電視添，失敬失敬，媽子你好呀，下次再嚟試你嘅手勢。😊🙏🏻…Read More

真漢子去咗「綠色心活館」每個月一次嘅體驗日，亦都係我第一次嚟呢度喎。當然要試吓佢哋體驗日先有嘅 raw food 廚師發辦啦，食物係由老闆娘 Megan 主理。👩🏻‍🍳Raw 壽司午餐 $78，raw food 當然唔會用飯啦，原來係用咗椰菜花。餡料同醬汁望落似沙律，食落去都有啲似，味道唔錯，但就唔係好食得出個汁係用咩整嘅。佢另外有個汁點壽司用，甜甜哋，雖然唔點都有味，但點咗又覺得幾夾喎。可惜個紫菜有啲淋咗，否則就更完美喇。😅加 $38 有個前菜 ，係涼拌海茸頭同海竹笙，份量好多。海茸頭略為硬少少，如果浸軟啲就更入味。海竹笙就索哂汁好好味。😚加 $25 有杯菜汁，係羽衣甘藍，蘋果，加咗啲檸檬汁同薑汁打成，夠哂養生。因為加咗薑汁所以飲落幾辣，店員話加咗薑就冇咁寒涼，咁又係，尤其食素嘅都係女士為大多數嘛。💁🏻‍♀️加 $68 試埋個甜品，係 raw 版 tiramisu 。雖然外型同味道都唔似 tiramisu ，但確係好食，甜度適中又天然，所以食哂都冇咩罪疚感。🤭綠色心活館每月都會搞一次一連三日嘅體驗日，平日就有生機純素，健康同養生嘅產品發售，例如有機綿衫褲，風乾小食，raw 朱古力等。🌱💪🏻當日仲遇到「納豆天貝媽媽」Kitty，非常熱情咁介紹同比我哋試食好多佢精心製作嘅天貝同生機純素麵包，樣樣都好好食，不過為配合煮食需要，我就買咗 Kitty 嘅靚靚味噌（$198），好期待快啲整出嚟食呀。🤩素友們記得密切留意住佢哋嘅 social media 睇吓下個月嘅體驗日係幾時，去食純素美食同買高質嘅健康產品喇。😋🛍️…Read More

今次真漢子去到 Fish & Chick 試吓佢哋嘅素食版「炸魚薯條」 fish and chips 。不過先戴頭盔，由於佢哋主打係食真嘅魚同雞，所以其他食客都係食肉為主，而裝修都係圍繞住呢個主題。😅Fishless fish and chips 散叫要 $110，午餐價 $98，包頭盤同飲品。汽水或檸檬茶免費，其他要加錢，我就加 $20 要海鹽檸檬梳打。🍸頭盤素食選擇有炸鮮蘑菇沙律，有兩粒新鮮炸起嘅蘑菇，外脆內多汁，點少少沙律醬食更能帶出鮮味，非常開胃。沙律菜都幾新鮮，跟咗啲油醋汁。🥗素食 fish and chips 之前 Green Common 食過，都幾好食，但呢間始終係專家，冇得傾，真係做得好啲。魚柳炸得脆又唔油膩，選用咗 Omni 魚柳，「肉質」好嫩滑。🐟魚柳上面加咗粗嘅海鹽，雖然佢跟咗茄汁同他他醬，但我覺得最好食係唔點醬食，就咁有啲鹽咁食就最鮮味。😋薯條係粗身款，炸得恰到好處，唔會太燶，本身都係加咗鹽，所以唔點茄汁都夠味，不過點少少茄汁食就開胃啲。🍅海鹽梳打竟然用 1664 杯裝喎，雖然冇酒精，不過飲落都有啲 mocktail feel，而且檸檬同海鹽呢個配搭除咗清新，都响食咗咁多炸嘢之後帶來解膩嘅作用，非常推介。🥳真漢子問店員佢哋嘅炸鱈魚柳漢堡可唔可以轉素魚柳，店員就話佢哋暫時冇呢個選擇，希望餐廳睇到可以考慮吓啦 🙏🏻。另外响肉食素食版本都有提供嘅餐廳，有時都驚唔知會唔會比錯咗，始終而家技術做到真假難分，或者都係食返芋頭魚安心啲？😂😂今次去嘅係將軍澳 Monterey Place 嘅店，佢哋上環同西環都有分店，而且咁啱都係近海喎，係咪特登嘅呢？不過將軍澳店附近有 DON DON DONKI ，食飽飯可以行吓街同 shopping，正呀。🐧🛍️…Read More

「LE-TA-SU 一人一鍋」作為日式火鍋店，除咗牛同海鮮之外，難得佢哋都為素食者留咗一個位置，仲係 vegan 嘅添。🌱12 種野菜套餐 $78，包括有蓮藕，甘筍，粟米，本菇，金菇，綠毛菜，心内美蘿蔔，大白菜，油麥菜苗，甘筍，南瓜，冬菇。兩款可選湯底都係全素嘅昆布湯底，一款寫住「回甘味」，我冇問店員，但睇返佢哋 社交平台 應該係除昆布外，仲加咗綠茶茶葉嘅意思。🍵主食可選白飯，讚岐烏冬（加 $6），或葛絲（加 $6）。前菜/鍋伴可選燒豆腐 4 件，或芋絲（加 $5）。可追加單品，飲品同甜品，單品全部都有肉我就唔 show 出嚟喇，呢排我慳緊錢所以亦冇追加任何嘢。😂我太太叫嘅係非素食套餐，但佢嘅野菜盛合就有得揀 LETASU 野菜盛合，或本地農場野菜盛合喎 （加 $9）。12 種野菜套餐果啲菜應該唔係本地農場菜嚟嘅，不過單點 $38 亦可以試到（如果未售罄的話）。個湯清清哋得嚟都有啲鮮味，加咗綠茶葉係有啲甘甘哋嘅茶味，而且茶葉可以當埋菜咁就咁食。蔬菜都幾新鮮，份量夠多，食埋白飯係非常夠飽。☺️醬料方面，日式火鍋落胡麻醬一定冇錯㗎啦，大路之選。真漢子亦都試咗柚子醋，有啲似食緊沙律汁，唔可以講係鍾意，叫做食厭咗胡麻醬嘅另類選擇啦 😆。另外佢哋有蜂蜜醬油但我冇試到。豆腐雖然叫燒豆腐，但食落冇咩味，我亦都唔敢肯定係咪已經熟咗，不過我係就咁點胡麻醬食，感覺似街食到嘅胡麻醬豆腐，都幾好味。我相信佢哋都係預人可以擺埋落鍋度煮嘅。😀叫呢個餐佢哋會擺低個 vegan 牌，相信係响加湯時識別，因為佢哋會另外加滾水比你。呢個安排都幾細心喎。😊餐廳環境幾舒服，位與位之間都唔會太迫。個爐嘅控制台响枱邊，望落好似有幾段火力可調較，但就算較細咗啲水都係滾到彈吓彈吓，令人有啲無所適從。😂限時食 75 分鐘，收加一，只接受電子支付。我哋去嘅係沙田店，唔知係咪所有分店都有提供呢個素食套餐，大家去之前記得問清楚先呀。😙…Read More

今日真漢子介紹位於荔枝角半島大廈地下嘅「大員」，係台式餐廳，有幾款素食供應。😉🍄 椒鹽杏鮑菇，配前菜，白飯及飲品 $68作為素食者，椒鹽杏鮑菇都食唔少啦，但呢碟係我食過最好食嘅。之前食嘅都係切塊炸，但呢度就切成幼絲，薄薄咁炸咗一層。食落去首先食到好惹味嘅椒鹽味，仲有啲辣辣哋嘅香脆蒜粒，好過癮。咬到中間杏鮑菇軟得嚟有少少彈牙，完全係食緊椒鹽魷魚鬚嘅感覺。🐙埋單同老闆講起，原來佢哋真係想模仿椒鹽魷魚鬚，所以先咁樣整嘅，咁你哋真係幾成功呀。👏🏻老闆仲好細心，驚炸杏鮑菇比較乾，送咗啲醬油膏比我送飯食。佢話台灣醬油膏一般用豬油整，但佢哋就用豆油，所以素食者可以食，不過就有蒜。我想講個醬油膏撈白飯食真係超正，冇餸都可以食幾碗飯。😋🍲 鍋邊素滷味，配前菜，白飯及飲品 $58鍋邊素嘅意思即係响葷食素食都有嘅菜式中，揀素食嚟食。呢個菜式個名叫鍋邊素，而事實佢哋個滷味汁都有煮過肉嘅，所以絕冇違反商品說明條例 😂。如果唔接受鍋邊素嘅素友可以略過。🚫其實個菜式嚟到，大部分餸都並冇汁浸住嘅，係個底有少少汁，而且啲汁都冇話好「肉感」，所以分分鐘比大家去兩餸飯店食鍋邊素嘅感覺仲純淨啲。🌱賣五十幾蚊但完全冇將貨就價，有好多餸包括：百頁豆腐，豆乾，海帶結，杏鮑菇，酸菜，薑絲。酸菜食落唔太酸，但就辣得好開胃。百頁豆腐軟硬適中，海帶結有咬口之餘，調得好好味，非常好送飯。滷杏鮑菇食落涼涼哋，滷得入味而且充滿麻油香，切成三角塊狀，所以咬落去好彈牙。☺️望落去以為係芽菜嘅薑絲，拌埋其他嘢食竟然幾醒神。感覺呢個鍋邊素所有配料加入去都係有諗過，而唔係求其拼埋一齊咁簡單。👍🏻🍜 涼拌麵 $57呢個價錢未必人人一樣嘅，因為視乎揀咩餸。素食嘅餸有：🥬青菜🥒青瓜絲🌽玉米粒🥚蛋絲真漢子揀咗青菜，青瓜絲同玉米粒。上枱見到有蛋絲同半隻溏心蛋，我相信因為青瓜絲，蛋絲同溏心蛋係個 base 嚟嘅，如果唔食我諗可以同店員預先講聲。🙋🏻‍♂️個麵份量超大，食哂飽咗成晚。麵質都算幾靚，咬落有少少彈牙。麻醬加咗少少醋，所以食落幾開胃。呢個拌麵雖然冇上面兩個餐咁驚艷，但就大件夾抵食。😙呢度嘅餐大部分特色飲品都唔使加錢。同而家好多新開食肆一樣，飲品係預先入好樽，雖然係咁但質素都唔錯。台式餐廳必點嘅冬瓜茶有，白桃烏龍茶有，蘋果泡茶亦有。佢哋仲有台式蛋餅，不過只限早餐，下午茶，同星期六日先供應。😅真漢子幾欣賞佢哋開到晚上八點，因為好多工商業區類似餐廳主要做 office 客，所以好多都六點前就收鋪。開到八點就更多街外客都可以試到啦。🥳…Read More

呢日真漢子同太太去咗尖沙咀北京道一號嘅「功德林上海素食」，由於係食飯順便探店，所以點嘅菜式未必係最招牌果啲。我哋今次點咗：🥣 竹笙百合北蟲草燉湯 （位）$75飲落非常清甜，冇話加咗太多調味，感覺味道都係來自湯料嘅鮮味，所以都幾真材實料。👍🏻🍲 京滬酸辣湯羹（位）(有蛋）$60打正招牌叫上海素食，但呢個酸辣湯就唔算特別好味。酸同辣度都唔係好夠，而且個素蝦咬落去竟然有啲「死實實」 😑，其實唔加素蝦會更好。湯料仲有竹笙，筍絲，木耳。🐮 沙嗲金菇肥牛煲 $118餐牌上有隻辣椒，估唔到真係幾辣喎。我太太喜歡佢嘅素牛肉，覺得好滑，我都覺得滑，但比較偏好有咬口啲嘅口感。味道上呢個煲冇令人失望，非常入味，亦令人好想叫飯食。😂🐟 羊肚菌扒鱈魚 （有蛋）$128羊肚菌其實响另上果碗汁度，汁基本上係素蠔油調配嘅。鱈魚係炸咗，所以蛋應該用咗响炸漿嘅部分，除非唔係。咬開舊魚睇下咩樣先？咦，豆腐嚟嘅？講真舊炸豆腐好好味，尤其點少少羊肚菌汁食，真係外面香脆，入面嫩滑。但點解唔開心見誠講係炸豆腐呢？真漢子覺得期待食素魚嘅人未必好多，因為間間餐廳用嘅素肉質素都好參差。反而好多人都鍾意食豆腐㗎嘛（無論是否素食者），尤其外國人食中式素食，好多時都會點豆腐嘅菜式（我睇返餐牌英文都係寫 vegetarian cod fish)，都未計有啲人好唔鍾意食素肉，所以咁樣命名個菜式真係唔太明智。😅食咗咁多濃味菜式，見佢哋鮮榨果汁就叫嚟飲吓。$38 杯可選蘋果汁，或蘋果汁拼 西芹/青瓜/胡蘿蔔汁。一樣價錢梗係揀雙拼啦，太太揀咗拼西芹，我就揀胡蘿蔔。但竟然係啲部長直接响個 counter 即榨比你個喎，咁搞笑嘅，好「綠野林」喎呢單嘢。🤣蘋果汁加胡蘿蔔汁毫無違和感，而且都同時飲到兩種汁嘅味道，非常好味。太太嘅西芹汁都唔錯，冇咩草青味，十分清新。😙埋單五百幾蚊，送咗兩張 $100 卷可以消費滿 $500 用一張（適用於尖沙咀或銅鑼灣店），兩個月內使用。遊客區嚟講呢個價錢都差唔多啦。😀…Read More

大家樂新出咗「烤大啡菇葡汁雜菜焗飯」，以往大家樂嘅素飯都係有素肉嘅，今次呢款就全用原形食物，抗拒素肉嘅朋友今次可以食喇。不過同之前嘅款式一樣，今次都係蛋奶素，而且有洋蔥。🧅個飯貫徹以往用炒底嘅紅米，即係有蛋啦。有素友可能唔鍾意紅米因為嫌佢硬，我自己就幾 buy ，因為有啲口感，撈埋個汁幾好食。葡汁未必人人鍾意，我就幾喜歡嘅，而且佢冇話太重椰奶味。🥥單點 $52，套餐配飲品 $59，以足料程度同份量都算對得住個價錢。蔬菜種類豐富，有洋蔥，椰菜花，茄子，蕃茄，脆肉瓜。大啡菇就加上啲芝士焗。難得地所有食材都冇話焗到好乾，全部食落口都好 juicy ，可能我食果陣係剛剛焗好，真係非常出色。😋以往嘅焗素豬或者焗素肉醬意粉，食到個底都好油，但呢次竟然冇乜油。好少食到一個焗飯係用咁多蔬菜而冇素肉，而且芝士唔係好多，所以少有地食焗飯係幾乎零罪惡感。☺️作為集團式快餐店，大家樂可以 keep 住出素飯而唔係 hea 做，都算幾有心，尤其响香港找素唔算十分易，如果餐廳可以將素食做到「好靚，好食，好飽」當然好啦，但有時我哋素友要求低到响街搵到餐食就好開心喇，你哋話係咪？😂…Read More

今次真漢子分享嘅係土瓜灣嘅昇麵館，係一間車仔麵鋪。本身車仔麵嘅餸都會有素食選擇，但佢仲多咗啲素料可以揀喎，一齊嚟睇下。👀首先食湯麵大家都關心個湯底係咪素，佢哋有兩款素湯底揀，分別係蘿蔔湯同蕃茄湯，我就揀咗蘿蔔湯。🍲餸方面，基本果啲冬菇，蘿蔔，菜就唔講啦，最特別係有一系列素肉嘅餸：🐟 素魚蛋🦁 素獅子狗🐮 素牛丸🌭 素香腸 各 $13。响 social media 問過店方佢哋都係冇蛋奶成份。真漢子揀咗比較少食到嘅素魚蛋同素獅子狗，加個酸齋，麵就揀咗粗麵。🍜先試魚蛋同獅子狗，非常彈牙，亦同真嘅好似，似到爭啲想搵人問係咪比錯，但其實佢哋冇真獅子狗賣，真魚蛋係陳皮魚蛋，所以應該冇錯啩。😂個麵煮得比較生，份量唔算太多，都夠食嘅。個酸齋正常發揮，不過有啲後悔叫咗，因為撈埋落湯度，有咗酸齋啲汁變咗試唔真清湯嘅味道。但就咁飲啲湯都唔太咸或油，幾夠味嘅。😀另外點咗炸素鯪魚球，通常素肉炸咗味道或口感都變得自然啲冇咁假，呢個都唔例外。新鮮炸出嚟熱辣辣，但完全唔油膩，非常好味。食落唔會好粉，細細粒但夠彈牙，我覺得係必食之選。👍🏻店內電視除咗一邊播住電影「食神」之外，另一個電視播住佢哋嘅資訊。其間都有素食相關嘅，例如素食選擇，關懷鄰里素食卷等。對於肯出力推廣素食嘅餐廳，絕對值得支持吓。💪…Read More

回顧返早前同一大班素食朋友嘅聚餐，今次揀咗北角嘅「素之樂創意蔬食料理」，亦係我最愛嘅素食飲茶酒樓，有冇「之一」呀？冇 😆（以下如冇講明就係純素）☘️我睇返我上次話佢哋腸粉係世界級喎，上次食嘅係叉燒腸，今次試蝦腸，個腸粉仍然係好高質，啲素蝦又爽口。講開蝦當然唔少得蝦餃，睇啲相都知有水準，脹卜卜咁，隔咗咁耐睇返都餓。😂 食厭咗傳統口味腸粉，又可以試吓松露雜菌腸粉，菇味好香濃，唔使點太多豉油都好好味。有咩好得過食一籠好食嘅燒賣呢？就係食兩籠喇 ✌🏻，仲要唔同口味，分別係魚翅燒賣同松露燒賣（都係奶素）。魚翅燒賣接近傳統口味，黑松露 fans 就必試松露味啦。🍄滿足完對點心嘅渴求，試吓啲小菜先。個燉湯好鮮味又足料，飲落感覺好滋補。蜜汁脆鱔我覺得必叫，其實係菇嚟，但食落真係幾似鱔，非常有特色。👍🏻招牌糖醋咕嚕（奶素，可改純素）同黑醋猴頭菇（奶素），簡直係哈林同庾澄慶，好少一齊出現，今次竟然同框，真係好難得。咕嚕肉口感好似真嘅版本，而且好爽口。另外嘅魚香豆腐，屬於「味來免治肉」系列，係結合咗魚香茄子同麻婆豆腐於一身嘅創意料理。🌶️除咗嘢食好味，值得一讚呢度嘅員工服務超好，有去過食嘢嘅朋友都會知道啦。💚…Read More

今次介紹中環新開呢間 Servo，位於安蘭街，前身係 Moxie ，餐牌上有唔少素食選擇，包括 vegetarian 同 plant based 。😊由於不是位處最旺地域，餐廳感覺幾 chill，店舖設有吧檯（有酒飲果種），正常方枱，亦有兩張望街圓枱仔（可以睇下啲網紅打卡 🤣🤣）。真漢子試咗幾樣嘢，都屬純素 plant based ：☕ 一「杯」湯配烤意式香草麵包 Cuppa soup, toasted focaccia $68店員先提醒係蕃茄湯，我諗可能有啲怕食酸嘅人唔知，叫咗後悔？我就非常鍾意。首先佢個湯超熱，熱到可以淥麵果種。個湯食到好多蕃茄蓉，當然帶少少酸，但好鮮味。除咗相片見到嘅香草，入面仲加咗啲松子仁，幾特別。😃🥞 蕃薯班戟配雜莓醬,英式腰果蛋奶醬,楓糖漿Sweet potato pancakes, berry compote, cashew anglaise, maple syrup $88Pancake 要等大約 15 分鐘度，蕃薯 pancake 第一次食，本身唔太甜，烘到外面微脆，入面煙煙韌韌，幾得意。面頭嘅雜莓醬味道當然最搶，唔想太重口味可以點吓腰果蛋奶醬（個名嚟啫，冇蛋奶嘅）同楓糖漿一齊食。😋🥪 烤三文治配沙律，洋薊, 西班牙鷹嘴紅椒, 羅勒青醬Toasties served with house salad, Artichoke, piquillo, basil pesto $88醬汁唔知點解食落有啲腐乳味，但唔係伏果種，而係幾開胃。個三文治望落好似好燶，但食落係正常。個沙律用咗啲泡菜，但唔記得問係咪純素嘅泡菜，sor 😐。而我都唔肯定佢哋係咪每日嘅沙律都係呢個配搭，如果有食開嘅素友可以留言分享吓。🙏🏻適逢復活節，佢哋推出應節嘅 homemade hot cross bun，盛惠 $48 一個。店員話係 vegan 嘅，用 soy milk 造。我果晚同外籍英文老師講起，佢話細個係成日食嘅，但就唔係咩貴嘢 🤣，同我傾開都好有童年回憶咁話。而真漢子就第一次食，麵包好新鮮，熱辣辣，仲送埋好好味嘅紅梅醬添。🍒飲品方面試咗凍 latte $38（冷熱同價），開得响咁多西人嘅中環，咖啡當然優質啦，而且轉豆奶或燕麥奶唔使加錢。🥛想健康啲亦可飲 smoothie & shake，我試咗呢個香蕉, 椰棗, 開心果, 杏仁奶, 亞麻籽 （Majoon - banana, date, pistachio, almond, flax seed），咁大杯又真材實料，都只係 $55，比好多其他區嘅 cafe 都仲要平，非常推介。💯佢哋 社交平台嘅 story highlights 餐牌有 lunch，但由於真漢子一次去係朝早，一次去係兩點半後，所以見唔到呢個餐牌。🥲特別鳴謝素友提起，我先認識呢間餐廳，否則就冇呢個 post 嘅出現喇。😆…Read More

今日真漢子嚟到尖沙咀北京道嘅一森素食，地址係環球商業大廈二樓，就係 iSQUARE 對面。同一時間有一班外國遊客都特登上嚟食素（可能參考 HappyCow?），佢哋見到個門口都一臉懷疑，呢度就係素食餐廳？🤔之前睇咗 「青 BB」 YouTube channel 條片，知道全店都係純素嘅。☘️戇居居咁揮手叫人寫單，先知係自己去收銀買飛 😅。真漢子今次試咗：🐥 椒鹽香酥雞（5 件）$18Sorry 我想講咗個例湯先 🤣，個湯應該係跟炒粉麵飯送嘅。碗湯望落平平無奇，但飲落去熱辣辣之餘，仲好夠味，真係同青 BB 條片咁講，有老火湯 feel。通常素食餐廳嘅例湯一係好淡，一條就偏甜，但呢個例湯有久違嘅茶記例湯 feel（當然個湯好味同係咪健康冇掛鈎啦）。🤩個椒鹽香酥雞冇想像中咁惹味，但亦代表冇咁咸同熱氣。個素雞肉質唔似雞肉，反而有素蠔嘅 feel，即係偏淋冇咩彈性咁。炸粉好薄，食落外脆內軟，雖然唔似炸雞，但味道都唔錯。😋小食方面呢度仲有齋滷味，不過就唔係雜錦，而係分開甜酸齋，咖哩齋，齋鴨腎咁賣，各 $13 一碗。🥣🍜 竹笙羅漢齋炒麵 $69我就好鍾意食羅漢齋炒麵嘅，所以一上枱見到個賣相就知唔算好好喇。通常食開係個脆麵响底，啲汁淋响面㗎嘛，咁就按自己喜好撈適量嘅汁食，視乎想食脆啲定淋啲。但呢個啲麵已經浸哂落啲汁度，所以脆嘅麵大部分都浸淋哂，食落冇咁香口 😕。配料都算多嘅，有竹笙，西蘭花，冬菇，支竹等。炒粉麵飯响呢度係最貴，貴過小菜。🤑🍆 煎釀三寶：茄子，三色椒，豆卜 $53所有小菜一律 $53，加 $10 可轉套餐就有白飯同例湯。豆卜好似炸咗好耐咁，好硬，唔好食。三色椒好啲，茄子感覺係新鮮炸，最好味。😀由於第一次食，所以保險起見已經盡量揀餐牌上有 👍🏻嘅菜式先叫，不過炒麵同煎釀三寶都唔係好得。食完諗會唔會反而快餐會好食啲？性價比又高，$33 單點，$39 有埋湯。小食又係通通十幾蚊有交易，呢個價錢深水埗區都唔得，真係好癲。🥺其實就算唔係素食者，响尖沙咀平平地食個飯都唔係容易，點會估到尖沙咀，仲要响正 iSQUARE 對面，可以 $40 唔使食飽飽。大家記得 save 低呢個 post 下次嚟食喇。🤗…Read More