TheZooKeeper的個人專頁

朋友買來蛋糕，地點關係，就買左龍島的。龍島的西餅一向比較少食，就試一下。看起來第一個感覺係造型可愛的，好落本，因為買一個甜品杯，係連埋一個瓷質的杯仔送埋俾你，杯仔係幾厚身實淨的，絕對可以重用。講左咁耐，其實我都唔太肯定依杯係一個木糠布甸，定係Tiramisu。說實話，杯子本身係比杯子入面的內容來得吸引，甜品本身味道只是一般，質感太過多cream，而cream發得太緊要，太輕太浮，結果好似食緊成杯cream咁，當然還有好大的改進空間啦。…查看更多

今日天氣好，黎左BEANS食LUNCH，仲有得坐埋出面戶外位添！麻麻地肚飯，唔想食飯或者意粉，就想食FULL DAY BREAKFAST。佢地的BREAKFAST有幾款揀，我見到依個有香蕉有窩夫咁有D甜野，就叫左依個喇。BREAKFAST黎到都幾大份，有炒蛋，煙肉，仲有焦糖香蕉，同埋窩夫，配埋蜜糖同埋忌廉咁。炒蛋睇到就知好滑，煙肉係瘦的，略為煎香。焦糖香蕉就最得意，係香蕉切半上面有一層好似焦糖燉蛋咁脆脆的焦糖，冇難食的理由。至於窩夫，一圈圈的，就係比較實在一Ｄ的，有少少似雞蛋仔咁樣嘅質感，配埋蜜糖同埋忌廉，幾正。…查看更多

今日LUNCH想食飽D，就黎左禮記食飯。依度雖然係工廈地鋪餐廳，但每逢放飯都有好多附近打工仔幫趁。環境尚算ＯＫ，係要坐得迫Ｄ。佢地除左有一個好多選擇嘅常餐揀之外，每日午餐都仲有好多選揀，有西式飯類，又有中式小菜或蒸送，炒粉麵咁。今日我一坐低見到隔離食嘅乾炒牛河好似好靚仔，就忍唔住邪惡一次，叫左個乾炒牛河，午餐連中湯，再加$3有熱飲。乾炒牛河黎到，份量唔少，叫阿姐拎黎唔少得嘅辣椒醬，阿姐竟然毫爽的拎一支FULL SIZE的黎。河粉炒得乾身，碟底冇油，但粉唔會碎濕濕。牛肉成本高，但給得慷慨，切得大塊，醃得入味，這個價位，收貨有餘了。…查看更多

今日有幸來到JW Marriott 出席工作會議，主辦方在中場休息時有提供茶點。忙完一個早上已經非常肚餓，當然要好好試一下這裡酒店供應的點心。因為只是早上的茶點，選擇固然不會太多，但都有西式點心，中式點心，同埋水果供應。西式點心，就有蛋餅撻，同埋水果燕麥片。蛋餅撻驟眼看起來，令人以為係葡撻，但其實係咸的！係葡撻的酥皮，但入面係煙肉蘑菇奄列蛋餅來的，都幾得意。水果燕麥片都唔錯，煮得好滑身，配埋少少雜莓，雖然係健康食物，都令人忍唔住食完再食。至於中式點心，就有冬菇豬肉燒賣同埋小籠包。冬菇豬肉燒賣是５星級酒店出品，比平時酒樓食到的更好，冬菇味好出好香，豬肉有肉味，有肉的質感，唔會一劈野咁，配埋少少辣醬食就更香口。小籠包的肉餡味道唔錯，肉係優質有鮮味，仍有湯汁的。可惜就係皮造得比較厚，可能係因為要照顧自助餐的情況需要。否則客人個個一夾包就穿，會攪到成籠點心都會濕哂唔好睇。感覺酒店餐廳食物唔錯，希望下次再有機會黎正式食一餐啦。…查看更多

自從WE GO MALL 依度開左之後，附近嘅街坊就多左個就近飲茶食野買野的地方。商場入面只有一間酒樓，唔係平常稻香富臨果Ｄ，又係比較少見比較中檔的名都。佢地開張之後，見住佢地由無咩人，到而家閒日飲茶都有固定熟客，六日直頭要等位添！話明係走中檔，除左價錢係稍稍貴一點之外，最重要係佢地食物的質素真係一食之下係唔同Ｄ。味精少／冇，用料靚，老實，手勢傳統唔花巧但反而比較健康，唔會過份多油重味，所以都幾岩中產人士同老一輩客人的味道。應該係話，因為佢用料扎實，份量足，所以計返其實比其他話平話多優惠的酒樓仲抵。我地食左幾次之後，都當左依度係飯堂。午市飲茶，平時係即蒸的，假日就係推車仔。點心的心水有蝦餃燒賣，粉粿，雞扎都唔錯，仲有蒸飯／豉油皇炒腸粉都唔錯。晚飯時間的例湯同小菜都食得過。…查看更多

其實好多中環人都知道，如果想食炸雞，jollibee 可能係一個好比KFC更好的選擇。雖然佢冇KFC咁多款炸雞，但係佢一款BASIC就夠殺! 我第一次試左就返唔到轉頭，唔單止熱辣辣，而且非常大件，好香，一咬落去好多汁，肉嫩，唔辣但醃得夠味。但除左炸雞，jollibee其實仲有一樣隱藏菜單食品，就係佢地個蝦汁米粉！！！依樣雖則話佢地個MENU係有嘅，但係好多香港人見到佢個樣麻麻，古古怪怪咁，都好少人嗌過。點知有一次同事極力推介，我先勉強試下，先知道原來一直大家都走左寶！！佢嘅米粉上面係有咸咸地有少少肉碎咁嘅汁，再有幾隻細蝦仁，最重要係附上有一角檸檬。食果陣時就唧Ｄ檸檬汁落去，連埋Ｄ汁同米粉一齊攪勻哂佢。個味道真係好特別，但又好正，未試過嘅一定要試下！比較可惜嘅就係，佢哋個米粉只係中環總店有得食，其他分店，包括中環其他分店都冇。…查看更多

今日生日，屋企人揀左依度同我慶祝，仲要之前係保持神秘，去到先知原來佢地BOOK左依度，真係俾左個驚喜我！龍景軒依間米芝蓮3星餐廳果然名不虛傳，由一入門口的接待，餐廳裡面的佈置，侍應的招呼安排，到食物的質素，都令人無可挑剔的感覺。難得黎到，當然點左幾味出名的菜式，印象最深刻的就有龍帶玉梨香、皇湯雞絲羹、鮑羅萬有同紅炆原件星斑腩。皇湯雞絲羹，真係幾乎係我食過最濃郁的雞湯。感覺係好似有十隻雞煲埋一小碗，雞係咩味，佢就係咩味咁。雖然佢係金黃色好似雞油咁黃澄澄咁，但其實佢一Ｄ都唔肥膩，真係一個好特別的體驗。然後鮑羅萬有就係每位一盎，有鮑魚、花菇、海參、髮菜、蹄筋等等，全部海味都炆得好稔好入味。依個岩哂心多嘅人，因為叫依個菜就可以一次過試哂咁多種海味。紅炆原件星斑腩，依個係有骨的，但我地就係喜歡，尤其係魚腩同魚骹的位置非常嫩滑。魚的質素非常高，新鮮，份量多，而且紅燒的烹調手法冇蓋過魚本身的味道，是好精彩的一味菜。雖然依度價錢當然不便宜，但質素實在高，有重要日子都值得黎試下。多謝哂！…查看更多

每年到左西洋菜嘅季節，就自不然諗起去川龍飲茶。應該係話，飲茶係由頭，西洋菜先係目標！上到黎依度，都有去左郊外的感覺。茶樓是比較傳統鄉鎮的STYLE，冇FANCY野，冇五星級服務，一切都充滿RAW味同鄉土氣息。為著西洋菜來黎，點可以唔叫返碟即灼西洋菜食下？翠綠、鮮甜、冇渣，新鮮，就係咁簡單。其他仲叫左蝦餃，腸粉，土魷，馬拉糕，蒸飯，各式其式，仲有郊外限定的茶粿，黎得到，當然要試得就試。嘆完茶，再過隔離一人買一袋當造西洋菜＋一盒茶粿做手信，半天郊遊就係咁。…查看更多

依間薩莉亞自從開張以來都係咁多人排隊！我地估應該都幾好食/幾抵食掛，所以今日晏晝一有機會就黎試下。賣嘅應該係帶少少日式風味的意大利菜，出名平靚正。我地見佢Ｄ野食好似細細份咁，但價錢好平，就叫多左幾款黎試試。最後叫左：蕃茄蜆意粉，煙肉菠蘿PIZZA，炒香腸，沙律，炒磨菇西蘭花，再黎多件蛋糕做甜品，仲有汽水。叫咁多野擺到一檯都係，見到都幾開心。PIZZA味道都可以，但個底硬左Ｄ。意粉唔錯，用左真係連殼蜆肉，依個價錢算係咁。香腸正常同素菜類的都正常，可以。重點係佢地Ｄ野食真係好平，叫咁多野都好似$200到，唔怪之得成日都咁多人。不過可能佢可能味精多左少少，定係PIZZA硬左Ｄ，食完返到去個胃就Ｄ唔太舒服，有Ｄ奇怪。…查看更多

今日兩個人又黎到九號水產買野，血拼中途太攰，需要食Ｄ野補給。見依度有位，所以入左黎依度，隨便食個拉麵先再行過。叫左一人一碗拉麵，因為我地中意食筍，所以再追加多左一人一份筍，務求食到盡興。拉麵一碗睇落都幾大，連埋配料陣容都幾鼎盛，食落份量真係唔少。可惜就係豬骨湯底比較油，味道一般，變左雖然大碗，但有種提唔起勁食來食去都仲有嘅感覺。麵質都同配料都OK的，醣心蛋唔錯。不過都係因為湯底麻麻，所以拉唔返起成個感覺，有改進的空間。…查看更多

今日帶個小朋友出街玩，晏晝時間佢話想食一蘭，於是就黎左食。依度都有少少隱閉，唔係佢識黎都要搵一下。據講一蘭無論日本定香港都好多人，成日排長龍，果陣時仲好似話要等幾個鐘，好在今日可能閒日，黎到冇咩人。我冇食過一蘭，日本同香港都冇食過，所以今日都係第一次試下係咪傳說中咁正。叫左一人一碗正常的拉麵，豬骨湯的，上面就係一Ｄ蔥，兩片叉燒，紫菜另上，睇落去係冇其他香港的拉麵咁澎湃。湯飲落同睇到嘅一樣，都幾香濃，麵係比較幼身的，幾彈牙，但唔算話係好多。食到咁上下，小朋友仲學人加麵，真係同平時唔肯食飯果個係兩個人黎。雖然我自己就唔係十分為拉麵著迷，但總括黎講都一蘭都唔錯，經過可以一食，只係我就應該唔會特登排長龍黎食喇。…查看更多

今日兩個人出左沙田買野，見差唔多食飯時間，就食埋先返去。揀左間食德國菜的餐廳，香港少Ｄ地方有得食，比較新鮮，但而家原來開到入黎沙田都有。德國菜出名大份，我地兩個人唔食得幾多，就要兩樣最經典的名菜，德國燒豬手同埋香腸拼盤。黎到係兩樣加埋好大嘅一份咁，好大堆頭。燒豬手OK，個皮唔係話太硬，一定要新鮮食辣食，凍左就會又油又硬好難攪。醃得透，又唔過咸，唔錯。我地都好中意食腸，所以食親德國野都好期待個香腸拼盤。就咁睇好似每款腸一條唔係好多，但其實加加埋埋都差Ｄ食唔哂。個人心水係白色果款，但其實有隻SPICY的都唔錯。作為食肉獸，我地依餐梗係食得好滿足啦。不過依Ｄ野都幾漏，食一次要等一排先會想再食。…查看更多

上次入黎大埔，行過附近發現左依度有間食放題嘅日本料理，就覺得好得意，因為通常依Ｄ餐廳都係集中喺市區先有的。後來打聽左，原來果間野應該都唔錯，所以就約埋一班朋友，今日下晝黎左依度試下喇。佢地放題的食物種類都算幾多，大路野，例如刺身壽司，沙律、燒物、炸物等等嘅都有，但又有一Ｄ比較少有的品種，例如長腳蟹，PAMA HAM沙律，原隻燒蠔，燒鰻魚咁，真係算唔錯。食物味道幾好，樣樣睇落都已經幾得。牡丹蝦幾鮮甜，我地都叫左幾多。燒蠔幾大隻，唔會得一劈醬其實好細粒蠔咁樣。炸物都係新鮮炸的，唔錯。沙律都幾多款，樣樣都試下。一大班人都食得幾盡興，又都算抵食。不過依度就要入到黎大埔先有得食，但係街坊應該會幾方便。…查看更多

朋友送我一包依度的雜錦曲奇，可惜就係拎到返屋企就整爛左少少，影出黎冇咁好睇。見到一包都幾多花款的，有純牛油的，有果占的，有果仁的，又有綠茶味的。我自己其實好買食曲奇，唔係話唔好食，而係好怕某熊果種太多牛油太油膩，我成日食完會個胃好似好唔消化咁，會唔舒服。 而且就係自從自己整過曲奇之後，就知道其實曲奇係用幾多牛油做的，就怕左喇。又試一下依度嘅出品，咬一啖，鬆化唔太硬，但又唔會話牛油味太重，點到即止，又有淡淡的麵粉香味，唔錯。個人心水除左純牛油果隻，就係有果占的果隻。佢中間有粒焗硬左嘅果占，係煙煙UN ＵＮ咁，幾得意。多謝哂朋友的禮物。…查看更多

做節，家人揀左黎依度，就貪佢交通方便，又可以試下經典的順德菜。不見門外有人等候，但一推門入來，就發現係全場滿座，檯擺得非常密，自然係想在做節高峰期多做生意。因為遲來，菜單家人早已發辦，都不外乎係炸子雞，魚，西米布甸一類的菜式。味道不是很差，過得去，但實在有點點乏善可陳，食過印象都不深，可能之前抱得太大希望而來。大家吃得不是很盡量，才發現好像沒有叫他們的"名菜" 生腸，於是就又來一碟。這裡的生腸很出名，就是橙色滷味那種。黎到嘅係大大碟，都OK嘅，幾爽口，冇異味，黎到就可以一食。依一餐飯，感覺最深刻的不是食物的質素，而家環境！點解？因為依一餐飯一路食就一路大汗疊細汁，可能因為實在坐得太多人喇，樓底又矮，坐坐下就好焗，唔止熱，而係空氣好唔流通的感覺，坐得好辛苦，真係幾好食都係咁話，希望店方可以改善下啦。…查看更多