Kaesar's Profile

因為疫情問題，日和号呢排搞緊特價，逢星期一至日單點壽司同刺身都半價。但我覺得根本就係gimmick 嚟，特價完仲貴過壽司郎食一碟嘅價錢。呢間嘢其他食物普遍都唔平，定得咁嘅價錢我期望佢可以畀返相應質素嘅食物畀顧客，但啲刺身嘅用料就仲差過迴轉爭鮮，啲刺身同壽司一食落去就知唔新鮮，完全冇魚味，食八爪魚片好似食緊搓字膠咁。衛生問題都有待改善，張枱會有啲蟲仔爬嚟爬去，啲杯碗全部都係濕哂咁畀客人，你唔講我以為自己去咗屋邨茶樓同埋間嘢會唔聲唔聲收每位顧客$6一位茶錢，又唔寫到明話要收。無論如何我一定一定唔會再食第二次 …Read More

安安燒店舖面積唔大，再加上香港係限聚令底下， 其實幫襯嘅顧客相對亦都比較少，但係我依然無辦法理解到店員點解仲會做到手忙腳亂。首先講吓店員嘅服務態度，一個字，差。店員永遠都好似好唔耐煩咁，每次嚟serve你都會反一次白眼，好似唔想你搵佢咁。有時就算你舉手，佢都會無視你。講到上餐，不停上錯嘢食，明明係無點過又或者第二枱嘅上咗嚟我哋度，又或者，將你點嘅嘢食遺忘咗喺廚房冇上俾你。其實如果樓面真係應付唔到嘅話，不妨請多兩個幫下手。講完服務態度，再講下嘢食。總括來講，嘢食又貴又細份又唔算好食。兩隻扇貝夾埋嘅size先等於一對筷子長度嘅三份二，粒扇貝肉大細大過粒豆豉少少，你唔講我以為食緊淨蒜蓉，真係勁唔抵。韭菜價錢唔算話貴，但份量真係極少，佢嗰啲竹籤已經唔係平時串燒店嘅長竹籤，而韭菜嘅份量只係佔竹籤嘅三份二，可想而知有幾少。成餐飯最大份係依個芝士撈丁，個芝士撈丁味道不過不失，但唔知點解個麵底水份唔係太足夠，而啲芝士又杰撻撻，撈落去好似撈緊漿糊咁，勁難撈。如果成餐飯冇咗呢個麵應該會食唔飽。講完嘢食又嚟講吓環境衛生，唔知點解，我隔離個座位上面有舊食剩嘅菠蘿。難免係店員做清潔嗰陣唔覺意掃咗落去。但我哋已經係最早嗰輪客，餐廳中午又唔開，即係舊菠蘿已經發酵左一晚，但點解今晚開舖前仍然冇人睇到。好老實咁講，就算係黃店都撐唔落手，唔會再去多次…Read More