PuUall's Profile

之前睇到好多人介紹呢間位於尖沙咀北京道既餐廳，聽講消費唔高但有高級享受，真係要試下先知。The Ducky $168由於我地只得兩個女仔，試唔到咁多口味既pizza，咁今次就揀左比較新穎既口味，片皮鴨口味既pizza，pizza皮係比較薄身嗰種，食落無咁濟。鴨肉少少鞋身，加上蔥同烤肉醬味道係創新嘅，不過下次我會想試返Classic啲嘅味道。Fritto Misto $98炸到脆卜卜既炸蝦同炸魷魚圈，配上檸檬蒜蓉蛋黃醬，呢個小食真係好啱配酒。Almond crush $98Tiramisu $98兩杯飲品入面Tiramisu會比較特別，真係好似令到一份Tiramisu甜品變咗一杯飲品，Tiramisu愛好者可以試吓。我事先whatsapp book左枱request要窗邊位，大家記得book定先，咁就實有得打卡睇靚景啦。…Read More

本身係個腸粉愛好者，偶然發現旺角有呢間皺皮腸粉，一食就愛上咗，仲介紹咗唔同朋友去食，個個都讚不絕口。雞蛋瘦肉腸粉同芫荽牛肉腸粉係我哋每次必叫，因為佢哋嘅蒜蓉辣椒醬好好食，我哋每次落好多，所以每人都要叫返杯豆漿送腸粉。腸粉皮唔算好薄，但係米漿整出嚟嘅腸粉好香，而且餡料好足，一人食一份都已經好滿足。如果多啲人去食仲可以試埋佢哋嘅蒸米粉，味道都唔錯，但係小鳥胃最好留返個胃嚟食腸粉😆次次去食都會聽到有人叫豬髀飯，我自己就麻麻地豬髀，大家有興趣可以試下。…Read More

今日朋友生日就嚟到iSquare呢間主打新式潮州菜既餐廳，餐廳設計有格調，氣氛浪漫，放工同親朋戚友食個飯或者飲番杯又得。風味脆茄子 $98炸到金黃色嘅茄子，咬開係煮到軟糯既茄子，外酥內嫩，非常開胃。韮菜豬紅 $98韭菜鋪起底，面頭係滿滿嘅豬紅，醬汁濃稠，無腥味而且好入味。獅頭鵝件 $298鵝件滷得非常入味，唔會死鹹，肉質鮮嫩，唔會鞋口，底層鋪左一層嚟滿滷水汁嘅豆腐。懷舊春菜煲 $198寒冷嘅天氣最適合食熱辣辣嘅菜煲，芥菜吸收晒清甜嘅湯汁，口感鮮香回甘。鹹菜胡椒豬肚湯 $138天氣咁凍，飲番碗胡椒豬肚湯可以暖下胃，胡椒辣既程度恰到好處，唔會感覺太刺激。蜆肉鵝肝炒飯 $228炒飯粒粒分明，好有鑊氣但又唔會有油膩感。有蜆肉鮮味為炒飯增加鮮味，而鵝肝就令成個飯口感更creamy。由入餐廳門口到離開，都有熱情嘅服務，除咗食物令人滿意，服務員嘅態度到令人讚嘆不已。除咗我同朋友慶祝生日之外，都有見到其他客人同屋企人一齊慶祝生日，氣氛相當好，非常推薦呢間餐廳👍🏻👍🏻…Read More

大埔又開咗新餐廳，位於八號花園，環境整潔、光線充足，令人感覺舒服。見到佢哋主打用豬骨熬煮嘅湯底，我呢個米線狂熱者就梗係要試吓！酸辣肥腸粉 (小辣) $60先講湯底，佢哋嘅小辣真係唔係講笑，再加上酸辣湯底，係加倍惹味，同埋真係幾辣，我係一路食一路流晒眼淚鼻涕，但都停唔到口，不過酸味可以再重啲。份量超多呀，肥腸洗得好乾淨，唔會有腥味同臭味。而且醃得好入味，煮得好淋身，滿意！紅燒牛腩粉 (小辣) $60呢碗嘅湯頭同另一碗一樣，不過冇咗酸辣味，同樣都係小辣，但都係幾刺激下🤣朋友唔鍾意食肥肉，佢哋每一舊牛腩都肥瘦均勻，瘦得來唔會柴，又係好入味同淋身，只係牛腩份量可以再多一啲，但都係用心之作。肥腸粉同牛腩粉都係比較粗身嘅粉，有啲似瀨粉，似保留左一啲咬口既粗米線。涼拌土豆絲 (小辣) $30香辣爽脆既土豆絲有少許酸味再加上辣油，非常開胃。手打牛丸 $75手打牛丸係佢地既招牌菜，簡直係必試！我哋叫既兩碗粉都加咗辣，試唔到佢哋自家熬製嘅豬骨湯，點知牛丸嘅湯就係呢碗冇味精嘅豬骨湯。湯底好香濃，可以就咁飲都唔會覺得口渴，牛丸爽口彈牙，物超所值！芒果梳打 $15菠蘿梳打 $15喺大埔諗唔到食咩可以試吓黔滋味，用心製作嘅小店，真係會有驚喜。…Read More

最近香港開咗好多日本過江龍天婦羅丼飯，但因為好多都set好咗一個丼飯有咩配菜，好似我呢啲三心兩意嘅人梗係想有得自己配搭，咁啱油麻地就新開咗呢間好似食車仔麵咁樣點菜既天婦羅丼飯，啱晒我心意！自選天婦羅定食 $30 （冷蕎麥麵）今次我叫左冷蕎麥麵，清爽既蕎麥麵可以中和炸物既油膩感，麵質爽口彈牙，配上蕎麥麵汁，非常開胃。配菜就有穴子(+$18/份)、希靈魚、黑虎蝦、半熟蛋、牛肉餅(+$12/份)、南瓜(+$8/件)。炸物係即叫即整，上到嚟都仲係熱辣辣。個人最推介穴子同虎蝦，最適合做天婦羅嘅海鮮🤤雖然炸過但係都保持鮮味。半熟蛋略為過熟，口感唔太好，唔太推薦。其他配菜不過不失，不過炸物真係做得好好，非常酥脆但係又唔會有油益味。整體嚟講都係令人滿意嘅一餐。今次我係weekend嘅三點左右去食，去到都唔需要排隊，聽聞起lunch time同埋dinner time都要排好耐，大家去既話就要睇番時間🙈🙈…Read More

哈豆係由台灣人主理既台式餐廳，餐廳既內牆畫上唔同台灣景點，充滿去台灣旅遊既回憶呀🥹🥹百香果糖檸雞飯（套餐） $105加配黑糖芋芋鮮奶近排天氣咁陰沉，胃口都無咁好，炸雞配甜甜酸酸既百香果檸檬醬，少左炸雞既油膩感，更加開胃！黑糖芋芋茶喺牛奶入面加入香濃綿密既芋泥同黑糖，甜度較高，適合愛甜人士。浮誇大腸麵線（套餐）$158香腸+$20加配哈豆鮮果茶（微糖）平時食嘅大腸麵線就只係得大腸做配菜，今次呢一碗仲有魚肉、貢丸、花枝丸同大腸，超級滿足呀！哈豆鮮果茶又唔同水果調製而成，清爽既味道既可以消滯又可以增加食慾😍嘎嘎脆刨冰 $99造型超澎湃嘅台式刨冰，底層有係滿滿既仙草冰，花生奶蓋加上黃豆粉，頂層仲有紅豆同香芋雪糕！將台灣特色口味聚集於一身，口感豐富。觀塘工廈有唔少美食，喺呢邊番工既朋友又多一個台灣料理既選擇😍…Read More

黑芝麻湯丸瑪德蓮蛋糕 $22超濃黑芝麻蛋糕，口感濕潤，中間仲有黑芝麻醬同煙韌麻薯，加熱後仲會有少少拉絲。上次朋友帶我去淨係買咗一粒，食過之後完全返唔到轉頭。。除咗瑪德蓮佢哋仲有泡芙同埋蛋糕樽，試過開心果蛋糕樽（$68）都係超高質，勁濃開心果味🥹最可惜係佢哋嘅營業時間同我返工時間唔太夾，好少機會可以去到買🥹🥹…Read More

聽聞尖沙咀H Zentre有間高級日式燒肉，裝修非常有格調，環境又舒服，今次就帶埋朋友食餐好嘅，順便慶祝生日。烤和牛肩他他 凱撒沙律 食油膩既燒肉前緊係唔少得食啲沙律菜墊下肚先，清爽既感覺又可以解膩。肉片烤既程度岩岩好，唔會乾身。季節刺身盛合（五款） 呢個刺身拼盤包括真鯛、拖羅、帶子、左口魚邊同油甘魚，每一樣都非常新鮮，味道鮮美。香辣雞翼 食日本嘢點會少得炸物，呢款香辣雞翼係單骨雞翼，食落非常方便，而且炸得非常香口，少少辣味令雞翼更加惹味。特選和牛盛合（五款） 呢一次嘅重頭戲就係呢一道和牛拼盤：牛肩肉、和牛牛肋條、肉眼上蓋、和牛三筋、辣椒肉。個人最鍾意就係辣椒肉同埋肉眼上蓋，辣椒肉係牛比較稀少嘅部份，肌理纖細，肉汁較多，口感嫩滑。肉眼上蓋油脂分布均勻，充滿油脂香味。和牛煲仔飯港式煲仔飯就食得多，中日合壁嘅和牛煲仔飯就第一次食，有師傅過嚟幫手整好再分成等份比我地享用，牛肉流出嘅油脂同埋香味加上雞蛋香味，令成個飯味道昇華，真係會食過返尋味。季節雪糕今次我地就試到開心果雪糕，入面有粒粒開心果碎，而且開心果味香濃，雪糕軟滑，高質嘅甜品為呢一餐飯畫上完美句號。大家返工返得咁辛苦，梗係要間唔中食返餐好嘅慰勞吓自己，行開尖沙咀可以試吓三郎燒肉，食飽仲可以去海旁行吓～…Read More

之前見到有好多捌捌陸既ig post，搞到我都心郁郁左一段時間，今日喺荔枝角就走左去試下呢間台灣野！鹽酥排骨滷肉飯 $68超大塊鹽酥排骨切到整整齊齊擺起滷肉飯上面，滷肉有肥有瘦，唔會啖啖都覺得好肥膩，不過就略嫌滷肉汁比較少，飯會比較乾身，但整體來講味道都唔錯！鹽水手撕雞蔥油乾拌麵 $68蔥油拌麵有別於平時自己喺屋企煮嗰啲，麵較粗，但唔算太有咬口，拌麵汁較稀，不過鹽水手撕雞味道較濃，表面有炸蒜粒，增加口感。台式鹽酥雞 $58份量超多既鹽酥雞，外面非常脆口但裡面既肉質口感唔會炸到鞋哂，岩岩好呀！台式小食拼盤 $88小食拼盤入面有台灣腸、炸花枝丸、甜不辣、黑糖地瓜條同埋蝦膠油炸鬼。九十蚊都唔洗就有咁大份既小食拼盤真係勁良心🥹甜不辣係我每次食台灣嘢都會叫嘅小食，煙煙韌韌勁好味！黑糖地瓜條口感軟糯，加埋黑糖醬就好似甜品一樣😋小食拼盤仲配埋泰式辣醬同沙律醬，咁就唔怕太dry啦🙈🙈七色雲彩 $38一碗集合唔同顏色既芋圓，仲有珍珠同椰果，豆腐花、仙草底加入黑糖，味道偏甜，適合螞蟻人！蜂蜜柚子茶 $28捌捌陸水果茶 $48兩款飲品我就比較鐘意水果茶，味道偏淡，每啖都非常清香，果香味重。食左咁多油膩食物，真係好需要一杯飲品解膩🤣捌捌陸既炸物做得較為出色，每款都卜卜脆，邪惡得嚟真係好滿足，行開d2 place又想食台灣野可以試下捌捌陸😋…Read More

大埔愈來愈多美食我都仲未試，今次就行去位置較偏既鮨一日本料理，雖然餐廳唔係喺啲人多熱鬧既地方，但我哋入座之前餐廳入面都座無虛席，可見受歡迎程度都頗高。味醂魚乾 $68以味醂調味同烘乾後既魚乾，充滿油香，配上蛋黃醬同七味粉食用，簡直係最佳既佐酒小食！龍蝦沙律 $35真係食到大大粒肉既龍蝦沙律，比較light既前菜，非常開胃。日本芝士年糕 $32兩面烤至微微金黃，一咬開就湧出流心芝士內餡，勁邪惡勁吸引呀😍上錦繡刺身$288 海膽、三文魚、北寄貝、帶子、牡丹蝦、油甘魚等咁多種刺身做成拼盤，每件都非常厚身，口感鮮美。鮨一千層海膽飯 $228 （日本海膽）面頭係對到成座小山咁多既日本海膽，色澤鮮黃，口感濃郁，下面鋪滿拖羅蓉喺飯上面。沾上wasabi同豉油嘅海膽用紫菜包住嚟享用簡直係味覺的享受😋日本番薯平南瓜天婦羅 $68炸至金黃既蕃薯同南瓜天婦羅，即叫即炸，外皮香脆可口，內裡保留蕃薯濕潤綿密口感，火喉控制得好，又唔會有炸到滴油既油膩感。牛油炒金菇 $48呢道係其中一道令我驚喜既料理，外表平平無奇，估唔到入口超濃牛油香味，仿如食卡邦尼意粉般既creamy。鰻魚炒飯 $98通常出去食饅魚炒飯都係得面頭幾粒饅魚仔，今次竟然每啖都食到大大粒鰻魚，絕對係非常足料！呢餐真係非常滿足，喺大埔又多咗一間高質日本料理做選擇。不過除咗大埔之外，鮨一喺尖沙咀同荃灣都有分店，住得唔近大埔嘅朋友都可以試吓呢兩間分店。…Read More

灣仔QRE plaza新開日料，地方闊落，環境舒適，無論同屋企人定三五知己聚餐都好適合。一口和牛 $128和牛粒肥瘦均勻，配上濃郁既黑椒醬汁，個底仲有入哂味既洋惹，好惹味。鹽燒雞肉 (兩串) $32鹽麴五花腩 (串) $32鹽燒蘆筍豚肉卷 (串) $32我地既座位就喺開放式廚房隔離，即叫即燒，熱辣辣既串燒肉質嫩滑，又唔會太瘦或者燒烤時間過長令肉質變柴。 饅魚炒飯 $128炒飯外表吸引，蔥花作為點綴又可以增加鮮味，炒飯口感較為乾身，粒粒分明，唔會過油！牛肉豆腐野菜鍋 $158一大個鍋入面有唔少配料，除左牛肉同豆腐仲有紅蘿蔔、金菇、娃娃菜、大蔥、蒟蒻等等配菜，份量十足，非常滿足。紅豆抹茶奶凍 $48食到咁飽緊係唔少得食番個甜品，紅豆同抹茶簡直係最佳配搭，滑捋捋既奶凍甜度較低，可能就唔太適合螞蟻人。如果去開灣仔諗唔到食咩，都可以試吓呢間新嘅日式料理，除咗鍋物同串燒之外仲有新鮮嘅刺身同壽司，仲可以同同行朋友飲番杯～呢間餐廳仲唔收切餅費，歡迎大家帶埋蛋糕去慶祝生日😗…Read More

#聽聞旺角有間樓上韓式料理非常抵食，仲要係韓國人主理，今日就帶埋朋友嚟試下，睇下會唔會搵到韓國既味道🙈鳳雛燉雞(無骨) $248超有份量既燉雞，可以選擇辣度，今次就揀左唔辣，可以試到原汁原味既燉雞🙈個底仲有冬粉，索哂汁既冬粉好惹味，仲好煙韌，而且薯仔燉到淋哂、入哂味，食完一啖又一啖！芝士炒年糕 $88唔止炒年糕，仲有魚板同雞蛋，年糕唔會有煮太耐既感覺，韌度適中，好有咬口。甜辣口味既醬汁愈食愈辣，同喺韓國街邊食既味道一樣正宗。睇落好似唔係好多，原來又係份量十足，食極都仲有！海鮮煎餅 $98海鮮煎餅不嬲都係我既最愛，嚟到由韓國人主理既餐廳就緊係唔少得試下呢道菜！唔止煎餅既邊邊煎得金黃香脆，每一啖都好香口仲啖啖海鮮，真係無揀錯！蘋果特製調酒 $68呢杯特調酒真係唔係講笑！超大杯，同朋友share就岩岩好，甜甜酸酸既味道，食辣野都唔怕啦！嚟到鳳雛燉雞真係唔好亂叫野食，眼闊肚窄，因為樣樣都超有份量，包保你食得超滿足！…Read More

今次已經係三訪呢間位於觀塘東廣場既 Comfy by Chef's Stage，裝修簡約，地方闊落，環境舒服，食物亦好高質，每次既體驗都非常滿意。鮮果蜜糖穀物乳酪 $98新年期間成日都食得咁heavy，今餐就打算食light d，近年來都好興yogurt bowl，除左健康，擺盤精美搶眼，賞心悅目。yogurt本身無咩甜味，配合唔同水果同granola一齊享用就有唔同口感同味道啦！煙三文魚賓尼迪蛋酸種麵包 $108店家使用蘭王蛋，熟既程度剛好，恰到好處既流心，一切開就係橙紅色的蛋黃，色澤鮮艷，蛋香濃郁。最得我心既係個酸種麵包，外面焗得好香脆，但內裏保持小小煙韌有咬口，唔會比上面既醬汁整淋左。黑松露薯條 $68香脆可口嘅薯條上面灑上黑松露碎，配上黑松露沙律醬同茄汁，食到停唔到口🙈牛油果香蕉奶昔 $46曲奇奶昔 $46前者較適合追求健康既朋友，甜度較低，味道清新可口。後者適合愛甜既朋友，不過對螞蟻人嚟講算係甜度適中，唔算太驚艷。上兩次到訪都會叫明太子意粉，佢地既意粉同薯條都係我私心推介，包保滿意，如果去開觀塘，都推薦大家去試下comfy by chef's stage，無論周日放工後定周末同三五知己嚟傾下計、食番餐飯都係個好選擇。…Read More

機緣巧合下同朋友搵到呢間位於中環the workstation既隱世創意泰式fusion菜，無論係室內定室外既環境都相當美觀，室外位置更仿如世外桃源，充滿浪漫氛圍，超適合打卡。🦐 Red prawn sashimi thai sauce 238紅蝦有手掌咁長，肉質結實彈牙，鮮味十足，配埋清新既泰式薄荷sauce，味道絕配。🐚 Hokkaido scallop with salmon roe and uni 328北海道帶子刺身切片配海膽同三文魚籽，仲有花瓣既裝飾，又係一道美觀且可口既料理。一直都好怕食到海膽嗰陣腥味，但入口更品嘗到既係帶子既鮮味，加上味道稍鹹既三文魚籽，口感更為豐富。🥘 Tom yum bouillabaisse with crispy rice 158冬陰公湯酸度岩岩好，椰香味亦十分濃郁，口感creamy，惹味得嚟又唔會太辣，用茶壺型器皿盛載，會較為方便亦賞心悅目。脆米上有青口、蜆同冬菇，脆米吸收哂冬陰湯後依然脆口。🌮 Thai lettuce wrap in taco style 238上菜既時候勁誇張，仙氣十足，有種天上有，地下無既感覺。Taco版生菜包肉，超級足料，每一啖都係肉，豬肉碎以芫茜、魚露、青檸、辣椒等香料炒香，用生菜同taco包住一齊食就可以中和鹹香，更加開胃。🥩Us prime rib-eye steak 280G with bone marrow 598煎至粉嫩色既西冷牛扒，肥瘦均勻，肉汁鮮嫩可口，旁邊仲配左牛骨髓，只以黑椒同海鹽調味已經好夠味，牛脂味極香。🍨 Coconut mascarpone parfait with mango jam 128椰子口味芭菲加入mascarpone 整成雪糕既口感，側邊仲有冰凍既芒果醬，彷似食緊淋滿椰汁既芒果糯米飯。🥧 Pecan tart with lime sherbet 108香甜可口既核桃撻配上清新解膩既青檸雪芭，為今餐畫上完美句號。🧉 Island of desire 148🍹 Wanderlust 148兩款飲品都係精心調配，連杯都非常精緻，打卡一流呀🥹喜歡甜口嘅朋友應該會更為鍾意前者，我個人就比較鍾意後者，有香濃既斑斕味但又有茉莉花中和椰子既甜味，清香可口。getaway環境優美不在話下，室外位置真係彷如離開鬧市，而且每道料理都充滿心思，非常精緻，而且上菜用既每一款餐具都好有品味，令人心情更加愉快，呢個價錢絕對係一分錢一分貨。…Read More

作為大埔人，緊係要試盡大埔美食啦🤣呢間位於大埔運頭街既日料店，主打串燒、壽司同丼飯，裝修充滿左日本居酒屋既感覺。四重火焰盛 $138經火炙既三文魚、左口魚、帶子同蟹柳鋪蓋喺溫熱既米飯上面，勁足料！火炙過既刺身加埋蛋黃食別有一番風味，非常滿足，呢款丼飯岩哂怕食刺身丼飯既朋友🤪究極甲羅盛 $198外表同個名一樣震撼，拆好哂既蟹肉好似疊羅漢咁鋪滿喺飯上面，肉質鮮甜唔會腥，平時最怕就係拆蟹腳食得唔乾淨，但佢地都整得好靚好完整既蟹肉，滿滿既蟹膏、蟹籽同蟹肉喺蟹蓋入面，拎嚟撈飯簡直係一級享受！火炙三文魚脂壽司 $20 （2件）火炙三文魚入口即化，油脂味非常香，令人回味既一款壽司。行開入大埔都可以嘗試下呢間隱世丼食堂，不過店舖空間偏細，如果想一大班人食就可能要避開食飯時間🙈…Read More