jessicanggg's Profile

個短髮阿姐長期望住個電話mon煲劇，算啦買個三餸飯都唔會話要人招呼，行埋去話要個飯，佢企起身𢳂完個飯，繼續望住個mon，正當我想開口話要咩餸，佢就突然斜眼拎住個鉗望住你，好似「你做咩仲唔出聲」咁嘅樣，阿姐你一眼都無望過我，點知你ready未？講返個飯同個送嘅例湯，個湯就得啖笑啦，鹹少少嘅清水（即係鹽水），三個餸我叫咗梅菜扣肉就真係好淡，梅菜好似烚咗好多次咁，無乜味；蒸蛋就無乜特別，不過下面全部肥豬肉粒，我怕肥膩，食咗上面嘅蛋成個底無食；然後有個甜酸雞翼，呢個好味，但要用區區兩隻雞翼撈成個飯⋯ 四十幾蚊真係好唔抵。態度又差，食物質素又唔好，可能大家收工之後都對食物無乜要求，求其買，咁都能夠屹立不倒，算係奇蹟。…Read More

知道附近新開咗呢間舖頭，同老公食完拉麵就過黎睇下。有六款每日都有嘅曲奇，同一款限定曲奇。店員姐姐好好招呼，好大方咁叫我地試食，我地本身諗住買一塊試下先，結果d曲奇味道太吸引又大大塊咁，忍唔住㨂咗四塊走返到屋企明明個麵都未落格，但d曲奇放响度就忍唔住開黎睇下，嘩，香到呢所以都係開黎食。花生朱古力好香濃，本身呢兩樣野都係perfect match，食落無想像中咁漏，反而會愈食愈有咬下一啖嘅衝動；雙重朱古力表面上有少少海鹽，所以食落會鹹鹹甜甜咁，而且裡面真係好多朱古力；我最最推薦嘅係限定嘅柚子檸檬曲奇，食落係柚子味白朱古力再加一絲絲檸檬皮，中和咗曲奇本身嘅甜膩之餘，仲有種酸酸甜甜嘅清新感！仲有一款榛子朱古力就無乜特別，可能外面都太多呢種口味，不過榛子仲係脆卜卜，四款曲奇嘅質地唔會太糊太濕（好怕曲奇連鎖店果種好似泥膠咁），但又唔會硬身，食落係牛油香之餘又食到每款口味嘅特色結果返到屋企已經食哂四款，店員姐姐仲叫我地今日食唔哂可以用焗爐整返熱，都好好食，無啦食哂啦希望快d有人再分享下其他口味嘅食後感…Read More

聲稱來自北海道的湯咖喱，都幾期待！食物真係唔錯，亦唔會好似而家好多餐廳咁份量好少，呢度一定食得飽可惜食物唔錯但服務真係0分一入到去招呼都無個，咩都唔會講，指一指d位叫你坐；坐低左就放低menu同杯水，仍然keep silent更加唔好話介紹下，侍應們繼續企埋一邊背住d客㩒電話到自己研究完個menu點tick，嗌唔該落單，就埋黎收走menu同筆，仍然無講任何野，直至到個飯都食完，都無聽過侍應出過一粒聲其實都幾勁有圖有真相，無論廚房定侍應就係咁樣全程hea哂响度㩒㩒㩒，食物唔錯架，不過唔好期望有任何服務～…Read More

夜晚同家人返到屋企先醒起未食飯，所以嗌某外賣APP，之前食過一次呢間覺得d中式小菜都唔錯，今次真係失望啦。首先因為屋企有少量白飯，亦唔想要例湯，所以備註咗「要一碗飯同一碗湯就夠，謝謝」，結果黎到都係三碗飯三碗湯，咁都唔緊要嘅，俾多好過俾少，我都唔浪費，所以雪起佢第日炒飯啦。問題係屋企人今日好想食牛柳，所以先特登嗌呢間有個中式牛柳，結果咬咗兩啖就唔對辦，明明就豬扒黎嘅？中式醬仲有菠蘿但變咗豬扒，唔係真係當我唔識分下嘛？…Read More

紅磡好少做得好嘅日本料理，咁啱經過見佢新開，所以就同老公入去試下！一進門又光猛又乾淨，而且兩個後生男侍應都好有禮貌。㨂好食咩之後就同個紮辮嘅中年女侍應落單，奇怪乜都黎齊就係爭個沙律未黎，問番個阿姐，個阿姐望完自己手寫嘅簿仔，個樣明顯係自己無落，但就同我哋講「我叫師傅整快d」然後就急急入電腦，由頭到尾一個唔好意思都冇。喂當我盲架？望住你入單架！衝住呢個阿姐嘅表現，本來真係想俾負評，但係佢d食物係above average，沙律足料又新鮮，鍋物同石鍋飯都係水準之上，老公仲好滿意d壽司。所以都唔想俾嬲嬲，畢竟係新餐廳d嘢又好食，其他侍應又好好。希望果位阿姐可以改善下！…Read More

因為身體唔舒服所以買湯飯食，等咗一段時間就叫我拎，我見外賣碗入住得一碗嘢，所以問佢「咦，係咪齊架啦？」大大聲答我話「齊架啦小姐！」咁我當時心諗哎呀即係d飯响入面，行快兩步返屋企食，驚浸到發哂。結果急急腳行到返到屋企發現得個湯，無飯。好唔舒服所以連打電話都無打。不過唔該可唔可以check真少少先咁確定嘅語氣去答人呀？買個湯飯無俾飯人呢d錯都仲可以犯？仲要收我$58？之前同朋友食過幾次炒小菜都ok，不過以後就不了。…Read More

同老公經過呢度，無意中見佢貼住阿呂美食屋嘅餐牌，仲見到老闆坐响入面同老闆傾咗一陣，先知一年前因舊樓清拆而結業的《阿呂美食屋》重新開張！睇下有咩食先，諗起之前食過嘅檬粉念念不忘，都係好想食番個凍檬！所以分別嗌咗豬扒檬同雞翼檬果然同之前嘅一樣咁好食，爬爬下就食哂成碗，撈埋魚露爽口又清新，夏天食真係好開心另外仲叫咗個炸越南春卷，香口又惹味！隨餐附送一本青檸水，唔係溝糖水果種，飲落酸酸地好解膩。以後肚餓又有個好選擇！…Read More

見到門口寫住有「木瓜牛奶」，咁我就入去諗住買杯外賣飲，入到去佢話$31，我問佢外賣加幾錢，佢話加$1，但木瓜牛奶唔係$25？佢話加左桃膠，咁唔加桃膠得唔得？又話唔得，咁唔緊要啦，都照要。但已經覺得好夾硬。出去門口等望下個餐牌，喂木瓜牛奶加桃膠係$28，咁到底收我$31係乜？終於姐姐出到黎俾外賣我時我再查詢，佢話呢個係飲嘅，我咪就係要飲架囉？然後我再指住$25果個我話我就係想要呢個木瓜牛奶，佢話冇，然後等左一陣，又話有，「不過呢個係飲嘅。」大佬我話得要木瓜牛奶，咪就係要飲架囉？你講唔正廣東話我都算，喂「港」心甜品，連個客要咩都聽唔明？最後我拎住碗桃膠牛奶燉木瓜番屋企，都唔知做乜？…Read More

朝早番工前經過黎食個早餐，嗌個蛋治加牛奶麥皮、熱好立克。杯好立克得個色無味，麥皮又係滾水煮咁，最好笑係個蛋治，我都費事講，所以特登影張相紀念下。無遇過最低質嘅茶餐廳 — 到底點解仲會有人幫襯，我望唔透。早餐時段呢頭唔算多選擇，但咁樣做法都仲生存到係令人驚訝。由細到大未食過一次茶餐廳係伏成咁，覺得香港真係變左好多，一間連蛋治都搞成咁嘅餐廳都仲可以經營，如果有幸老闆睇到，希望你可以檢討下，你係拉低緊香港茶餐廳嘅平均水平。…Read More

12:26分落單，12:38先有得拎。之前試業階段食過覺得好味，今日可能剛正式開業，失哂準，首先係個包散哂；第二係等左咁耐先拎上手都唔熱，只係微溫；第三係醬汁唔夠；第四係最重點嘅漢堡肉，咬落完全散開，無肉餅嘅感覺反而似肉碎，一堆漿住個口嘅生粉獻咁，好失望。薯條好食，唔係用千年油（咁因為啱啱開又無得比較）。試業日子，店內清一色係自己人黎試食，我响度等，周圍避開佢地影相，有點尷尬；期間都有幾個客行入黎想試，但見到呢個情況都走夾唔抖。我㨂日子㨂得唔好啦真係，本身住附近，本來諗住成日有得食好開心，而家都係決定唔會再幫襯。一個不愉快的經驗。…Read More