yeungyoyo's Profile

今日約左朋友係北角食飯，好耐冇食雞煲，所以就揀左呢間餐廳試下。估唔到星期一晚都咁多人，好彩咁岩仲有最後一張枱！老重慶奇妙雞煲朋友唔食得辣，所以揀左呢個奇妙雞煲，醬汁幾特別，甜甜地又幾夠味、幾濃郁，雖然個煲入面有少少辣椒不過又唔會覺得辣喎。呢個係細煲，但都有好多件雞，雞幾滑，大細剛剛好，唔會好大舊食得好辛苦，又唔會太細舊好多碎骨，入面既配料仲有豆卜同冬菇，索左啲醬汁好好味。呢個雞煲值得一試！同埋下次有機會想試埋個麻辣雞煲！鮮味香煎墨魚餅見到牆身張相幾吸引，又寫住人氣，所以就叫黎試下。墨魚餅份量都幾多，幾厚身，又煎得夠香口，個底仲有幾塊蝦片！炒包心菜平時茶餐廳冇乜機會食到，見呢到有就叫黎食下，都唔錯！除左小菜，仲見到有得打邊爐，有機會都可以試下。…Read More

今日去左新蒲崗買嘢，之後順便去Mikiki搵嘢食，西班牙菜唔係成日食，所以決定試下。西班牙海鮮飯我地叫左二人份，都幾大份，海鮮有青口、蝦、魚、蜆同墨魚仔，飯軟硬適中，個醬汁都正正常常。德國超級香腸拼盤有五款腸仔，一堆薯條同鹹酸菜，食到好漏既時候可以中和一下！佢仲配有兩款醬汁，茄汁同蜜糖芥末，蜜糖芥末好好味，我食薯條都係點佢。腸仔方面，中間那個分左兩折既有少少辣汁，比較特別！羅馬生菜包牛小排牛小排有七舊，生熟程度剛剛好，用生菜包住再加埋佢嘅醬汁，好夾！值得一試！是日餐湯配意大利麵包我哋傻左唔記得咗問是日餐湯係咩，見到張相以為會係南瓜湯，點知原來係白湯，不過都唔緊要，隔離個包好香好脆好好食！啤酒我地揀左餐牌第三行那款啤酒，麥味夠重！配腸仔好夾！！…Read More

朋友食過話好食所以就黎試下啦，星期四既晚上，都幾多人，好彩仲有位。本身想揀套餐抵啲，但有啲想食既野套餐冇，所以最後都係散叫。馬拉盞炒通菜每次食泰國嘢都一定會叫既野，炒得夠香好好味，可惜唔覺得辣，辣啲會再惹味啲！雞絲炒金邊粉另一個必食嘅係炒金邊粉，平時通常都食蝦，今次想試吓雞絲，又幾好食喎！不過我地食食吓掛住食其他嘢，放耐左變咗一餅嘢，要再慢慢整返散！炭燒豬頸肉睇餐牌相見到佢係用個細細既爐烘住上，勁吸引，燒到熱辣辣勁香，配埋佢個汁食到停唔到口！呢個一定要試！龍眼冰同紅豆冰我地叫左少冰但都仲係幾多冰，不過都分別有幾多龍眼肉同紅豆！味道正常！芒果糯米飯呢度嘅芒果糯米飯幾特別，食落覺得有一種花香味定精油味，就係去泰國按摩會聞到嘅味道，朋友唔鐘意，不過我接受到，食埋佢個份～…Read More

前排去將軍澳搵朋友玩，佢帶我食左呢間既冒菜，見到原來尖沙咀有分店，仲有烤魚同火鍋，所以就黎試下。店員見我地好迷惘，佢就簡單介紹左三款魚既分別，多寶魚會比教多骨，三刀魚會比教厚身，龍躉魚會比教鮮甜。我地最後揀左中價位既三刀魚，條魚真係幾厚身，都幾滑，中間冇咩骨，係邊邊位會多骨啲。味道方面，我地係揀左招牌小辣，辣到適中，食得辣既可以挑戰中辣。條魚會跟三款配菜，日日都唔同，今次係雞髀菇，芋絲，雲耳，全部都好夾個湯底，好入味。另外，我地仲叫左幾款配菜。豆腐有八舊，硬身唔怕好快煮到溶溶爛爛，索左汁又係好入味海白菜呢個比較少見，唔多地方有得食，份量都幾多，煮淋啲會好食啲黑豚肉肥瘦剛好，薄身但又幾大片，正常水準桂花蜂蜜幾清新，甜甜地，唔錯～烤魚絕對值得一試！下次試埋火鍋先～～…Read More

我好耐冇食韓國嘢，午飯時間專登約左同事食～我地大概十二點半左右到，已經坐左好多人，得番近門口既幾張枱。午市套餐都幾多選擇，有炸雞、飯、麵、薄餅、年糕可以揀，但因為我地太想食炸雞，所以揀左一個炸雞同一個焗雞。每個午市套餐都包一杯飲品，可以自己去雪櫃拎一罐凍飲或者隔離枱沖熱既柚子茶，凍飲都幾多選擇，我揀左比較少見既荔枝烏龍茶，不過淨係飲到荔枝味，冇咩茶味，但甜甜地都唔錯既～香辣脆雞微微辣，個皮好脆，炸粉剛剛好，雞夠嫩滑，唔會炸到好乾身，食到停唔到口！蜂蜜牛油香蒜焗烤雞焗烤雞比炸雞多肉汁，同埋好入味！個香蒜味好正！雞皮都烤到幾香口！另外佢出面張枱仲會有泡菜同粉絲提供，可以出去自己夾，粉絲清哂都見到佢好快就提供番～兩樣都好好味，我地都有夾完再夾。同埋佢地會提供手套比我地食炸雞，非常貼心，唔怕食到成手都係！…Read More

前排去左深水埗睇電腦，朋友介紹有間台灣牛肉麵唔錯，不過上次冇食到，今日專登黎試下，實在太掛住台灣！星期五既晚上七點幾到，咁岩仲有最後一張枱，唔駛等位，太好了！呢度既裝修幾特別，懷舊風格，好有去左台灣既感覺！望下餐牌，我地一人揀左一個主食，再揀左一個小食，嗌左主食配飲品可以減十蚊～招牌紅燒牛肉 配牛骨湯麵個牛骨湯底幾濃，店員話係用牛骨再加左菜同藥材煲左幾十個鐘既，個麵都幾彈牙，大概有五舊牛，都算厚身，唔會太硬太淋，仲有一舊蘿白，幾清甜。特盛台灣牛肉 配牛骨湯麵特盛真係好豐富，除左牛腱，仲有豬軟骨、花枝丸、貢丸，個豬軟骨都幾淋同入味，丸類就比較普通。起司蛋手抓捲餅手抓餅好香脆，入面有好多菜，好有咬口，配埋芝士同蛋真係好夾，必食！芋香珍珠奶茶我地叫左少甜少冰，芋香味都幾香～下次黎多次試下其他野先～～～…Read More

之前聽過好多朋友講呢間餐廳唔錯，但是由於佢坐落荔枝角工業區，對我黎講唔太就腳，所以一直都冇機會試。不過今日咁岩經過，唔需要等位就試一試啦！餐廳係十樓，一入去就見到中國風既裝修，職員先問我們打邊爐定小菜，今次我地先試試打邊爐吧。我們揀左花膠雞同埋麻辣鴛鴦鍋湯底，湯底好快就上，由於我近排唔可以食辣，所以麻辣湯底我冇試到，但是花膠雞湯底好足料，飲一啖湯，已經知道係心機之作。先黎四寶丸，呢個比較普通，覺得同其他火鍋店差不多，八粒黎講價錢唔算平。再來係豆腐紙同千層枝竹，豆腐紙好薄，同腐皮有少少唔同，不過配上火鍋又係另一個層次。本地新鮮牛頸脊呢個絕對係推介，色澤均勻，油花分布平均，有咬口，厚度剛好美國極黑和牛封門柳大大碟好抵食，牛味非常重，食唔停口鮑魚雞粒餃冇諗過真係會有半粒鮑魚喺入邊，真材實料！手打魚腐魚腐吸晒湯底啲精華，食落口好似棉花糖咁軟綿綿，值得推介！最驚喜係金箔懷舊芝麻卷！食落口好似食緊碗芝麻糊咁，好正！最後仲有皇帝菜同埋淮山麵，都好好食！…Read More

去完深水埗睇電腦，睇到咁上下就覺得好肚餓，朋友就推介咗一間附近嘅鑊氣小炒王帶我去食。可能時間尚早，完全唔使等位。Menu好多嘢食，睇到眼花撩亂，最後揀咗以下幾款小炒：芥辣牛柳粒驚喜之一，平平無奇嘅牛柳出奇地加上芥辣非常好味，師傅炒得非常有鑊氣，有合桃同蜜糖伴碟，牛柳粒食落好淋。艷影蝦球炸得恰到好處，蝦肉冇乜雪藏味，亦唔會炸到成口粉漿。醒胃山楂骨酸酸甜甜，真係好似個名咁有醒胃嘅作用，啖啖肉，不過食多幾舊就會覺得有啲漏。啫啫通菜呢個係第一道菜，好有驚喜，鑊氣十足！唔會過鹹，通菜好嫩，仲有蝦乾爆香。事頭婆炒麵最後驚唔夠飽我哋就嗌左一碟炒麵，呢個就冇乜驚喜同平時粥店嗰啲差唔多，但份量好足，簡單菜式但絕對唔hea。食完發現全場爆滿～好彩我哋早咗嚟食如果唔係就要等位。不過唔知係咪好多客人的關係，員工禮貌就比較一般，大概係大牌檔式餐廳的特色吧！…Read More

公司附近開左個food court叫food loft，大部分餐廳都係做外賣，一樓有少量位置可以坐，不過我地都係買番公司食。我地都鐘意食辣野，所以就黎試下呢間酸菜魚，佢個門口係對街，不過food loft 入面都有個counter，兩邊都可以落單。午市套餐都幾多選擇，最後我地叫左酸菜魚配飯，水煮牛肉配薯粉，再用優惠價加左成都口水雞同埋麻辣雲耳青瓜，都幾抵！有需要仲可以加幾蚊要埋野飲，不過我地冇叫到。酸菜魚湯底唔錯，微微酸，微微辣，幾開胃，白飯索左湯汁好好味，平時我好少食白飯都差唔多食哂成碗。魚片大舊，份量都幾多，好滑又冇骨，大家可以放心食。水煮牛個辣度剛好，牛肉多，夠入味，薯粉煙煙銀銀有咬口，配埋個水煮汁忍唔住食哂成碗！口水雞夠惹味，雞肉夠滑，不過略嫌紅咗少少，美中不足！青瓜爽口，雲耳入味，幾開胃～整體都幾滿意，下次會食酸辣粉～…Read More

沙田區食到悶悶地，朋友介紹所以入大埔搵下好野食。今次黎到呢間鐵板牛，佢既特別之處係牛扒跟重量比錢，食幾多叫幾多，仲有係你面前磅，唔驚比人呃！牛扒有五個選擇，我地揀左後腰三角肉同埋牛板腱，兩個都係想要300g左右，結果磅出黎係322g同296g，我地覺得都差唔多，之後就可以揀埋個汁，蒜油相對比較吸引，仲可以加錢配餐，Set 1 同 Set 2 各叫左一個，揀左飯、沙律、汽水，同埋啤酒、飯、沙律。本身想試溫泉蛋，可惜已經賣晒！鐵板預設係五成熟，如果有特別要求既落單既時候可以講埋。點完餐會有個No牌，佢響嘅時候就可以去拎餐啦！兩塊牛扒都幾厚身，後腰三角肉比較多筋，但肉質較好。相反牛板鍵就少啲筋，但就略嫌牛羶味重左少少。不過總括黎講呢個價錢呢個質數絕對係抵食！另外跟牛扒附上既汁有少少柚子味，幾夾幾清新！如果唔鐘意個汁仲有鹽同黑胡椒提供！沙律配有芝麻醬，可以解下油膩，唔錯！個啤酒幾好飲，同埋個杯都係雪凍左，盡量保持住個溫度！食完之後自己執埋野就可以走啦～…Read More

聽講呢間既漢堡好好味，不過青衣我好少去，屯門有就去試下啦。因為肚餓驚等得耐，見到有電話號碼就提早打去落單，店員態度好好～去到餐廳有幾個人排緊隊，到我個陣個餐岩岩出，非常好。我地揀左加勒比海牛堡同埋至尊牛堡，加左一個餐，揀左粗薯條同埋湯。兩個牛堡都好足料，夠Juicy，肉夠厚身，好好食！配菜足，醬汁勁多，不過食到後期會有啲論盡。粗薯條炸得好香脆，仲係熱辣辣，不過可惜個黑松露湯比較稀同淡。下次會試其他野！…Read More

晚市重開左幾日，約左朋友食飯，不過去到餐廳話好多野都冇，有啲失望。最後我地嗌咗一個一人Dinner Set，再散叫左意粉同甜品。Dinner set 有個湯，普普通通，前菜就揀左溫泉蛋三文魚子豆腐，個汁幾好味！餐個意粉係細細碟，兩三啖就食完，酸酸甜甜幾得意！個主菜揀左西冷牛扒五成熟，生熟剛好，但牛扒唔夠Juicy，個薯蓉好食，如果可以多啲就好。散叫既意粉唔錯，幾清新，忌廉汁但唔會好漏。食哂正餐上甜品前佢地提供左少少果肉整既沙冰，佢話可以解下啲味先食甜品，幾特別。之後就到心太軟，正常水準。整體黎講普普通通，正正常常，不過可能期望過高，就有啲落差。…Read More

疫情好轉，晚市重開，當然要周圍搵下野食啦，早幾日去左太和搵朋友，佢話呢間幾好食，所以今日就專程入嚟試下。星期五晚黎到，岩岩好仲有最後一張卡位，望下個餐牌，見到二人餐都幾抵食，我地就揀左春卷同墨魚餅，馬拉盞炒通菜，香煎豬頸肉鮮蝦撈麵同海鮮喇沙摻摻，凍薑蜜奶茶同青檸梳打。但見到牆身既介紹，又好想食火山包，所以又忍唔住叫左個軟殼蟹火山包。春卷幾香脆，熱辣辣，好食！不過墨魚餅相對就比較普通。個菜炒得幾香，雖然係用馬拉盞抄，但一啲都唔辣，用個窩上菜，會冇咁快凍！豬頸肉就正常發揮，如果唔想食湯麵類，有得選配撈麵都係唔錯嘅選擇。海鮮喇沙值得推介，夠椰香味，唔辣，有蛋、豆卜、魚片、蝦同蜆，幾豐富～最後梗係要介紹吓個火山包啦，店員提醒我哋火山包啱啱整好熱辣辣食最好食！原來個包都幾大個，隻軟殼蟹大大隻，仲有青口，蜆，蝦既配菜，好多餸！移開隻軟殼蟹望一望，個包中間仲好多汁～軟殼蟹香脆又有蟹膏，個包索左啲汁好好味，不過如果個汁可以再辣少少會更好！…Read More

難得呢間小店成功續租，當然要黎支持下，星期五既晚上比較多人，大概等左四十分鐘左右，亦因為疫情關係，用餐時間都係大概四十分鐘，都合理呀！呢度沾麵比較出名，但今日比較想食拉麵，所以最後都係揀左豚骨拉麵同埋鹽味雞湯拉麵，加左一個套餐，要左章魚小丸子同汽水～豚骨拉麵湯底濃度適中，唔會太油太鹹，麵既粗幼度都岩岩好，豚肉微微燒過好香口，仲半隻蛋添。鹽味雞拉麵就比較淡身，鹹鹹地，個雞肉叉燒唔錯，想食清啲既可以試下。章魚小丸子有四粒，外脆內軟，即叫即整，熱辣辣，必食！…Read More

慶祝生日想食蠔所以上網做左陣資料蒐集，就揀左呢間餐廳，經OpenRice 訂座，仲可以落埋備注話想甜品寫「生日快樂」，岩哂我呢啲懶人。係石門站出行一陣就到，都幾方便，可能因為我係訂座，所以可以坐係靠邊位既一張半圓形梳化椅，舒服啲，影相背景又冇人，非常好！因為主要想食蠔，所以我地淨係叫左一個晚餐，揀左西班牙辣肉腸什菌菠菜意大利飯，跟埋南瓜湯、菠蘿有機奇亞籽綠茶同細細件是日精選甜品，南瓜湯唔錯，意大利飯軟硬適中，份量剛好。跟餐仲可以加配唔同小食，每個餐每個項目可以加配一次，所以我地揀左精選生蠔同吉列蠔，吉列蠔幾香口，唔會太厚粉，都唔會好油。另外每日都有六款生蠔買一送一，我地就揀左黎自法國既兩款，再加埋跟餐既精選南非就有六隻啦，佢會跟你叫既口味，幫你擺好順時針跟住食就岩，全部都好鮮甜，同埋都幾大隻，絕對可以再黎食！！！另外我地仲叫散叫左意大利芝士餅，酒味幾香，仲寫埋字，影相好靚～（唔記得左單獨幫佢影相，所以冇相睇）…Read More