woodytg's Profile

講真，以咁嘅價錢，有半自助餐，main course食物質素係收貨嘅 。我叫左龍蝦芝士飯，好好味就講唔上，半自助餐有多款沙律，有少少海鮮，收貨啦 。我地呢啲普通市民，星期五晚約個朋友搵個地方食飯吹下水，只要求食物質素唔太差，環境ok 。但點解標題係莫名奇妙嘅服務思維呢？事緣我同朋友兩個人，六點零鐘入去，一路坐到差唔多九點，其間我都一路有留意外邊係咪有人排隊，但事實係我見到外面有吉枱，所以就諗住坐耐啲都唔會阻住人地做生意啦 。但就嚟九點嘅時候，有個男侍應行埋嚟細細聲咁同我哋講外面有人等緊 。我當時都覺奇怪，明明有吉枱，但都馬上埋單啦 。出到門口望一望，果然冇人等枱，到我地去埋洗手間出嚟，我地坐果張枱仲係吉嘅 。其實俾返張枱你有咩所謂，但使唔使老點我哋話外面有人等枱呀 。當我地傻仔🤬 。我地一行出門口就知你老點啦😂😂其實佢用呢啲籍口攞返張枱但又冇客，為咩呢？反而覺得佢地先係傻仔 。而家我明點解咁多人北上消費，因為除咗價錢平啲，上邊嘅服務贏晒 。起碼唔會俾人老點 。呢間嘢咁鍾意老點客人走，攞返張枱擺喺度晒燈，我以後都唔會阻你，😂😂 。希望大家都唔好去煩佢哋😂😂😂…Read More

三個人晚飯，點左人嵾雞，五花肉，雪花牛 肉。人嵾雞冇味 。五花肉普通 。雪花牛冇牛味 。雖然價錢尚可，但唔知食黎做咩 。仲諗住係韓國人主理，點都有啲嘢掛，睇韓劇講到啲人咁認真，😂😂 。嘥氣 。最激氣係仲厚同鄉而薄香港人 。一見同鄉入嚟，直頭同韓劇入面啲場面差唔多，招呼好到不得了。咁都算，正所謂他鄉遇自己人，講晒韓文咁，熱情啲都明啦 。但因為我哋其中一個朋友，對辣椒敏感，所以咪問佢攞多碟唔好放辣椒嘅醬油，哈哈，佢竟然話冇，跟住好輕挑咁行開 。我冇放棄呀 。再問第二個攞 。佢面有難色咁 。左問右問，攪左一輪，先由原先果個輕挑傲慢又好高嘅女人攞左一碟冇辣椒嘅醬油俾我哋 。哦 。而家又有嘅 。擺明耍花樣 。真係無聊 。我個朋友諗住點啲醬油啦，但一食落啲味怪怪地 。唉 。呢次真係要放棄，無謂搏 。所以除非你係韓國人或者識韓文，唔好去幫襯，俾人玩嘞 。香港地大把韓國餐廳 。…Read More

約咗朋友食晏，佢推薦呢間。我第一次去，都有啲期待。朋友叫咗個牛扒，我食咗一嚿，味道都唔錯，有牛味。我自己就叫咗個龍蝦pasta，小辣，味道OK，咁嘅價錢，都收貨啦。另外甜品就叫咗兩個芒果拿破崙cake，賣相OK 㗎，可惜我嗰件呢舊芒果就太熟啦。但我都收貨嘅。本來餐晏都算開心嘅，但走嘅時候，朋友去埋單，我唔熟地方，所以跟埋朋友去咗賬房嗰邊，間餐廳地方都係狹窄㗎，所以就變咗阻住佢哋賬房個門口前面條通道。其實我都係喺嗰度停留咗唔夠兩秒，搵緊個lift口喺邊度，竟然有個侍應同我講，喺出邊等啦，你阻住個門口啊。我心諗有冇搞錯啊，點解咁冇禮貌㗎？呢度啲人。但我都冇出聲，費事令朋友尷尬啦。結論係，除非同朋友去食晏，否則，我自己係唔會去，因為話晒都食法國菜喎，服務都緊要㗎嘛。…Read More