Siuchun6's Profile

有車必做嘅事就係鹿頸早餐。試過平日下晝嚟多人到滿座，今次專登早起身嚟食真早餐。早到泊車唔使爭，轉角就係餐廳，隔離有廁所好方便。聽講呢間早餐正啲，所以都係食返呢間。個人比較鍾意薯餅，所以要咗精選早餐。即叫即整係要等5-10分鐘，所有嘢食都煎得香，絕對係餐廳水準，唔係一般大排檔。最重要嘅係有清新嘅自製蘋果醬搽多士，食完一定精神。雖然呢個位唔憂做，店員態度良好，上次漏咗散銀喺車話唔使比尾數，梗係跑返上車攞啦，君真啲好。…Read More

因為疫情關係，太耐無去過旅行，想揾一啲有特色嘅日本菜食。呢個商場一向都多選擇，今次就揀咗間和風裝修嘅日式餐廳。灰色牆襯木色嘅枱望落幾舒服。坐低之後會收到一個二維碼，可以用電話落單，方便得嚟又可以減少接觸。對自己好啲，我揀咗最好嘅燒日本九州A4和牛丼，同埋南蛮風炸雞同朋友一齊食。首先嚟嘅炸雞有蛋沙律醬喺面，比起平時嘅醬油新奇。炸雞鮮嫩，外脆內軟，撈埋蛋沙律醬竟然又減輕到油膩嘅感覺。不過食完真係會好飽。和牛丼等咗一陣，啲肉肥瘦大約各一半，未係最頂級嘅牛，但煮到半熟狀態有少少入口即溶嘅感覺，然後用火箭菜做伴碟可以解一解膩，果然係有心思嘅 fusion菜。今次食得太飽，下次有機會仲想試埋意粉同pizza!…Read More

呢間鋪頭位於扶手電梯頂當眼位置，上商場行好大機會見到。每次見到個餐牌都覺得好吸引，今日終於有機會嚟慢慢嘆個下午茶。今日落雨，室外無得坐，落完單啱啱有一張枱，非常好，再無就要坐大枱。我要咗日本宇治抹茶海綿卷輕食，本身鐘意食抹茶但怕芝士蛋糕加雪糕太邪惡，所以試下海綿蛋糕。雪糕就揀咗混合嘅抹茶牛奶雪糕，可以有多種味道。飲品揀咗簡單啲嘅熱牛奶咖啡。呢度非常注重視覺享受，雲石花紋餐枱加遮陽傘，再加上甜品嚟到嘅金色花紋托盤，有貴族嘅感覺，未食已經先滿足。抹茶卷鬆軟，甜度剛好，同紅豆餡係絕配。雪糕非常滑，兩隻都好重牛奶味，我可以接受抹茶再濃啲，啲雪糕嚟嗰陣已經有啲溶，可能要最後先吱會好啲。白玉丸子好煙韌，配埋雪糕紅豆就一流。蜜餞栗子微甜，咖啡細滑，加上天然微酸，可以中和其他甜品嘅甜味。喺度過咗個愜意嘅下晝，好嘅食品值得一試再試！…Read More

行咗一日，諗住搵個地方坐低慢慢食一餐，見到越南菜諗住穩陣啦就入咗去。點知佢話有限時，都算啦唔想周圍搵位，入到去裝修靚但係窄到好似晏晝食茶餐廳咁。我地叫咗個生牛肉湯河同番茄蟹湯檬。啲嘢到得幾快，牛河賣相普通，牛肉份量合理，但係河粉唔夠。越南湯河最注重就係個湯，但係食咗幾啖到食唔出係咩味，大大啖飲個湯都冇乜美咁，除咗懷疑味精味。成碗野冇質素可言，連街邊食都可能好味過佢。再嚟個番茄湯仲突破，諗住飲啖番茄湯，一入口又係同一隻鹹味，得好淡嘅茄味，所以好懷疑係用同一隻味精，真係肚餓都食到唔食。如果係街邊平平地三十蚊一碗都話可以過得去，喺呢度食就真係太過分。如果你肯比呢個價錢坐呢度咁就嚟食啦。…Read More

開咗一段時間，終於有機會嚟試，初初開做緊買五送一，可以慳少少啦。去到要排隊，等十個人左右，夠哂時間揀定口味。鋪頭用玻璃櫃放麵包，只有店員可以夾，唔俾自己揀，避免破壞賣相。每個包睇落都賣相滿分，真係好難揀。首先有例牌海鹽焦糖，要平衡甜同鹹味唔係咁容易，佢做得恰到好處。然後有朱古力味，有質素但比較甜。香蔥味噌做牛角包幾神奇，食落幾夾，不過好油膩。雪花檸檬最好味，香甜得嚟唔會過份，面頭仲有脆糖，滿足口感。明太子係獨特啲嘅口味，鍾意嘅話會覺得幾好食。香濃起司就重口味啲，增肥適用。總括嚟講都幾好味，稍為可惜係冇地方即食。…Read More

自從黃埔開通咗咗鐵路，北角返工嘅人約九龍人多咗個好方便嘅地點，搭船過去就可以見。而呢度係大型住宅區，附近有好多種類嘅嘢食。今日想簡單食碗粥，就揀咗呢度粥粉麵飯點心都有。兩個人叫咗一碗窩蛋鮮牛肉粥同一碗鮮牛肉麵，想話叫個菠蘿叉燒包，但原來六點前先有人整，夜咗有一堆點心都無得叫，唯有叫個叉燒腸粉。粥唔會太咸，有薑驅寒，米量都夠。窩咗蛋食落鮮甜，牛肉亦好嫩滑。麵食落幾彈牙，都係合理質素。叉燒腸中規中矩，好味但無特別皮薄功夫。今時今日喺較高消費地區食呢啲嘢要呢個價錢都只能夠話係咁上下，要方便就要付出多啲錢，間中嚟食下都可以嘅。…Read More

去完旅行食太多唔太舒服，喺醫院睇完醫生要揾啲嘢食先返公司。上網揾咗呢間粥鋪，天氣太熱唔理咁多入去試一試。入到去都係正常一個人帶位落單上菜，門口無人就指咗我坐門口，開揚啲會熱啲。我叫咗一碗粟米粥同一碟鮮牛肉腸，希望會夠飽。粟米粥應該係用罐頭粟米，粥夠米量無偷工減料。鮮牛肉腸都好足料，每一嚿都有牛，不過腸粉一啲都唔滑，非常厚身，只求填飽個肚而無乜功夫可言。整體而言，價錢合理，質素正常，食得飽，環境一般，飛蟲難免，區內無乜粥店，唔要求太高嚟呢度食都還可以。…Read More

出街開工食飯最忌撞正放飯時間周圍都係人，浪費時間等又坐得唔舒服。今日出嚟做嘢，中間隔一個鐘剛剛就係最多人嘅時候，見到轉角有間咁吸睛嘅麵包鋪，就決定揀個麵包頂下肚餓算。鋪頭佈置走高檔次歐陸風情，除咗有麵包櫃可以自己夾麵包，仲有店員幫你夾嘅精美甜品同有餡烘培麵包。我行咗一個圈，覺得白朱古力髒髒包賣相最吸引，於是夾咗個放入透明膠袋。點知伏就中咗，面頭嘅醬幾乎掃平哂，無哂觀賞價值，所以建議大家交比店員處理。食落真係好甜，有少量白朱古力味，麵包軟熟，係日本靚材料嘅出品。食一個真係唔太夠飽，要喺度食飽可以貴過食個午餐。…Read More

通常喺銅鑼灣諗唔到食乜，又唔想排咁耐隊或者周圍揾位，就會去一蘭。初初開得呢間，要排兩個鐘，宜家唔使再排咁耐，今次早過食飯時間仲即刻有位。鍾意食拉麵但又唔可以食太肥膩嘅我嚟到就一定揀無或少肥膩度。辣亦都完全無要，唔使驚刺激到腸胃。其餘嘅都要一份嘅分量。第一碗麵叫普通，食食下就會軟。如果添麵通常會揀軟麵，因為湯凍咗唔會影響個麵質感。五分鐘左右就有得食，服務同味道都同日本食過嘅一樣，跟足指引做。拉麵本身唔係咩高級食品，我欣賞佢用心調節各種食材嚟遷就顧客味道，唔鐘意佢個湯嘅人就要揀第二間啦。價錢就絕對係貴，物離鄉貴，無日本咁公道。…Read More

見咁多人推薦，又有藝人去過讚好，於是決定放工去食。呢間鋪兩個地鐵站都唔近，慢行要十幾分鐘。鋪頭比較細，繁忙時間去有人龍，我地係九點幾去先至有位。我叫咗個薄切安格斯牛扒露筍忌廉汁闊條麵。所有嘢都係即叫即造，要等十分鐘左右。上菜熱辣辣，聞到忌廉香味。牛扒非常軟熟，裏面微微粉紅色，有比心機控制火候，配埋醬汁好好食。雖然忌廉汁會食到幾飽，但無多餘嘅油，感覺剛剛好，麵嘅份量都唔會太多。鋪頭比較細同迫，去到得吧枱，店員忘記咗比返矮枱我地比咗新客，不過多數都係咁。…Read More

幾年前開始喺呢區做嘢已經有同事介紹我食呢間越南菜。之前喺比較近港灣豪庭嘅一個角落小鋪，好有地道風味。宜家搬咗去中匯街，地方大咗，坐得舒服啲。今日過九龍做嘢，回程順路嚟揾舊同事食個飯，要同事帶路。終於去到新鋪，又見返越南老闆。我叫返超值午餐雞絲湯河，加咗幾蚊，始終環境唔同咗無辦法。碗粉嚟到先醒起唔記得叫少粉，依然係一貫嘅大碗。最正就係個湯，濃郁得嚟清香，食完唔會口渴，係多年嚟嘅秘密武器。雞絲其實似雞柳連皮，啖啖肉，份量適中。有越南辣椒醬可以自行添加。同事叫咗扎肉，依然一碟有兩款，一款有豬耳增加咬口，兩款都好有風味，唔會太咸。就算加咗價，性價比都係冠絕全港，希望老闆繼續做落去！…Read More

今日做嘢多到抖唔到氣，想去海邊呼吸下自由嘅空氣，所以用手機應用程式落單，叫咗個雙重芝士雜菌三文治，快捷方便又可以變相插隊。落到去輕微覺得有伏味，首先店員趕到講嘢呼呼喝喝，我知係無心嘅。埋到去我個三文治未有，前面一定都有一定嘅單，打咗尖都要等。有得擺啦，比人喝咗一喝，似足大學版本嘅分店，咁忙無辦法啦。去到海濱難得揾到位，咬落去，嘩個包邊硬到呢。食咗幾淡入去先軟返少少。味道係正常嘅，飽就一定唔夠兩個鐘，要買多啲嘢食。有可能店員太忙焗錯時間，平時真係無咁硬。多人時間真係無運行，自己小心。…Read More

今日係假期，同家人食午餐。咁啱要去順豐站攞貨，於是就去鴨脷洲大街隔離間泰國嘢食飯。雖然唔知佢開咗幾耐，但幾年前都有同朋友食過，質素幾好嘅。今日三個人叫咗一碗豬頸肉湯金邊粉，一碟泰式炒蝦肉金邊粉同泰式串燒。湯粉清甜，份量幾多，食得好飽。炒粉偏甜同有啲濕身，我唔知正宗係點，但覺得無乜問題，辣椒喺側面自己調配。份量適中，夠一個人食。串燒燒得好香，肉大大嚿好滿足。以我地唔大食嘅人嚟講，叫兩個主食加一個小食都好夠。假日無午餐叫，但價錢都合理，應該係呢個島上面最好食嘅嘢。…Read More

由阿爸十幾年前喺度做嘢食到宜家自己喺度做嘢，一直都係幫襯佢，除咗炭燒雞蛋仔之外，應該只會幫襯呢間。今日又係忙到甩轆嘅日子，收工覺得要食啲嘢補償返。去地鐵站中途經過見得一個人等緊，就即刻埋去睇下，跟住仲要睇到未有整定嘅雞蛋仔，就即刻買一個。由於佢都開始造定啲雞蛋仔，等咗一分鐘就有喇。等嗰陣見到阿姐落蛋漿落到滿瀉先停，係俾足料嘅，但亦都係小小敗筆。一攞個雞蛋仔，顏色偏淡，好似唔夠火侯。食落有蛋香，獨有配方係好食嘅，但無外脆內軟嘅口感，因為落過多蛋漿，令佢難以有微焦嘅效果，只係會食得飽啲。加到呢個價錢就唔太值，偶然回味下係可以嘅。…Read More

又到放飯時候，為咗唔好食太多頂住，唔同同事去食碟頭飯，走去食輕食。啲間咖啡店嘢食種類越來越多，最近新出咗燒牛肉雜菜絲紅菜頭包，有菜有肉有五穀類咁均衡，所以買嚟試下。落咗單要等用烤爐整熱，兩三分鐘有得攞。呢度算幾多位，即刻揾到位唔使等。個包食落同普通包無乜分別，不過紅菜頭益氣補血係有益食材。牛肉同雜菜鋪滿成個包，牛肉唔太乾容易咬開，雜菜加沙律醬更易入口。不過食完真係唔飽，兩個鐘就會餓。而全線都唔期望員工會態度好，做功課多過一個鐘唔會趕，但食完嘢加恰一恰都唔夠一個鐘就埋嚟拍，匪夷所思。…Read More