Jsian4Real's Profile

咁啱要去尖沙咀快買啲嘢，就順便去海防道呢個熟食市場快食。我同我女朋友叫咗豬扒出前一丁加煎蛋，凍咖啡少甜。豬扒出前一丁加煎蛋：簡直唔知佢點樣整出嚟，豬扒好柴，好乾。出前一丁我係叫爽面嘅，首先個面好明顯係焗出嚟嘅（即係好似你整杯麵咁樣整，好嚡）最攞命係出前一丁個湯淡而無味（我特登加$5換個出前一丁就係驚你用普通公仔麵個湯淡，你同我整到咁樣？）。個煎蛋煎到過熟（都係要加$5）。凍咖啡少甜：我只能夠講係冇咖啡味，好明顯係好多冰溝到好淡好淡好淡（唔係一般你叫少甜嗰啲淡，係好似杯凍飲擺咗喺度好耐啲冰溶晒晒咁淡）。兩個人盛惠$156 總結：我真心唔明一啲咁簡單嘅嘢點解可以整到咁樣，簡直就好似一個唔識煮嘢食嘅中學生喺屋企煮公仔麵俾自己食一樣，分分鐘都煮得好食過你。其實如果你唔想做可以執咗佢，擺喺度又冇生意又冇味道我都唔知你想點。…Read More

平日放假同屋企人嚟聚餐，想揀一達環境比較優雅少少嘅地方用餐。位於酒店內嘅餐廳，環境大多數都唔會有咩問題嘅。之前同客食過呢度嘅商務套餐覺得唔錯，所以相比屋企人試下。成個套餐唔算太多道菜，但係味道就非常之好，亦唔會有過多或者太少嘅感覺，分量控制得非常之唔錯！個人十分之喜歡1）頭盤 2）炒飯，同埋 3）甜品。我知道呢度都有得飲茶所以下次都想試下，整體嚟講如果唔介意洗多少少錢我覺得呢度同屋企人或者同客人食都唔失禮！…Read More

琴晚好夜先肚餓又想食啲好味少少嘅壽司，就用open rice個app掃下有咩選擇，搵到呢間立鮨，好多年前食過金馬倫道嗰間分店覺得幾好食。不過尋晚最近我嘅就係呢間旺角分店，可能因為係旺角嘅關係，入面有好多人同埋冇侍應理你。我就畀張單佢睇我上網訂咗餐，佢就咁隊咗袋嘢畀我望都冇望過我，搞到我想問佢有冇乾冰都唔好意思（因為我要揸返15分鐘車返屋企）不過，整體嚟講食物同價錢都好高性價比，不過呢個價錢就唔好要求有啲咩服務。下次都只係會繼續外賣，唔會堂食，費事要受氣！…Read More

差不多每星期六都用App叫早餐的一間茶記，味道不錯，選擇唔多但貴精不貴多啦。但係真係越做越難食，越做越求其，如果太好生意太忙咁你唔好接生意囉，做乜做到咁求其。我幫襯你半年，由好鍾意食到我太懶先會勉强叫外賣，我今日決定以後唔再幫襯！經驗: 沙牛麵叫你分湯你一時記得一時唔記得，送到嚟就林到唔想食，餐具就鍾意就比唔鍾意就飲管都冇。咁麻煩你一係就收多少少錢如果你要額外餐具，唔好浪費食物。公仔麵其實真係好hea好易整既食物，你都可以整到咁，利害！而家想搵間好少少既茶記真係好難，難得開頭做得咁有心機而家又Hea做，可惜！…Read More

可能我比較黑仔，最近食親野都撞啱間超難食嘅！同屋企人2點鐘到荃灣廣場搵食，搵到呢間野！佢哋話未有下午茶，唔緊要，差幾廿蚊，唔通要屋企人等咩！我本身由細到大都有食越南野（響加拿大食開，如果響加拿大返嚟嘅應該知我講乜）！好啦，最簡單嘅，食越南河，加甜醬辣醬已經係常識吧！你冇？唔緊要，當我腌尖囉！你們所謂嘅牛肉粉，點解個湯淡到衰過出前一丁雞容麵？我阿爸仲問我，似唔似味精溝水？ 大佬，你收成六十幾蚊一碗，可唔可以俾返小小誠意？如果係咁，我比多＄40食一蘭好過啦？我知道食越南野，去九龍城就當然有保證啦，但係都唔使撐咁遠下話？順帶一提，呢一間野，服務態度也是一般！啲小食叫咗，可以到你想買單都未出俾你，到我問佢可唔可以取消，就馬上奉上！你有冇衰到咁樣樣啊？有時真係好想出街消費，但係咁樣嘅質素，我真係接受唔到！各位讀者，純粹個人意見，你自己決定啦！…Read More