happyyummy's Profile

我有幾個去過韓國留學嘅朋友，佢哋因為太鍾意韓國，所以我哋平時約食飯都係會試下香港唔同嘅韓國餐廳～但每次講話食韓國嘢，我腦海都只係出現韓式炸雞、炒年糕、泡菜煎餅⋯🤨 感覺韓國嘢好似食嚟食去都係嗰啲⋯然後我上網查咗一查先發現，原來尖沙咀有一間韓國餐廳係主打韓國地道住家菜，聽落好似幾有新意，一於過嚟韓屋試下！🤩.韓屋嘅零味精家常料理係由韓國大廚炮製，今次叫咗幾款餐廳嘅人氣食物～先嚟一個蔘雞湯補一補先！一上檯，好大陣雞味傳入我的鼻！🤤 話明蔘雞湯，咁緊係首先試下啖湯先～熱辣辣㗎！其實人蔘味唔算好濃，但就好鮮甜，無乜苦澀味！😝😝.湯入面隻雞煮到超級腍，只係輕輕用筷子夾一夾就散開，連骨頭都係腍嘅！韓屋一啲都唔吝嗇雞肉嘅份量，好多雞呀！🤩🤩 估唔到雞肉煲咗咁耐都仲咁嫩滑！雖然湯入面已經有糯米同少量其他配料，但我額外再加個蕎麥麵，浸落湯度食！麵質唔錯，滑滑哋又幾彈牙！😍.食完蔘雞湯，就要食韓屋嘅招牌菜：石鍋拌飯！成間餐廳差唔多每檯都有叫！石鍋拌飯有原味、牛肉同埋豬肉揀，另外仲可以加芝士～今次我就揀咗炒豬肉石鍋芝士拌飯！.石鍋飯非常好足料，除咗expected嘅豬肉同芝士，仲有好多唔同嘅配菜，你會見到有蘿蔔絲、蛋絲、芽菜、紫菜、菇菇、翠玉瓜仲有菠菜！😆 落埋秘製嘅韓式辣醬之後就撈勻佢！（辣醬是分開上的，所以可以自行調校辣度～不過我自己就落晒成兜，因為都只係少少辣！）.一路撈一路見到個飯啲芝士拉晒絲咁，成個飯連埋咁多配料嘅香味係咁飄下飄下，真係搞到我流晒口水！🤤🤤 食嘅每一啖都係超豐富超多配料，每一啖都好香好惹味，食到最尾仲有飯焦！實在係太正了，真係難怪個個嚟到都嗌，呢個飯絕對係我會再返嚟幫襯嘅原因！😎😎.其實食完兩個主食都已經飽飽哋，但都仲想試多少少韓屋嘅小食，於是嗌咗個蒸泡菜餃子～餃子大大隻非常足料，泡菜味香濃，微辣，好juicy～蒸過嘅餃子入面啲餡理應係腍晒，但我食嘅時候「咔嚓」一聲，入面嘅泡菜仲係脆嘅，嘩！😱 點解會咁樣㗎！真係好欣賞韓屋廚師嘅廚藝！😝.食韓國嘢唔一定係食韓式炸雞、炒年糕、泡菜煎餅嘅，今次呢一餐真係令我愛上咗韓國地道住家菜～疫情關係無得飛韓國，我覺得你都可以去韓屋止住咳先喎！😎…Read More

呢排上網成日都見到唔少人介紹一間位於西環嘅泰式fusion餐廳：享慢煮泰，睇圖見到餐廳裝修得好有格調，食物又十分吸引！🤩🤩 望一望個餐廳名，我先醒起原來佢係我好耐之前喺上環食過一間法國餐廳，享慢煮意嘅姊妹店！😮 嗰時都食到舔舔脷，令我非常回味！我諗呢間姊妹店都應該唔錯，於是今日就book咗檯夜晚過嚟試下！😝.餐廳可能因為太受歡迎，即使已經book咗檯，都要喺門口排一排隊，大概等咗半小時～我實在太肚餓了，一入座櫈都未坐暖就即刻瘋狂咁嗌嘢食！🤣 首先上菜嘅係餐廳最出名嘅fusion料理：冬蔭龍蝦湯流心牛角包！西式嘅牛角包、泰式嘅冬蔭功、法式嘅龍蝦湯，三樣嘢夾埋一齊到底係點嘅呢？🤔.第一件事一定係相機食先！😎 喺牛角包嘅中間切開，等龍蝦湯爆晒漿流出嚟，再影相打卡！金黃色嘅牛角包同奶黃色嘅龍蝦湯真係好夾又好靚！影完相就即刻嚟試下，牛角包外層非常酥脆香口，仲食到好香牛油味！牛角包即叫即整，即使上檯之後影咗一陣相，湯汁都唔會被個包索晒～😋😋.龍蝦湯係幾重冬蔭功味，只係微微辣，而且龍蝦味亦都好鮮好突出～🤩 我最鍾意個湯嘅質感，佢絕對唔係稀溜溜好似水咁嚟hea你，個湯非常creamy又濃郁，係極之惹味！揸住個包，再點下碟上嘅湯，味道好豐富好有層次，亦都感到非常邪惡！🤤🤤.食泰菜點可以唔叫串燒？😝 我嗌咗一份花生醬沙嗲雞串，雞串燒到又香又脆，面頭仲有少少焦焦～雞肉肉質好扎實又嫩滑仲要有點juicy，最正係點埋個秘製花生沙嗲醬，成嚿雞肉微辣又甜甜哋，仲咬到花生粒，真係忍唔住食完一嚿又一嚿！😆😆.叫咗兩個主食，首先出場嘅係真空慢煮挪威三文魚配冬陰燴飯～佢個擺盤有啲似法國菜，相當精緻～平時好少喺出面食熟三文魚，怕嚿魚會煮到乾噌噌，而今次見佢係fusion嘢好似幾得意先叫嚟試試，估唔到有驚喜！😮.三文魚係用慢煮方式炮製，所以魚肉肉質好嫩滑軟綿，仲要好juicy㗎！冬陰燴飯嘅冬陰功味道幾香濃，少酸微辣，不過我覺得就無牛角包嘅冬陰功味咁突出，但咁就唔會蓋過三文魚嘅味道～燴飯亦都相當煙韌，而且粒粒分明！🤤.第二個主食就叫咗泰式燒西班牙黑毛豬頸肉配白飯～食泰國嘢除咗必叫串燒，仲會必叫豬頸肉！😎 呢度嘅豬頸肉燒到夠晒火喉，邊皮少少焦脆，肉唔乾之餘仲有啲油脂，肉質嫩滑又爽口彈牙，點埋自家調製嘅泰式酸汁真係無得頂！🤩.食咗幾樣嘢發現好似無乜點食菜，於是就嗌咗個馬拉盞炒椰菜花（通菜賣晒改做椰菜花）～成碟菜非常香濃惹味！但可能因為係炒椰菜花，馬拉盞醬同調味料炒得有少少唔均勻，所以食個時一啖好鹹、一啖好淡，但我諗如果係炒通菜嘅話就應該唔錯！😋.食咗好多鹹食，最後就來個甜品！呢個甜品名堂好勁，叫椰子雪糕配風乾鳳梨及紫糯米！椰子雪糕係餐廳自家製的，椰子味道好香濃，唔會泰甜，紫糯米軟綿綿好煙韌！風乾鳳梨就係鳳梨乾，甜甜哋又脆卜卜～配埋紫糯米、少少椰絲、少少椰果，成個雪糕嘅口感非常豐富，冰冰涼涼好清爽！😝😝.今次喺享慢煮泰食咗好多嘢，食到好飽好滿足呀！🤤 香港雖然有好多大大小小唔同嘅泰國餐廳，但如果你食到可能有啲厭，覺得泰國嘢好似食嚟食去都係嗰啲，不妨過嚟西環享慢煮泰試下佢嘅特色泰式fusion菜吖！🙈…Read More

夜晚喺尖沙咀食完飯就想食返個甜品，要我諗尖沙咀附近有咩甜品鋪？🤔 我就只係諗到梳乎厘班戟店，又或者係一啲好靚好fancy嘅高級蛋糕鋪，但我又唔想食呢啲～😣 但出到嚟尖沙咀，我又唔想食太普通嘅甜品，例如楊枝甘露、芝麻糊呢啲好多地方都有嘅糖水～🧐.到底尖沙咀有冇啲特色甜品，而價格又OK㗎呢？🤔🤔 於是我就去咗厚福街度搵下，呢條街咁多嘢食，應該會搵到間啱我心水啦啩？最後就入咗嚟呢間甜蜜蜜甜品專門店！.甜蜜蜜嘅menu有超多甜品揀，淨係睇份menu都睇到頭暈眼花，🥴 大部份嘅甜品都有附圖，見到啲甜品咁靚，選擇困難症又開始發作了，🥴 唔知揀咩食好！最後叫咗兩款甜品，第一樣係老闆見我哋揀到頭都痛埋而推薦的：炸香芒春卷伴芒果沙巴翁！🤤.平時去酒樓食春卷就食得多，今次真係第一次食甜嘅春卷，感覺好新奇好特別！🤩 呢個甜品係用一隻長碟裝住，擺盤好精緻～一大盤沙巴翁漿浸住6件芒果春卷，仲配一兜芒果醬汁！春卷外皮炸到非常香脆，入口酥脆鬆化，仲熱熱地，而個餡係用新鮮芒果整成嘅芒果蓉，鮮甜又多汁，仲凍冰冰，外脆內軟、一凍一熱嘅感覺非常刺激又好滋味！😝😝.另一樣甜品就叫咗香蕉窩夫，窩夫炸到外面好香脆，入面係好鬆軟的！🤩🤩 我平時喺街好少嗌窩夫，可能係因為食慣格仔餅嘅關係（雖然兩樣嘢係唔同），出面有啲窩夫係脆到硬掘掘、硬到會割損上顎！但甜蜜蜜嘅窩夫嘅硬度係啱啱好，腍脆腍脆～窩夫面頭淋咗朱古力醬，再夾埋一片片香蕉同忌廉一齊食，每一啖都好豐富！😋😋.食完甜蜜蜜嘅兩款甜品好滿足呀！可以為晚餐畫上完滿嘅句號～😆…Read More

今日天氣都幾翳焗🥵 ，中午喺尖沙咀做完正經嘢，就即刻匿咗入海港城涼吓冷氣～lunch hour好多餐廳都逼爆人，於是我繼續行，繼續搵下有邊間餐廳唔使排咁耐，結果行到嚟呢間稍為遠離熱鬧地帶嘅芽莊，見唔使等位就入咗去了～.其實都唔係第一次幫襯芽莊，印象中呢度嘅越菜係幾有特色，食物擺盤幾精緻，同埋味道都唔錯～首先同大家預覽吓我今餐喺芽莊食咗啲咩先～雖然今日得一個人自己撐檯腳，但我就眼闊肚窄，好多嘢都想嗌嚟試下，結果唔小心叫咗成檯嘢食～🤣🤣.天氣咁悶熱就叫咗碗湯河，貪佢濕濕哋，易入口易消化吖嘛！🤩 我今次嗌嘅係河內牛湯河三拼 (PHO COMBO)，可以從四款配料入面揀三樣，我揀咗生牛肉、牛𦟌同埋牛丸（無揀到黑毛牛裙邊）～我食PHO最鍾意就係佢會有好多越式香料配菜，例如九層塔、生豆芽、生辣椒、青檸呢啲，咁樣食嘅每一啖粉個味道都會好豐富好有層次！😝😝.食PHO第一件事緊係要飲啖湯先！啖湯牛味非常濃郁、仲帶少少酸酸哋～😋 雖然碗PHO好多料，但啲湯都係好鮮甜好清，好味道！上菜時，生牛肉仲係粉紅色，輕輕浸一浸落湯度稍為轉一轉色就已經啱啱好食得，生牛肉口感好腍，十分鮮嫩～牛𦟌就大大塊，成碗都有好幾塊，一啲都唔吝嗇，牛𦟌好容易就咬得開，好食喎！😆.不過講到我最鍾意嘅配料一定係牛丸，牛丸咬落係好扎實，非常彈牙，仲要爆汁，牛味非常非常濃郁！🤤🤤🤤 至於河粉就吸收晒湯底嘅精華，河粉質地又軟又滑，結果我瘋狂吸入，好快就KO咗成碗了！😎.因為知道碗PHO有少少油，所以就想叫碟菜中和吓～😳 睇menu張圖見到芥蘭苗嘅賣相又幾好，於是就嗌咗一碟！芥蘭苗一上檯，我係有少少嚇親，乜我嗌咗芥蘭山咩？！😱 芥蘭份量非常多！😨 芥蘭十分新鮮，你見成碟菜都係非常翠綠，口感仲好爽脆！碟菜一啲都唔dry，醬汁係甜豉油溝少少魚露，配合埋頂頭嗰啲蝦米仔同埋花生碎，每一啖都非常香非常惹味！😋😋.食完菜又覺得自己有返啲quota食肉，🤓 於是就叫咗香茅雞串燒，呢個雞串一份係有三串的～雞串燒到又香又脆，面頭仲有少少焦焦～雞肉肉質好扎實，最正係點埋個秘製沙嗲醬，成嚿雞肉微辣又甜甜哋又有啲香茅味，仲咬到花生粒，真係忍唔住食完一嚿又一嚿！旁邊仲有幾嚿青瓜解吓膩，真係再食多幾嚿雞都唔使驚！😤.今次嚟芽莊食得好開心，水準唔止係保持到，我感覺仲比以前出色咗，真係難怪佢越開越多分店！今次一個人嗌咗好多嘢食，最後食唔晒打包返屋企，夜晚整返熱嚟食都仲係咁滋味！🤩🤩…Read More

其實香港並唔算有好多北京餐廳，最為人所知就係連鎖店XX樓，我都食過唔少次～呢幾日我突然間想食官府菜，跟住就上網查下到底香港有冇啲咩京菜小店可以試下～於是今日就嚟咗呢間位於銅鑼灣嘅老北京！.老北京由門口到餐廳內嘅裝修都係好有傳統中國嘅味道，俾人一種感覺好似穿越返去中國古代去品嚐當時嘅美酒佳餚咁，所以未坐低、未點餐、未進食之際已經好有feel～.首先來個冷盤：夫妻肺片！一上菜已經聞到一陣麻辣開胃嘅味道，牛肚、牛𦟌都切成絲，配合大蔥絲、青瓜絲同埋蘿蔔絲一齊食，口感非常豐富，再加埋老北京秘製嘅麻辣醬料、芝麻同埋芫荽，成碟夫妻肺片嘅層次更豐富，味道再昇華，直頭係味之誘惑，忍唔住一啖又一啖，好快就KO咗成碟嘢！.我屋企人好鍾意食官府菜，所以我由細到大每逢有咩大日子、慶祝活動個陣，全家人都會去佐敦嘅北京酒樓（已結業）食餐勁嘅～以前北京酒樓嘅大廚推介我哋叫碟和菜戴帽包薄餅食，呢個係北京嘅傳統美食～可能受屋企人影響，每次我去試一間新嘅北京餐廳個時，都會叫和菜戴帽同埋薄餅，睇下間餐廳嘅水準，漸漸我將呢樣嘢變成我評價間餐廳夠唔夠正宗嘅標準！.其實和菜戴帽就係一堆肉絲、蔬菜絲、粉絲炒成一碟，最尾鋪上一塊厚厚嘅芺蓉蛋，好似頂帽咁樣冚住雜菜，和菜戴帽個名就係咁嚟～講返老北京嘅和菜戴帽，老實講我唔算太滿意。雜菜嘅部分炒得唔係好甘香，而好食嘅和菜戴帽係會食到好重香油味同埋鑊氣味～不過老北京嘅和菜戴帽就好足料，大大盤！.薄餅方面，其實我覺得佢更似包片皮鴨嘅薄餅，但其實包和菜戴帽同埋包片包鴨所用嘅薄餅係唔同，前者係厚厚嘅一大片，並且用烤爐烤到有啲位置焦脆，薄餅表面又有殘餘嘅麵粉咁樣～而老北京嘅薄餅太過薄身又細塊，而且唔係好煙韌，所以整體嚟講我覺得還好～.甜品方面我嗌咗拔絲香蕉，呢個係我每次去食京菜必嗌嘅甜品！賣相非常吸引，金黃酥脆嘅香蕉上面有一大塊用麥芽糖拉成絲，再用芝麻點綴而成嘅可食用靚靚裝飾！香蕉嘅外皮好酥脆，入口一咬真係有咔嚓一聲！香蕉肉亦都好熱好軟，係真正嘅外脆內軟！老北京嘅拔絲香蕉唔算過份嘅甜，我覺得係恰到好處，所以食多幾嚿都仲未甜到乸喉！十分出色！.今次去老北京真係滿足到連日想食官府菜嘅慾望～等我之後再發掘多啲香港唔同嘅京菜小店先！…Read More

當你睇到呢篇食評嗰陣，其實Bistro Bon已經結業喇～我想記錄返一次喺Bistro Bon食晚餐嘅經歷，但願遲啲再有機會喺香港食到！（最尾有交代Bistro Bon嘅去向）.Bistro Bon係一間位於九龍塘浸大嘅西餐廳，同浸大入面嘅其他canteen唔同，Bistro Bon顯然係一間比較高級嘅餐廳，喺呢度你可以食到各種各樣嘅西式食物、具異國風情嘅美味料理，絕對唔會係「頹飯」～雖然係咁，但由於佢嘅下午茶實在係太抵食，基本上三十幾蚊就有交易，價錢居然同浸大嘅其他canteen相若，所以浸大人都會視佢為午後之食堂，稱之為BB Can (Bistro Bon Canteen).呢晚喺Bistro Bon食咗幾樣嘢～落完單之後，店員就送上餐包同牛油，一嚿外表好似煎堆咁嘅樣嘅包，外脆內軟，又甜甜地，好特別呀！另一嚿包望落就好似scone，又脆又香，好吃～.主食方面，我嗌咗個豬下巴意粉，其實人哋全名係叫煙燻伊比利亞豬下巴香蒜辣椒意粉～豬下巴喺出面好少機會食到，覺得佢幾特別就叫咗嚟試！意粉嘅份量雖然唔多，但真係好高質！廚師首先慢慢煎香豬下巴，逼晒佢啲油出嚟之後，再放意粉落鑊炒，所以每啖意粉都食到豬油嘅甘香！除此之外，炒意粉時落咗香蒜同辣椒，所以入口個味道非常豐富，有油香、有蒜味、又辣辣哋，真係好正呀！意粉比平時食嗰啲更幼細，我覺得佢更似天使麵，質感煙韌，煮得恰到好處！（因為我好怕食嗰啲煮到過晒火稔到不得了嘅意粉！）.食完個意粉，全晚嘅重頭戲終於來了！就係呢個要事先預訂嘅威靈頓牛柳！賣相真係好吸引，酥皮金黃，花紋細緻～個酥皮食到最後一嚿牛柳嗰時都仲係酥脆卜卜㗎！.牛柳叫咗medium五成熟，唔會太生又唔會太熟，牛柳中心呈粉紅色～牛柳肉質嫩滑多汁，絕對唔嚡口！酥皮同牛柳之間有一層鵝肝醬，鵝肝醬除咗好香嘅鵝肝味，仲有濃郁嘅菇菌黑松露味！個醬仲食到火腿塊，十分有誠意～伴碟一啲都唔馬虎， 薯蓉好重牛油同奶味，入口好綿滑好smooth！真係估唔到連個薯蓉都咁好食，賣相仲要咁靚！好滿足呀！.甜品方面，我叫咗檸檬撻，正正常常啦～個檸檬餡雖然有少少酸，但連埋上層嘅蛋白一齊食就剛剛好！.位於浸大嘅Bistro Bon喺7月15號已經結業，餐廳喺social media透露未來有機會喺尖沙咀再同大家見面～希望之後仲有得試佢其他嘅特色嘢啦！…Read More

夏日熱辣辣，有時午餐都想食啲無咁熱辣辣嘅嘢～🥵 於是今日就去咗尖沙咀嘅鐵火堂，等我入去整返個刺身丼解下暑先！🥶.鐵火堂嘅午市有供應自選魚生丼：任揀4款魚生盛惠$60，再揀多款（5款）都只係70蚊！但如果你仲想再揀多幾款，第6款起就每款加$14！個丼可以配白飯或者壽司飯，仲跟碗味噌湯！😱 其實魚生呢樣嘢本身就唔平，鐵火堂咁嘅價錢就可以嘆到魚生丼，真係非常之抵！貪心嘅我當然唔會只係揀咗4-5款魚生就罷休，我唔止加14蚊揀額外配料，我仲再加多啲錢嗌啲特選配料！🤣🤣.自選魚生丼我揀咗三文魚、飛魚籽、火灸左口魚邊、鰻魚、赤蝦、帝皇蟹棒、三文魚腩同埋北海道珍寶帶子！其中三文魚腩同埋珍寶帶子係特選配料，總共有八款刺身！我自己覺得以呢個價錢就食到咁豐富嘅魚生丼真係好唔錯！三文魚、赤蝦、三文魚腩同埋帶子呢四款刺身幾新鮮，唔會食到雪藏味～特別想講下赤蝦，肉質厚實同彈牙，很正！🤤.熟刺身方面，鰻魚本身沾咗鰻魚汁，入口好香，肉質唔錯而且無碎骨～而蟹棒個size雖然比我想像中無咁「帝皇」，但一絲絲嘅蟹柳好完整，唔會斷開晒又一忽忽咁！🤩 最amazing嘅係火灸左口魚邊，燒過左口魚真係做到入口即溶，然後我成口充滿油脂，成鼻充滿油香！🤩 我仲揀咗飛魚籽，其實係嗌嚟俾我撈個壽司飯，咁成個魚生丼食落就無咁單調！😋😋.淨係食個魚生丼又點夠？我仲叫咗幾樣小食：蟹籽沙律、北海道粟米芝士脆脆同埋吉列炸蠔～最欣賞蟹籽沙律嘅位係青瓜刨得好幼細，同蟹柳絲一樣咁粗，我就係要呢啲！平時食吉列蠔至怕就係睇佢外表大大嚿，實情厚粉包住細粒蠔，鐵火堂嘅吉列蠔係有驚喜：粒蠔唔細粒，仲好重蠔味，點埋蛋黃醬真係無得頂！😝 北海道粟米芝士脆脆就煙煙韌韌，食落好似食緊糯米糍定麻糬咁！彈下彈下咁又幾得意喎～.我覺得幾十蚊嘅價錢可以喺尖沙咀食到咁豐富嘅魚生丼真係不得了，一於下次再嚟食過！…Read More

Cupping Room Coffee Roasters 喺全港開咗接近十間分店，由最初第一間位於赤柱嘅小店，開到依家喺港島同九龍區都可以搵到佢嘅蹤影～到底係咩原因令佢可以喺香港陸續係咁開分店？🤔今日我就去咗銅鑼灣利園分店一探究竟！.今日我6點左右就入座～由於呢間餐廳相當人氣，所以想早啲過嚟食，避開晚餐時段嘅人潮！💨💨呢度係自助點餐同埋取餐：首先去櫃台揀嘢食，揀完買完之後，店員就會遞部號碼機俾你，到食物ready好之後就返去櫃台度拎～餐廳亦設有自助區，可以俾你攞飲用水（冷熱都有）、醬料同埋餐具等～由於幾乎所有嘢都係自助，所以唔會收你加一服務費㗎！😝😝.第一次嚟其實好多嘢都想嗌，但知道唔可以眼闊肚窄，而我又有選擇困難症🥴，於是我就揀咗 Cupping Room嘅signature dish: Spaghetti & Pan-fried Chicken Breast with Garlic Creamy Sauce! 呢個意粉都幾特別，首先講下佢嘅意大利粉，佢個口感唔係你喺港式茶記食到嗰啲煮到好熟好軟嘅意粉，而係幾彈牙同有嚼勁嘅麵條！意粉食落都感覺比起平時個啲粗身少少，難怪掛到好多白汁！🤤.食得出意粉個醬汁並唔簡單，係自家製濃厚嘅白汁，帶有蒜香味，食落又唔會太咸，另外我仲食到個意粉係加咗少少辣汁（放心佢係唔辣，應該只係落咗少少令意粉帶微辣同少少酸）！😍 意粉表面有芝士，好明顯係用火槍輕輕燒過，燒完成個意粉都變得好香，咁多樣嘢夾埋一齊，味道真係非常豐富，每啖我都好滿足！🤤.最令我驚訝嘅係，雞胸俾得一啲都唔吝嗇，成碟唔同位置都搵到，總共有十零嚿，絕對唔係你想像得兩三嚿擺喺面頭做show嗰隻～🤣 唔少人聽到「煎雞胸」可能都會覺得嚿雞應該會又柴口又乾身：老實講，雞胸嘅雞味並唔算話非常突出，但肉質就十分正！🤩 Cupping Room嘅雞胸煮得恰到好處，出面有少少脆口，中間係好軟腍，唔單止唔乾，而且仲食到佢啲肉汁！完全打破咗我對「煎雞胸」嘅一般印象，唔知係因為用料靚，定還是廚師正呢？.其實Cupping Room有咁多間分店，點解我要過嚟利園呢間呢？🧐 咁係因為只有利園嘅Cupping Room先有得order Motown Pizza，呢個係香港一間好出名賣 Detroit-style pizza嘅鋪頭！我就嗌咗Hummer，又名肉食愛好者pizza！😝 如圖所見，除咗芝士同意大利蕃茄醬之外，配料全部都係肉，全部都係肉！有pepperoni, house sausage 同埋厚切bacon! 呢個pizza係正方形，同平時食開一大塊嘅圓形pizza唔同，可以好似西多士咁cut開九塊🤣🤣，一啖一嚿認真過癮！pizza熱辣辣又脆卜卜，真係好滋味！身為食肉獸嘅你一定唔可以錯過！.其實Cupping Room最出名係佢嘅咖啡，但我就走去嗌咗杯熱朱古力～🤨 一打開個蓋，熱朱古力嘅香味直接飄入我個鼻，好香呀！🥰 飲完一啖就覺得：我無嗌錯，是這杯了！其實逢親飲朱古力，我至怕就係朱古力得個顏色但飲落淡而無味，而Cupping Room嘅朱古力味很濃！朱古力面頭仲有溶咗嘅棉花糖，甜得嚟又唔會膩，入口好順滑，非常可口！🥺.整體嚟講我係好滿意呢次喺Cupping Room嘅early dinner，下次我會過嚟食個brunch，試埋佢其他食物同嘆下佢哋嘅咖啡先！😤😤…Read More

要食漢堡，唔一定要幫襯全球連鎖快餐店嘅～.其實好耐之前就已經聽過嘉寶漢堡呢個名，不過當時佢就得葵涌一間分店，位置對我嚟講比較唔就腳，要特登入去先有機會試～但去到今日，嘉寶漢堡喺全港已經有兩間分店，今日就去咗尖沙咀嗰間試試佢！🤣.嘉寶嘉寶，究竟點解嘉寶叫嘉寶？🤔 會唔會係餐廳老闆就係叫嘉寶？唔講唔知，原來係因為最初第一間分店正正開喺葵涌嘅嘉寶大廈，真係簡單又易記！.成個流程就係首先去櫃台買嘢食，然後店員就會遞部號碼機俾你，到食物ready好之後就返去櫃台度拎！所有漢堡都係即叫即製，所以都需時等候～ 餐廳入面有個自助區，可以俾你攞醬料、餐具同埋紙巾等～.其實餐廳供應唔同種類嘅漢堡，有牛又有雞，有豬又有蝦，仲有羊肉漢堡添呀！🤤🤤 而我今次就叫咗嘉寶熱賣嘅漢堡：烤菇芝士牛堡～ 淨係食一個漢堡包又點夠喎？其實你叫完一個漢堡，只要加少少錢就可以升級成為套餐，配個飲品同小食，十分抵食！我見到小食個list就即時無晒抵抗力，點完一樣又一樣，非常貪心。😝😝（其實升級套餐只可以揀一個嘢飲，同一份小食，但我額外再用正價追加埋其他小食）我嗌咗薯條、炸燒賣、BBQ雞翼同埋炸芝士～.咬完一啖烤菇芝士牛堡，烤菇嘅汁即時爆晒出嚟，爆到我成手都係，唔講以為我啱啱喺廁所洗完手出嚟！💦💦💦 嘉寶嘅牛堡堅持係要慢煮，牛肉肉質腍得嚟又有彈性，肉汁又係爆晒出嚟！我自己覺得一個漢堡包一定唔可以無芝士：烤菇、牛肉、再加埋濃郁嘅芝士呢個組合令到成個漢堡包嘅層次變得非常豐富，每一啖我都好滿足！漢堡果然係高汁，係真係高汁又多汁！🤤.小食方面，由於個漢堡實在係太屈機，太搶focus，小食就顯得只係純粹俾我過下口癮～薯條就係你能夠想像得到嘅味道，係粗薯條嚟，即叫即炸，所以係又香又脆！可能由細到大幫襯連鎖快餐店嘅影響下，認為漢堡配薯條加埋汽水先至係均衡嘅一餐，所以明知薯條唔算好特別嘅小食都會想叫埋～🤤.炸燒賣嘅椒鹽味有啲搶，味道係偏鹹，但咬落係煙韌！BBQ雞翼嘅醬汁分量落得有啲重，結果醬汁味好搶，味道都係偏鹹～😝 芝士條就可以拉絲的，但始終mozzarella cheese都係著重喺拉絲嘅效果而非味道，所以味道係淡淡地～但我覺得係幾得意嘅，如果你鍾意食芝士都可以一試！.今次叫咗咁多嘢都只係百零蚊，但就食到我超級飽超級滿足！我後尾發現，原來薯格都幾多人叫同埋好似都幾多人推薦，但我當時就無為意所以無試到，等我下次再幫襯個時試埋先～🤩…Read More

俾三秒時間你答，如果我問你香港邊度有好食嘅咖喱豬扒飯，你會介紹我去邊度食？三、二、一⋯⋯ 🤔.會唔會係翠X、大快X定還是X興呢啲賣各式各樣美食嘅連鎖茶餐廳或者快餐店？🤨 如果你問我喺邊度可以食到全香港最好食嘅咖喱豬扒飯，我心入面只得一個答案：新景園。😏.其實新景園本身已經係一間非常人氣嘅餐廳，因為佢嘅咖喱豬扒飯實在係太出名！但作為一間茶記，佢嘅咖喱豬扒飯居然賣到成$88一個（堂食）？！值唔值呀？.呢一日天文台懸掛三號風球，出面雷電交加雨風吹。閒日lunch hour再加埋滂沱大雨，都無淋熄一眾一心幫襯新景園嘅食客（包括我自己）。😝😝 一去到餐廳門口，就見到門口左右兩邊都排滿人龍，門口中央亦都企咗好多個等外賣嘅食客。天氣咁差都仲擔住遮喺度等，間嘢係咪咁堅呀？但因為咁，我對新景園嘅食物就越嚟越期待！🤣🤣.排咗半個鐘左右，終於輪到我啦！🤩 一入座就即刻落單叫咗最出名最人氣嘅咖喱豬扒飯！只消幾分鐘，一大盤咖喱豬扒飯就出現喺我面前。上菜時我真係嚇親，餐廳一啲都唔吝嗇，一碟咖喱豬扒飯居然有起碼十塊豬扒，仲要嚿嚿都好大塊，好大份呀！馳名豬扒係即叫即炸，非常熱辣辣，外面只係有一層薄薄金黃色嘅炸粉，十分香口又酥脆，厚身又juicy，仲要一啲都唔嚡口，我真係勁驚喜，好食！😋.咖喱豬扒飯嘅咖喱同豬扒係分開上的～咖喱汁入面仲有一大嚿薯仔，不過薯仔就無事先炸過，如果炸過就perfect喇！新景園嘅咖喱汁幾重椰香味，辣辣地咁，質地亦都幾稠！唔好話我誇張，你淨係俾兜咖喱汁我都可以撈兩碗飯食！🤤🤤.食完真係好滿足呀～我一定會再幫襯！其實我本身係無諗住介紹新景園俾其他人㗎，因為佢已經好多人幫襯同埋成日排晒長龍，我唔想又多一班「競爭對手」呀！不過佢實在係太好食，所以我忍唔住同大家開心share～如果你都鍾意食港式咖喱豬扒飯，不如下次過嚟試下？😳…Read More