Serenelcy的個人專頁

夜首爾🍽️-▫️韓國人主理▫️傳統風味韓國菜▫️值得再訪🤩-每次行過寶勒巷都好想試下呢間餐廳，感覺係好正宗嘅韓國菜，始終都係韓國人主理。於是就搵咗機會去食LUNCH。餐廳好有韓國特色，牆身都做到好似韓國宮廷式嘅風格，而且感覺係好傳統嘅小店。店面望落都好大，好多位置，主打都係食燒肉，但係兩個人食LUNCH都係試返啲基本嘢算。-ORDER完就會上小菜，有好多款🤤每款都好好味。基本嘅豆芽、菠菜、泡菜都係平時食開嘅味道。額外再有個醬油茄子、XO醬脆肉瓜，兩款都好好食。另外，有個好似蕃薯糖水咁，味道甜甜的都好清新。右上係款類似蒟蒻啫喱咁，配咗醬油醋辣椒食都好舒服開胃。-🔹豆腐鍋/配牛肉好足料，比咗好多滑豆腐，底下都有好多切到細細舊嘅牛肉，已經煮到好軟好入味。加上配咗好多蔥，好香，湯底好濃郁，帶有小小辣，但又唔會辣到令喉嚨好辛苦。-🔹石鍋拌飯/配烤牛肉呢個飯同平時有小小唔同，加咗生菜絲，同埋係用牛肉碎整。開頭以為牛肉碎會令到個飯唔好食，因為怕無咬口。但係反而唔會，仲幾好食，底下仲有好大舊飯焦🤤成個飯都好豐富好足料。而且一直食，個石鍋都KEEP住好熱，一直有飯焦，仲多過食煲仔飯😂-🔹泡菜煎餅呢個幾乎係每次食韓國菜都要試嘅，因為覺得每間做法都唔同，好想搵一間好好食嘅。呢間個泡菜餅比較軟身，夾起時好易散，泡菜係好大舊再加小小辣椒圈。邊皮都有煎到脆身，而且應該都醃咗麵粉，成個餅都好濃泡菜味㗎～😋😋-呢間店一定會再訪，每樣食物都好好食，果然係韓國傳統嘅味道～已經諗好下次要試燒肉😋餐廳好大，就算多人嚟食都坐得好闊落，而且食物選擇都好多，見到有個豆乳麵好特別，另外仲有醬油蟹，都係比較少見。老闆係韓國人，但係講到一口流利嘅廣東話，真係好犀利👍🏻👍🏻同埋keep住見到好多人買外賣拎走，證明呢間餐廳真係不錯☺️…查看更多

Cocina 3 Tapas Restaurant & Bar🍽️-▫️餐廳十分寬敞▫️具有西班牙風情▫️服務態度有待改善-今次揀咗呢間餐廳同朋友嚟慶祝生日，一行四人都安排咗旁邊卡位比我地，梳化位坐得舒服，但就擺唔到好多嘢食，會有小小逼。今次ORDER咗個4人套餐～小食可以揀兩款，主食TOTAL揀四款。-落完ORDER就會SERVE小食，麵包似係加咗PAPRIKA辣椒碎，食落微微辣幾好食。再配埋西班牙必有嘅TORITOS，反而配嘅千島醬就唔太夾。-SET DINNER會跟是日餐湯，當日侍應話係忌廉西蘭花湯，但上到枱同飲落都無西蘭花嘅蹤影😂似係普通忌廉湯多啲。而且味道正常，不過SET入面嘅湯都唔好太高期望。-🔹蘑菇炸餃子呢道菜點睇都唔似餃子，反而似薯波包住蘑菇粒😂再配少少辣醬，幾特別嘅，套餐包嘅都唔好太高要求。-🔹黑松露蒜蓉包上道枱香噴噴，黑松露味都好香，但係就唔係塗抹得好平均，有一舊特別多，一舊又特別少咁，食落有焦味，焗得太耐，蒜蓉味唔夠。-🔹炭燒伊比利亞黑豚豬鞍扒豬扒燒得好香，而且好鬆軟，食落無筋唔會韌，配搭埋黑椒汁都幾好食😋配菜都夠味，底下有菇同埋一個好棉好棉嘅黑松露薯蓉，超好味。-🔹香煎比目魚伴黑松露野菌汁比目魚略帶有小小腥味，但係都接受到，因為都有配SAUCE，可以蓋過返陣味。比目魚都好大塊，完全夠4個人SHARE。配菜同豬鞍扒一樣，又再有薯蓉😂-🔹西班牙海鮮炒飯呢個飯都算好足料，而且配有辣肉腸、橄欖，又同平時嗰啲唔同。海鮮就有青口、蜆、一隻大蝦。底下個SAFFRON飯就做得幾好食，好夠味，會令人想繼續食😋👍🏻-🔹卡邦尼意粉伴日本溫泉蛋由於喺SET MENU已經揀唔到主食，又唔想食PIZZA，於是唯有嗌個卡邦尼意粉，點知店員完全漏咗，已經幫我地擺好曬甜品碟，我哋再同返店員講，先即刻再叫廚房整出嚟😅真係新鮮滾熱辣，不過就好普通喺出面CAFE都食到嘅意粉，而且只係用普通嘅BACON做配料。-另外ORDER指定飲品LIST會有半價，有COCKTAIL,MOCKTAIL，或者梳打等等可選擇。-呢個餐廳整體都麻麻地，裝修佈置係不錯的，食物就正正常常，但係員工就差咁啲😐員工之間感覺上無咩溝通，直程成個主菜MISS咗😥而且上菜嘅規律都比較怪，一開始上前菜係非常快，快到張枱冇位擺，食唔切。但係之後想主菜，又慢慢上，等我地完全食完一碟，收咗碟再等一段時間先至上另一碟。最後成餐飯食咗三個幾鐘，簡直拍得住食法國菜🫠之前睇網上評價都唔差，但係都自己親身試，就覺得普普通通。同埋整體感覺都覺得唔值。…查看更多

山本屋🍽️-▫️位於新商場「圍方」▫️店面不大，座位比較窄▫️日本過江龍手打烏冬-難得同屋企人去咗行新商場，只係開咗三日，就見到有呢一間剩係得名古屋先有嘅手打烏冬店，過江龍嚟香港開分店，咁就一定要試下啦。當日傍晚排隊都排咗兩個幾鐘先有得入去食，但係中咗伏，七點幾排排下已經截龍，截龍嗰陣擺咗牌，職員並指排緊隊嘅都會有手打烏冬食。但係去到排剩返十幾個人嘅時候，同我地講手打烏冬已經賣曬🫠淨係提供稻庭烏冬，已經排咗咁耐隊都冇理由唔食，咁就唯有比一次機會佢。入到去係唔會有MENU睇，只會有一張落單紙，完全無圖片睇，由於新開基本上OPENRICE都無資訊。咁就唯有盲叫😂-🔹冷豆腐 $18呢款前菜好夠凍，而且豆腐超重豆味，係一款好傳統嘅日本前菜，相信亦都好難整得難食。-🔹天婦羅炸蝦🍤 x2當落完ORDER無幾耐就炸好嘅天婦羅，點知屋企人一咬，發現蝦未熟，粉漿都仲係白色😰即刻同職員講，之後就重新換一碟，炸蝦都正常，但炸粉有少少厚。-🔹燒地雞手羽 (3本)之後呢款雞翼係超級好食，炸得好香脆，而且好入味👍🏻呢款小食值得叫。-🔹五目煮烏冬 配老店傳統味噌 $78由於唔知道乜嘢係五目，所以屋企人就叫嚟試下，最後發現只係多咗冬菇嘅分別。本來烏冬已經配有腐皮、大蔥等等嘅配料。上枱嘅時候先至開蓋，而煲裏面嘅烏冬，仍然係滾嘅。-🔹黑豚肉煮烏冬 老店傳統味噌 $88之後叫咗另一款，黑豚肉只有三塊，略嫌有啲少，但係都幾重豬肉味。配菜都係一樣。-🔹牛肉煮烏冬 老店傳統味噌 $98+$20牛肉都係只有三塊，屋企人加咗雞蛋同腐皮，分別額外加$10，雞蛋見到佢地係用蘭王蛋，所以蛋黃色澤都幾靚。-由於已經賣曬手打烏冬，我地就只有扁嘅稻庭烏冬食，但係完全錯曬。扁烏冬十分之林，由於烏冬係擺喺個鍋到，由煮好至上菜，相隔都有10分鐘，個鍋係滾嘅，上菜嘅時候都不停煮緊，導致到個烏冬軟曬，毫無咬口，完全無煙韌嘅感覺。🥲個感覺就好似食緊河粉多過烏冬，所以都有啲失望。湯底選擇咗味噌味，同平時食開嘅味噌有啲唔同，呢款食完會有少少苦苦地回甘嘅感覺，而且偏咸。-總結係如果下次唔使排咁耐隊，都會考慮再試下佢嘅手打烏冬。不過就真係價錢唔算好貴，都算合理。而且老闆都好好人，FEEL到佢有善待每位客人👍🏻排長龍怕得失啲客都即刻主動拎綠茶比大家，好識做🤣同埋店內真係比較逼，枱與枱之間基本上無咩空位，隔離枱講嘢完全聽到曬😅感覺上係想用盡所有位置，但係當食飯嘅時候都要叫人唔該借借讓位就唔太好。後來其實我地見到隔離枱食吉列豬扒，咁就問店員係唔係可以加呢個小食，但係得知原來係要跟烏冬餐一齊，咁屋企人就再落單一份雞翼。點知…我哋等咗一陣，見到佢地廚房啲人開始清潔🧹😰就好奇問一問個店員，係咪無落到份雞翼，點知原來係廚房無收到張單😞咁就唯有取消走啦，開業幾日都漏單，應該可以再做好啲。…查看更多

HENRY🍽️-▫️美式扒房▫️特式熟成牛扒🥩DRY AGED▫️位於ROSEWOOD HOTEL-一直BOOKMARK咗呢間扒房，終於！今年生日選擇咗去呢間人氣扒房一試😍餐廳位於酒店嘅5樓，要喺另一間餐廳再通往呢間扒房，餐廳環境大，十分舒適，枱與枱之間都有空位，唔會太影響同朋友/伴侶👩🏼‍🤝‍👨🏻傾偈。-當落咗ORDER之後，就會提供麵包、牛油同HAM。麵包係SOUR DOUGH，好有咬口，配搭鹽牛油，咸咸地幾好食。再可以夾埋HAM一齊食，如果單食HAM就偏咸少少🤏🏻。-🔹CHEF’s SIGNATURE STEAK TARTARE $428呢個前菜相信係好多枱都會叫嘅，係和牛TARTARE，配蛋黃、洋蔥、蔥、horseradish、黑松露。WAITRESS/WAITER會推車仔去丁枱面前，即場撈個TARTARE，一邊撈會一邊倒橄欖油，十分香。之後仲會磨黑松露，磨超多，喺面前即刻睇住佢整真係另一種享受。TARTARE配咗份比較脆嘅包，TARTARE味道十分濃郁，有蛋香芝士香，但亦都食得出肉味。十分推薦大家嗌！🤩重點係食完完全無肚痛👍🏻-真係好好味😋-🔹THE CHARCOAL GRILL RIBEYE 14oz $998之後再ORDER咗一個RIBEYE兩個人SHARE，亦係WAITRESS推薦的，熟度揀咗MEDIUM RARE。一上枱已經香到不得了，牛扒嘅邊邊位有小小燒焦咗，但係唔會太怪，而且肉味好濃郁，每一啖都有香香嘅肉味散發出嚟，牛扒完全唔會太肥太難咬開。其中肥膏嘅位更加係放入口就即溶化😋本身配咗三款醬，本身已經擠咗喺碟嘅醬類似BBQ SAUCE，呢款就無咩特別。另外兩個就唔清楚係咩醬，紅色酸酸地有小小似TABASCO加其他嘢，黃色醬就比較似淡忌廉汁。額外再配有BASIC嘅SALT & PEPPER，個人覺得最簡單嘅食法最好食。食咗兩啖之後，都有職員主動問我地要唔要MUSTARD，咁就試咗兩款佢推薦嘅，其中一款有驚喜，係用COGNAC浸嘅MUSTARD，好香COGNAC味，而且更加能夠突出肉香！非常好食🤤-🔹SIDE - CREAMY SPINACH $98額外配咗個SIDE DISH，十分濃郁嘅忌廉味，而且帶有小小松露香，不過由於係忌廉，所以都會有小小膩，反而可能配其他款SIDE DISH會更好。-🔹YUZU CREAM CAKE🍰 最後再ORDER咗款蛋糕，呢款係新出嘅，當日試完先知原來呢款甜品只係第二日開售🤭柚子蛋糕味道十分清新，除咗柚子外，應該再加咗檸檬整成MOUSSE CAKE，慕絲好軟好CREAMY。上面再配有啲脆脆粒、柚子肉同橙皮，完全可以解膩😂-呢間扒房真心不錯😍職員全部都好NICE，有GOOD SERVICE🤩☺️有機會一定會二訪，再試其他款牛扒🥩…查看更多

六公館🍽️-▫️OPENRICE長期最高瀏覽NO.1▫️著名中菜▫️適合慶祝▫️打卡一流-今次係慶祝生日，揀咗呢間一直都好出名嘅中菜，環境氣氛一流，絕對啱曬愛打卡人士，咁啱BOOK咗食7點，夏天嚟到仲可以欣賞到日落。🌄喺入口位置就有道小門可以通往室外比大家影相。如果唔嫌熱仲可以選擇坐室外小酌一杯🥃-即使坐入面都會望到靚景😍-🔹龍井燻太爺雞 $338幾乎每枱都會ORDER，上枱時已經好香煙燻嘅味道🤤雞皮唔係脆嘅，但係好香滷水豉油味，雞肉十分嫩滑。應該有半份雞，旁邊係龍井嘅茶葉，應該係炸過嘅，好脆口，夾埋雞肉一齊食更香。-🔹煙燻BB鴿 (廚師推介)呢款BB鴿都係煙燻嘅，同樣有香烤味，底下有啲茶葉枝，令整體又靚又香。乳鴿皮十分脆，肉都好滑，擠上青檸汁都好夾，好清新，一反傳統點准鹽食。-🔹蔥油炒飯配白雲帶子 $268呢款整到好似西式RISOTTO咁，其實係濕炒飯，但係都好香蔥油味。底下打咗個芡，有帶子、蛋白加蕃茄，幾特別嘅配搭，唔會好DRY。-🔹八味金磚豆腐 $138金磚豆腐個皮十分鬆脆，豆腐嫩滑，旁邊有蒜粒同蕃紅花絲，好香口。但由於喺其他中餐廳都試過更好食，所以就覺得不太值。-🔹黑蒜焗羊鞍 $328唔好羊肉嘅我，今次都一試呢個羊鞍，好香黑蒜味道，以為會好咸，但反而唔會，羊肉有少許羶味，但係食落黑蒜味都可以遮蓋到，不至於太難入口。羊鞍份量都好大，肉質實但唔難咬開。喜歡食羊嘅真係可以一試！-🔹桂花蟹肉炒新竹米粉 $298呢道主菜十分有驚喜，超有鑊氣👍🏻配有椰菜絲、芽菜、蛋黃、蟹肉🦀️，就咁簡單嘅材料炒埋一齊已經好好食，每一啖都充滿蛋黃粒同蟹肉，口感非常豐富。另外再加咗少少肉絲，又更加香。-🔹黑金流沙包 $108最後再嗌咗一個好出名嘅流沙包作為甜品，設計到黑金已經好特別，佢地嘅麵包都係比較煙韌，實啲。裡面流沙效果都好好，一撕開即流，而且好香蛋味。-整體來講，呢間餐廳都十分適合慶祝同打卡。個人覺得新竹米粉真係有驚喜☺️侍應們都好主動介紹招牌菜，而且主動收碟。加上影相嘅時候仲會幫食客打燈😂 食物都係高水準嘅，如果BUDGET多嘅都可以一試，都係值得嘅～…查看更多

ELEMENTARY🍽️-▫️假日好去處▫️NICE BRUNCH-咁啱假日嚟開大坑，就試咗呢間CAFE(?)。可能因為係星期日嘅關係，MENU應該同平時有啲唔同，主要係BRUNCH為主。-🔹Grown-up toastie soldiers $128(Toast, parma ham, Swiss cheese truffle, soft boiled egg)呢款真係輕食，多士烘到好香脆，入面都好足料，芝士都係有拉絲，而且黑松露味都好濃。Boiled egg就略為普通，似係夾硬配上去，加咗小小salt&pepper調味，但係個蛋白痴實曬個殼，唔完整挖到出嚟。-🔹Smashed Avocado🥑 $128(Feta, mint, beetroot pesto, quinoa, sourdough)呢款賣相不錯，好啱打卡😌呢個算係幾好食嘅smashed avocado toast，超級多牛油果，我諗至少有一個半嘅份量，牛油果有淡淡檸檬味，好清新！Sourdough都好脆好夠味，再配埋面層嘅NUTS，又增添一份口感。不過美中不足係隻蛋係熟蛋😥完全唔流心，切開嗰下真係有啲失望。不過呢份係超飽肚。-其實我地都有額外ORDER飲品，但係餐廳漏咗單，所以我地都無出聲。食物不錯，正正常常水準，如果週末想放鬆下，都可以去試下。見中午時間已經好多外國人ENJOY佢地嘅HAPPY HOUR!…查看更多

楊記麻辣魚館🍽️-▫️典型內地風格餐廳▫️設有樓上雅座▫️抵食川菜🌶️-今次同朋友試一試呢間麻辣魚館，去咗土瓜灣分店，新開嘅所以環境都比較企理乾淨，而且多枱，但枱與枱之間都有適當嘅距離，唔會覺得好逼。因為聽朋友講佐敦嗰間就偏大牌檔FEEL，會嘈少少同埋較多大枱，一圍人咁食。今次四個人叫咗四款嘢食，最後都食到好飽好滿足😋-🔹酸菜魚 (小) $188我地明明叫細份，但上枱都係大大兜😂好足料嘅酸菜魚，完全係返大陸食嘅味道👅由於怕太辣，所以叫咗微辣，有好多配料，魚又夠滑完全無骨，仲有萵荀、薯粉、大量酸菜。不過就唔建議飲埋個湯，因為都偏咸同辣，但如果餸飯都不錯😬-🔹香鍋 (+蓮藕、土豆片、牛柏葉、午餐肉、鮮魷)呢個香鍋都係比好多料，不過就愈食愈辣，食到底比較多辣油就會覺得好膩，但係每款配菜都係炒到好入味，不錯不錯👌🏻-🔹花椒雞 $128呢款菜整到好似宮保雞丁咁😂一上枱超級香噴噴🤩好多雞肉粒炒埋一齊，超入味，但整體都係偏咸，食完會覺得口渴。-🔹大盤花菜 $78呢盤花菜就遜色咗小小，唔係炒得太香太入味，反而係加咗好多孜然粒，食落只有孜然味，但同平時食開嘅花菜就差好遠🫠肉片亦唔算太入味，成道菜感覺唔夠鑊氣。-呢間店每款菜都大大碟，真係要叫多啲朋友仔嚟先可以試到唔同嘅菜。如果唔算食得辣嘅話叫微辣都已經足夠，因為每樣都係愈食愈辣😂食到口水鼻涕都流。不過每道菜都好好餸飯👍🏻-🔺要留意返呢間店只收現金💰…查看更多

2 Kims’ Pocha🍽️-▫️地道韓國菜+小量fusion▫️型格酒吧餐廳-次次經過轉角位呢間餐廳都會直行直過，今次諗唔到食咩又見多好評，就入咗呢間餐廳試下🤔️餐廳係行型格酒吧feel，唔係傳統酒吧咁黑咁嘈吵，反而係好CHILL。-🔹粉紅醬炒年糕 $188呢款醬有小小似辣雞麵粉紅色包裝嗰隻醬😂味道帶有小小辣，再加咗火腿、腸仔做配搭，令到食落無咁膩同埋咸咸地幾好食。年糕質地好特別，係長條形而且好軟身，煙煙韌韌，好有咬口。不過食耐咗就覺得偏辣🌶️。-🔹炸醬麵 $98本身從未試過食炸醬麵，所以唔識分正唔正宗。但係呢個炸醬麵真係好好食！麵質唔會太軟，好有咬口，又掛汁👍🏻再配青瓜絲、薯仔、洋蔥同小小肉碎，成個麵超香，係會令人一口接一口咁食曬🤣-🔹泡菜煎餅 $128每次食韓國菜都好鍾意嗌泡菜煎餅，呢間煎得好香口好好食，餅底唔會太多麵粉好厚，而且好足料，不過有放辣椒圈就要小心太辣。仲有個醬油可以點，醬油都加咗啲大蔥可以夾埋一齊食😋-呢間餐廳真係估唔到佢咁出色🤩每樣食物都好好食，仲以為只係酒吧比人坐下傾下偈，但係每款食物都係高質的👍🏻見到仲有啲鐵板燒肉都好似好正，下次有機會再去食。店員服務態度都好好，好主動收碟，會主動比紙巾杯墊等。👍🏻🥰…查看更多

順日本料理🍽️-▫️各款日式定食▫️店舖座位不多，有機會要訂枱-星期五夜晚無BOOK枱都竟然有位坐，被安排咗坐吧枱，好有日式居酒屋嘅感覺。-🔹香煎野菌鵝肝飯 $155呢款定食係招牌同高人氣菜式，成碗飯都佈滿唔同種類嘅菇，中間係一大舊鵝肝🤤十分之邪惡！雜菇全部都係日式加咗醬酒炒過，每啖飯都有菇，再配一小口鵝肝，超好食又唔會膩。鵝肝煎到半燒焦，焦香可口👍🏻而且鵝肝十分香，完全唔會有羶味。定食仲配有沙律、麵豉湯同一啲漬物，令到一邊食鵝肝飯都唔會覺得膩口。綠色漬物咸咸甜甜幾好食，應該係脆搞瓜之類，蘿蔔反而就太硬。麵豉湯呢間做得幾好，好清甜，因為再加咗大根、紅蘿蔔、冬菇、洋蔥，超足料😗-🔹厚燒牛舌飯 $158另外再叫咗好出名嘅牛舌飯🐮一上檯真係嚇親，每舊牛舌👅都超大舊，超厚切，好震撼，擺到滿滿的，完全蓋過曬下面嘅飯🤣牛舌飯個飯底有配咗啲日式醬汁，唔會太DRY。牛舌應該只係簡單用鹽醃過，再加黑胡椒煎香，食落好滿足，牛舌已經乸到冧曬。而且牛舌無羶味，只係有小小咸，食多幾舊就已經要不停飲水。同埋呢個定食比嘅牛舌數量都好多，一共有5大舊，女仔自己一個真係完全食唔曬😣-總結以百零蚊一份定食，呢間都算性價比高，定食提供嘅份量好足料，完全唔會慳住。每樣食物都好好食，即使唔係主食，可能只係簡單嘅沙律、麵豉湯都有用心做，令到成份定食除咗有買相外仲係好食😋特別係個牛舌飯真係震撼到我🤣不枉佢係牛舌關注組NO.1，不過可能因為比較濃味，所以食咗兩三舊就覺得咸咗小小。下次嚟嘅話可以試佢其他高人氣嘅定食，見到有銀鱈魚/吉列豬扒定食，都好吸引下次再嚟食🤭…查看更多

Involtini Italian Cuisine🍽️-▫️地點方便▫️店面唔大，大約容納到15-25人▫️晚餐分兩輪用餐（18:00或20:00）▫️環境舒適-好耐之前已經想試，原本上網訂咗位，但點知打風，改咗第日食，今次終於試到🥰最後叫咗1個前菜+2款主菜，由於太飽就無叫甜品🍮。-🔹餐前麵包麵包一上枱就聞到香噴噴，而且麵包係暖嘅，值得一讚👍🏻👍🏻麵包分咗兩個味，左邊應該係香草味，右邊係原味，而且有兩款醬配搭（黑醋+欖欖油）同另一款應該係cream cheese 🧀。好味：4/5😋-🔹温室小蕃茄配水牛芝士及羅勒脆片 $108蕃茄味道好清甜再配上水牛芝士，成個感覺好清新，而底下配咗一啲帶咸味嘅脆脆，口感上更加豐富，食完十分開胃！好味：4/5😋-🔹手造意大利貓耳朵意粉配黑胡椒汁及舞茸菇 $188個人不太喜歡貓耳朵的質感，好似食緊能得利糖咁🤣 鍾意食煙煙韌韌嘅口感嘅人就應該會好鍾意食。舞茸菇炒到好爽口，幾好食，但整體醬汁偏咸，可能因為用咗三款芝士加黑椒汁，食到最後咸到要飲好多水。好味：3/5😋-🔹傳統卡邦尼手造意大利幼麵 $168呢個意粉真係好似每枱食客都有點，蛋味相當濃郁，鍾意卡邦尼以蛋味重的人一定喜歡。意大利粉方面，意粉有咬口而且很掛汁，整體相當不錯。好味：5/5😋-呢間餐廳好適合情侶嚟，環境好舒服，又唔會太過嘈吵。而且食物都不錯，基本上每款意粉都係即叫即整，確保上枱時係熱辣辣，意粉都係好彈牙，做到AL DENTE嘅口感，果然係手工意粉。如果鍾意食蝦嘅朋友，可以試佢地招牌嘅紅蝦意粉，幾乎每枱都有ORDER！…查看更多

KABOOM🍽️-▫️絕佳打卡餐廳▫️FUSION泰菜▫️設有室內室外坐位-呢間餐廳又係BOOKMARK咗一段時間，今次一行四人嚟慶祝生日🎂無諗過熱辣辣天氣，我地被安排坐室外，但係竟然有驚喜🥰室外位置有個CAMPSITE嘅帳篷🏕️遮住，感覺比較焗促，但係餐廳都好貼心整咗好多把風扇。而且超有氣氛👍🏻咁啱當日去嘅天空都粉粉藍藍好靚🩵-🔹Deep Sea Tacos🌮 $138ORDER咗3款小食，第一款係tacos，入面夾住cocktail shrimps再加魚子，再夾小小生菜，都幾fresh，不過比較難同人share，只可以咬完一半再比對方。入面夾住嘅蝦都好新鮮，而且好足料，不過食到好狼狽😂～🔹Crab Bao Bao $128軟殼蟹嘅灲包，超大隻軟殼蟹，食落都有小小蟹膏，配有小小mayo醬，包入面夾咗墨西哥辣椒圈，怕辣嘅就要小心！～🔹Tuna Cups $98一個迷你小撻仔，最好食嘅small bites🤤吞拿魚應該有用小小醬油醃製過，但係都好突出到佢嘅鮮味，可能係真係好足料😂滿滿嘅吞拿魚，好幸福🥰-🔹Tom Yum Gong Carbonara $198一試菜就覺得同平時食嘅carbonara無咩分別，顏色亦無特別深色，食落第一啖都唔覺有咩特別，但係慢慢就有股辣係喉嚨攻出嚟，真係估唔到！辣味就係冬蔭公嘅味，不過整體都唔太特別。-🔹Go Big Go KABOOM! $278之後叫咗個同店名一樣嘅燒春雞，我諗都算係signature dish?!一上枱都好濃嘅香料味，而且都配有好多配菜，有車厘茄、南瓜、秋葵、紅椒黃椒等，令整體唔會好齋，雞肉都算嫩滑，而且入味。-當然唔少得就係ORDER佢嘅COCKTAIL，真係每款都好吸睛🤩-🔸If Not Now, When? $128(ɢɪɴ, sᴏᴜʀ ᴀᴘᴘʟᴇ ʟɪǫᴜᴇᴜʀ, ᴊᴀᴘᴀɴᴇsᴇ ʏᴜᴢᴜ ᴊᴜɪᴄᴇ ᴡɪᴛʜ ᴘᴀɴᴅᴀɴ ғʟᴀᴠᴏᴜʀ)呢款飲落蘋果味唔突出，班蘭味反而搶曬。如果鍾意蘋果味cocktail嘅可能會失望。-🔸Jealousy is Killing me! $128(ᴡʜɪsᴋᴇʏ, ᴘᴀᴍᴘᴇʟʟᴇ, ᴘɪɴᴋ ɢʀᴀᴘᴇғʀᴜɪᴛ ᴊᴜɪᴄᴇ, ʟᴇᴍᴏɴ ᴊᴜɪᴄᴇ ᴡɪᴛʜ ʜɪʙɪsᴄᴜs ғʟᴀᴠᴏᴜʀ)呢款酒味比較濃，果汁味相對無咁突出，而且唔算好fruity。如果鍾意飲濃烈啲酒味嘅就可以叫呢款。-🔸Tonight is Gonna be A Good Night! $128(ᴠᴏᴅᴋᴀ, ᴘʀᴏsᴇᴄᴄᴏ, ᴇʟᴅᴇʀғʟᴏᴡᴇʀ ʟɪǫᴜᴇᴜʀ, ʟᴇᴍᴏɴ ᴊᴜɪᴄᴇ ᴡɪᴛʜ ᴇʟᴅᴇʀғʟᴏᴡᴇʀ ғʟᴀᴠᴏᴜʀ)呢款係咁多杯最清新最易入口，味道清清甜甜，又唔會太重酒精味，如果唔鍾意飲咁濃烈嘅可以試呢款。-🔸Damn Pissed Off! $128(ᴠᴏᴅᴋᴀ, ᴘᴀssɪᴏɴ ғʀᴜɪᴛ ᴘᴜʀᴇ́ᴇ, ᴘɪɴᴇᴀᴘᴘʟᴇ ᴊᴜɪᴄᴇ ᴡɪᴛʜ ɢɪɴɢᴇʀ ғʟᴀᴠᴏᴜʀ)呢款真係打卡一流🤣味道酸酸地，飲耐咗其實薑味都好出。鍾意飲酸味重嘅就可以叫呢款！-店員再送咗呢SHOT比我地，味道有小小菠蘿+椰子味，但又不似PINA COLADA，都幾好飲～-由於我地坐ROOFTOP室外坐位，如果要ORDER酒精飲品就要落返去室內嗰層ORDER同即場比錢先，之後就會有人SERVE飲品。-▪️呢間餐廳絕對好適合打卡，食物飲品都係正常水準。而且環境搭救，位置20樓，又望到維港景，即使室內室外一樣望到。不過夏天坐室外真係比較熱少少，如果無咗帳篷會更好。但整體都好舒服，同一班朋友吹下水都不失為一個好地方。越夜就見到好多人上ROOFTOP飲嘢，成個環境都好CHILL🤍▪️職員都好好，由於我地慶祝生日，佢地都好熱心幫我地合照同埋SERVE蛋糕👍🏻收碟速度就可以再加強。…查看更多

川味魚館🍽️-▫️家庭式川菜▫️其貌不揚隱世店-呢間川菜係屋企人介紹嚟食嘅，試過真係返唔到轉頭😂川菜十分正宗，味道好適合香港人。我地五個人食LUNCH都食到非常滿足😋-🔹馳名口水雞（小辣）呢款算係冷盤，口水雞好入味，上面佈滿蔥、花生碎，辣油都係非常香👍🏻雞肉嫩滑，而且都比足料有雞髀🍗食。-🔹老成都回鍋肉（小辣）呢道菜炒得好香好有鑊氣，餸飯一流👍🏻而且都係比好大碟，好多肉。不過椰菜就比較少，反而紅椒青椒就好多，但都好入味。-🔹麻婆豆腐（小辣）好適合餸飯，味道都係好正宗，家常會整到嘅味道。豆腐都係好嫩滑，仲有蔥花香。但個人覺得略嫌太多辣油，食到後面成碗飯配油嘅感覺。但係都算不錯👍🏻-🔹五花肉炒花菜（小辣）呢款五花肉無回鍋肉咁咸，係超有鑊氣嘅一道菜。花菜又係好好食，無諗過晏晝食都有咁足料咁大碟。食完仲不停想再食。-🔹麻辣牛肉（小辣）類似夫妻肺片嘅做法，係咁多道餸最辣嘅一個，即使叫咗小辣都係偏辣。但係好香，牛肉好腍，再配有花生碎同芝麻。而且仲有牛肚🤤底下有青瓜配搭，但係辣油偏辣，淨食青瓜未必接受到。-🔹皮蛋豆腐額外再喺大MENU叫咗個皮蛋豆腐，上枱已經嚇親，超大碟仲要豆腐切得超靚，好考工夫，完全無斷開/爛咗。呢道菜好清新，食咗咁多咁辣同埋比較膩嘅菜，食反呢個好舒服～紅椒青椒帶出咗個清新感，而且醋又會令到更加開胃同解膩。-整體呢一餐超滿意，LUNCH嚟食真係性價比極高。午飯時間食真係超抵！LUNCH MENU每款餸都係$60-$70一個，白飯任裝，配飲品🥰店主仲好好，最後送咗個冰粉比我地解辣，係一舊類似大啫喱再配花生碎加甜甜嘅糖水👍🏻店員服務態度又好好，睇得出應該係家庭式經營嘅，好有人情味嘅餐廳🤍臨走時仲ORDER咗個酸豆角炒肉碎打包DINNER加餸😂又係超好餸飯，食唔停口啊😋😋…查看更多

AHAN THAI 阿閒泰-▫️人氣高嘅餐廳▫️FUSION泰菜-見好多人介紹又嚟試下，平日18:00-18:30 WALK IN都唔需要等太耐，店面都大，幾乎坐滿曬，KEEP住有客入。-🔹青蘋果茄子沙律 $68呢道前菜嘅味道真係超驚人，本身以為係酸酸甜甜好開胃，結果係又酸又苦又臭🤢唔知點解食落有陣怪味，但又講唔出加咗啲咩。茄子係好腍嘅，但係成碟個味道太奇怪，食咗一舊都唔太想再食第二舊。-🔹泰式醉貓炒新鮮手造卷粉 $128見呢道都係熱門菜，諗住一定唔會難食得去邊。但係都比想像中有出入，卷粉幾特別，面質好似河粉/陳村粉，帶有少少煙韌感。配咗泰式嘅豆角炒蛋一齊炒，單食豆角都不錯，但整體味道都係偏怪，唔太啱我口味。-🔹泰又話啦菠蘿雞肉炒糙米飯 · 炭烤牛肉串燒 $148諗住泰國嘢食菠蘿炒飯實無事，點知都係中伏！成個飯都係超淡，近乎無味，雞肉十分嚡，即使加咗肉鬆、提子乾及菠蘿，都完全無菠蘿炒飯嘅味道。唯獨是牛肉串燒係好食，味道及肉質正常，再配有一個泰式生蝦嘅辣SAUCE會更香。-呢間餐廳不太推薦，食物味道都偏怪，可能係FUSION嘅關係，唔太啱我同朋友嘅口味，下次都係食反正宗泰國餐廳。而且餐廳職員都一幅唔悠做嘅樣子，好幾次示意員工加水及埋單，職員即使行過都無望過嚟，再加上唔會主動加水/收碟。…查看更多

CARAT Fine Indian and Mediterranean Cuisine🍽️-▫️正宗印度餐廳▫️店面超大，可以揀室內室外-呢間印度餐廳係BOOKMARK咗好耐想試嘅餐廳😍咁啱同屋企人慶祝生日就可以一班人試多幾款菜式。不過咁啱撞正當日比人BOOK場，就安排坐室外位置，但係室外都好舒服，唔會太焗促，而且AREA好大，唔會同隔離枱好近好逼。-🔹Mediterranean Dips Platter $118有四種唔同嘅醬（中東茄子、鷹嘴豆、紅椒合桃、中東芝麻），再配埋TABBOULEH菜粒沙律，有三款唔同嘅薄餅去沾嚟食。薄餅焗到熱辣辣，加小小菜粒沙律再點醬係十分好食😋每款醬都好出色，個人最鍾意係鷹嘴豆同中東芝麻醬，非常香滑濃郁👍🏻而且佢加咗POMEGRANATE好清新，絕對係唔錯嘅開胃菜。啲醬多到要再嗌多個BREAD BASKET先點得曬🤭-🔹Punjabi Paneer Tikka $148原本睇MENU以為係芝士波波，點知上枱成舊炸豆腐咁，其實成舊都係芝士🤤點上薄荷醬就無咁膩。建議可以兩個人SHARE一舊，唔係好快就飽食唔落其他。-🔹Tandoori ChickenHalf ($128) | Whole ($228)叫咗半隻，唔夠食再叫咗一隻😂雞肉好嫩，配搭薄荷醬食就無咁膩，而且唔會煮得太乾身。不過就偏辣少少。-🔹Murgh Tikka Masala $138 (上)🔹Butter Chicken $138 (下)🔹Basmati Steamed Rice $48呢兩款都好似，但係tikka masala係偏辣嘅咖喱；而butter chicken就偏甜同杰身啲，而且帶有香濃嘅蕃茄味🍅額外再ORDER咗印度長米飯，不過個人就唔太喜愛，覺得好無飯嘅質感😂-🔹Garlic Naan / Butter Naan $38🔹Sun-dried Tomato Naan $48食印度嘢又點可以唔配NAAN，叫咗三款嚟試，Butter同Garlic都好香，蒜味都足夠。Sun-dried tomato就咸咸甜甜幾特別。配埋Butter chicken啲sauce一齊食，完全係絕配🤤不過呢到就無Cheese Naan選擇。-🔹Murgh Saag $138最後叫多咗個菠菜咖喱雞，估唔到有驚喜🤩上枱見到咁嘅顏色都好擔心係咩味，但係食落係超濃郁嘅菠菜味，而且好清新，反而中和反上面比較膩嘅感覺！再配幾粒POMEGRANATE又更清甜👍🏻-🔹Mango Lassi $68食印度菜又點可以唔試呢杯飲品！呢杯超濃芒果味，而且算杰身，每一啖都係濃濃嘅芒果乳酪香～飲完一杯都想接住再飲多杯🤣-整體來講，呢間餐廳真係十分推薦👍🏻🤩嘢食好食，員工態度又好，非常FUNNY。食到最尾都會問下我地整體如何，當然都係讚不絕口，而且每碟都清曬😂…查看更多

Terrace in seaside🍽️-▫️柑橘主題CAFE🍊▫️打卡餐廳-收咗工同BF經過，見到都有人排隊，同埋食物賣相幾靚，就決定排隊試下😚平日夜晚排隊都係排15分鐘左右就有位，不過有機會需要搭枱。因為見搭枱坐得好逼，所以就等多陣。-🔹傳統飯卷 $68全素嘅飯卷，味道都好正宗，似足韓國食嘅味道👍🏻飯卷SIZE都好大舊，女仔自己食一份飯卷都完全夠飽。好味：4/5😋-🔹燒醬油黑毛豬白切肉紫蘇飯 $128幾乎每一枱都會嗌嘅紫蘇飯，擺盤好特別，將飯壓平擺滿半圓。飯好香，唔太食得出紫蘇葉嘅味，反而覺得好似香蔥拌飯，好食😋黑毛豬白切肉肥瘦均稱，味道唔會太咸，都幾似食緊大舊嘅台灣鹵肉。好味：4/5😋-🔹泡菜豬肉芝士千層麵 $72見千層麵加泡菜幾特別就ORDER咗，點知係大伏🫠成舊千層麵都超級咸，咸到苦，每一啖都要飲水🥲不過都好足料好大舊，每一啖都好多泡菜同肉碎，但可能係肉碎醃得太入味🤦🏼‍♀️好味：2/5😖-🔹濟州柑橘乳酪 $68又係幾乎每枱一杯嘅飲品，但係我唔識欣賞，味道比較怪，可能係乳酪太稀，變咗柑橘水加小小乳酸味，加上柑橘味比較假。好味：2/5-由於叫咗太多主食，所以都完全食唔落甜品，不過都見到好多人都有ORDER窩夫。整體來講真係一間打卡餐廳😂食物賣相全部都幾靚，而且全部都會配一舊橙，當係配合反主題。但係味道就麻麻地，有待改善。下次有機會可能都只會試甜品。…查看更多