rabbit_4_u's Profile

響尖沙咀海港薈訂咗兩席慶祝爸爸生日。酒樓服務同食物都好好，整體好滿意。只係場地set up同最初討論有少少唔同，例如枱布顏色以及備菜枱同麻雀枱嘅位置，酒樓都好快因應我哋嘅要求調整，所以冇乜問題，無傷大雅。如果好緊張場地佈置嘅朋友，可以預早少少時間到酒樓check下以防萬一。酒樓嘅維港海景真係好靚，我哋廳房嘅位置對正文化中心，食嘢、打麻雀同影相都覺得有文化啲哈哈。菜式每碟都好食，幾款餐前小食幾好味；乳豬香脆唔算肥；龍蝦同3.6牛乳一齊食，有啲似燉奶咁樣，煮法幾清新同新穎；翡翠螺片帶子、炸蟹鉗同魚翅都有水準；紅色東星斑零舍覺得喜慶，同埋好味；鮑魚黃玉參、黑松露醬燒雞同炆伊麵都唔錯；最驚喜係壓軸嘅鴛鴦大蟠桃，嘩嘩嘩好大個好開心經理同各位侍應都好好，有咩問題同要求都好快同準確咁回覆，見到有咩需要都好快幫手，好細節嘅嘢，唔使我哋出聲都主動幫忙，例如搵張細蛋糕枱俾我哋切生日蛋糕，見我哋想黐裝飾氣球就俾啲blue tag我哋，服務細心周到。主力負責我哋廳房嘅侍應係一個後生女，斯文有禮貌、快手同埋盡力，幫我哋影大合照完全冇問題，態度好好。多謝酒樓團隊令到我哋各位親戚有一個盡興同好飽飽嘅晚上！最重要係主角，即係在下嘅爸爸好開心哈哈哈…Read More

蛋撻的確係好味嘅一直以來，店外買外賣蛋撻，一個都可以買，冇問題嘅，都買咗好多年今日去買，似乎係老闆/店長(一個有鬍鬚嘅中年男子)嘅人，話冇得買一個，全部都係兩個，因為盒裝蛋撻係兩個包裝咁其實我一直以來買嘅一個蛋撻又點買到㗎呢？佢哋咪搵個紙袋包一包，冇問題㗎我都冇咁好氣，平靜地微笑講，我得一個人，想買一個咋喎最後總算成功買到，佢哋以施捨嘅語氣賣咗一個蛋撻俾我，疑似老闆娘(一個戴眼鏡嘅中年女子)仲要俾說話我聽，話其他嗰啲蛋撻收起唔賣㗎啦，呢個俾埋佢啦俾！？我手上拎住張十蚊紙，真金白銀俾錢買㗎喎一係你白紙黑字寫出嚟，話一個蛋撻唔俾買囉，唔使拗啦趕時間搭車，唔想同佢哋爭論，亦都唔想影衰我嘅修養，買完快脆走，但咁嘅服務態度真係令人好唔舒服好食係好食，頗多遊客買係事實，店大欺客都係事實我由頭到尾都好有禮貌，絕對唔係西客。佢哋咁嘅服務態度，好自為之啦…Read More

由於住響附近，所以經常幫襯山林茶餐廳。店員非常親切友善，有時會同啲熟客傾返兩句，講下笑咁，好有人情味㗎。餐廳係典型嘅街坊式經營，普通實際茶餐廳嘅格局啦，繁忙時間好多時都滿座咁滯，客人絡繹不絕。晚餐來講，每晚有4款指定晚餐可以選擇， $48有一個碟頭飯/炒粉麵，一碗細嘅中/西湯同埋一杯熱飲(凍飲加幾蚊)，以我一個正常女仔嘅食量都夠飽啦。咁嘅價錢實在非常親民，而且味道都唔錯，熱辣辣，都幾好味㗎。如果指定晚餐唔啱食或者想豐富啲，可以揀其他晚市套餐或者炒幾個小菜，有時見啲一家大細嚟嘅會嗌幾個小菜夾下夾下咁。如果住得近嘅，晚市山林係可以免費送外賣嘅。當其他外賣平台閒閒地都要收$20外賣費嘅時候，免費送外賣真係非常窩心，在下都受惠不少哈哈。在下會繼續支持呢啲有心經營嘅小店嘅😁…Read More

自從冇響金鐘返工之後，都好耐冇幫襯啦，偶然去開嗰頭，都會專登去幫襯返碗車仔麵。今日又去咗幫襯啦。叫嘅係魷魚甜酸齋豬紅菜心米粉，堂食。企響度慢慢食。店員做嘢係快靚正嘅，節奏快促，但係都好有禮貌同友善。咖喱魷魚係鎮店之寶，相信都唔駛我多講，仍然維持高水準，非常好味啊，其他餐廳真係絕無僅有。甜酸齋係用心之作，比起好多齋舖賣嘅更有水準，唔會一味軟淋淋咁樣。豬紅好入味又夠滑，菜心夠嫩亦都俾得慷慨，米粉嘅份量都唔少。整體來講，係快快脆又令人心滿意足嘅一餐。口味人人唔同，然而呢間的確係我心目中多年以來車仔麵嘅no.1。如果順路去開嗰頭，我都會繼續幫襯。此外，唔知係咪因為天氣熱，午膳時間條排隊人龍好似比以前短咗好多。請大家都同我一樣，多多支持有誠意嘅小店啦。…Read More