okaykaykay's Profile

自從airside開咗呢間嘢之後，我一直有幫襯開佢地嘅嘢飲，開頭佢地嘅嘢飲真係好好飲，茶味好濃，又係用鮮奶，但可惜愈做愈差。第一，，開頭嗌嘢飲可以走冰，到後期就開始唔畀，最多只能夠少冰，但即使少冰，每個職員嘅標準都唔一樣，試過依然好多冰，亦試過冇乜冰，所以好難因應冰量而嗌少甜之類，亦明顯職員冇一個統一標準。第二，茶飲份量愈來愈少，之前嗌過一次少冰，結果杯嘢飲少咗大約五分一，到今日更離譜，杯嘢飲份量接近得返一半！其實呢間嘢啲職員成日喺度傾閒偈，我只係一個顧客買完嘢飲就走，唔會理咁多，但當我畀38蚊得到半只有一半份量嘅嘢飲，我覺得店家應該正視返問題！其他茶飲冰會寫明走冰只有8成，但呢間冇，而且每次份量亦唔一樣，本人以後唔會再幫襯！…Read More

平時成日經過呢間鋪頭，今日決定入去試吓，可能因為假期前夕，幾乎full house，唔知係咪因為廚房少人，所以等嘢食時間都比較耐，反而見到串燒上得比較快，見比我地後入嘅客人串燒上得快啲。我地最後嗌咗個黑咖哩牛腩飯同船河，船河跟餐有個小食同嘢飲。個牛腩飯睇落好普通，但食落唔錯，個咖哩係比平時嘅香口但偏向水質地，惟份量比較少。另外個船麵湯底好濃郁，蛋麵好有咬口，啲札肉同炸豬油都好好味！另外杯泰式奶茶偏淡，唔嗌亦冇損失！…Read More

之前喺外賣app叫過呢間嘢嘅雞煲，覺得藥饍湯底唔錯，見屋企附近有一間，所以專程去堂食。我地平日兩個人八點零walk in，唔駛等已經有位，見佢鋪頭都幾細，唔夠十張四人枱，但好處係麻雀雖小，但都坐得幾舒服，因為兩個人都係畀張四人枱你。我地今次叫半隻麻辣雞煲，其實份量幾充足，但係雞肉鞋身，而且個麻辣汁真係少得可憐，基本上如果開住個爐嚟食係會即刻焦底（因為冇汁），所以侍應都建議我地唔好開住爐食，食完先幫我地開爐加湯打邊爐。但亦因為太少麻辣汁，加湯之後個湯完全冇麻辣味，變咗清湯咁，而且鋪頭亦冇提供蘸汁，所以淥咩都冇味！另外我地嗌咗個炒蜆，燒魷魚、燒牛柳粒、燒雞腎，除咗個炒蜆幾惹味之外，其他嘢食都非常普通。不過值得一讚係，侍應們態度非常好，殷勤主動，隔籬枱想叫飯食，侍應話佢地鋪頭冇飯，可以幫佢地去對面鋪頭買，試問而家啲餐廳點會畀你攞出面嘢入嚟食之餘，仲幫埋你去買？而且地方坐得舒服同乾淨，或者下次再試吓佢啲燒海鮮同其他湯底嘅雞煲！…Read More

同朋友去尖沙咀食飯，最後揀咗呢間韓國餐廳。我地坐低嗌咗幾樣嘢食，有部隊鍋、鮑魚粥、牛肋骨等等，不過最想講吓個泡菜煎餅，真係非常濃味同香口，超好食，建議嚟呢間餐廳嘅朋友一定要嗌！另外佢啲前菜都好好味，尤其個泡菜味道非常正宗，同喺超市買嘅泡菜真係完全冇得比！而且呢度啲服務好好，侍應會主動幫你refill泡菜同斟茶，座位亦非常闊落，坐得好舒服，勁啱幾個朋友聚會傾偈大聲笑，完全唔怕嘈到隔離枱，因為大家都係咁嘈！…Read More

喺附近做完嘢，決定試吓聞名而久嘅大渣哥。入去坐低睇餐牌，選擇都算多，最後我叫咗個下午茶餐，乾炒牛河，再加杯凍奶茶，咁就要六十蚊，其實以一個工業區嘅價錢嚟講真係唔算平，不過杯奶茶比普通茶餐廳大杯，碟乾炒牛河份量亦唔少，而且好有鑊氣，味道唔錯，都算值回票價！另外樓面都幾闊落，但座位設計就麻麻，排到有啲密質質，繁忙時間應該要同隔籬位膊頭掂膊頭，不過好彩我下午茶時間去，唔算多人。總結而言如果下次經過都會再試！…Read More

喺屋企叫外賣，見呢間連鎖米線舖有好多分店，諗住應該冇死啦，點知中晒伏！我嗌咗個酸辣豬扒米線，第一，佢個酸辣湯唔係熬出嚟，而係喺碗米線度加入酸菜同辣椒，然後另外畀一兜味精湯你加入去，咁就係個酸辣湯！個人認為呢種酸辣湯毫無誠意，而且酸辣味道亦冇乜，只係飲到濃烈味精味！第二，塊豬扒睇落炸到金黃色，好似好吸引，但食落就瀨晒嘢，稔到飛起，擺明落咗好多鬆肉粉，已經失去原本豬扒嘅質感，再加上塊豬扒係完全冇味架，我都唔知食緊乜！第三，個上海麵一挾就散，完全唔煙韌冇口感，食落好似稔咗嘅烏冬，亦唔掛湯！真心唔明點解呢間鋪頭可以開到咁多分店！…Read More

今晚幫朋友慶祝生日，揀咗呢間特別嘅火鍋店。首先佢嘅環境裝修係非常有特色，模仿中國傳統嘅怡紅院，剩係打卡影相都值回票價，可惜我地今次坐唔到卡位，剩係坐到普通大圓枱，否則應該可以影到更多靚相。以佢嘅地段同裝修，食物價錢比我想像中平，佢好出名嘅花膠雞湯都係幾百蚊，入面有半隻雞，不過建議食之前要快啲飲湯，我地剩係飲咗一碗已經畀姐姐加咗湯，嘥咗！呢度揀鴛鴦鍋係唔駛加錢，所以我地另外揀多個麻辣湯。食物質素都幾好，牛肉好新鮮，亦好多丸類選擇，雖然未至於好驚艷，但都發揮穩定，美中不足係杯西瓜特飲麻麻，但呢間嚟中環可以一試！…Read More

呢幾日打風冇得出街食飯，等到落波馬上衝出去搵嘢食，咁啱見到燒肉like冇人排隊，即刻入去食。呢間鋪頭係用QR CODE落單，然後線上畀錢，由於冇乜SERVICE嘅關係，所以冇收服務費，我地兩個人，嗌咗兩個套餐，埋單都只係二百蚊，非常抵食。等咗一陣上餐，一見到碟牛肉真係嘩一聲嗌咗出嚟，冇諗過一個一百蚊嘅燒肉套餐可以有咁多牛肉！牛肉質素就一般，始終咁嘅價位，好難要求食到靚肉 ，但都算係OK，以性價比嚟講呢間真係冇得彈，特別適合一個人食！…Read More

星期日嘅夜晚搵嘢食，見到呢間水門雞飯多人幫襯，決定湊吓熱鬧。呢間餐廳係用QR code落單，我地揀咗海南雞飯，雞豬串燒，燒魷魚同泰式奶茶。首先想講個海南雞飯，啲雞胸肉略嫌太乾同硬，建議最好加錢轉雞髀肉，不過好彩配飯嘅醬汁好惹味，配搭起嚟都唔太差。至於串燒就穩定發揮，個人認為雞比豬好食全餐最好食係燒魷魚，好有炭燒味，配搭嘅醬汁亦都好夾，而且落單時仲可以揀碎上，非常細心最後係杯泰式奶茶，兩個字，好飲！不過下次再飲我會揀走冰，因為夏天啲冰極速融化，杯嘢好快淡咗，嘥料…Read More

我地一行六人去食晚飯，鋪面地方寬敞，坐得幾舒服，不過座椅有啲污糟，要自己攞紙巾抹一抹。我地嗌咗青瓜、海哲、蟹粉小籠包、上海燻魚、蟹肉海鮮飯等等，本來仲想嗌東坡肉，不過原來東坡肉要預定，因為需要三、四個鐘烹調，唯有下次再食。食物質素ok，冇失望，亦冇咩驚喜，不過勝在餸菜款式多，而且環境舒服，好啱一家人食飯，而且經理態度好好，會主動提醒客人壺茶熱，小心辣手，呢啲細位好加分。如果家中有老人，想穩穩陣陣食間啱佢地口味嘅中菜，呢間唔錯…Read More

星期日出沙田食嘢，度度都要等位，見到呢間牛肉麵冇咩人，又有卡位，諗住求其入去食碗牛肉麵…（不過入座位後就開始多人，之後出面仲要等位，好彩入得快）坐低後侍應會送上一杯濃茶，杯茶意外嘅好飲，不過怕飲得多瞓唔著，所以都係飲一杯就算。朋友嗌咗個紅燒牛肉麵，佢揀咗粗麵，個粗麵好煙韌，非常有咬口。個湯底清清地，有牛肉味，但味道唔算特別，牛肉正常，最出色都係個麵底。我就嗌咗個鹽酥雞排撈麵，揀咗椒麻醬，個雞排會配沙律上。雞排好食，夠香口同脆口，不過最正都係個椒麻醬，撈麵夠晒惹味。建議如果諗唔到食乜，又想平平地，呢間可以一試。…Read More

今晚同朋友飯聚，揀咗尖沙咀呢間居酒屋，平日六點半去到，開頭冇咩人，但好快已經坐滿成間鋪。我地五個人嗌咗五樣嘢先係呢個黑松露帶子沙律，啲帶子好鮮甜，估唔到咁個黑松露，加埋個酸酸甜甜嘅醋汁，超開胃跟住嚟個牛肉壽喜燒鍋，呢個味道中規中矩，冇咩特別，不過牛肉份量都算幾多。之後仲有個燒魚干、芝士豚肉串燒同海膽吞拿魚卷。首先個海膽卷味道正常，啲海膽都幾鮮甜，可以一試。但燒魚干同芝士豚肉串燒都麻麻，唔食都冇損失！飲品我地揀咗巨峰同白桃梳打，味道如想像中一樣，不過最正係夠大杯，一路傾偈一路飲嘢…Read More

同屋企人食飯，大家揀咗呢間中菜，本來以為好難book，但當日book都有位，我地一行七個人，餐廳畀咗張大梳化位我地，坐得好舒服。見佢個menu有好多新式點心同餸菜，價錢唔平，但落單竟然係用QR CODE，有啲意外。當晚見堂食乳鴿做緊優惠，所以試吓，但味道非常一般，仲有啲鹹添。其他點心雖然做得好靚，但食落肚真係一般，而且啲侍應服務麻麻，雖然知佢地做嘢忙，但請佢幫手影張大合照竟然催我地快啲，嗰刻真係有啲火。佢嘅食物質素彌補唔到服務嘅不足，真心冇下次，不過如果想試吓新派點心可以一試，但唔好抱太大期望，當影幾張相，打下卡算。…Read More

之前曾經食過佢嘅外賣火鍋套餐，今次試吓堂食。我地係週末下午去到，見到佢有60分鐘嘅午市套餐，不過週末要加10蚊，另外除咗公眾假期外，時間會免費延長到75分鐘。我地嗌咗兩個套餐，牛肉質素不過不失，任食嘅打邊爐配料，例如菜呀，丸呀都係正常發揮，反而想講吓佢啲熟食，係意外嘅好食！個鹵肉飯非常入味，鹵豬手鹵到好稔，連炸鮮奶都好好食，搞到我地後期已經主攻熟食。另外佢有兩款自製茶飲，值得一提嘅係荔枝紅茶，有淡淡荔枝香味但係又唔甜，打邊爐一流！…Read More

見到米線關注組有人提起呢間米線，有日經過就去會一會佢！週末六點前嚟到，以為咁早應該有位啦，點知全場full晒，都係要等位，不過等咗一陣就可以入座。佢地方唔大，不過勝在啲位規劃得幾好，就算二人座都算闊落，唔會同隔離枱膊頭搭膊頭。滿懷期望叫咗碗醉雞湯米線，點知一飲啖湯就覺得出事，完全食唔出酒味，淨係得一個字，甜！而且雞件份量唔多，仲要鞋口，同以前食過嘅滑醉雞好大分別！另外可以嗌餐飲，印象中嗌咗一杯百香果，一杯菊花，但兩杯嘢都超甜，夾埋碗米線真係甜上加甜，食完出去即刻買返支水飲。唔知點解呢間嘢網上咁多好評，我相信可能係因為平，但如果你想食好味嘅雞湯米線，避雷！…Read More