mia410's Profile

食個景就一流嘅，但食物味道就非我杯茶… 首先講返啲好處就係份量非常大方，食完前菜其實都有啲飽！味道都不過不失，而且個擺盤都幾有藝術感。可惜去到個主菜就出事啦，極度懷疑廚師唔記得落鹽！直白嘅形容係：有舊攤涼左嘅魚放咗嚮菇味水上面，嗯，唔好食🙂。但戴返個頭盔先，以上只係我個人口味！另外個牛扒係正路嘅，但考慮返個價錢就真係好普通。總結係，因為個景真心無敵，所以可以去飲嘢！不過食飯呢就…同樣價錢有更多選擇！你懂的😉。#勁耐無食好西換黎失望一檯🤣 #呃錢系列 #但個景真係無敵 #不負責任食評 …Read More

中環其實有超多餐廳，所以食lunch嘅時候真係好多選擇！今次想同大家分享下呢間位於石板街，裝修好似酒吧咁嘅日本拉麵店。之前嚮OpenRice見到好多人食，於是一直都想試。一坐低，即刻諗都唔使諗就叫咗佢地嘅招牌拉麵- soy sauce ramen ! 本身好少見日式拉麵會用雞髀做主要食材，見到佢咁大隻雞髀係有少少興奮嘅。當fusion菜食，成碗麵味道整體而言OK，係個湯略為油咗少少。為食嘅我其實仲叫咗個粟米tempura，可能本身內心期望過高，覺得普普通通，所以唔多作介紹啦。我覺得整體唔太差，味道可以，份量好足。間唔時食個lunch，想坐得舒服啲同環境chill啲係幾好嘅。但性價比普通，呢一點大家可以自己衡量一下：）…Read More

有一日路過呢間茶餐廳，見到都好似好多款式揀，而自己都反正唔知附近有咩食，於是就入咗去食一個快嘅晚餐。入到去覺得都乾乾淨淨，以茶餐廳環境來講算幾好。而食物有好多選擇，同時價錢都算合理。睇到OpenRice呢間野應該係出名食芝士汁，但其實我本身麻麻哋假芝士（真芝士另計），所以最後都揀咗個其中一個餐廳推介嘅勁辣川椒牛肉煎蛋乾撈麵。公平啲講，味道同唔係唔好味，但係個情況就好似係有人話介紹陳法拉俾你識，於是你滿心歡喜！但點知，出到嚟...喂，岑麗香嚟嘅？！真心岑麗香勁靚，但唔係陳法拉黎嫁喎。所以即使本身個撈麵係好食，但我不禁要問一句：說好的勁辣呢？但如圖示，其實整體都OK嘅。平，環境正路，快手，個汁甜甜地似瑞士汁，只可惜唔係好食到辣味。可以再去，但應該會試其他食物。 人均消費：連飲品幾hkd60…Read More

朋友要離開香港去內地工作一段時間，臨行前為佢餞行。因為大家都太鍾意傾偈啦，所以揀咗呢間環境舒適嘅西式日本居酒屋。間餐廳/酒吧/居酒屋有好多塗鴉同品牌嘅貼紙，同上環一帶街頭藝術文化好配合。加上店員們都好開朗健談，令餐廳嘅氣氛好輕鬆好lively，好適合放工三五成群飲兩杯傾吓計。雖然兩個人唔食得好多，但貪心嘅我哋樣樣都食！於是我地就揀咗Mohawk Menu + Free Flow(sake & beer)，因為呢個類似chef recommendation嘅menu可以俾我哋試到餐廳大部份嘅signature dishes！而且真係有好多items，我只係記得當時有一個「嘩點解食極都嘅仲有嘅」興𡚒心情！而家等我嘗試數返自己食過啲咩出嚟先：枝豆、炸雞、wagyu tataki、hamaichi sashimi with seasame paste、salmon sushi、hamaichi sushi、cabbage salad、手卷、tuna hot dog (炸壽司）、撈烏冬同雪糕三文治。數返出黎都覺得飽到上心口，而且每樣味道都唔錯，性價比一流！雖然食物唔太精緻但勝在選擇多，好適合同朋友去一邊傾偈一邊食嘢！人均消費：hkd498 (本身無加一！）…Read More

最近突然好懷念讀書嘅美好光陰。可惜而家無得去旅行，唯有去瑞士餐廳，扮去左。但講真食瑞士菜，香港無咩選擇。預其亂試，不如揀間有口皆碑- 半島嘅Chesa，我相信絕對係穩陣之選！而果然間餐廳無令人失望！餐廳一入去，就好似瑞士小木屋嘅裝潢- 唔奢華，但就令人覺得好溫馨。我地一行四人叫左個蟹肉班戟，四個湯同芝士火鍋做前菜。坦白講，讀書嗰時一啲都唔識欣賞芝士火鍋，嫌佢酒味太重。但今次食完，完全為芝士火鍋嘅壞印象大平反。可能係細個唔識食，又或者隨着年月增長，開始識得欣賞酒精同食物嘅結合！無論點都好，食瑞士菜要食芝士火鍋係基本。私心推介就叫多份炸薯條-不得了！至於主菜，其實已經食咗。不過我哋都叫咗份啤酒燴去骨牛筋條配麵糰，燒銀鱈魚同燒羊架。我唔識欣賞羊架，但朋友話係每次必嗌！銀雪魚正常發揮，而個牛筋條就好入味，麵糰口感煙韌。太飽太飽，但甜品都叫左apple crumble同朱古力火鍋！我知，一晚打兩次邊爐係過分咗少少😂，但甜品係第二個胃呀嘛！同朋友開心食飯最重要，減肥就再講啦！人均消費：連加一酒水hkd 1000…Read More

當有人同你講：「甜品係另一個胃」，我懇請你好好相信。——————食得再飽，港女如米米都可以獎勵自己一個甜品。而且，嘆一個疏乎厘，跟本唔需要理由。利申- 唔識焗甜品，更加無金舌頭，但見到個#soufflé 發到咁高已經感到賞心悅目。張相影得不完美可改善，但疏乎厘本身其實係焗得十分靚仔：蛋白綿密而有彈性，外層鬆軟，同時中心濕潤。味道方面亦唔會過甜，食落有淡淡蛋香但無蛋腥味。呢個梳乎厘我真心欣賞，最少，我認真為佢寫咗呢一小段食譜。可能我要求低，又或者只係我未試過其他更好味嘅，但容許我排佢做「我最喜愛的梳乎厘排行榜」嘅第一位。不過都有少少美中不足，一係可惜今日無薑汁，二係可惜我太飽。但基於甜品係另一個胃，我最後自己食晒一整個。本身已經好飽嘅我都驚訝點解自己可以食得晒，繼而有極少量罪惡感。所以都係建議大家分甘同味，少食多滋味，多食...就之後做運動補償返。人生好難，獎勵自己好好地嘆一個疏乎厘，唔需要太多罪惡感同理由。我支持你- 食咗先。…Read More