樂高妹妹's Profile

佐敦出名多隱世食店，上網搵到呢間有意大利同印度菜食嘅餐廳，加上價錢睇落幾實惠，就試吓啦，估唔到係出乎意料之外地「好」！由環境衛生，食物到服務都出奇地好！食物雖然多元化，但全部味道都做得恰到好處，我哋點咗pizza、意大利飯同咖喱羊，首先全部食物都係熱辣辣上枱，份量亦好適中，海鮮飯足料，咖喱羊亦炆得幾燜，我哋叫咗午餐set,大部分選擇都係$88-$98，免收加一之餘待應嘅態度係好好，全程面帶笑容有禮，整餐lunch嘅體驗，雖然時間唔長，但感覺相當良好，下次一定會再嚟幫襯👍🏻👍🏻👍🏻…Read More

朋友生日飯想食齋，上網搵到呢間素食館，見評價唔錯，就嚟試吓，無錯菜式味道有啲驚喜，例如叉燒炒河、炸蘿蔔糕、同鬼馬炒雙蔬真心好味，唔油膩調味亦好適中，唔會死咸重口味，酸辣湯有些少麻辣味都幾特別;反而有啲較為貴嘅菜式如片皮鴨和金牌榆耳竹笙煲，就有啲失望，片皮鴨整得太乾，竹笙煲就太水汪汪，個汁似湯非湯，材料如果加多少少成件事會好好多，不過整體上食物味道尚可，價格就屬於中上。值得注意嘅係，本來覺得呢間食店唔收切餅費都幾大方啦，點知原來帶蛋糕嚟食必須買佢哋嘅即棄餐具，店員係會收起所有餐具碗碟，連一對筷子留低做公筷都堅決不提供，呢點令作為食客嘅我哋相當反感，餐具已買，想借用一下筷子分蛋糕都被拒絕，好似有啲不近人情，唔識轉駁，究竟咁嘅服務仲會否求回頭客呢？就算味道頂流都係咁話，真係唔好怪港人鍾意北上消費。…Read More

之前睇到YouTube 介紹呢間自助餐好得，趁阿女生日嚟試吓，整體上食物係優質嘅，味道真心唔錯，$500幾蚊自助晚餐嚟講簡直係無敵！海鮮方面，生蠔同刺身都好新鮮又肥美，龍蝦差唔多隻隻有膏，長腳蟹有啲頗鹹，但都不失肉甜；肉類方面，有佐賀和牛鐵板燒、牛扒同壽司，北海道白豚豬肉壽喜燒，食肉獸簡直係大滿足，亦都唔係渣嘢👍🏻最最最可惜嘅係之前有原條藍鯨吞拿魚劏嘅刺身promotion已經喺上個月做完，否則真係抵上加抵！個人覺得呢間餐廳嘅食物雖然係十分之好食，但可惜自助餐枱嘅空間有限，受歡迎嘅食物好多時都要排長龍，同埋生蠔每人每次只派兩隻，好似寒酸咗少少，去到尾段食物例如刺身、蟹腳同蠔係會派晒嘅，所以不能夠慢慢攞慢慢嘆。整體上值得推介，個係真係要有啲策略喺攞嘢食方面👍🏻…Read More

約朋友去尖東食嘢，搵到呢間有台灣牛肉麵食，見裝修光猛企理，就入去試試，點咗紅燒半筋半肉牛肉麵、炸豬排拌麵、皮蛋豆腐同鹽酥雞小食，麵同肉嘅份量都多，大大碗都係$78相當合理，湯唔太咸帶甜味，牛肉同牛筋都炆得好腍有肉味；拌麵煙煙韌韌咁非常索汁入味，炸物水準都唔錯，皮蛋味道濃而不膩，加配黃金比例手打檸檬茶，真係甜酸度比例適中，個人覺得好清新呀，呢餐食得好舒服感覺良好，下次台牛麵癮起一定會再嚟😉👍🏻…Read More

喺IG見到呢間放題條片，拍到好似好正好抵食咁，點知完美中伏，所謂嘅鮑魚、長腳蟹、帶子海膽嘅選擇，原來全部都要另加百幾蚊位先可任食，加錢都算，嘢食嚟到完全同相/影片兩回事，三個字:唔新鮮！尤其是款帶子夾海膽刺身，帶子乾爭爭，海膽一Pat pat咁呈暗泥黄色，加咗放題錢雖然可以任食，但食咗一件完全唔想再點😖其他刺身同壽司都係非常一般，唔覺得特別好味同新鮮，花之戀壽司做到比一格手指公仲細，雖然話怕浪費但都唔使整到咁迷你啊？熟食仲離譜，燒生蠔好細隻都燒得唔熟同腥嘅，燒羊腩又騷又乾，鰻魚炒飯好油好重味，同店員反映毫無反應，算係最好味啲嘅只有幾款泰式食物如炸蝦餅、串燒同炒椰菜苗，咁食呢啲唔使俾咁嘅價錢啦！😪雖然呢間放題價錢唔算貴，但質素係咪可以做到咁低呢？食完嬲到連相都冇影到，真係好後悔冇留証😤😤…Read More

朋友推介呢間嘅巨形豬扒同瀑布咖哩蟹肉蟹籽飯好食，就試吓呢間新開嘅越南餐廳，整體感覺同味道真係唔錯，泰婆汁惹味唔算辣，豬扒內質夠腍不錯，伴碟嘅蝦片脆口好味，生牛肉湯河牛肉嫩滑有肉味，湯底濃淡適中，可惜略嫌唔夠熱，整體上價錢合理，服務都幾細心，店員喺適當時候清理碗碟，最正係飯同粉都可以選擇多或少，不另收費，全日免收加一外賣自取有九折（$68以上），一定會介紹朋友同再嚟👍🏻😋😋😋…Read More

肉酥和內碎似腐肉，千祈唔好叫，完全冇口感，賣相求其，屋企煮都靚過佢，湯底唔覺有咩特別，康師傅番茄湯底，其餘就係酸菜加小辣湯底，食完都唔知食咗咩，感覺好差，米線冇嚼口，唔明點解咁多好食評，唯一可能係平幾蚊囉，唔係香港人口味，食完好失望，發覺雲南小鍋、譚仔&三哥原來已經好好味😋服務麻麻，唔夠人做，1-2個樓面chur全場，可能只係適合重慶人士口味，建議真係要執執配菜口味，自問應該唔會回頭，仲衰過以前米線哥😪…Read More

團購試咗個生蠔優惠，發覺除了生蠔又靚又扺食之餘，其他菜式都是用料上盛，烹調水凖尚佳，並非一般港式西餐做法，重點是價錢超值，如非位置偏遠，價格絕對可以調高很多。餐廳環境裝修都很舒適，很有高級格調，非常適合情侶約會，以及一家人食慶祝飯。另外，看得出大廚都用心挑選所有食材，黑毛豬好味，高級得來又不太貴，個人最欣賞意式簿餅，味道合到好處，完全不覺得肥膩重口味，是小朋友的首選菜式，慢煮料理都控制得很好，令嘴刁的我們食得非常滿意！唯有美中不足是服務員經驗尚淺，不夠專業，這點有待改善。…Read More