㊣Ron™'s Profile

　　上星期路過見到呢度好多人等位，結果無試到。呢期因為外母去旅行無住家飯食，所以就襯今晚嚟試一試。　　好彩，老婆行得快，所以只係等咗五分鐘，由入座到走，門口都大排長龍。　　見到餐牌啲相好靚，所以叫咗三個餸，但係無諗過每碟餸都係超巨型！結果三碟都食唔晒，打包帶走都滿兩盒。　　招牌黃金蝦：香口！有成 14 隻咁多，食唔晒，因為油炸，食多兩隻都會覺得油，但係味道確實唔錯！　　沙嗲金菇肥牛煲，一句講晒：超勁份量，未見過咁嘅 Size 仲要滿晒！料足牛肉又好味。　　倉魚兩食：分別用酸甜汁及鼔汁煮，美味。　　連埋兩個白飯加埋發泡膠盒，埋單 HKD214.00…Read More

　　今晚無端端返咗屋企都走返出街食飯，漫無目的咁嚟到信芳一帶，觀察晒附近嘅食肆，原本想去「金潮小廚」，但係 20:00 呢個閒日時段實在爆得太誇張，門口等位嘅人幾乎相等於食肆內嘅人客數量，所以唯有放棄，結果就去咗「新豐記」。　　次選「新豐記」，因為附近食肆係呢間最多人，而我走埋去又唔駛等位，再加上佢嘅裝修令我覺得佢會頂呱呱，所以入去坐低，但原來又中招。　　同老婆兩個人叫咗三個餸：　　一、墨魚鵝腸。無乜味道，覺得好嘅係啲墨魚並非硬硼硼嗰種，但價錢比荃灣食得貴，份量又比較少，連味道都唔係特別好，咁就真係唔值；:(　　二、辣酒煮花螺。一上枱好有期待，因為好神悉咁出晒煙。但係一打開個煲蓋，衝口而出就彈出一句：「有無搞錯？」個煲本身已經係細，仲要唔夠半煲。如果係美味的話都仲可以安慰自己「小食多滋味」，但係辣酒唔辣、酒無酒味、螺又細粒又無味道，如果唔係望住自己放咩入口，然後加上幻想力，啲螺同黑魚嘅口感係一樣，但唔會分得出食緊咩嘢。:(　　三、椒鹽鮮魷。經過兩道菜嘅心理調較，已經預咗呢個餸個 Size 都會係好輕巧，結果一如所料。好嘅係上碟都算乾身，碟底唔會有剩油，但係呢，就一啲都唔香口，賣相亦都只係普普通通。:(　　三個餸連一枝啤酒，兩個人 HKD162.00 埋單，倆公婆都覺得唔抵，因為荃灣食開一間，份量 / 味道 / 價錢，甚至坐位環境都比呢度優勝，所以食唔飽都已經唔想再叫，只有打算再去其他地方填飽個肚。　　服務方面，企喺街頭時候，叔叔好好禮貌咁介紹，唔錯，我指明要個涼快嘅冷氣位佢都俾到我。但係當落咗 Order 之後，另一位姨姨就叫我轉枱，讓將四人枱俾一行三人嘅食客，但問題在於，佢間舖係仲有其他位。　　呢間食肆雖然唔係太大，但隔離對面一共三間鋪位，所以有兩個啤酒 Promoter，一個靚女醒目，一個就一舊飯咁，我一坐低，碗筷都未有，睇緊 Manual 食乜餸時候就衝埋嚟要我 Order 咗佢啲啤酒先，真係本末倒置。我要飲酒就去咗酒吧啦。靚女一個就醒目好多，等我叫晒餸先埋嚟，一邊倒酒一邊就已經 Sell 定我下星期要再去幫襯，因為有獎抽，禮物好豐富咁話喎。　　但總括嚟講，食物質素雖未致於好難食，但係比預期差一大截。而且食飽離開之後，就發現我因為著短褳而已經唔知俾咩咬到對腳一粒粒，好痕癢。…Read More

　　之前一日食咗一餐唔開心嘅日本嘢之後，呢日再接再勵去搵過另一間好食嘅去獎勵老婆，慶祝結婚一週年，就由老婆提議嚟咗呢間成日經過但無試食過嘅日本料理。　　可能因為撞正呢晚英超開鑼日，所以夜晚八點左右都唔駛等位，而且成間食肆都係一半枱有客。一坐低就已經花多眼亂，樣樣都想試，好辛苦先揀到叫咩食。呢晚就好彩，揀親都好食，定係真係餐牌上寫照照都係掂嘅呢？要遲啲再試先知。　　第一道菜「三文魚沙律」，未食已經見到好新鮮，再用筷子夾上去已經確認咗 80% 係好嘢，放埋入口，100% 肯定係新鮮到爆。　　第二道菜「照燒安格斯牛扒」，同樣用料新鮮，食到牛扒嘅肉味，個汁亦整得好好。三爬兩撥就俾我食晒。　　第三道菜「廣島麵鼔蠔鍋」，食材新鮮不在話下，個湯煮出嚟仲好清甜，一啲都唔鹹。　　「鹽燒魚鮫」燒得好香口，而且又無油膩嘅口感，正！　　最後因為食得太開心，開始有啲飽仍然要加多個「三文魚壽司」。呢舊壽司同前一日嗰盤就差得遠喇，美味可口，而且啲 Wasabi 仲比其他連銷店或日本料理嘅靚，嗰種攻鼻嘅感筧都零拾清新。　唯一有少少貪心就係其實個 Size 比出面食開嘅細咗少少。　　整體而言，基於：　　(1) 唔駛等位；　　(2) 環境舒服；　　(3) 食材新鮮；及　　(4) 價錢相宜。　　呢一餐係食得好滿足，值得荃灣友一試。…Read More

　　好日唔去 MegaBox，難得當日專誠走入去行街，仲特登行上行落搵嘢食，點知搵咗一間食完會唔開心嘅食肆。:(　　雖然標題係「大失所望」，但都講一講令我滿意嘅嘢：Sabu Sabu「日本傳統牛肉鍋」。整個鍋嘅食料都好新鮮，牛肉很有鮮味。呢個第一道上枱嘅食物，確實令我增加食慾同埋要求。　　第二道上枱嘅「鹽燒鯖魚」亦都係香口美味，呢個時候個心其實有一種「呢間可以 Encore」嘅感覺。　　但係再上枱嘅「壽司拼盤」，賣相都幾整齊，但係已經令我個心情有少少跌，因為賣相同隔離 Jusco 嘅壽司相比，視覺上已經無 Jusco 嘅壽咁新鮮。呢樣都未算，最衰嘅就係啲壽司全部一夾就散晒，啲飯一啲都整得唔實。就算用手食，未試過可以成功將任何一舊壽司完整攞起。有紫菜包住嘅另計。要我用連加一差唔多 HKD200 去食呢個「壽司拼盤」，只有三個字可以講：「好差差！」　　如果 100 分滿，結果就係因為一個「壽司拼盤」由原本嘅 80 分跌到去 20 分。　　然後埋單嘅時候，再見埋將單，要扣多 15 分淨返 5 分。　　令我要扣多 15 分嘅係，望下將單，除咗 10% Service Charge 之外，竟然仲收多每人 HKD5.00 嘅茶芥。　　恕我實在孤漏寡聞，未試過食日本嘢收茶芥，對我而言，一間價錢唔係特別平，食物質素又唔係特別好嘅食肆，呢餐俾錢俾得唔開心。…Read More

　　中午時份，可能比較早，十二點三左右，計埋我地都只係三枱客，所以服務特別周到，而上菜時間亦十分之快。　　吸引我會再幫襯嘅原因係：　　賣相吸引之外，味道亦比預期之中好得多，加上再以價錢去衡量，其實唔算係貴。　　其實餐廳環境氣氛都唔錯，適合朋友傾偈嘅地方，但係最終我都決定只係俾 3 分環境分，係因為下列兩個原因，而呢兩個原因亦係令我下次考慮幫襯前嘅決定因素：1. 冷氣不足。甚至乎我懷疑有無開冷氣都係一個謎，對於一向怕熱嘅我就實在係一個大問題。2. 或者因為空氣唔流通，所以整個午餐過程中，都有三數隻蒼蠅作伴，都幾討厭。　　…Read More

　　星期六開 OT，老婆先去搵位。事前唔知道開咗呢間食店，行到去門口仲要嚇親，因為好多人等位。　　但地方大，流量都好快，我食到一半，已經見啲枱唔爆喇。　　老婆就鍾意一上樓梯就見到有大大條三文魚喺度，視覺上令人食慾大增。　　唔知係咪唔好彩，叫咗幾個餸，賣相都係唔吸引。不過，食落去又無比想像之中咁差，壽司嘅餸，三文魚同帶子都好新鮮；雞軟骨即整，熱辣辣所以好食；天婦羅亦係熱辣辣，而且好在啲粉唔會太多；唯獨個烏冬我覺得有少少怪咁，可能食唔慣「撈」烏冬嘅關係啩。　　每個服務員都好賣力去做嘢，但係就人手始終唔夠。枱面有部機俾客人去按鈕，分有：落單，加水，賣單，等等，但按極都無人埋嚟，只有傳統咁去叫行過嘅服務員提供服務。　　最恐怖係一坐低就聽到服務員同行緊上樓梯嘅客人講句：「孖衫啦些」。但我諗香港人都已經聽慣晒。…Read More

　　相約舊同事食飯，星期五尖沙咀周圍都 BOOK 唔到位，唯獨呢間 BOOK 到位仲要坐唔爆。　　整體美味程度沒有什麼特別，最好食係個甜品－－芝士雪糕，而且賣相好靚，最大意係反而呢個甜品無影相。　　但係環境確實好適合朋友傾偈。　　所有食物賣相唔錯，之不過質責真係無咩特別。牛排食唔出有牛味。…Read More

　　同老婆隨便地走到呢間越棧，行入去坐低時候係兩點十分，只有三數枱客。　　睇看餐牌，原來越棧係有設［下午茶］，閒日兩點開始，今日星期日就係兩點半。既然差少少時間，當然想等啦。　　研究緊食咩好嘅時候，發現其實叫個雜錦拼盤毋須要等到兩點半，於是就叫待應生先幫我落單。　　待應生好好咁問我係咪等到兩點半先 Order，我話係。然後佢話可以照寫咗先，夠鐘自動幫我入單喎，既然佢咁細心咁留住個客，我當然唔會拒人於千里之外啦。　　呢個舉動已經令我好滿意喇，好過有啲食肆，仲要同個客拗頸，話我隻錶快過佢個鐘。　　以份量同味道計算，今餐同老婆都同意係抵食，食到食唔晒，無估到個撈檬喺下午茶時段，都係有返咁上下嘅份量。　　夠鐘嘅時候發現，我估客人已經熟晒時間，兩點七已經坐滿晒仲要排隊。好彩行快兩步咋。　　值得再光顧。…Read More

　　今晚又要一兜友自己開餐，不自覺咁行到嚟屋企附近幫襯開嘅富都。　　一向有幫襯開因為方便，同埋鐘意佢夠鑊氣。　　但係今晚就跌晒 Watt，扣晒分喇。　　叫咗個黑椒雞球炒麵，鑊氣依然，炒麵夠脆。　　但係衰在啲雞球竟然切得好鬼大舊，唔方便放入口之餘，仲要係一嘅味道都無。即使冰鮮雞都會有雪味，如果矇住眼放入口，實會估十世都估唔到食緊乜。除此之外，成碟雞球 Size 各異，但係質感就一致，都係韌到咬唔開。　　咁夜收工自己食飯已經唔開心，仲要慘到幫襯開嘅食肆大跌 Watt，真係離晒大譜黑到爆。　　就今餐而言，完全唔及格，仲搞到可見嘅將來都未必再有心情嚟食添。…Read More

　　寫呢篇食評之前，睇到前人嘅感受，嚇親，好彩呢晚無遇上之前嘅狀況。　　收工成十點鐘，個肚打晒鼓，有理無理即刻衝入去醫肚啦。　　估唔到咁夜都咁多人，八成枱有客。　　叫咗個燒肉叉燒飯，除咗本身肚餓，放乜入口都格外美味之外，呢一晚嘅燒味實在比平時出色。　　叉燒肥瘦適中，啱我口味嗰隻；另外嘅燒肉亦都係，唔會成舊都係肥糕，最估唔到係夜晚十點幾，啲燒肉嘅皮仲係脆卜卜！　　碟飯 HKD33.00；凍飲 HKD15.00，尖沙咀嘅地段，加上呢晚嘅食物質素，係抵食嘅一餐。…Read More

　　外母生日，去食齋。揀呢間嘅原因係每次行過都見到好多人等位，所以搵機會試一下。　　試完之後，非常失望。就我哋一家人而言，師父都好重手，重手唔係指個份量，而係每個餸都偏咸。　　賣相都唔係十分吸引，普普通通咁，而碟菜心就老咗啲，幾乎咬唔開，自己食咗一條已經無再食喇。　　唯獨最後出場嘅壽桃係最好食。好食嘅原因，好大程度係因為：(1) 包好難整得唔好食；(2) 喺唔飽肚嘅情況之下，同之前幾個餸比較，壽桃就即刻變咗係美食；(3) 我自己確實係鍾意食麵包，未食已經加咗主觀嘅分數。　　總括嚟講，我哋一家人唔會再試。…Read More

　　出差到觀塘工作，幸好午膳時間第一時間外出，否則都好難搵位。　　好彩十二點半就行到入去，遲五分鐘的話都要等位。一點三離開時候，等位嘅人條隊由二樓排到落地下。　　呢日好勇咁去鐵板餐，因為四年前開始，每次扒餐必然會胃痛，只係呢日抽起條筋想食而去冒險。　　好嘅係呢次竟然無事喎！　　講返呢一餐，叫咗個午餐推介，鐵板西冷牛扒。一分錢一分貨，都會預咗無晚餐咁好份量，不過估唔到係薄到好似 BBQ 嘅牛扒咁薄。Size 細咗一截。　　雖則如此，但係上枱時候鐵皮就真係夠晒火喉，掂到都唔知點算。而我要求七成熟都做到，可能因為塊扒薄，比較容易控制啩。　　整體上不過不失。…Read More

　　呢晚同埋阿媽食飯，所以可以叫多啲，試多啲款式。　　整體上，食物唔錯。總共叫咗：牛肉醬麵（配蛋黃）、意式三文魚薄片、日式肉醬披薩、雞肉菌菇麵、日式牛蒡沙律、醬燒八爪魚丸（伴芝士汁）。　　牛肉醬麵（配蛋黃）同雞肉菌菇麵兩個麵，味道好大路，同其他地方食到嘅差唔多，無話特別差，或者特別美味嘅地方。　　醬燒八爪魚丸（伴芝士汁）個 Size 我覺得幾大粒，如果女士要分多幾啖食，未必方便。感覺係食緊街頭嗰啲章魚小丸子嘅感覺。　　意式三文魚薄片，三文魚新鮮，但不致於好肥美。　　日式牛蒡沙律，個人覺得牛蒡嘅味道唔夾沙律。　　日式肉醬披薩，係特別推介，但就係呢晚試嘅菜最奇怪嘅一道菜。一咬落去，我感覺係將平時食到嘅焗肉醬意粉嘅肉醬，淋喺一塊薯片上面一齊食咁，而呢塊薯片有啲部份好脆，但有肉醬嘅地方就好「林」。　　今晚第二次嚟食，覺得無第一次咁好食。但整體係唔差嘅。閒日幫襯可以儲印花，呢個 Promotion 又有時間限制幾時要儲夠分，對我而言係無用同唔吸引。…Read More

　　好耐無食日本嘢，行開附近，所以夜晚呢度開餐。　　食物質素都唔錯，但係一行入鋪頭，店員嘅服務態度就令我開懷大餐嘅意慾減咗一半。　　同老婆兩個人，帶住一個拖喼，四大袋文件，再加上每人一個公事包，即使有卡位都要將我哋兩個位迫去坐 BAR 枱。坐得好辛苦。　　最唔滿意係佢同我講卡位係三至四位用。但係眼見當時八點半入座到九點半離開，店鋪只係約 70% 客人。而其他卡位嘅食客亦只係兩位，而我帶住咁多隨身物品竟然唔准我坐一個合適嘅位置，原因何在？　　如果係卡位係 Reserve 俾三至四位用，咁點解其他兩位嘅食客又可以坐？結果有兩張卡位係由我入座直到埋單都係無人坐。　　因為一開始店員嘅服務，已經令我對呢度光顧扣去超過一半嘅分數，即使食物如何美味都無補於事。　　總數 Order 咗十二碟唔同嘅食物，兩人埋單連加一係 HKD226.60…Read More

　　星期日下午四點，唔駛等位，坐同食都舒服啲，唔駛趕住趕住。　　魚湯幾好味，結果俾我飲晒。但可能有人會覺得腥。　　最好食係炸魚皮，因為脆得嚟唔會一咬落去就成口都係粉。…Read More