ChrisChan_DS's Profile

推薦程度：平平哋嘅漢堡唔係得老金嘅，其實呢啲小店嘅驚喜重大啦，大家鍾意漢堡嘅話，儘管去幫襯啦，屯門同灣仔都有分店！啲炸物全部即叫即炸，脆卜卜，熱辣辣！抵食程度：🍔🍔🍔🍔(4/5) 手工漢堡嚟講呢個價錢抵到爛，質素都係對得起個價！墨西哥脆辣雞堡🇲🇽🌶🐓🍔辣醬加埋墨西哥辣椒，有雙重刺激。加上新鮮熱辣炸起嘅雞扒（小心係熱到一啖咬落去啲雞油可以辣親嗰種），食起上嚟個醒神感係100% 。不過如果自問唔太食得辣嘅可能就未必享受到箇中滋味喇。四式芝士牛堡🧀🧀🧀🧀🐂🍔鍾意芝士嘅朋友真係行過唔好錯過！身為芝士愛好者，我不得不講，佢係令我為之滿意！有芝士有芝士醬，係滿足嘅感覺！黑松露蘑菇湯🍄🍲呢個係成餐飯嘅敗筆之處，雖然應該有嘅味都有，但成個湯好水，重要好細碗，就不禁有少少唔抵飲，要汽水好過嘅感覺咁。咸蛋黃雞翼🥚🕊蛋黃量好足，同埋佢係即叫即裹即炸。略略差啲咸味，不過唔會特別影響。薯條🍟、薯餅就唔特別寫，同雞翼一樣即炸起，調味適中。總括嚟講值得再幫襯，會想試吓其他包，湯就應該不了。去幫襯嘅手足記得帶濕紙巾抹手。…Read More

👍🏾推薦程度：餃子好食湯好飲，普通人嗌一碗淨餃應該都夠。特登搭車嚟食個水餃都值！不過小食麻麻地。大力推介粟米同芝士水餃，重有佢個花膠湯。💰抵食程度：🥟🥟🥟(3/5)餃子嚟講佢呢個價錢淨餃得8隻老實係有少少肉赤，不過食落口同飲埋湯就覺得都值回票價。但如果大食少少嘅，埋單可能都成百文一個人。首先講個餃子皮，好有咬口，唔會係一pat嘢咁，又唔會爛溶溶。再講佢個餡，夠味夠多夠實淨。到湯底，重花膠味，夠濃，又冇味精，飲咗兩碗都重想飲。豆漿就好似台灣早餐店嘅咁，如果再大杯啲就開心晒。幾款小食反而都麻麻，冇乜味。佢一叫就八隻，個人覺得普通男性食量嚟計就應該唔多夠。不過可以先叫八隻試咗先，再試其他味，或者大家各自叫完再分享。…Read More

👍🏾推薦程度：泰菜嚟講算係間高檔啲嘅，環境、價錢、食物質素、服務態度都係比起普通泰菜鋪有過之而無不及。成餐飯個感覺係好舒適嘅。推薦大蝦冬陰公同炭燒豬頸肉。💰抵食程度：🇹🇭🇹🇭🇹🇭🇹🇭（4/5）如果淨係想食個泰菜冇要求嘅，會覺得呢間少貴，不過如果有要求啲嘅就會覺得個價錢算係咁，中規中矩。鬧市中嘅一點靜，坐低喺個花園平台隔嚟嘅位，好唔似喺旺角，平時嘅喧嘩吵鬧完全入唔會傳到去餐廳。由坐低到點菜到上菜嘅速度都係幾令人滿意嘅，侍應亦都會主動斟水執枱同換食甜品嘅時候換餐具！嘢食方面今次嗌咗大蝦冬陰公、炭燒豬頸肉、冬陰公芝士海鮮老鼠粄、蒜蓉包、芒果糯米飯，同泰國奶茶幾樣嘢，以二人份量都算係幾足夠。味道上個人覺得幾兩極，即係一係好重味，一係冇乜味。大蝦冬陰公整得比較偏酸，同埋味道有少少模糊，香料味較淡，但個酸味勁得嚟幾醒神，鍾意甜啲或者香料味多啲嘅手足就可能會飲到揦埋口面喇。另外上面隻大蝦係正嘅，啖啖肉之餘個蝦膏一啲都唔腥。值得再叫，同埋個湯配埋蒜蓉包又係另一個講法！蒜蓉包嘅蒜蓉牛油落得幾重手，所以香氣同味道都好夠，而且個包超級軟身，唔係硬到會插親嗰種，相信配咖哩都一定相當出色。再嚟就係炭燒泰式豬頸肉，不得不提嘅係佢個椰糖芫茜辣汁，非常出色！同行嘅桃子小姐係完全非芫茜人士，但佢食呢個汁都係津津有味，所以各位走茜人仕都可以安心服用。啱燒出嚟嘅豬頸肉又香又脆邊，配埋個辣汁就好完美咁平衡哂各種味道。之後就到老鼠粄，唔知係本身個冬陰公湯太重味定佢呢個老鼠粄太淡味，食嗰陣淨係食到老鼠粄個粉嘅味道，冬陰公味好淡好淡，同芝士味係幾乎冇嘅。老鼠粄嚟講下次嚟就唔會再叫喇，留番個位畀其他嘢。壓軸嘅係食泰菜一定要食嘅芒果糯米飯。最為驚嘆嘅係面頭嘅椰子脆片！畫龍點睛就係佢！芒果夠甜，糯米飯適中，鹹甜鹹甜，簡直係行過都要買一個即食嘅程度！泰仔奶茶就正常會飲到嘅味，唔失望但亦冇驚喜。最後不得不講嘅係，佢真係好多花，擺盤都要嘅～…Read More

推薦程度：為咗個炒丁可以再去試多次其他嘢嘅，不過唔嗌雞扒。抵食程度：🍜🍜🍜(3/5)一般冰室價再平啲啲咁啦。喺佢臨收工截單前坐低咗，問個姐姐有咩推薦，佢問番我要輕量定食得飽。結果食得飽嘅推薦就係炒丁，雞扒同豬扒之間最後揀咗雞，可能就係咁揀錯咗！分開幾樣嘢嚟講，炒丁合格。炸雞就個皮夠脆，但雞本身冇味亦冇特別調味，嗒嚟嗒去都係得陣油味。奶茶就水咗啲啲。總括而言算係okay嘅，啲位都闊落，又唔會太嘈，下次會想試吓個咖喱撈丁！…Read More

👍🏾推薦程度：炸豬扒（排骨）同炸雲吞一定要嗌，配甜辣醬或者豆瓣醬都超正！！💰抵食程度：🍜🥟🍜🥟(4/5)兩個人去食，有麵、有小食、有嘢飲，人頭都係大概$50，食得飽個晏晝，可以。但淨係嗌一個炒麵嘅話，就唔抵喇。睇完「Kiki & May 隨意吃樂部」介紹，見喺港島就即刻拉埋桃子小姐去試。炸豬扒（排骨）嚟講師傅嘅心同力你係食得出嘅，而且食嘅同時你重會可以有聽覺上嘅享受，師傅會畀個beat你，因為我哋食緊嘅同時，佢已經揼緊之後嘅豬扒，呢個位係大加分！1️⃣馳名排骨麵🍖🍜($34)佢嘅排骨（雖然叫排骨，但佢係冇骨嘅，所以可以大啖咬唔驚咬爆牙！不過都建議細細啖食嘅，真係有骨都唔洗爆牙嘛！）首先係新鮮炸起，勁脆勁香口，再者佢個油份又偏低喎，食落罪惡感好低，啲肉汁係足以令你唔會覺得乾嘅。湯就偏清，不過蒜味好夠，同埋有蔥味咁，但好單調，可以話並冇為個豬扒加分！2️⃣排骨粗炒麵🍖🍝($45)一般嘅粗炒畀人嘅印象應該係油同鹹，但呢碟粗炒完全反轉，又唔油、又冇味，食落冇乜負擔。之但係如果落豆瓣醬又太鹹，搞到要淡茂茂咁食哂成碟，好彩有塊豬扒搭夠，唔係嘅話真係會變大嘥鬼。3️⃣酥炸雲吞🥟($16三隻)好好好好好好食！一定要嗌，真係好好食。同豬扒一樣，又係勁脆勁香口，個皮好似食緊酥皮蛋撻咁，最緊要唔會成口油！個餡好juicy，係可以令唔鍾意食炸雲吞嘅人愛上嘅程度嘅炸雲吞！4️⃣豆漿同凍奶茶🥤🥤($12一杯，跟麵半價)係好飲嘅新鮮豆漿同茶味夠又唔用澀嘅凍奶茶，唔特別著墨喺呢到喇。其實我覺得淨係叫個豬扒加炸雲吞配杯豆漿或者奶茶就夠，手足們唔好等，GOGOGO!…Read More

👍🏾推薦程度：行開行埋想食個雪糕消消暑嘅手足可以幫襯吓，不過唔計支持小店，淨係計雪糕同奶昔嘅話，以呢個價錢未必會想番去食第二次。💰抵食程度：🍦🍦(2/5)如果唔係佢有第二個item半價就真係唔抵食。1️⃣原味軟雪糕🍦($38)硬身少少嘅富乜雪糕車雪糕咁嘅味，面頭嘅玫瑰花碎並冇特別帶到香味出嚟，個筒係便利店阿波羅有膠蓋嗰個新地筒嘅淋度脆少少，咬到最底尖尖嗰舊直頭𡁻緊厚紙皮咁。2️⃣特濃曲奇奶昔🍪🧊🥛($29，第二件半價之後$15)特濃！曲奇！奶昔！一樣都冇！好啦其實曲奇係有嘅，見佢落嗰陣好似幾重手，不過飲嗰陣就又好似冇乜咁。跟著就係佢落冰去打，奶昔真係好忌有冰。如果抱著沙冰嘅期望叫嚟飲就平衡番啲嘅，不過如果要抱沙冰嘅期望，我都應該唔會嗌呢款。有可能我嗌唔中最signature嘅朱古力雪糕啦（賣哂！），如果下次有機會又未賣哂就再試吓啦！…Read More

👍🏾推薦程度：行開行埋想食個快嘅都可以嘅💰抵食程度：🍲🍜🍗🥬(4/5)大碗食得飽、有嘢飲、有小食，呢個價錢個人覺得可以，但如果平多啲啲就超正。雖然話圖片祇供參考，不過啲嘢食上到嚟同menu比嘅還原度都好高吓。1️⃣招牌溫泉蛋雞扒鮮茄湯通粉🍅🍲見佢係招牌所以都冇太考慮其他嘢就揀咗佢，個湯係偏酸嘅，鍾意甜蕃茄湯嘅手足食到就應該會皺眉頭嘅，不過個人幾偏好酸啲嘅蕃茄，所以覺得正，加上佢個湯飲落係冇乜負擔，又唔會油膩。通粉就反而冇乜味唔夠彈牙，咬落就好似玻璃心咁，會碎。雞扒嘅seasoning唔錯，個鹹味平衡番個湯嘅酸，令到個味道多元化咗，但因為係浸喺湯入面嘅關係，個雞皮逃唔出浸淋嘅命運。最後到隻蛋，作為溫泉蛋，佢係完全合格有餘。不過亦都係因為佢係溫泉蛋，反而令到成碗通粉失色，因為個蛋黃同啲湯並唔夾。如果係溏心滷蛋相信會夾啲，而且唔會一督就冇咗個黃。2️⃣酸菜魚片湯河（轉咗湯麵）🥬🐟🍜一食落口嗰吓令我諗起譚生嘅煳辣湯，配油麵都順口，個人覺得辣度唔高，係胡椒湯嗰種辛。不過根據桃子小姐口述，食食吓都幾辣。3️⃣炸單骨雞翼（孜然風味）🍗一食落口第一個感覺係肯乜雞脆香雞翼嘅皮，加埋麥乜奴嘅香辣雞翼嘅肉，就會變呢個單骨雞翼。喺呢個兩間都唔會再幫襯嘅情況之下，呢到就可以一隻單骨雞翼滿足哂你兩個口味。皮脆肉嫩，少少辣，可以encore！不過，食食吓發現一樣嘢，佢無論味覺上定嗅覺上都冇咗孜然，都可能係自己落單冇confirm到啦，但係冇影響嘅，誤打誤撞下食到呢個味又唔錯。4️⃣金華火腿奶油津白🥛🥬點解話實物圖片還原度高呢，就係因為呢個津白而發覺，寫緊呢篇食評嘅時候，睇番佢menu張相就發覺原來佢張相啲菜都係浸嘅。盅奶油津白上到嚟見到係奶油湯津白。味道尚可嘅，係菜可以再淋多少少，汁可以竭多多咁就正喇。5️⃣鮮果消脂蘋果果醋🧃利申自己本身極少飲果醋，好難分好飲與否，就飲品而言，佢畀我嘅感覺係飲一啖甜嘅果汁再飲一啖白醋咁，但聽桃子小姐講咁樣係正常？6️⃣香滑凍奶茶🧊🥛🍵出色！好飲！凍嘅都唔會淡，茶味夠出，順滑唔澀，正！順帶一提，default走塑走飲管，good！佢另外有限量賣甸佬DinLo嘅Caramel Pudding🍮，因為太飽，所以下回分解！…Read More

👍🏾推薦程度：台式嘢嚟講，唔錯食，不過最低消費嗰吓有少少令人卻步，食個tea飲杯嘢係叫得到低消門檻嘅，不過就會冇隨心嗌咁自由。💰抵食程度：💰💰💰（3/5）以純粹行過想食少少嘢就唔特別抵，但如果當食個飯嘅話，價錢算係咁。*有人排隊就會有用餐時間限定*人頭最低消費$75✔️小知識：「犇」讀奔。1️⃣🥭愛文芒果莎莎（限定）趁有機會快啲去飲！佢杯嘢上嘅時候睇落啲芒果係淺色，本身以為會酸，但食落超甜！！成杯嘢冇違和感，係飲到會brain freeze嘅程度，注意飲嘅時候唔好太快！2️⃣冷泡炭焙烏龍茶好飲嘅茶，唔係普通嘅茶。印象中我唔洗叫無糖，不過安全起見confirm一次，無糖可以飲到茶原味！3️⃣台式芋圓（凍）食親台灣嘢都會想食佢個糖水，食親台灣糖水都離唔開芋圓。呢碗芋圓重有黑糖珍珠同仙草，偏偏最好食嘅係珍珠同仙草。珍珠夠甜同夠咬口，仙草味都好出，反而芋圓唔夠彈口又冇乜芋頭味。4️⃣基隆廟口甜不辣鍾意炸嘢呢個好香口，調味得恰到好處，九層塔嘅香味同蒜嘅香味好夠，甜不辣嚟講冇得彈，係舊米糕有啲癡牙同冇乜味，不過佢唔係主角，影響好細。…Read More

推薦程度：鍾意疏乎厘奄列、疏乎厘pancake、疏乎厘乜乜物物嘅人快啲去食！ 抵食程度：🥞🥞🥞🥞🥞滿分！$88佢話就二人份，如果當飯後甜品嘅話四人分都夠！ 成日聽人講Muji甜品好正，終於託桃子小姐嘅福，有機會試試佢。 本身畀錢嗰陣見到個價錢都窒一窒，點知嚟到嗰陣勁大份，有cream brûlée嘅火炙糖面嘅疏乎厘奄列、朱古力醬、糖漿、同淡鮮忌廉。 一插落去嗰吓咔嚓嗰吓就知佢個糖面整得好好，脆得嚟唔會太多唔會太厚，啲糖入口即化，唔會造成有成塊糖喺口入面或者插損牙肉嘅情況。 個奄列本體嘅蛋味好出，如果唔係特別鍾意朱古力或都唔特別鍾意重甜嘅手足，就個人而言，就咁食嘅甜味係啱啱好。如果係想個甜味再低少少就可以加淡忌廉。 個人覺得朱古力醬並唔係特別夾，但個朱古力醬係非常之濃郁，所以相信鍾意朱古力嘅手足都會好滿意架啦喇。 糖漿部分就可能因為想呈現個奄列本體嘅蛋香，而用咗冇特別味道嘅糖漿。呢部分就見仁見智啦，其實如果用桂花蜜或者黑糖可能個組合又再多樣性啲喇。…Read More