van gogh's Profile

甚少寫食評，但呢間餐廳實在非常得，絕對入圍個人最喜愛餐廳之一！當日路過Airside, 午飯時間，遠遠見到呢間餐廳，在商場正中露天位置，可以好好享受秋日陽光，於是試試，幸運地攞到最後一張卡位，喜出望外。叫咗龍蝦意粉、蟹肉手捲麵、八爪魚、炸粟米，仲有西蘭花同薯條side dishes，樣樣都好好食！而且賣相一流，龍蝦意粉係一試難忘，side dish亦非常大份，成家人都讚。侍應服務亦一流，非常細心，餐牌介紹詳盡，唔駛舉手就自動幫你加水。而且餐廳環境非常舒服，由於半露天，就算多人亦不覺嘈吵，陽光之下一班人享受美食，實在賞心樂事。總括嚟講，絕對係大班人聚會或約幾個朋友靜靜傾計嘅首選。一定會再去。…Read More

餐廳地點樓高三層，因為油上了黃色漆油，好容易搵，遠遠睇到，有種歐洲小鎮氣氛。一間餐廳最重要係食物，坐低叫咗蕃茄牛肋肉闊條麵，仲有帶子香辣蒜油意粉，餐廳非常貼心，因為有小朋友唔食得辣，主動提出可以走辣。牛肋肉入味好食，帶子意粉帶子鮮甜，意粉亦整得好香，小朋友食得好開心。意猶未盡，加多一個牛油果sourdough, 呢個更加係意外驚喜，個sourdough 本身整得好好，麵包亦烘得香脆，對於我呢啲麵包控，一食就忍唔住再食，轉眼清晒。叫咗杯Americano，好飲喎，於是再encore一杯手沖咖啡，佢沖得好細心，坦白而家間間Cafe都做手沖，其實唔係間間都好飲，呢間質素係非常唔錯，有層次感，尾韻回甘，好啱我口味，原來老闆對水質等等都有嚴格要求，咖啡豆仲係每日新鮮嚟貨。總括餐廳食物同咖啡質素，俾佢外表更加驚艷，朋友食完大讚，非常愉快的一餐。…Read More

喺附近返工，午餐時間經過，睇餐牌好似幾吸引，第一次嚟食，於是叫咗個牛肋骨湯，佢話係跟埋飯嘅。等咗都有10分鐘，牛肋骨嚟到，真係嚇死你，咁大個煲，得一塊好薄嘅牛肉，同埋一舊骨。食過好多次韓國嘢，真係未試過咁嘅情況，即刻同餐廳反映，個阿姐話係咁㗎啦，我話咁都得，佢仲話呢個餸其實精華係個湯。即刻飲一啖湯，個湯其實同水一樣，完全冇味，嗰塊唯一嘅薄切牛肉，係咬極都咬唔爛嘅。大家可以望吓餐牌張相，佢完全違反商品說明條例。埋單$78。同區一定有更好嘅選擇，冇必要唔好入嚟。…Read More

之前幫襯過幾次，本來食物可以，環境舒適，但今次去，發覺已經加晒價，最離譜係杯十勝紅豆冰，竟然有一半係紅腰豆！叫做紅腰豆冰就差唔多！去的時候係下午4點幾，成間餐廳坐得兩枱客，叫個下午茶餐，食到一半個侍應想埋嚟收嘢，喂我未食完㗎，好彩即刻叫停佢。一個鐘後，侍應又走來叫我埋單，話用餐時間已過，我話成間餐廳都冇人喎？佢竟然答係疫情考慮。吓，每枱規定食一個鐘，自然轉枱轉得快，客人就更多，有咩事咁樣其實反而更易傳染！其實真正原因，係想轉多幾次枱賺多啲姐，做生意當然明白，但成間餐廳都冇人，咁樣趕客只會得罪客人，又唔見賺多咗。其實本來仲想叫個多外賣，咁情況即刻走啦。…Read More

星期六, 下午兩點幾到，成間嘢其實未滿，門口無人，等咗一陣，行入少少問話要兩位，即刻有個帶眼鏡肥女人侍應，粗聲粗氣叫我喺出面等，好啦終於入座，叫嘢食成10分鐘都冇人理，一味叫等等，隔離左右都有幾台食客等叫嘢食，終於有人理，又係個肥侍應，黑口黑臉，好似全世界得罪佢，問多幾句套餐包咩，又一臉唔耐煩咁。要了一個會安車頭河轉檬粉，落單時都提咗佢兩次，唔係河粉，來到竟然係河粉，叫佢轉返，又係黑口黑臉。服務差，咁食物好食都是但啦，但再等15分鐘，終於食到，一入口個湯已經淡而無味，牛腩咬唔爛，套餐跟碟菜仔，咁樣收98蚊，配上咁嘅服務，總結，呢間嘢真係永無下次。…Read More

好少寫食評，但係今次真係頂佢唔順，Boxing day 來東涌，陽光很好，好耐冇來呢度食飯，諗住緬懷下，點知食到一肚氣。首先呢度嘅侍應同經理，全部都黑口黑臉，講嘢粗聲粗氣，成間餐廳氣氛都好緊張咁，叫咗一個墨魚汁飯，一個Pizza , 個墨魚汁飯上桌，啲飯係一嚿嚿，好似剛係雪櫃攞出黎咁，依家我哋係咪食緊飯團？忍唔住同個經理講唔要，於是再叫一個雞肉闊條麵，嗰位阿姐仲話一定要等半個鐘，問我哋要唔要，我哋話要，就繼續食Pizza。點知等左大半個鐘，一直冇見過闊條麵，期間有幾次侍應過嚟加水，都整跌嘢，攞刀叉又成把刀飛落嚟，再問返個經理，個闊條麵點解咁耐，點知佢話原來佢唔記得落單！實在頂唔順，埋單走人，埋單時簽信用卡，又成支筆劃落我隻手度。冇服務冇食物質素，一定唔會再幫襯。…Read More