我係去開竺扶大班餐廳嘅常客，基本上每一至兩星期就會黎食一次，視乎餐廳繁忙時段，堂食同外賣都有食開。今日食完堂食係我食過最差嘅體驗，決定要寫食評同各位食客分享。以下係平時食開嘅D7叉燒燒鵝飯，$62。可見叉燒燒鵝有一定厚度，係竺扶大班平時正常發揮嘅半肥叉。平時食前都已經覺得好香，飯配肉汁真係好好味，唔鹹唔乾，普通男子都會食得飽同滿足。今日同家人三個人12點到餐廳，大概係繁忙時段嘅開始，等了5分鐘左右就可以入座。以下呢個係今日嘅D7叉燒燒鵝飯。落單後5分鐘之後就上碟。賣相/份量：有四塊叉燒同五塊燒鵝同一條菜心。上碟時我以為自己眼花，叉燒好薄，薄得離譜，唔講以為自己叫左鵝片飯咁薄。五塊燒鵝只有骨同鵝皮，只有中間有兩塊有啲肉。味道：叉燒唔硬但又薄又乾，實在食唔出平時有炭燒嘅味道，亦聞唔出平時熟悉嘅香味。五塊燒鵝入面兩塊有啲肉嘅燒鵝只是合格水平，剩餘三塊只得骨頭。白飯亦都配咗好少汁，唔夠平時咁熱。飲品叫左杯凍檸茶，正常普通。除左D7叉燒燒鵝飯，媽媽亦都叫左一個五寶飯$88，包括有叉燒、燒鵝、燒腩仔，同埋紅腸鹹蛋。忘記影相，但可惜叉燒燒鵝一樣薄，燒腩仔好肥，紅腸一般，鹹蛋份量一樣少。同員工作出即時反映，一個肥妹職員都同意今日嘅叉燒同燒鵝都好薄，但佢唔肯更換我哋嘅飯，話今日唔同師傅唔同切法，下次落單時要要求厚切。我同家人都呆左，只好無奈地開始食飯，食左兩塊薄叉燒先忘記未影相，就影左以上呢張相。可能係份量少，只用咗十分鐘左右好快就食完個飯。飲品仲剩成杯未飲，有個短白髮婆婆嘅員工同我哋講而家係繁忙時段，已經請示想我哋離開。雖然我哋都知餐廳開始變得多人，但我哋10分鐘食得快而又咁快俾員工請示，實在食得好唔滿足。三人埋單連飲品$233。身為長年竺扶大班嘅食客，見到1)食物份量減少，2)質素下降，3)員工態度變差，實在覺得失望，今次食得唔開心、唔滿足同埋唔飽滿。我估可能係有新師傅入職唔同切法，可能係繁忙時段嘅原因，但這些都唔係食物份量同質素變少變差嘅藉口。如果食物質素繼續唔一致嘅話實在好可惜，短期間內我都暫時唔會想去住了。…Read More
